Read kirikeni Kịẹnḅịpị Ma 27 Bible Online

Kịẹnḅịpị Ma 27 - kirikeni bible

Kịẹnḅịpị Ma 27

¹Mala ma na, Noa ma na, Hogla ma na, Milka ma na, pịkị Tiza ma na anị Zẹlofẹhad ḅe oria eremeni awọ ma-ẹ, anị Hifa yaḅe, anị Giledị yaḅe, anị Meka yaḅe, anị Manasẹ yaḅe, anị Josẹf yaḅe.

²Ini mun Moziz ḅe na Ẹleaza agbamịẹḅọ ḅe na, tịḅịnịma na, pịkị bebe sẹ mị mgba na tọrọkọ chịẹmẹ Nyanaḅọ Ḅe pakaḅoḅo Ikowarị mị ḅọkọ ḅụ se nwọ ḅẹmẹ,

³“Mịna ḍa ḅe piri ele mị ḅie ḅụ owutọkụ nyanaka ḅara ḅụ ọ̀ fịmẹ. Ori inia ḅie ofori-ẹ, anị Kora ḅe ḅụ sọ ininachịn Nyanaḅọ Ḅe pịrịapụ ma; oria si gose anị ọ̀ fịye-ẹ.

⁴Ori owutọkụ nyanakaye gose, mịna ḍa ḅe ẹrẹ mị faḅẹ Izrẹl mị ḅieḅụ? Mịna ḍa ḅe oria mịnapụma ḅieḅụ ó ḍiekiriye se wa pịrị.”

⁵Moziz ḅe inia ḅẹrẹ mị seni Nyanaḅọ Ḅe ḍiemẹ,

⁶se Nyanaḅọ Ḅe nwọse ọ̀ ḅẹmẹ,

⁷“Zẹlofẹhad eremeni awọma ḅiye mị karakaramẹ inia ḍa ḅe oria mịnapụma ḅieḅụ ḍiekiriye seni ini pịrị. Ye ọ̀ lalama ḍiekiriye mị sime ini pịrị.

⁸Ḍuko Izrẹlapụma pịrị na tomoniḅọ nemikase owutọkụ nyanaka ḅaraḅụ sime se fịmẹ ḅẹḅẹ, oria eremeni tọkụ ma oria ngọma ḍie ọkị.

⁹Ò nemikase eremeni tọkụ nyanakẹ ḅẹḅẹ, oria owuapụ mịnapụma oria ngọ ḍie ọkịḅịa.

¹⁰Ò nemikase owuapụ mịnapụ nyanakẹ ḅẹḅẹ, ḍawu owuapụ mịnapụma anị ḍie ọkịḅịa.

¹¹Ò nemikase owuapụ mịnapụ anịkanịka ḍawu na gbọrị-nyengi, gbọrị-ḍa mịnapụ nyanakẹ ḅẹḅẹ, ori na furo mị ḅie kpekitẹịn pakụmaḅọ anị ḍie ọkịḅịa oriaye ḅaraḅụ. Izrẹlapụma ini mị oloko mị kokoḅịa mịẹkamịẹka ḅaraḅụ, anị Ị̀rị̀, Nyanaḅọ Ḅe, tọnse ị́ pịrịye ḅaraḅụ.”

¹²Nyanaḅọ Ḅe nwọse Moziz ḅe ḅẹmẹ, “Iwo Abaịrim Tụndụ ma ọgọnọ mun se à seni Izrẹlapụma pịrịarị ama mị ḍikikelema.

¹³Ị́ anị ọrịsosa ḅẹḅẹ, ị́ fịḅịa, anị ị́ mbire Erọn ḅe fị ọkụ mị,

¹⁴anịatịḅị ómine mamapụ ma, ómine ị̀ ḅịpịkanmẹ Zin piri ele mị ḅieḅụ. Bebe sẹ mị Mẹriba ḅụ ị̀ seni mbụrụmbụrụ sịkị, ómine ị̀ya osiḅụ sime kụrọ mị ḍiepakụma ḍụkụkẹ.” (Mẹriba mị anị Kedẹsh ideri mengi mị-ẹ Zin piri ele mị ḅie).

¹⁵Moziz ḅe tẹkẹḅụ nwọ ḅẹmẹ,

¹⁶“Yei Nyanaḅọ Tamụnọ, ḍumo mamgba ḅe chuku sakịḅọ, àrị ị́ tẹkẹmẹ sisi, gbọrịḅọ tọn anị ineda tọrọkọda tomonima pịrịḅịaḅọ

¹⁷pịkị ineda ọmụ ḅie tịḅịdaḅịaḅọ mịẹse ị́ya tomonima ḍikiḍikiḅọ-ofori anana ogbo kịkẹ-ẹka ḅara.”

¹⁸Nyanaḅọ Ḅe nwọse Moziz be ḅẹmẹ, “Nọn ya Jọsụwa ḅe ọkị, se ị́ ḅarama seni ọ̀ tịḅị ọgọnọ gbana, ori anị jokoma owutọkụ-ẹ.

¹⁹Ò se ḅo Ẹleaza agbamịẹḅọ ḅe na bebe sẹ mị mgba na tọrọkọ chịẹma, se inimgba tọrụkuḅu ḅụ ḍukopakụma na ori anị ị́ tịḅịḍinmaḅọ ḅe-ẹ.

²⁰Ị́ya kụrọ ma ḅụ daye seni ọ̀ pịrị, mịẹse bebe Izrẹl sẹ mị mgba ọ̀ ḅịpịpokiḅịa ọkụ.

²¹Ori Ẹleaza agbamịẹḅọ ḅe ḅụ sẹrẹrẹḅịa, anị Karakaraye ḍọkị ekpe sụkaye Ụrịm mị na pịkị Tụmịm mị na ḅụ à tọn ayema ḍawọḅụ. Mịn ḅara mị ḅụ Ẹleaza ḅe ọ̀ Jọsụwa ḅe na bebe Izrẹl sẹ mị na datekeremaḅịa inia mịẹmịẹaye mamgba ḅụ.”

²²Nyanaḅọ Ḅe ọ̀ tọn Moziz ḅe pịrị ọkụ mị, anị ọ̀ pịkị mịẹ ọkụ mị-ẹ. Ori Ẹleaza agbamịẹḅọ ḅe na pịkị bebe Izrẹl sẹ mị tọrọkọ ḅụ Jọsụwa ḅe ọkịḅo chịẹmamẹ.

²³Nyanaḅọ Ḅe ọ̀ tọnsa ḅaraḅụ Moziz ḅe ori ọ̀ ḅarama se Jọsụwa ḅe tịḅị gbana se ḍukopakụmamẹ na ori anị ọ̀ tịḅịḍinmaḅọ ḅe-ẹ.