Read kirikeni Habakọk 1 Bible Online

Habakọk 1 - kirikeni bible

Habakọk 1

¹Mịn anị Nyanaḅọ Ḅe ḍieḅelema seni ịkịankoro Habakọk ḅe pịrị oku mị-ẹ.

²Yei Nyanaḅọ, àrị ị́ ḅara ḅarachụa ḅi ḅọlọ mun nde sịkị lasịkị re ị́ poki tẹrẹrẹ se ị́ tọrụsiọrị ḅie wa ḍụa ḅe?

³Cheye gose ị́ ị̀ mịẹse àrị ọkọsime ḅụfụka nwọ ọrị-ao? Nde ị́ ineda inema nyana ọkọsime si mịẹaye ḍikiḅịa ọkụ? Mbasị na kụrọkụrọaye mịẹ-a si na ị̀ kelemamẹ, owusọ na kamụsọ na pịkị nyọ mamgba ḅụ omi-ẹ.

⁴Mịn mị gose, Oloko mị ḅụ ịnyọ fasam, anị pịkị ḅarị yeḅụ ofori-ẹ, iḅi ḅẹrẹkọn pịkị ofori-ẹ. Siapụ ma iḅi ḅẹrẹ nyanatẹịn karakaraye mịẹapụ ma nẹngịmẹ, anị mị ḅụ ini iḅi ḅẹrẹ mị pịkị iḅomẹ.

⁵Anị Nyanaḅọ Ḅe nwọse oria tomonima ḅẹye-ẹ, “Kwein tọrụ se ị́ kelema sẹma ḍiki, se ị́ ọrịarịye mị ị́ ḅụgbiripumaḅịa. À mịẹḅịaye ị́ nwọ naaḅịa sịkị, ị́ ḅereni-ẹkẹ.

⁶À Babilọn apụma ọkịḅo se kụrọ se ini pịrịḅịa, ini ḅalafama, ịnyọ sarasaraka apụma. Ini nwẹngị tomonikiri mị saḅa jịn ama inuma-o mun aḅẹ.

⁷Ini ma anị nweni-a ḅalafama pịkị opuma yesimasima apụ-ẹ. Inia opuaye mịẹmịẹaye ḅụ inina-mịnaḅụ na anị pịkị oloko mị-ẹ.

⁸“Inia asụnma àrị mangịtẹịn ọpọ-chịrị nẹngịmẹ, àrị ḅalafamatẹịn ḅuru pụkọtarị àrị piri obiri nẹngịmẹ. Ḅọlọ ama ḅụ mị inia asụn nwẹngịmarịapụ ma nwẹngị ma ḅoarịye-ẹ; inia asụnma àrị kiri mị wara kọsịmamẹ. Igo vuma finkoro ḅo owu se àrị pẹịḅịaye paka ọkụ mị ini ḅoarị ọkụ-ẹ.

⁹“Inia owunima ḅalafama ḅara ini nwọse ḅo ama inuma ḅịa, ọrụḅọḅọ ḅalafamẹ ini ḅoarị sịkị ḅụ. Ini owu ḅie kun apụma ini ḅaka onwun mgbọlụma na gbasịmẹ.

¹⁰Yeḅụsọka ḅara ini nwọse amanyanapụma mịẹmẹ, se ini fịrịtịḅịnị ma ḍẹrịmẹ. Ineda kikichụa ini pịrịḅịa kụrọma owuniaye se kelema onu ofori-ẹ—ini onwun tan se anịa ḅụ jia se anị ọkịḅịa.

¹¹Se fọrụ nyọ ọfịn ḅara ini nwọse nyọ mị ọfịn se soḅịa, mịnapụma inia kụrọ anị inia oru-ẹ.”

¹²Nyanaḅọ, aya sịkị ngịsị ị́rị́ Tamụnọ-ẹ. Ị́rị́ anị ị̀ Tamụnọ-ẹ, fịafịa pịkị sime gbamaso. Nyanaḅọ, ị̀ Tamụnọ, pịkị ị̀ya agbọ, ị́ Babilọn apụma sẹlẹọkịsam, se ini mịẹse ini kụrọsam, mịẹse ini ineda fomuḅara seni wa pịrịḅịa ḅara.

¹³Ọkụma nde mịna nweni inuma, osi nyanaka siapụma ị́ nwọ ḍikiarị ọkụ? Ị́rị́ Tamụnọ Ḅe Ị́ opuma iḅimẹ siye ọrị se ḅẹ na iḅiye-ẹ; ị́ pịkị ineda tọrụ se siye mịẹarị apụ ọrịẹkẹ. Anịọkụma, nde ị́ gboinma sime se mịnapụma mun iḅi ini nẹngịapụ ma famaḅịa ọkụ?

¹⁴Tamụnọ ị́ mịẹse tomoni ḅo ini ḍikiḍikiarịapụ oforika ḅara nwọ simesam, anị papa inji na nwẹngịarị sọnọ awọ na sime ọkụ.

¹⁵Arị se inji kun ḅara, Babilọn apụma ini nwọse tomonima kun somẹ. Ịgbọ ma ḅie ini ini kpọrọrọ somẹ, se ini kun apụma gose ini ḅieḅẹlẹ ḍorokumẹ!

¹⁶Ini inia ịgbọ ma se oru mịẹ tẹkẹ, se pịkị agba mịẹ àrị pịrịpịrịmẹ, anịatịḅị inia ịgbọ ma iḅitẹịnye goyegoye nwọse ini pịrịpịrịmẹ.

¹⁷Ini inia okola agiji ma seni ḍikitịḅịfoin nyanaka ḅara ḅụ sẹma fama gbaso ḅe?