Read kirikeni Hagaị 2 Bible Online

Hagaị 2 - kirikeni bible

Hagaị 2

¹Anị gbọrị kụra mị ḅie sọnọma akalụ mị ḅie, sigbọrị ḍin fịnjị ene mị ḅụ, anị Nyanaḅọ Ḅe pịkị ịkịankoroḅọ Hagaị ḅe ḅụ ḅọrọ ọkwẹịnye-ẹ.

²Ọ̀ nwọ ḍuko Hagaị ḅe pịrịmẹ na ori ọkwẹịn Zẹrubabẹl, Juda gọvịna ḅe na, Jọsụwa, Gele Agbamịẹḅọ ḅe na, pịkị tomonima na nwọ pịrị na,

³“Ọ́mịna ḅụ Oputẹkẹwarị mị iḅi ḅara mị se ḅiekoromaḅịa ḅọ omi? Nde mịọkụ anị ọ́mịna tọrụ ḅie sime ọkụ? Anị ngịsị gbọrịye sọnị sọ ẹkẹ.

⁴Ọkụma ọ́mịna ḅie gbọrịḅọ sọnị kuḅie lọkọmama. Ọ́ fịrịnwẹngị, anịatịḅị àrị ómine na omi-ẹ.

⁵Ómine Ijipt ḅie paka ḅo sịkị, à ḅereni ọ́ pịrịmẹ na à sịkịmamgba ómine na simeḅịa. À pa ómine na omi-ẹ, anịgose ọ́ ḅalafama.

⁶“Ḅọlọ ẹkẹ à so mị na, sẹkiri mị na, kiri mị na tọrụ mị na nwọ jikeḅịa.

⁷À sẹ mamgba jikeḅịa, se ini nyanaye mamgba nwọ tan mịanga ḅoḅịa, anịsịkị Oputẹkẹwarị mị ḅie ngọ ḅeinḅịa.

⁸Mị tomonikiri ḅie sime seleḅa ma na goli ma na, arịmgba ị̀yaye-ẹ.

⁹Ịwọ Oputẹkẹwarị mị iḅitẹịn olomu ye mị nẹngịḅịa, anịsịkị anịnyọ ye ḅara sọ na deinma na à nwọse ị̀ya tomonima pịrịḅịa.” Mị Ị̀rị̀, Kụrọmamgba Nyanaḅọ Ḅe kọn ọkwẹịn ma-ẹ.

¹⁰Darịọs ḅe amada maịn karama kụra mị ḅie, kụra ḅụ esenie-a akalụ si inein-a ḍin fịnjị ene, Kụrọmamgba Nyanaḅọ Ḅe pịkị ọkwẹịn kọn ịkịankoro Hagaị ḅe pịrịmẹ.

¹¹Ọ̀ nwọ ḅẹmẹ, “Ye agbamịẹapụma inia kuḅie ḍuko mịn ḅẹrẹ mị ḅụ:

¹²Nemikase tomoniḅọ ini se agbamịẹḅịa ẹrẹchị mịẹfịafịama sa nama okpokpo ọkị se oria ḅụchụaye ḅie chu ọkụma, se ọ̀ ḅụchụaye mị mịẹse anị fịturu la, anịkanịka chụọ fịye, anịkanịka iru, anịkanịka oliv pulo, anịkanịka jịn fịye sọnị nwọ la ọkụma, anị mịẹse anị fịye mị sọnị fịafịa ḅụ sime ḅe?” Mịn mị gbela sịkị, agbamịẹapụma, “Ẹn-ẹn” ini nwọ pẹkẹrẹmẹ.

¹³Se Hagaị ḅe gbelamẹ, “Nemikase tomoniḅọ ḅe ọ̀ ḅụ pụlamamẹ, anịatịḅị ọ̀ ḅara se fịḅọ lama ye gose. Se ọ̀ ḅara se ma fịye ma ḅụ gbọrịye lama ọkụma, anị mịẹse fịye ma sọnị ḅarị fịafịaka?” Agbamịẹapụma pẹkẹrẹmẹ, “Iin.”

¹⁴Anị Hagaị ḅe nwọ ḅẹye-ẹ, “Nyanaḅọ Ḅe nwọ ḅẹmẹ na mị gbọrị ḅara mị anị pịkị sime mị sẹ mị ḅie sime apụma pịrịḅịa ọkụ-ẹ, pịkị ini ma nyana se pakụmaḅo yegoyegoye na; anịẹrẹchị ini seni agbamịẹ ẹbẹ ọgọnọ gbana agbamịẹaye goyegoye pụlamẹ.”

¹⁵Nyanaḅọ Ḅe nwọ ḅẹmẹ, “Ómine ineda paka ọ́ pịrịsa ye mị ọrịka? Ma ọ́ sakị Oputẹkẹwarị mị namaka sịkị,

¹⁶ó koroma mẹ na ó mun ḍipi ayema soku ḅịa sịkị ịpịamgba chiri chiri ḅụ si chiri ọ́ nwọ ọrịḅịa, ọkụma oyi-a chiri kẹngẹ mị pakaḅoye-ẹ. Ó mun iru kọrọ ma kinḅịa sịkị, ojongo-a sọnọasi pakaḅo na karaka, si ojongo kẹngẹ mị pakaḅoye-ẹ.

¹⁷Kụrọ fọrụ na kụrọ irisi na kụrọ ịrụa kpoin na à nwọ fịrịma se ó ḍipi ye layelaye nwọ ḅaaḅịa ẹrẹchị, ọkụma anị sọnị ó si ḅụ vinpịkị ḍụkụkẹ.

¹⁸Mịmgba anị esenie-a karama akalụ mị ḅie si inein-a ḍin fịnjị ene mịẹ, anị Oputẹkẹwarị mị ḅe chuku sẹkẹ ḍụparị mị fịrị ọ́ nwọ nwẹngị so ene mịẹ. Ọ́ pakaḅịa ye nwọ ḍiki, mịmgba ọkị tọrọkọ mun.

¹⁹Gbọrị fịaye mgbọlụ sọ kọnkẹ nwọ ḅẹ sọnị, pịkị tụmgbakị elelenda chịnma na, irumịẹ chịnmgbọlụma na, mgbafa ma na, pịkị oliv chịnma na, ma àrị chụa kẹ nwọ ḅẹ sọnị, ọkụma, mịọkụ ọkị mun àrị ọ́ ḅẹlẹmaḅịa.”

²⁰Anị gbọrị ene mị ḅie anị akalụ si inein-a ḍin fịnjị karama ene mị ḅụ Nyanaḅọ Ḅe maịn karama oku nwọse Hagaị ḅe fịrịmamẹ.

²¹Ọ̀ nwọ ḅẹmẹ: Ḍuko se Zẹrubabẹl ḅe pịrị na: “À so mị na sẹkiri mịna jikeḅịa.

²²À pịkị amanyanakiri ma sumagbin se arịa kụrọ ma mịẹse àrị ḅo kunoḅịa. À kiri nwẹngị owuni arụ ma na àrị dọkụ arịapụ ma na nwọ pịkị iḅoḅịa; asụnma, àrị fịḅịa, àrị nwẹngịmarịapụ ma sọnị, ini jịnḅọ jịnḅọ ḅaaḅịa.

²³Anị ene mị àrị ị́rị́ ị̀ya fịrịnwẹngịḅọ Zẹrubabẹl ḅe ọkịḅịa, se à kụrọ se ị́ pịrịḅịa ị́ ḅẹrẹtọn ḅọ sọḅịa. Ị́rị́ mị à sẹlẹsaye-ẹ.” Kụrọmamgba Nyanaḅọ Ḅe ọkwẹịnsam.