Read kirikeni Kịẹnḅịpị Ma 23 Bible Online

Kịẹnḅịpị Ma 23 - kirikeni bible

Kịẹnḅịpị Ma 23

¹Belam ḅe nwọse Belak ḅe ḅẹmẹ, “Sọnọma agbamịẹ ẹbẹ mịanga nwọ pike ị̀ pịrị, pịkị sọnọma owoi-nambulo na sọnọma ajirima na nwọse ḅo ị̀ pịrị.”

²Belak ḅe Belam ḅe se ọ̀ ḅẹ ọkụ anị ọ̀ pịkị mịẹ ọkụ-ẹ se ori na Belam ḅe na gbọrị owoi-nambulo na gbọrị ajirima na se gbọrịwu gbọrịwu se agbamịẹmẹ agbamịẹ-ẹbẹ ma ọgọnọ.

³Anị Belam ḅe nwọse Belak ḅe ḅẹye-ẹ, “Mịanga ị́ya dọkịma-agba mị anga ḅụ chịẹsime, ye à mun ḍiki nwọfa Nyanaḅọ Ḅe ori ị̀rị̀ na ịrịaḅịa na ịrịa-ẹka na. Ò se ḅelema ị̀ ḍieaye goyegoye à ḍuko ị́ pịrịḅịa.” Anị ori ngẹrị gbọrị chịngị ọgọnọju mun ye-ẹ,

⁴se Tamụnọ Ḅe ḅo Belam ḅe na ịrịamẹ. Belam ḅe nwọse Tamụnọ ḅẹmẹ, “Sọnọma agbamịẹ-ẹbẹ ma à pikesam, à pịkị anịa ọgọnọ gbọrị nambulo na gbọrị ajirima na nwọse gbọrịye gbọrịye ọgọnọ agbamịẹsam.”

⁵Nyanaḅọ Ḅe Belam ḅe ḍukoḅịaye mị, nwọ ḍuko ọ̀ pịrị se ò seni pịkịna Belak ḅe fịrịmamẹ ò mun oria oku mị ḍuko ọ̀ pịrị.

⁶Anị ò vinpịkị so Belak ḅe damamun se ọrịmẹ na ọ̀ pa oria dọkịma agba mị angaḅụ chịẹsime waraḅẹ bebe Moab tịḅịnị mamgba na ori na.

⁷Belam ḅe mị ịkịan mị koromẹ: “Belak Moab amanyanaḅọ ị̀ se ḅosam Siria ḅụ, ịrụapakapaka nyọ mị ḅụ tụndụma sime anga ḅụ. ‘Ḅo ị̀ tịḅị gose ọkwẹịn,’ ọ̀ nwọ ḅẹmẹ. ‘Worinime se Izrẹl-a tomonima pịrị.’

⁸Nde Tamụnọ Ḅe worinime se pịrịka apụ, à worinime nwọse pịrịḅịa ọkụ, Anịkanịka fa ḅẹrẹ ḍukoḅịa ọkụ Nyanaḅọ Ḅe ma ọkọ ḅẹka sịkị?

⁹Gololo ḍụparịma ọgọnọ à sime ini ọrịaḅẹ; Chịngị ma ọgọnọ à sime ini ḍikiaḅẹ. Ini anị jịn sẹ na gbolomaka ngẹrị sime apụ-ẹ; Ini nemimẹ na ini ḅẹlẹma nyanatẹịn jịn-a sẹma nẹngịmẹ.

¹⁰Izrẹl furo ḅie apụma fọn sime ọkụ anị ini sime ọkụ-ẹ— Ini ḅaka la-ọkụ mị kịẹnḅịa ọkụ ofori-ẹ. Ye ị̀ya enema ḅe kuluma Tamụnọ-a tomonima kuluma kịkẹ; Ye à karakaraḅọ ḅarase deinma ḅụ fị.”

¹¹Anị Belak ḅe nwọse Belam ḅe ḅẹye-ẹ, “Mịn cheye ị́ nwọse ị̀ mịẹ? Ị̀rị̀ ị́ chịn mịanga ḅomẹ na worinime se ị̀rị̀na-tarakapụ ma pịrị, ọkụma ị́ mịẹye goyegoye ị́ ini ḅẹlẹmamẹ.”

¹²Ọ̀ nwọse ọ́ pẹkẹrẹmẹ, “Nyanaḅọ Ḅe se ị̀ ḅẹye mị kẹngẹ anị àrị ineda ḍukoḅịaye-ẹ.”

¹³Anị Belak ḅe nwọse Belam ḅe ḅẹye-ẹ, “Ḅo ị̀rị̀ na jịn anga mun anị ị́ ineda Izrẹlapụma ḅụ kalapụ kẹngẹ ọrịḅịa nyọ. Anịanga ḅụ worinime se ini pịrị ị̀ pịrị.”

¹⁴Ori ó se mun Zofim ele mị ḅie Pisga Tụndụ mị ọgọnọju lamẹ. Anịanga sọnị sọnọma agbamịẹ ẹbẹ ọ̀ nwọ pikemẹ pịkị gbọrị owoi-nambulo na gbọrị ajirima na se arịa ọgọnọ gbọrịye gbọrịye se agbamịẹmẹ.

¹⁵Belam ḅe nwọse Belak ḅe ḅẹmẹ, “Mịanga ị́ya dọkịma agba mị anga ḅụ chịẹsime, à mun anịanga Tamụnọ Ḅe na ịrịaḅịa.”

¹⁶Nyanaḅọ Ḅe Belam ḅe na ịrịa se ò ḍukoḅịaye mị ḍuko ọ̀ pịrịmẹ se ó seni Belak ḅe fịrịmamẹ, oria oku mị nwọ ḍuko ọ̀ pịrịḅịa ẹrẹchị.

¹⁷Anị ò vinpịkị Belak ḅe damamun se ọrịmẹ na ọ́ pa oria dọkịma-agba mị angaḅụ chịẹsime waraḅẹ, Moab tịḅịnịma na ori na. Belak ḅe Nyanaḅọ Ḅe ḍukoye mị nwọ gbelamẹ,

¹⁸anị Belam ḅe mị ịkịan mị koroye-ẹ: “Ḅo, Belak Zipọ ya, Se à ḍukoḅịaye mị poki.

¹⁹Tamụnọ Ḅe na tomoni na gbọrị ḅarakẹ, anị iruoapụ ma; Ori tomoniḅọkẹ se ò kuḅie ḍinma. Ò ḅereniye goyegoye, ọ̀ mịẹmịẹmẹ. Ori ọkwẹịnmẹ, anị pịkị mịẹmẹ.

²⁰Ḍiki, kụrọ ị̀ ḅara lasam na à ḅẹlẹma se ini pịrị. Tamụnọ Ḅe ḅẹlẹma se pịrịsaye, àrị ineda chịn pịkị ẹkẹ.

²¹Àrị ọrịsam na Izrẹl mị tọrọkọju anị Sifụḅara nyana-ẹkẹ, ḅụḅalaḅala pịkị sime anị pịrị-ẹkẹ. Nyanaḅọ inia Tamụnọ Ḅe ori ini na omi-ẹ; Ini ḍukopakụmamẹ na Ori anị inia amanyanaḅọ ḅe-ẹ.

²²Tamụnọ Ḅe Ijipt mị ḅie ini ọkị pakụmaḅosam; Piri ḅie owoi nambulo owusọ ọkụ ọ̀ nwọse owusọ ini pịrịpịrịmẹ.

²³Seni Izrẹl sẹ mị na ọmụgbinḅịa, oru-kụrọ anịkanịka ḍiri-kụrọ ngịsị ofori-ẹ. Mịọkụ tomoni Izrẹl ḅụ ḅẹḅịa, ‘Tamụnọ Ḅe mịẹye ḍiki!’

²⁴Izrẹl sẹ mị opu kụrọ chịrịḅa sime ọkụ simemẹ; Anị ịnyọ sarasarakẹ anị kanị se chịẹmamịnịka sime ogbo, Anị ḅaasapụ ma oju pulo mị nwọ ḅuka sime ogbo.”

²⁵Anị Belak ḅe nwọse Belam ḅẹ ḅẹye-ẹ, “Izrẹlapụma ị́ worinime se ini pịrị ḍụkụka sịkị, pa ḅarị ḅẹlẹma seni ini pịrịma!”

²⁶Belam ḅe nwọse ọ̀ pẹkẹrẹmẹ, “À ḍuko ị́ pịrịka na Nyanaḅọ Ḅe ḍuko ị̀ pịrịye goyegoye anị à mịẹḅịa nwọ ḅẹye mịẹ?”

²⁷Belak ḅe nwọse Belam ḅe ḅẹmẹ, “Ị̀ ḍukoḅo, àrị ị́ se jịn anga munḅịa sosi Tamụnọ Ḅe ò ḅereni ị́ pịrị se ị́ anịanga ḅụ worinime se ini pịrị ị̀ pịrịḅịa.”

²⁸Anị Belak ḅe Belam ḅe ọkị Piọ Tụndụ mị ọgọnọju mun ye-ẹ tọrụ se onwun ele mị danyọ ḅụ.

²⁹Belam ḅe nwọse Belak ḅe ḅẹmẹ. “Mịanga sọnọma agbamịẹ ẹbẹ pike ị̀ pịrị, pịkị sọnọma owoi nambulo na sọnọma ajirima na nwọse ḅo ị̀ pịrị.”

³⁰Belak ḅe ò se ọ̀ ḅẹ ọkụ anị ọ̀ pịkị mịẹ ọkụ-ẹ, se gbọrị owoi-nambulo na gbọrị ajirima na ọ̀ nwọse agbamịẹ ẹbẹ ma ọgọnọ gbọrịye gbọrịye se agbamịẹmẹ.