Read kirikeni Kịẹnḅịpị Ma 35 Bible Online

Kịẹnḅịpị Ma 35 - kirikeni bible

Kịẹnḅịpị Ma 35

¹Moab ḅele sẹrẹrẹ ele mị ḅie Jọdan mị ḅụ saḅamanga ḅụ, Jẹriko mị ḅụ ḅoarị ọkụma, Nyanaḅọ Ḅe nwọse Moziz ḅe ḅẹmẹ,

²“Ḍuko Izrẹlapụma pịrị na ini ḍiaọkị ngọma ḅụ Livaị apụma angaḅịa da opuama na, àrị kelema nama fịfị osuein kiri na ini nwọse ini pịrị.

³Mịna opuamama àrị sime Livaị apụma pịrịḅịa, anịju ini pịkị angaḅịa. Nama fịfị osuein kiri mị sime inia nambuloma na pịkị inia jịn-a nama na pịrịḅịa.

⁴Nama fịfị osuein kiri mị opuama mị onu ma ọḅụju sakị mun kuḅu-a ẹndẹ na sọnọasi fịnjị laḅịa anga-anga ḅụ,

⁵anịa finji na nangwọ na gbasịḅịa, tọn kelema ọkụma anị laḅịaye, kuḅu mẹndẹ oyiasi fịnjị gbọrị pẹkẹrẹ gbọrị pẹkẹrẹ ḅụ, opuama mị anịa ogboku ḅụ simeḅịa.

⁶Sime ḅọịḅịa sonio opuama ị́ nwọse Livaịapụ ma pịrịḅịa anị nemikase tomoniḅọ bẹkẹma nweniḅaa ọkụma nụḅọ ineda mangị mun ḅọịḅịa anga. Opuama ma ḅụ mesi maịn fịnjị ị́ nwọse chụa ini pịrịḅịa

⁷pịkị arịa nama fịfị osuein kirima na, arịmgba kịẹn gboloma ọkụma anị maịnfa mesi oyifịnjị-ẹ.

⁸Livaị apụ opuamama gbọrị sẹ gbọrị sẹ ḅie la-ọkụ anị anịa eke mị pịkị kịẹnma finjima laḅịa ọkụ-ẹ. Ḍụḅa sẹma pịkị ḍụḅa ye se ini pịrị, kala sẹma pịkị kala ye se ini pịrị.”

⁹Nyanaḅọ Ḅe nwọse Moziz ḅe ḅẹmẹ,

¹⁰ḍuko Izrẹlapụma pịrị: “Ọ́ Jọdan Tọrụ mị saḅa se mun Kenan ama mị ḅie sọsa ḅẹḅẹ,

¹¹tomoniḅọ nemikase bẹkẹma nweniḅaa ọkụma nụḅọ ineda mangị mun tịḅịḅọịḅịa opuamama ọ́ nwọ sẹlẹ sikimaḅịa.

¹²Anịju ḅụ ori ò ḍumo ḍụaḅọrọmaḅịa fịḅọ ḅe mịnaḅọ ḅe sowu ḅiḅịa ḅọ ḅẹ ḅụ. Ini nweni ḅaa ḅẹrẹ se pụnụma gbọrịḅọ sọnị ini ḅaama ini ḅelema ḅẹrẹkọn nụḅọ pịrịka simeogbo.

¹³Sonio opuama ọ́ nwọ sẹlẹ sikima,

¹⁴Jọdan mị ḅụ ịrụapakapaka nyọ daọrụ ḅụ tẹrẹ pịkị Kenan ama mị ḅie tẹrẹ.

¹⁵Àrị sime tịḅịḅọịḅịa opuama sọ seni Izrẹlapụma na pịkị igoniapụ na pịrịḅịa, anị igoni ḅara se arịa ḅie anga anịkanịka jokoma arịa ḅie anga apụma. Bẹkẹma nweniḅaaḅọ goyegoye ineda mangị arịaḅụ gbọrị ama munḅịa.

¹⁶“Nemikase, tomoniḅọ ikulele anịkanịka ḍụparị anịkanịka imgbele nwọse nweniḅaa mẹ ḅẹḅẹ, ninikọn ḅẹrẹḅarasi sime ọ̀ pịrịmẹ anịẹrẹchị ini ọ̀ ḅaaḅịa.

¹⁹Fịḅọ ḅe na kpekitẹịn mịnaḅọ ḅe anị niniḅọ ḅe ḅaaḅịaye-ẹ. Ori ori ọrịsa ḅẹḅẹ, ori ọ̀ ḅaaḅịa.

²⁰“Nemikase tomoniḅọ nweniḅọ ḍikiḅieḅu se nụḅọ ḅaamẹ ḅẹḅẹ, anị ḅọrọ sumagbin ḅụ, anịkanịka ye seni ò gbin ḅụ

²¹anịkanịka ịkpụlụ se ọ̀ ḅakụ ḅụ, ninikọn ḅẹrẹḅarasi sime ọ̀ pịrịmẹ, anịẹrẹchị ini ọ̀ ḅaaḅịa. Fịḅọ ḅe na kpekitẹịn mịnaḅọ ḅe anị niniḅọ ḅe ḅaaḅịaye-ẹ, ori ori ọrịsa ḅẹḅẹ.

²²“Ọkụma nemikase tomoniḅọ bẹkẹma nweniḅọ ḅaamẹ nụḅọ ḍikiḅieḅuka ḅaraḅụ, anịḅọrọ suma gbin ḅụ, anịkanịka ye seni ò gbin ḅụ.

²³Anịkanịka nemikase tomoniḅọ nyọ ḍikika ḅaraḅụ ḍụparị se gbin seni anị mun nweniḅọ ḅaamẹ nwọḅẹ ọkụma, anị ngịsị ò ye seni lama ḍọkịka pịkị ori na ḅẹrẹ nyanakaḅọ.

²⁴Ọkọ sime-a ḅẹrẹ ma sẹ mị ḅẹrẹkọn fịḅọ ḅe ḅaa ḅọ ḅe ḅara iḅimaḅịa fịḅọ be mịnaḅọ sowu mị ḅiarịḅọ ḅe kẹ.

²⁵Sẹ mị nweniḅaa ḅẹrẹsi mị sime pịrịḅọ ḅe ḍụaḅịa, fịḅọ ḅe mịnaḅọ ḅara ḅie, ini pịkị ò seni vinpịkị ọ̀ mangị mun tịḅịḅọị ama mị munḅịa. Ori anị ama mị ḅie sime nweni anị sịkị Gele Agbamịẹḅọ ḅe fị ḅọrọ sịkị laḅịa.

²⁶Nemikase nweniḅaa-ḅẹrẹsi mị sime pịrịḅọ ḅe ọ̀ mangị mun tịḅịḅọị opuama mị ḅie pakasomẹ

²⁷se nemikase fịḅọ ḅe mịnaḅọ ḅe ori ọrị seni ọ̀ ḅaamẹ ḅẹḅẹ, mị sowu ḅi ḅara mị ninikẹ.

²⁸Ninikọn ḅẹrẹ sime pịrịḅọ ḅe ò mun tịḅịḅọị opuama mị ḅie mị ò sime nweni Gele Agbamịẹḅọ ḅe fị sịkị laḅịaye-ẹ, ọkụma anịsịkị ḅọrọsa ḅẹḅẹ ori ineda vinpịkịso oria ama munḅịa.

²⁹Ma olokoma sime ómine na ọ́mịna furoḅie apụma na pịrịmẹ ómine anga nyọ layelaye ḅụ.

³⁰“Ini ninikọn ḅẹrẹ seni tịḅịsẹịnḅọ goyegoye ini ineda ḅẹrẹ ḅarasi kọn nụḅọ pịrị se nụḅọ ḅaaḅịa, anị mamapụ anịkanịka anị ḅara nẹngịmapụ ḅo onyechịẹ sịkịre-ẹ, ngẹrịḅọ ḅe chịẹ onye mị anị ninikọn ḅẹrẹ mị mịẹ kụrọmakẹ.

³¹Niniḅọ ḅe ini ọ̀ ḅaaḅịa. Ori ineda mị fomuḅara mị ḅụ pọkọso-ẹkẹ igbiki se ọ̀ tịḅị pẹkẹrẹ ḅụ.

³²Nemikase tomoniḅọ mangị somun opuama mị ḅie tịḅịḅọị mẹ ḅẹḅẹ, ó ḅerenima ori igbiki gbẹịn se vinpịkịso ama ḅo, Gele Agbamịẹḅọ ḅe ma fịka simeogbo.

³³Ó nemikase ọkọ simeye mịẹmẹ ḅẹḅẹ ómine angarị ama mị ọ́ nwọ pụlamaḅịa. Ninikọn mị anị ama pụlama pụlamamẹ, anịsịkị ini niniḅọ ḅe ḅaaka simeogbo, seni ama mị sịkịrị fịafịamaḅịaye ngịsị ofori-ẹ; anị ini nweniḅọ ḅaa amakiri mị.

³⁴Ómine anga amakiri mị ómine anị pụlamama, anịatịḅị ị̀rị̀ anị Nyanaḅọ Ḅe-ẹ, Izrẹlapụma ḅie à pịkị angamẹ.”