Read kirikeni Maịka 4 Bible Online

Maịka 4 - kirikeni bible

Maịka 4

¹Ḅoḅịa enema ḅie Oputẹkẹwarị mị chịẹ tụndụ mị anị ḅo arịmgba ḅụ opusọtẹịn ye sọḅịaye-ẹ, anị opusọtẹịn ísía tụndụ mamgba nẹngịḅịa. Se sẹ mamgba soso anịa ḅie munḅịa.

²Anịsịkị sẹ ma ḅe tomonima nwọ ḅẹḅịa, “Ó ye wa Nyanaḅọ Ḅe chịngị tanjị, Izrẹl Tamụnọ Ḅe Oputẹkẹwarị mị. Anịatịḅị ori anị wa mịẹḅịaye se wa ḍieḅịaye-ẹ; ọ̀ sẹlẹ pakụmaḅo ateli ma ḅie anị wa nwẹngịḅịaye-ẹ. Anịatịḅị Nyanaḅọ Ḅe oria ḍieye mị Jerusalẹm anị ḅomẹ; Zaịyọn ḅie ọ̀ wẹrị ọkwẹịn oria tomonima pịrịmẹ.”

³Ọ̀ ḅẹrẹ fama sẹsẹ ma pịrịḅịa, ḅọlọ nyọma na kpeki nyọma na ḅụ sime kụrọ-a sẹma. Ini inia kongo ma se kiri sokuḅịa pịkị inia sụḅa ma se nyọ pẹlẹ agiji mịẹḅịa. Sẹ ma ḅarị jenejene owu sọẹkẹ, àrị ḅarị jenejene ḅụkarakarama owu pịrị-ẹkẹ.

⁴Nweni mamgba deinma ḅụ angaḅịa nụḅọ irumịẹ chịnmgbọlụ ozuma ḅie na figi chịnma ḅie na, se gbọrịḅọ sọ ḅarị inia ḅalafama-ẹkẹ. Kụrọmamgba Nyanaḅọ Ḅe mịn mị ò ḅerenisam.

⁵Sẹsẹ mịna oru tẹkẹ pịkị anịa ḅịpị pokimẹ, ọkụma mine wa Nyanaḅọ mịna Tamụnọ Ḅe, anị wa tẹkẹ pịkị ọ̀ ḅịpị poki mun ḅene-ḅene laḅịaye-ẹ.

⁶Nyanaḅọ Ḅe nwọ ḅẹmẹ, “Sịkị mị ḅoaḅẹ,” “à fomuḅara se pịrị apụma à nwọ koḅiriḅịa sịkị, anị ini desin ḅụ tọrụsiọrịapụ ma.

⁷Ini ikelisam, ini pịkị inia sẹ ḅụ sasamẹ, ọkụma à kọn apụma na ịwọ ḅara se sakịḅịa, se ini ḅo opu sẹ sọḅịa. Zaịyọn Tụndụ ọgọnọ ḅụ à sakị ini ḍikiḍiki ọkị tọrọkọ mun ḅene-ḅene laḅịa.”

⁸Se ị́rị́ Jerusalẹm, anị Tamụnọ Ḅe anana ḍikiḍikiḅọ ḅara se oria gele nyọ mị ḅụ oria tomonima ḍikiḍikiarị nyọ mị, ḅo pịkị gbọrị sịkị se sẹma ḅụ tịḅịnị opuama sọḅịa, anị tatarị ómine ma nyana sẹ mị.

⁹Cheye gose ómine opuma owu pakụma-o? Cheye gose ó yi-jike-arịḅọ tọrụsiọrị ọkụ se tọrụsiọrị-o? Anị ómine amanyanaḅọ nyanakaye ẹrẹchị mụnọ? Ọ́mịna ye tetemapụ mamgba fịsaye ẹrẹchị mụnọ?

¹⁰Ḅụ akụ ḅụ ọ́ sụnụnụ-fangalakpe pịkị ḅiede, Jerusalẹm-a tomoni, yi àrị eremeniḅọ ḅara, anịatịḅị mịọkụ ómine opuama mị wẹrịso se mun finji sẹ ḅie angaḅịa. Ó so Babilọn munḅịa, ọkụma anịanga anị Nyanaḅọ Ḅe ori ọ́ ḍụaḅịaye-ẹ ómine-na-tarakapụma ḅara ḅie.

¹¹Tọn-a sẹ gboloma ḅo ọ́ gbẹịnmachịẹsam. Ini nwọ ḅẹmẹ, “Jerusalẹm mị anị kan nyanamẹ! Wa ọrịḅịa mị opuama mị ḅo sara sọ!”

¹²Ọkụma mà sẹma, Nyanaḅọ Ḅe kuḅie simeye ini nemikẹ. Ini kaịnḅokẹ na ini ḅo koḅiria-gbolomasam, ḅo fomuḅara daḅịa anị tomoni fịayemgbọlụ koḅiri se anị ḅaa dẹkịdẹkịma ḅara mị.

¹³Nyanaḅọ Ḅe nwọ ḅẹmẹ, “Jerusalẹm-a tomoni, ó mun fomuḅara se ómine-na-tarakapụma pịrị! Àrị ọ́ mịẹḅịa ómine ikulele-ịvalị-na-alapẹlẹka-ḅụọ-nyana nambulo kụrọ ọkụ kụrọ ḅịa! Ọ́ tọn-a sẹ kankọsịmaḅịa se ini kụrọḅarase-nyana ngọma ọkịḅo ị̀ pịrịḅịa, bebe sẹkiri mị Nyanaḅọ Ḅe.”