Read kirikeni Zẹfanaịa 3 Bible Online

Zẹfanaịa 3 - kirikeni bible

Zẹfanaịa 3

¹Jerusalẹm, anị si se sitịḅịnyana pịkị anịa tomonima pụnda pụnda opuama mị anị fasam.

²Anị Nyanaḅọ Ḅe ḅịpị pokikẹ, anịkanịka ò ḅi ayema mịẹkẹ. Anị anịa kuḅiemgbọlụ se Nyanaḅọ Ḅe ḅụgbana kẹ, anịkanịka ọ̀ ḅara ḅarachụa ḅikẹ.

³Anịa tịḅịnị fịrịnwẹngịapụma ekerearị chịrịḅa ini nwọ kịkẹmẹ; anịa ḅẹrẹkọn apụma ini ḅurupụkọtarị piri obiri na kịkịnamẹ, ini ḅuru-anwua sọ so-ọkụma ini ineda gbọrị nama imgbe sọnị se dede mị wẹrịmakẹ.

⁴Ịkịankoro apụma mịẹye nemika pịkị mbasị apụ-ẹ; agbamịẹ apụma ini osiḅụ sime-a yema pụlamamẹ, ini pịkị ini na iḅiḅịa ḅara nwọse Tamụnọ oloko mị pịkịmẹ.

⁵Ọkụma Nyanaḅọ Ḅe ọ̀ pa opuama mị ḅie omi-ẹ; ọ̀ karakaraye mịẹmịẹmẹ, ori ngịsị iri ye mịẹmịẹkẹ. Gbarịmaka ḅara ḅụ, dede layelaye ori iḅi ḅẹrẹ ḅịpị se ḅo oria tomonima pịrịpịrịmẹ. Anịẹḅẹsọ, ḅụgerere nemika ḅara ḅụ, karakaraye mịẹkapụ ma ini pa inia iri ayema mịẹma mun aḅẹ.

⁶Nyanaḅọ Ḅe nwọ ḅẹmẹ, “Bebe opu-a sẹ à nwọ ọfịn sinsam; àrị inia opuamama famasam, se arịa kụrọ onu ma na sokopi-a warịma na à nwọ kọsịmasam. Nweni ḅarị opuamama ḅie angakẹ; opu ateli ma ḅie nweni ḅarị ofori-ẹ—gbọrịḅọ sọnị kọnkẹ.

⁷À nwọ koromamẹ na ị̀ya tomonima ini anịsịkị osi nyana ị̀ pịrị se à ḍukoarịaye ma mịẹḅịa, na ini ḅarị ngịsị à se ini ḍie yemị se ḅieḅarama ẹkẹ. Ọkụma anị ḅọlọkẹ, ini sakị inia si ḍumo mị kọn aḅẹ.”

⁸Nyanaḅọ Ḅe nwọ ḅẹmẹ, “Ó kele koru, à ḅẹrẹ se sẹma ọlọḅịa ene mị laḅịa sịkị. Ị̀ kuḅie ḅụ à tọn pẹlẹsam sẹma na amanyanakiri ma na, à nwọ chịn kpokponima se ị̀ya yeḅụosọ mị la ḅara nwọ ḍuko ini pịrịḅịa. Ị̀ya ịganị ḅe fịnị mị anị bebe sẹkiri mị mgba nwọ famaḅịa.”

⁹Nyanaḅọ Ḅe ọkọ ḅẹmẹ: “Anịsịkị re mị à sẹma ḅie sime tomonima nwọ ḍinmaḅịaye-ẹ, se ị̀rị̀ ngẹrị mị ini tẹkẹḅịaye-ẹ, ini pịkị ḅarị jịn-a oru tẹkẹ ẹkẹ. Ini ị̀ ḅịpị pokiḅịa.

¹⁰Sasaju ḅụ sime Sudan na mịnaḅụ na ḅie sime ị̀ya tomoni galagalapụ ma, ini agbamịẹ ḍiepịrịaye se ḅo ị̀ pịrịḅịa.

¹¹Anịsịkị ómine ị̀ya tomonima ómine ị̀ ḅịpị pokikẹ nwọḅẹ yeḅụ, ó gose ḅụgerere nyanaḅịaye ḅarị ofori-ẹ, ḅụdekichịẹma pịkị ḅụboma ye mịẹḅọ goyegoye àrị ini ḅọ sinḅịa, se ngịsị ọ́ ḅarị ị̀ya fịafịa chịngị mị ọgọnọ sitịḅịnyana ị̀ pịrị-ẹkẹ.

¹²À se anịju koromaḅịapụ anị, ḅụiderima pịkị ị̀ damaḅo se ḅarachụa ḅiḅịa tomoni-ẹ.

¹³Paka ḅoḅịa Izrẹlapụma ini gbọrị si sọnị se gbọrịḅọ sọnị mịẹ ẹkẹ; ini iruo kọn ẹkẹ, ini pịkị nweni telima ẹkẹ. Ye ini na tọrọkọ munḅịa ini pịkị fa ḅie sọ ẹkẹ se ini gbọrịḅọ sọnị ḍiki ḅalafa ẹkẹ.”

¹⁴Izrẹlapụ, ó nime chu se ḍoroku ḅụ oloku! Jerusalẹm ị́ kuḅiemgba nwọse ḅieḅẹlẹ!

¹⁵Nyanaḅọ Ḅe ori ọ́mịna ḅụfụka ma dachịẹmasam; ómine na tarakapụ mamgba ori ini sinsam. Nyanaḅọ, Izrẹl Amanyanaḅọ ḅe ori ómine na omi-ẹ; ó gose mịọkụ ḅalafaḅịaye ofori-ẹ.

¹⁶Sịkị ḅoaḅẹ ini nwọse Jerusalẹm mị ḅẹḅịa, “Ḅalafama, Zaịyọn opuama! Ḅerenima ḅalafa ị́ ḅụ sọ se ị́ kuḅie lọkọ!

¹⁷Nyanaḅọ ị́ Tamụnọ Ḅe ori ị́rị́ na omi-ẹ; oria kụrọ mị anị ọmụḅaraiḅi se ị́ pịrịḅịa. Nyanaḅọ Ḅe ori ị́ tarịḅịa, se oria ḅẹlẹma ḅụ ori ịwọ ḍumo se ị́ pịrịḅịa. Ò nime chuḅịa se ị́ ḅụ ḅieḅẹlẹ nyanaḅịa,

¹⁸alalị fịarị tomoni ḍoroku ọkụ.” Nyanaḅọ Ḅe nwọ ḅẹmẹ, “Fị fa ḅalafa mị à mịẹse anị kulumasam se àrị ọ́mịna ḅụgerere mị sinsam.

¹⁹Sịkị ḅoaḅẹ! À fomuḅara seni ọ́ pụndarị apụma nwọ pịrịḅịa; àrị ikeli apụ mamgba nwọ ḍụaḅịa se ini desin apụma à nwọ ọkị ama ḅoḅịa. Àrị inia ḅụgerere mị seni osi nwọ mịẹḅịa se bebe tomonikiri mị mgba ini tokoniḅịa.

²⁰Sịkị ḅoaḅẹ àrị ómine ọkị pakụmaḅoḅịa! Ị́ya galagala tomonima à nwọ ọkị ama ḅoḅịa; àrị ị́ se tomonikiri ḅie ẹrẹ pakaḅọ nwọ mịẹḅịa; se ị́ mịẹḅịa ị́ pịkị tọrọkọ mun.” Mịn Nyanaḅọ Ḅe ḍuko ọkụ-ẹ.