Read kirikeni Maịka 6 Bible Online

Maịka 6 - kirikeni bible

Maịka 6

¹Nyanaḅọ Ḅe nyana Izrẹl pịrị ḅẹrẹ mị poki. Sịsẹ, Yei Nyanaḅọ, se ị́ya ḅẹrẹ mị ḍuko; ye tụndụma na chịngịma na ị́ya ḅẹrẹ mị naa.

²Ómine tụndụma, ómine simegbamaso chukusẹkẹye tomonikiri mị ḅụ, ọ́ Nyanaḅọ Ḅe ḅẹrẹ mị poki! Nyanaḅọ Ḅe, ọ̀ ḅẹrẹ nyana oria tomonima pịrịmẹ. Ọ̀ ḅẹrẹ se Izrẹl tịḅị ọgọnọ gbana-ẹ mun aḅẹ.

³Nyanaḅọ Ḅe nwọ ḅẹmẹ, “Ị̀ya tomoni, cheye à nwọse ọ́ mịẹsa? Nde àrị ikuye sọ ọ́ pịrị ọkụ? Ómine ị̀ pẹkẹrẹ.

⁴Ị̀rị̀ Ijipt ḅie ómine ọkị pakụmaḅomẹ; àrị omoni ḅara ḅie ọ́ ḍụaḅọrọmamẹ; ị̀rị̀ Moziz ḅe na Erọn ḅe na, Miriam ma na fịrịmamẹ ini tọrọkọda ómine ḅọrọma.

⁵Ị̀ya tomoni, ó se ḅiekoroma, Belak, Moab amanyanaḅọ ḅe, tọn se se ọ́ mịẹ ḍọkịye mị, se Belam, Beọ tọkụ ḅe, se ọ̀ pẹkẹrẹ ḅara mị na. Ó se ḅiekoroma ateli ḅụ pakaye ma, Akasia ḅụ ó sime ịnyọ sara se ó so Gilgalị mun-arị sịkị. Ọ́ mayema se ḅiekoroma, se ọ́ pịkị ọrịḅoḅịa àrị ọ́ ḍụaḅọrọma ḅịa ẹrẹchị à mịẹaye ma.”

⁶Cheye à nwọ ọkị Nyanaḅọ Ḅe damamunḅe, soḅie Tamụnọ Ḅe, à mun ọ̀ tẹkẹḅịa sịkị? Àrị iḅitẹịn kala nambuloma ọkịḅo dọkịma agba mịẹ ọ̀ pịrịḅịa mọnọ?

⁷Nyanaḅọ Ḅe, anị ò ḅieḅẹlẹma-ẹka à nemikase ineda kịẹnḅịa ọkụ oforika anana anịkanịka ineda tọnḅịa ọkụ oforika oliv-pulo nwọse agbamịẹ ọ̀ pịrị ọkụma. Àrị ị̀ya sima gose ị̀ya tatarị tọkụ se ọ̀ gbẹịnḅịa mọnọ?

⁸Ẹn-ẹn, Nyanaḅọ Ḅe ò ḍuko wa pịrịsam iḅiye mị. Mịna ḅara ò ḅi arịye mị anị-ẹ: Karakaraye mịẹ, sịkịmamgba ḅẹlẹma ḍiepakụma, pịkị ḅụ-iderima mịna Tamụnọ Ḅe pịrị wa ori na nwẹngịgbolomarị sịkị ḅụ.

⁹Nemi anịa ḅie omi-ẹ Nyanaḅọ Ḅe ḍikiḅalafa mị. Ori opuama mị chịn aḅẹ, “Ó poki ómine opuama mị ḅie koḅiriapụ ma!

¹⁰Sitịḅịnyanapụ warịma ḅie ini furuḅo ngọ ḅeinmẹ. Karakaraka nyọtọnye ma mị ini se yedẹrịarịye-ẹ anị à ḍikiḅụjịjịye mị.

¹¹Nde à ḅarasin nwọ inia juo tomoni inuma arịapụ ma pịrịḅịa ọkụ?

¹²Ọ́mịna ḅie ngọ nyanapụ ma ini igwein apụma tọlọfịmẹ, ómine mgba pịkị iruo apụ-ẹ.

¹³Anịḅụ à sakị ọ́ mịẹ kọsịma pịkị ó simasam, ọ́mịna sima gose.

¹⁴Ó yefịḅịa ọkụma ọ́ pụkọtan ẹkẹ—fịye pa jokoma ọ́ tarịḅịa. Ó yedekisinḅịa, ọkụma ómine ineda àrị koko-ẹkẹ; ó kokoye layelaye, owu ḅie à àrị kọsịmaḅịa.

¹⁵Ọ́ fịayemgbọlụ ḍipiḅịa, ọkụma ómine ineda àrị soku-ẹkẹ. Oliv ḅie ómine ineda pulo pọnjị pakụmaḅịa, ọkụma ó se fịrịḅụ chuẹkẹ. Ómine iru mịẹḅịa, ọkụma ómine anị ḅu-ẹkẹ.

¹⁶Mịn pakaḅịaye-ẹ anịatịḅị ọ́mịna amanyanaḅọ Omraị ḅe na oria tọkụ, amanyanaḅọ Ehab ḅe na siamịẹmịẹaye ma ọ́ nwọ ḍikima mịẹmẹ. Ọ́ pa inia olokoma ḍukoye mịẹ-aḅẹ, anịẹrẹchị àrị ọ́mịna sẹ mị famaḅịa, se nwenimgba pịkị ó ḍikisimaḅịa. Nyọnyọma ḅie simeapụ mamgba ini ó ḍiki-iderimaḅịa.”