Read kirikeni Zẹfanaịa 2 Bible Online

Zẹfanaịa 2 - kirikeni bible

Zẹfanaịa 2

¹Ḅụgerere nemika sẹ, ọ́ sakị koroma nyana

²fọrụ samịnasa ịnyanya ọfịn sin ọkụ ma ini nwọse ómine ọfịn sinka simeogbo, Nyanaḅọ Ḅe oria ḅalafama ịganị ma ḅo ó laka simeogbo, oria kụrọ ịganị ma ọ̀ nwọse ó ḍieka simeogbo.

³Ó vinpịkị Nyanaḅọ Ḅe damamun, ómine ama mị ḅie ḅụiderima se pịkị oria olokoma koko apụma. Ọ́ karakaraye mị mịẹ, se Nyanaḅọ Ḅe tọrụkuḅu ḅụ ómine ọ́mịna ḅụ ma iderima. Sosi fomuḅara ọ́ gbarịḅịa Nyanaḅọ Ḅe oria ḅụosọ mị ḍiepakụmaḅịa ene mị ḅụ.

⁴Gaza opuama mị ḅie gbọrịḅọ sọnị kọn ẹkẹ. Ashkẹlọn mị anị ḅo eleogbo nwọ sọḅịa. Eneogboin ḅiri ḅụ mị ini Ashdọd apụma depakụmaḅịaye-ẹ, pịkị Ẹkrọn apụma inia opuama mị ḅie ini ini depakụmaḅịa.

⁵Ómine Filistiapụ tọrụ aka angapụma, ọ́ fasam. Nyanaḅọ Ḅe ọ̀ ḅẹrẹkọn ọ́ pịrịsam. Ori ọ́ ḅaafamaḅịa, se gbọrịḅọ sọnị ọ́mịna ḅie kọn ẹkẹ.

⁶Mengi aka sime ọ́mịna ama mị anị ḅo papa ele sọḅịa se anana koruapụ okponga na anana koroma warịma sime nyọ nwọ sọḅịa.

⁷Juda sẹ mị ḅie kọn-a tomonima, ini ḅo ọ́mịna nyọ mị ḅụ angaḅịa. Ini anị ju inia namama koko se Ashkẹlọn mị ḅie sime-a warịma ḅie mọnọḅịa. Nyanaḅọ inia Tamụnọ Ḅe ori ini na sime se ini mịẹse ini pịkị tọrọkọ munḅịa.

⁸Kụrọmamgba Nyana Tamụnọ Ḅe nwọ ḅẹmẹ, “À naasam Moab apụma na Amọn apụma na ḅara wẹrịma ị̀ya tomonima wọlọ se ini mịẹsima ḅara, ini pịkị ḅịpịboma aḅẹ na ini inia ḅara ḅụ inia kirima kọrịḅịa yemị na.

⁹Kọkọmaye ḅara ḅụ, Ị̀rị̀ anị ḍumo sime Izrẹl Tamụnọ Ḅe-ẹ, à kụrọma ye ḅerenimẹ na, Sọdọm na Gomọra na fa ọkụ mị Moab na Amọn na à nwọ famaḅịa ọkụ-ẹ. Àrị ḅo fụn olulu na sime gbamaso yeḅụ sọka nyọ na piri na nwọ sọḅịa. Ị̀ya tomonima ḅụ ḍumo pakaḅo-apụ ma ini ini ọfọịn se inia kirima ọkịḅịa.”

¹⁰Anị ḅara, mị Moab apụma na Amọn apụma na fomuḅara ọkịḅịa ọkụ-ẹ, anị inia ḅụdekichịẹma na ḅụboma ye mịẹ na, pịkị Kụrọmamgba Nyanaḅọ Ḅe oria tomonima ini nwọ wọlọ ye gose.

¹¹Nyanaḅọ Ḅe ori inia ḅalafamaḅịa. Sẹkiri mị ḅie oru ma ọ̀ nwọ iderima mun yeḅụ sọka ḅara ḅụ koromaḅịa, anịsịkị, sẹ goyegoye inia amama ḅie kpẹrẹkị ọ̀ tẹkẹḅịa.

¹²Nyanaḅọ Ḅe Sudan apụma sọnị ori ini ḅaaḅịa.

¹³Nyanaḅọ Ḅe ori oria kụrọ se Asiria famaḅịa. Ò Ninivẹ opuama mị se nweni koromasosa yeḅụ oforika pịkị mengi oforika eleogbo nwọ mịẹḅịa.

¹⁴Anị ḅo anana na, nama na pịkị nama tọrụkịrịkịrị ịnyọsara ḅịa nyọ nwọ sọḅịa. Ikpikikpiki ma àrị fa sa ama mị ḅie anga se pẹlẹḅọkọ ma ḅie ḅụ sime olokuḅịa. Ḍụẹịn-ama-ọḅọkọ ma, àrị warị ḅọkọ ma ḅụ sime paịnḅịa. Warị ma ḅụ ini awụ chịn ma wọrọsinḅịa.

¹⁵Ọkọ sime ye mị paka anịa kụrọ mị se ḅụboma pịkị mịnaḅụ dekichịẹma, pịkị koroma na ye anị la-ẹkẹ nwọ ḅe opuama mị pịrịḅịaye-ẹ. Ama mị nyana tomonima ini koromamẹ na inia opuama mị anị tomonikiri mị mgba ḅie ḍụḅatẹịnye-ẹ. Anị ḅo nweni angaka nyọ nwọ sọḅịa se owoi-a nama mun ịnyọsara ḅịa nyọ sọḅịa! Anị nyọ kpekima ḅọrọ ḅọ goyegoye nụḅọ ḅalafaḅịa.