Read kirikeni Kịẹnḅịpị Ma 36 Bible Online

Kịẹnḅịpị Ma 36 - kirikeni bible

Kịẹnḅịpị Ma 36

¹Giledị, Meka yaḅe anị oria opu ḍaḅọ Manasẹ, Josẹf yaḅe na sẹ mị ḅie sime furoma tịḅịnịma na, so Moziz ḅe na pịkị ísí-a tịḅịnịma na ḍọkịmamunmẹ.

²Se nwọse ini ḅẹmẹ, “Nyanaḅọ Ḅe tọn ọ́ pịrịmẹ na ómine ama mị ḍie Izrẹlapụma pịrị ịkịan wakị ḅụ. Ọ̀ pịkị tọn ọ́ pịrịmẹ na mịna mịnaḅọ, Zẹlofẹhad ḅe nyanaye ma ó se oria eremeni awọma pịrị.

³Ọkụma ó se ḅiekoroma na, ini nemikase jịn sẹ ḅie owuapụ sime ọkụma, iniaye ma sime anị sẹ mị pịrịḅịa, anị sime wa pịrị ḍiekiri mị iderimaḅịa.

⁴Ye Saḅama nyanaḅọ pịrị kụra mị ḅie ini dẹrịsaye mamgba nwọ saḅama se nyanapụ ma pịrịḅịa sịkị, anị Zẹlofẹhad ḅe oria eremeni awọma iniaye ma sime ini se chụa ini owuapụ sime sẹ mị nwọ pịrịḅịa, anị faye sọ mịna furo pịrịsam.”

⁵Moziz ḅe Nyanaḅọ Ḅe ḅịpịḅụ ḅo ma olokoma daḅọrọma Izrẹlapụma pịrịmẹ. Ọ̀ nwọ ḅẹmẹ, “Manasẹ sẹ apụma ḍukoye mị karakaramẹ,

⁶anịẹrẹchị Nyanaḅọ Ḅe nwọ ḅẹmẹ na Zẹlofẹhad eremeni awọma, ini ineda inia ḅụḅẹlẹ owuḅọ simeḅịa, ọkụma inia sẹ ḅie kẹngẹ-ẹ.

⁷Izrẹlḅọ ngọ goyegoye anị oria sẹ ḅie oḅolo simeḅịa.

⁸Izrẹl mị ḅie ḍaḅọ ḅụ ḅo ngọ nyana eremeniḅọ goyegoye pịkị anị sẹ mị ḅie owuḅọ na simeḅịa. Mịn ḅara ḅụ Izrẹlapụ mamgba inia opu ḍapụma ḅe ngọma nyanaḅịa,

⁹se ngọ pịkị gbọrị sẹ ḅie somun jịn sẹ ḅie sọẹkẹ. Sẹ goyegoye anịa ngọ nwọ nyana ma munḅịa.”

¹⁰Anịẹrẹchị Mala, Tiza, Hogla, Milka, pịkị Noa ma na anị Zẹlofẹhad eremeni awọma, Nyanaḅọ Ḅe tọn Moziz ḅe pịrị ọkụ mị nwọ mịẹmẹ, se inia ḍaḅe mịnapụ owuapụma na simemẹ.

¹²Josẹf ya Manasẹ ḅe sẹ mị ḅie furoma ḅie mị ini owuapụ simeye-ẹ, se inia ngọma pịkị inia ḍaḅe sẹ mị ḅie simemẹ.

¹³Nyanaḅọ Ḅe Moziz ḅe ḅụ ḅọrọ ma olokoma chụa se Izrẹlapụma pịrịmẹ, Moab ḅele kiri mị ḅie, Jọdan Tọrụ mị ḅe saḅamanga ḅụ wẹrị Jẹriko mị ḅụ ḅoarị ọkụma.