Read kirikeni Kịẹnḅịpị Ma 8 Bible Online

Kịẹnḅịpị Ma 8 - kirikeni bible

Kịẹnḅịpị Ma 8

¹Nyanaḅọ Ḅe nwọse Moziz ḅe ḅẹmẹ,

²“Ḍuko Erọn ḅe pịrị na ọ̀ sọnọma tọnjie ma se tọnjie gbanama yemị ọgọnọ gbanaḅịa sịkị, mịẹse enekuḅu mị ḅịa mun nụngọ ḅọkọ saraḅịa ọkụ ọ̀ nwọse anị koroma,”

³Erọn ḅe ḅịpịpoki ḅụ tọnjie ma tọrụ se nụngọ ḅọkọ da koromamẹ tọnjie gbanama yema ọgọnọ.

⁴Tọnjie gbanama yemị ḅụ ọgọnọju ngwengwe maḅụ ọkịmun chuku la ini ḅakụ sa goli seni anịaḅụ oḅolomẹ, Nyanaḅọ Ḅe se Moziz ḅe ḍie ḅaraḅụ.

⁵Nyanaḅọ Ḅe nwọse Moziz Ḅe ḅẹmẹ,

⁶“Livaị apụma ḅie ísí Izrẹlapụma sikima koroma, se ini mịẹfịafịama

⁷mị ị́ se anị mịẹḅịa ọkụ-ẹ: ḅụ-mịẹ-fịafịama-mengị mị se ini sana, se ini inia oju inime mamgba sẹịnsin, pịkị inia ḅịtẹma mgba sịkịrị. Anịsịkị re mị ini fịafịaḅịaye-ẹ.

⁸Anịsịkị ini gbọrị ayamburama owoi nambulo na fịayemgbọlụ agbamịẹ fịlawa mị se oliv pulo mị na gwa yemị na nwọ ọkịḅịa; anịsịkị ị́ pịkị jịn ayamburama owoi nambulo nwọ ọkịḅịa anị ị́ se si dekisin agbamịẹḅịa wuḅe-ẹ.

⁹Bebe Izrẹl sẹ mị mgba nwọ chịn koḅirima anịsịkị Livaị apụma à pakaḅoḅo Ikowarị mị tọrọkọ ḅụ chịẹ sime.

¹⁰Izrẹlapụma ḅara se Livaị apụma tịḅị gbanaḅịa,

¹¹anịsịkị Erọn ḅe Livaị apụma seni osiḅụ wẹrị ị̀ pịrịḅịa anị Izrẹlapụma sosikima se ḍie ị̀ pịrịye ḅaraḅụ, mịẹse ini ị̀ya fịrị nwọ nwẹngịḅịa ọkụ.

¹²Livaị apụma anịsịkị inia ḅarama seni mama owoi nambuloma ọgọnọ gbanaḅịa; gbọrị wu ini nwọse si dekisin agba nwọ mịẹḅịa se ísí wu ḅẹ seni dọkịma agba nwọ mịẹḅịa, se ḅụ mịẹfịafịama mịẹmịẹye mị mịẹ Livaị apụma pịrịḅịa ọkụ.

¹³“Livaị apụma se osiḅụ wẹrị ị̀ pịrị se sosikima ḍie ị̀ pịrịye ḅaraḅụ, se Erọn ḅe na oria owuapụ awọma na nwọse inia tịḅịnị mịẹ.

¹⁴Mịn ị́ se Livaị apụma sikima koromaḅịa ọkụ-ẹ, kirikọn Izrẹlapụma ḅụ, mịẹse ini sime ị̀ pịrịḅịa ọkụ.

¹⁵Livaị apụma ị́ nwọ mịẹfịafịama pịkị ini se osiḅụ wẹrị sosa ḅẹḅẹ, ini ineda sọmun Ikowarị mị ḅie fịrịnwẹngịḅịa.

¹⁶Àrị ini se Izrẹlapụma tatarị yi owuapụ awọ mamgba tọrụḍinma ọkịsam; ini pịkị sime ị̀rị̀ kẹngẹ nwọ pịrịmẹ.

¹⁷Ijipt mị ḅie tatarị yi awọ mamgba à nwọ ḅaa sịkị, Izrẹlapụma furo ḅụ tatarị yi owutọkụ goyegoye à nwọse osiḅụ wẹrị se ị̀ ḅụ pịrịmẹ, pịkị nama ḅụ tatarị yi wu layelaye sọnị.

¹⁸Mịọkụ Livaị apụma à nwọ ọkị seni Izrẹlapụma tatarị yi apụ mamgba kiriḍinma aḅẹ.

¹⁹À pịkị Livaị apụma tọn se Erọn ḅe na oria owuapụ awọma na pịrịsam, Izrẹlapụma se ḍie ị̀ pịrịapụ ḅaraḅụ, Ikowarị mị ḅie fịrịnwẹngị Izrẹlapụma pịrị na Izrẹl awọma ḍikiḍiki na, mịẹse ini ḅụse opuma Osiḅụ Sime Nyọ mị kpekima ẹka ḅara, ini ḅofa anị ḅụ ḅọrọ fị.”

²⁰Anịẹrẹchị Moziz ḅe na, Erọn ḅe na pịkị Izrẹlapụ mamgba na Livaị apụma se osiḅụ wẹrịmẹ, Nyanaḅọ Ḅe tọnse Moziz ḅe pịrị ḅaraḅụ.

²¹Livaị apụma iniaḅụ mịẹfịafịamamẹ pịkị inia ḅịtẹma sịkịrịmẹ, se Erọn ḅẹ ini se osiḅụ wẹrịmẹ, ini se sosikima ḍie Nyanaḅọ Ḅe pịrị ḅaraḅụ. Ọ̀ pịkị ḅụmịẹfịafịama mịẹmịẹye mị mịẹ ini pịrịmẹ, Livaị apụma gboloma yeḅụ.

²²Nyanaḅọ Ḅe tọnse Moziz ḅe pịrị yelayelaye Livaị apụma gboloma ye ḅụ, tomonima ini mịẹmẹ. Anịẹrẹchị Livaị apụma ini ineda Erọn ḅe na oria owuapụ awọma na chuku ḅie sime Ikowarị mị ḅie fịrịnwẹngịḅịa.

²³Nyanaḅọ Ḅe nwọse Moziz ḅe ḅẹmẹ,

²⁴“Sisọnọ-a kụra fịnjị lasaḅọ ḅụ sakị Livaị ḅọ goyegoye à pakaḅoḅo Ikowarị mị ḅie ọ̀ lalama fịrị nwọ nwẹngịḅịa,

²⁵ò ḅo kụra mesi-oyi fịnjị lasa ḅẹḅẹ ọ̀ ḅarị fịrịnwẹngị-ẹkẹ.

²⁶Anị ḅọrọso sịkị, ọ̀ papa ḅarachụa ò juo Livaị apụma pịrịḅịa ini Ikowarị mị ḅie inia fịrịma nwẹngịḅịa sịkị, ọkụma ọ̀ ḅarị ori ngẹrị ḅarase fịrịnwẹngịma. Mị ị́ se Livaị apụma fịrịma ḍie kelemaḅịa ọkụ-ẹ.”