Read kirikeni Kịẹnḅịpị Ma 9 Bible Online

Kịẹnḅịpị Ma 9 - kirikeni bible

Kịẹnḅịpị Ma 9

¹Nyanaḅọ Ḅe ọkwẹịn Moziz ḅe pịrịmẹ, Saịnaị Piri Ele mị ḅie, anị Izrẹlapụma Ijipt mị koromaso maịn karama kụra mị ḅie tatarị akalụ mị ḅie. Ọ̀ nwọ ḅẹmẹ,

²“Mịn akalụ mị ḅie oyi-inein-a ḍin fịnjị karama ene mị ḅụ, ịrụa mị bin sịkị ḅụ sakị, Izrẹlapụma Saḅaḅọrọ Alalị mị fịḅịa anịa olokoma na mịẹmịẹayema na sime ḅaraḅụ.”

⁴Anị Moziz ḅe ḍuko ini pịrịye-ẹ na ini Saḅaḅọrọ Alalị mị fị,

⁵se tatarị akalụ mị ḅie oyi-inein-a ḍin fịnjị karama ene mị ḅụ saso ḅiri ḅụ ini alalị mị fịmẹ Saịnaị Piri Ele mị ḅie ḅụ. Nyanaḅọ Ḅe tọnse Moziz ḅe pịrị ọkụ mị, anị ini pịkị mịẹ ọkụ-ẹ.

⁶Ọkụma dapụ iniaḅụ pụlamamẹ anịatịḅị ini ḅara se ḍụẹịn lamamẹ, anịẹrẹchị ini ineda anị ene mị ḅụ Saḅaḅọrọ Alalị mị fịkẹ. Ini so Moziz ḅe na Erọn ḅe na damamunmẹ

⁷se nwọ ḅẹmẹ. “Wa pụlasam anịatịḅị wa ḅara se ḍụẹịn lamamẹ, ọkụma nde wa gose mịna Izrẹlapụma na sọ gboloma agbamịẹ Nyanaḅọ Ḅe pịrị-ẹka ye?”

⁸Moziz Ḅe pẹkẹrẹ se nwọ ḅẹmẹ, “Ó koru se Nyanaḅọ Ḅe pịrịḅịa datekerema à nwọ nyanaḅo sịkị la.”

⁹Nyanaḅọ Ḅe nwọse Moziz ḅe ḅẹmẹ,

¹⁰ḍuko Izrẹlapụma pịrị, Ọ́mịna ḅụ gbọrịḅọ anịkanịka ọ́mịna furo ḅe apụ ḅụ ḅara se ḍụẹịn lamaye gose pụlasa ḅọ goyegoye anịkanịka ḅọlọ anga mun mẹ, ọkụma ḅimẹ na nụḅọ Saḅaḅọrọ Alalị mị fị nwọ ḅẹḅẹ,

¹¹à kụrọ se ọ́ pịrịmẹ na ó gbọrị akalụ ḅọrọma se anị mịẹ, maịn karama akalụ mị ḅie oyi-inein-a ḍin fịnjị karama ene mị ḅụ saso ḅiri ḅụ. Suka fịturu na akụ ịnyanya na ọ́ nwọse alalị mị fị.

¹²Fịye mị ngịsị ó ḅerenima ye anịaḅụ kọn mun eneḅa, pịkị namama ḅe imgbe ma ḅụ gbọrịye sọnị anyịma. Saḅaḅọrọ Alalị mị anịa oloko mamgba sime ọkụ ọ́ nwọse anị fị.

¹³Ọkụma nụḅọ pụlakẹ pịkị ḅọlọ anga ḅụ ofori-ẹ, se Saḅaḅọrọ Alalị mị fị ḅika ḅọ goyegoye, ị̀ya tomonima ogboku àrị nụḅọ kịẹnsinḅịa, anịatịḅị tọn koroma sịkị mị ḅụ ị̀ya agba mị ó ḅo mịẹ ị̀ pịrịkẹ. Ọ́mịna si mị ḅe fomuḅara ọ́ nwọ daḅịa gbarịmaka ḅaraḅụ.

¹⁴“Nemikase ọ́mịna ogboku anga igoniḅọ Saḅaḅọrọ Alalị mị fị ḅimẹ ḅẹḅẹ, ori anị gbọrị olokoma na mịẹmịẹayema na nwọ mịẹḅịa. Ḅẹḅọ ḅẹḅọ anị gbọrị oloko mị nwọ kokoḅịa, anị ḅọrọ furo tọkụ-ẹ anịkanịka igoniḅọ-ẹ nwọḅẹ sọnị.”

¹⁵Ini Nyanaḅọ Ḅe pakaḅoḅo Ikowarị mị pike chịẹma ene mị ḅụ, soḅuno ḅo anị gbẹịnmẹ. Ḍin ḅụ soḅuno mị fịnị sime ọkụ simemẹ

¹⁷Soḅuno mị iwo sịkị iwo sịkị, Izrẹlapụma sọnị ini sime-a nyọma ḅụ ini ḅụọpọkọsam, se soḅuno mị mun koroḅo dachịẹ nyọ layelaye, anịanga mị Izrẹlapụma pịkị inia koḅirima warịma pike chịẹmaḅịaye-ẹ.

¹⁸Nyanaḅọ Ḅe tọnse tomonima pịrị sịkị inia koḅirima warịma ini kansinmẹ, ọ̀ pịkị tọn sịkị ini àrị pike chịẹmamẹ. Soḅuno mị Ikowarị mị ọgọnọju sime mun lasịkị lasịkị, anị ini pịkị pike sime mun laḅịa ọkụ-ẹ, anị gbọrị koḅirima warị mị ḅie ḅụ.

¹⁹Soḅuno mị Ikowarị mị ọgọnọju sime mun ḅọlọ sịkị la sọnị, ini Nyanaḅọ Ḅe ḅịpịpoki se ḅụọpọkọka ḅụ simemẹ.

²⁰Tọn-a sịkị soḅuno mị ḍin kalaye mị anị se Ikowarị mị ọgọnọju simeye-ẹ, anị mịẹọkụ mịẹọkụ sọnị, inia Ikowarị ḅie sime na ḅụọpọkọ na Nyanaḅọ Ḅe tọn ḅara kẹngẹ-ẹ.

²¹Tọn-a sịkị soḅuno mị saso ḅiri ọkịḅo eneḅa dede kẹngẹ mị anị sime laye-ẹ, se soḅuno mị iwo kirikiri ini sakị ḅụọpọkọmẹ. Soḅuno mị iwo sịkị layelaye ini anị ḍukomẹ.

²²Anị ḅọrọ mama ḍin sọ, gbọrị akalụ sọ, gbọrị kụra sọ, anị anị ḅara nẹngị sọ, soḅuno mị Ikowarị mị ọgọnọju sime mun lasịkị lasịkị sọnị, ini ḅụọpọkọkẹ; ọkụma anị iwosa ḅẹḅẹ, ini ḅụọpọkọmẹ.

²³Nyanaḅọ Ḅe tọnse Moziz ḅe pịrị ḅaraḅụ mịn ini wẹrị ḅịpịpoki ḅụ Ikowarị mị pike chịẹma pịkị anị kansinye-ẹ.