Read kirikeni Nehọm 2 Bible Online

Nehọm 2 - kirikeni bible

Nehọm 2

¹Ninivẹ, ini owu se ị́ pakasam! Kụrọ ị́ nẹngị se ị́ ḅaafamaḅịa apụ ḅosam. Tomoni seni kụrọ nyọma ḅụ koroma! Ateli ma koru! Ḅụkarakarama ọmụ pịrị!

²Nyanaḅọ Ḅe ọ̀ pịkị Izrẹl opu mị ọkị pakụma-ẹtọn aḅẹ, anị na tarakapụma anị simaka sịkị anị sime ḅara mị.

³Tarakapụma owunima ini pulo-pulo agbọ ma pụra se awụwụ-a ḅụchụaye chụamẹ. Owu pakaḅịa ẹrẹchị ini ḅụkarakarama waraḅẹ! Fịnị nwananị nwananị ọkụ mị inia kiri nwẹngị owuni arụ ma nwananị nwananị ọkụ-ẹ! Inia asụnma àrị fukuaḅẹ!

⁴Kiri nwẹngị owuni arụ ma àrị ateli ma ḅie nọmụma ḅọrọmẹ, opuama mị ḅie eleogbo ma ḅie àrị nwẹngị nyọnyọ mun mẹ. Pọnjị tọnjie wakam ma ḅịa ọkụ àrị nwọse wakam ma ḅịa mẹ se so wakam nyọ ḅọrọ ọkụ àrị nwọse nyọ ḅọrọmẹ.

⁵Owutịḅịnị ma ini nwọ koḅirimamẹ; inia ḅụọma ọḅirima ọḅirimamẹ ini owu mun-arị sịkị. Owu pakapụma ini gbilama mangị onu mị daḅịa se tịḅịkikimaye sọ se onu mị kan àrị owunima nwọ pịrịmẹ.

⁶Tọrụ aka sime onu ḅọkọ ma kan finjimẹ; ḅalafa amanyanaḅọ warị mị ḅie sime apụma ḅụ sọmẹ.

⁷Ini amanyanaḅọ ta ma kunmẹ; arịa fịrịnwẹngịapụma elesika nyọ fiema ọkụ se nyọ fiemamẹ se ini kuḅie si ḅụ ḅara se inia kuḅie ma kunmẹ.

⁸Opu mengi kan paka mangị ọkụ anị tomoni Ninivẹ mị ḅie mangị ọkụ-ẹ! “Ọ́ chịẹ! Ọ́ chịẹ!” pụkọ oloku pakụmamẹ— ọkụma gbọrịḅọ sọnị pịkịkẹ.

⁹Ọ́ seleḅa ma ọfọịn! Ó goli ma ọfọịn! Opuama mị ḅie ngọ ḅakamẹ!

¹⁰Ninivẹ mị kọsịsam, nweni mangị sosam, nweni ḅarị angakẹ! Kuḅiemgbọlụ ma taịntaịnmẹ; ḅụọ ịkpụkụ geregeremẹ, kụrọ fasam; tomoni tọrụ ma nyọnị sam.

¹¹Mịọkụ opuama mị nde ju anị omi chịrịḅa koko nyọ ọkụ sime nyọ mị, ini fịye seni chịrịḅa awọma kokokoko nyọ mị, chịrịḅa owoi na ịrọrọ na munḅịa nyọ mị se ye arịa awọma la-ẹka nyọ mị?

¹²Chịrịḅa ḅe ori ọ̀ pẹịpẹị nama ḅe ḅaa se anị ḍiama ò juo wu ḅe na oria awọma na pịrịmẹ; nama okpokpo ọ̀ nwọ seni oria pokolo mị ḅeinmamẹ.

¹³Kụrọmamgba Nyanaḅọ Ḅe nwọ ḅẹmẹ, “Ị̀rị̀ anị ị́rị́ na tarakaḅọ ḅe-ẹ.” “Àrị ị́ya kiri nwẹngị owuni arụ ma dọkịmaḅịa, owuḅie ini ị́ya owunima ḅaaḅịa, se à pịkị ị́ ḅara ḅie ị́ jịn apụ ḅara pọkọ ọkịaye ma nwọ ọkịḅịa. Tomonikiri mị ḅie nweni ḅarị ngịsị ị́ ḅụ ḅẹrẹ naaka gbamasoḅịa.”