Read kirikeni Kịẹnḅịpị Ma 6 Bible Online

Kịẹnḅịpị Ma 6 - kirikeni bible

Kịẹnḅịpị Ma 6

¹Nyanaḅọ Ḅe tọn Moziz ḅe pịrịmẹ

²ma olokoma chụa se Izrẹlapụma pịrị. Anị ḅọrọ owuḅọ anịkanịka eremeniḅọ sọ na nụḅọ sosikima ye ḅereni se sime Tamụnọ Ḅe pịrị ḅụ se osiḅụ wẹrị fịafịama Nyanaḅọ Ḅe pịrịḅịa apụma mgba

³ere iru na tọrụḅaa iru na nwọ ḅu-eke. Tụmgbakị elelenda se mịẹ iru ini ḅuma pịkị tụmgbakị elelenda se mịẹ fịaye na, anị, samịna ye anịkanịka ịwọye sọnị.

⁴Nụḅọ nwọ sime Nyanaḅọ Ḅe pịrị ene mamgba ḅu tụmgbakị elelenda se mịẹ fịye fị ẹkẹ, mgbọlụ mị anịkanịka anịa apụra mị sọnị.

⁵Ọ̀ nwọ osiḅụ sime Nyanaḅọ Ḅe pịrịḅịa ene mamgba ḅụ, ọ̀ tịḅị-inime má ọ̀ kịrị-ẹkẹ anịkanịka sẹịn-ẹkẹ. Anị mịẹkamịẹka ḅara nwọ sime ọ̀ pịrịmẹ, ò ḅereni yemị mịẹ ḅeinma osiḅụ sime Nyanaḅọ Ḅe pịrịḅịa. Ọ̀ pịkị ọ̀ tịḅị-inime ma na ọ̀ ḅapuko ọgụrẹ ma sọnị wẹrịso se àrị sẹnịḅịa.

⁶Ọ̀ tịḅị-inime ma anị ḍiepakụmaḅịaye na ori osiḅụ sime Tamụnọ Ḅe pịrịmẹ, anịẹrẹchị ori ọ̀ ḅụ pụlama-ẹkẹ, anị ḅụ seni fịsa ḅọ na kpekimaḅụ, anị ḅọrọ ḍawu-o, anịkanịka nyọngọrọ-o, oria owuapụ mịnaḅọ anịkanịka oria eremeni mịnaḅọ sọnị.

⁸Nụḅọ nwọ osiḅụ simeḅịa nwọḅẹ sịkị goyegoye nụḅọ mịna ḅụ mịẹfịafịama Nyanaḅọ Ḅe pịrịḅịa.

⁹Nemikase ḅụ se osiḅụ wẹrị fịafịama Nyanaḅọ Ḅe pịrịḅọ tịḅị inime pụlamẹ ḅẹḅẹ, anị ọ̀ gbọtụma ḅụ se bẹkẹma fịḅọ kpekima ẹrẹchị, sọnọma ḍin ọ̀ nwọse koruḅịa anịsịkị ori ọ̀ tịḅị inime ma na ọ̀ ḅapuko ọgụrẹ ma na sẹịnsinḅịa, se ò ḅo mịẹmịẹye ḅaraḅụ fịafịaḅịa.

¹⁰Nine-a ḍin karama ene mị ḅụ mama okuku anịkanịka mama elesika nụḅọ nwọ ọkị ḅo se Nyanaḅọ Ḅe pakaḅoḅo Ikowarị mị ḅọkọ mun agbamịẹḅọ ḅe pịrịḅịa.

¹¹Agbamịẹḅọ ḅe gbọrị wu seni si agba nwọ mịẹḅịa anịsịkị ísí wu ḅe seni dọkịma-agba nwọ mịẹḅịa, se ọ̀ ḅụ mịẹfịafịama gose, anịatịḅị ori ọ̀ ḅụ se fịḅọ lamamẹ. Anị gbọrị ene ḅụ ọ̀ pịkị kpoto ọ̀ tịḅị-inime ma se osiḅụ wẹrịḅịa,

¹²se pịkị ọ̀ ḅụ seni kpoto osiḅụ koroma Nyanaḅọ Ḅe pịrị enema kịẹn ḅịa. Ḅọrọsa sịkị mị ḅarị kịẹnḅịpị ḅụ ofori-ẹ, anịatịḅị ò se-osiḅụ wẹrị tịḅị-inime ma àrị pụlamẹ. Se pẹkẹrẹ pakụmaḅo agba mịẹḅịa gose gbọrị kụra lasa anana-tọkụ ọ̀ nwọ ọkịḅoḅịa ò ḅereniye mị sịkị ḅo karasa ḅẹḅẹ.

¹³Ḅụ se osiḅụ wẹrị fịafịama Nyanaḅọ Ḅe pịrịḅọ ḅe, ò ḅereniye mị sịkị ḅo karasa ḅẹḅẹ, ọ̀ mị Tamụnọ anga mịẹmịẹye mị mịẹḅịa. Ò so Ikowarị mị ḅọkọ munḅịa,

¹⁴se ngịsị ḅẹḅẹ yeḅụoforika tẹrẹ-a nama ọ̀ nwọse Nyanaḅọ Ḅe pịrịḅịa: se dọkịma-agba mịẹḅịa gbọrị kụra lasa ajirima na, pịkị se si agba mịẹḅịa gbọrị kụra lasa ịrọrọ anana na se agbamịẹḅịa, pịkị gbọrị kụra lasa ajirima ḅe na se gboloma agba mịẹḅịa.

¹⁵Ini fịturu sumaye se chụaka fịturu kana ọ̀ nwọse agba mị mịẹ ḅịa; ịnyọ nyana okpokpo ini oliv na fịlawa na se gwa ye pịkị ini oliv pulo se tan gbam mịnị mịnị ịkịka na, se pịkị chụa ḅụ mịẹ na gbẹịn ḅaraḅụ fịayemgbọlụ na ere-iru agba mị na.

¹⁶Agbamịẹḅọ ḅe ọ̀ ma yemamgba se Nyanaḅọ Ḅe tọrụkuḅu munḅịa, anịsịkị àrị se si-agba na dọkịma agba na mịẹḅịa.

¹⁷Ori ayamburama anana ḅe na fịturu kana mị na se gboloma agba mịẹ Nyanaḅọ Ḅe pịrịḅịa; ọ̀ pịkịna fịayemgbọlụ na ere-iru agba mị na mịẹḅịa.

¹⁸Ikowarị mị ḅe ḅọkọ mị ḅụ se osiḅụ wẹrị fịafịama Nyanaḅọ Ḅe pịrịsa ḅọ ḅe sime se ọ̀ tịḅị inime ma sẹịnsin se àrị seni gboloma agba mị ḅe fịnị mị ḅie chụa dọkịmaḅịa.

¹⁹Anịsịkị, ayamburama anana ḅe tọrọkọ ḅụọ eleke mị ḅịa sa ḅẹḅẹ, agbamịẹḅọ ḅe ori anị ọkị se kana mị pakaḅo gbọrị ịnyọnyana fịturu na gbọrị gbam mịnị mịnị ịkịka na ḅụ chụa se, anị se ḅụ se osiḅụ wẹrị Nyanaḅọ Ḅe pịrịsa ḅọḅe ḅara ḅie chụa ḅịa.

²⁰Anịeso, agbamịẹḅọ ḅe ori àrị se sosikima ḍiepịrịaye mịẹ Nyanaḅọ Ḅe pịrịḅịa, ajirima ḅe ekpe na ḅụọma na se chụa àrị osiḅụ sime agbamịẹḅọ ḅe pịrịmẹ nwọḅẹsọ. Anịḅọrọ sịkị, ḅụ se osiḅụ wẹrị fịafịama Nyanaḅọ Ḅe pịrịsaḅọ ḅe ineda ere-iru mị ḅuḅịa.

²¹Ma yema anị sime ḅụ se osiḅụ wẹrị fịafịama Nyanaḅọ Ḅe pịrịsaḅọ ḅe pịrị oloko ma-ẹ; ọkụma ḅụ se osiḅụ wẹrị fịafịama Nyanaḅọ Ḅe pịrịsaḅọ ḅe nemikase ye ḅereni ori ineda pịrị na gbẹịn ọkụ nẹngịma mẹ ḅẹḅẹ; ò ḅereni ye mị mịẹkamịẹka ḅaraḅụ ori anị gbẹịnḅịa.

²²Nyanaḅọ Ḅe nwọse Moziz ḅe ḅẹmẹ,

²³ḍuko Erọn ḅe na oria owuapụ awọma na pịrị na ini tẹkẹ ḅụ Izrẹlapụma ḅẹlẹmaḅịa sịkị ini ma ọkwẹịnma kọn:

²⁴Ye Nyanaḅọ Ḅe ọ́ ḅẹlẹma se ó koko;

²⁵Ye Nyanaḅọ Ḅe iḅi se ọ́ mịẹ pịkị ó ḍikiḅụgerere;

²⁶Ye Nyanaḅọ Ḅe iḅi tọrụ se ó ḍiki se deinma seni ọ́ pịrị.

²⁷Nyanaḅọ Ḅe pịkị nwọ ḅẹmẹ; “Nemikase ini ị̀ya ẹrẹ ḅụ ḅẹlẹma karị Izrẹlapụma ọgọnọ gbanamẹ ḅẹḅẹ, àrị ini ḅẹlẹmaḅịa.”