Read kirikeni Zẹkaraịa 11 Bible Online

Zẹkaraịa 11 - kirikeni bible

Zẹkaraịa 11

¹Ị́ya ḅọkọ ma finji, Lẹbanọn, mịẹso sịkị fịnị ineda ị́ya awụ chịnma dọkịma koromaḅịa ọkụ.

²Akpụ chịn ómine oloku owu— awụ chịnma àrị ḅịkịsam; àrị tokoni nyana ejema ini àrị simasam! Ọ́ kụrọma oloku owu Bashan kuru— kputu piri mị ini pẹlẹgbinsam!

³Kuḅie si ḅụ ḅẹrẹtọn apụma ini owupakụmamẹ; inia boma sosam! Chịrịḅa ma ekerearịye mị poki: Jọdan nyọḅụ àrị anga piri mị ini pẹlẹsinsam!

⁴Nyanaḅọ ị̀ Tamụnọ Ḅe nwọse ị̀ ḅẹmẹ, “Ini ḅaaḅịa anana ogbo ḍikiḍikiḅọ mịẹmịẹye ḅara à nwọ ọkị mịẹ.

⁵Àrị nyanapụma àrị ḅaamẹ se fomuḅara ini lakẹ. Ini namama dẹrị se nwọ ḅẹmẹ, ‘Ọ́ Nyanaḅọ Ḅe boma! Wa ngọ kọnsam!’ Àrị nyana anana ḍikiḍiki apụma pembe sọ ḍikitịḅịfoin nyana àrị pịrịkẹ.”

⁶(Nyanaḅọ Ḅe ọkọ ḅẹmẹ, “À ḅarị gbọrịḅọ sọ ḍikitịḅịfoin ẹkẹ mị tomonikiri ḅie. Ị̀rị̀na-mịnaḅụ-na anị ḅarana tomoni mamgba se inia ḅẹrẹtọn apụma kụrọ chuku ḅie chuḅịaye-ẹ. Mịna ḅẹrẹtọn apụma ini tomonikiri mị kọsịmaḅịa, à pịkị inia kụrọ ḅie ini ḍụaẹkẹ.”)

⁷Ma ananama fẹ se àrị dẹrị apụma ḅo ị̀ ọkọmẹ, se à ḅo ini mun ḅaaḅịa ananama ḍikiḍikiḅọ nwọ sọmẹ. À ḅo mama amgbara nwọ ọkịmẹ; à nwọse gbọrịye chịnmẹ “Ḅẹlẹma” se ísíye mị “Gboloma.” Se à ḅo anana ogbo mị ḍikiḍikimẹ.

⁸Ḅarị ineda inemakaḅụ, gbọrị akalụ ḅie à jịn tẹrẹ-a anana ḍikiḍiki apụ nwọ sinmẹ, ị̀ ḍikiḅụnwọnwọ apụ.

⁹Se àrị anana ogbo mị ḅẹmẹ, “À ḅarị ọ́mịna anana ḍikiḍikiḅọ sọ ẹkẹ. Ye fịḅịa ananama fị, yelaḅịaye, ye àrị la. Kọn ayema àrị yese jịnye jịnye lama.”

¹⁰Anị à ḅo “Ḅẹlẹma” nwọse chịn amgbara mị ọkị se anị anyịmaye-ẹ, se Nyanaḅọ Ḅe sẹ mamgba na fị ọḅọkụ mị kansin ḅụ.

¹¹Anịḅụ ọḅọkụ mị kansinmẹ anị ene. Anana ma fẹ se dẹrị apụma, ini ị̀ ḍiki aḅẹ se ini ḍọkịḅo ọrịmẹ na Nyanaḅọ Ḅe, à mịẹye ma ḅụ ḅọrọ ọkwẹịn aḅẹ.

¹²Àrị ini ḅẹmẹ, “Ó nemikase ḅereniḅịa ọkụma, ómine ị̀ya gbẹịnye se ị̀ pịrị. Ọkụma, anịkẹ ḅẹḅẹ, ómine anị ọlọ.” Anịḅụ, mịn ini seleḅa pẹkẹrẹ-a soi nwọse ị̀ gbẹịnye-ẹ.

¹³Nyanaḅọ Ḅe ị̀ ḅẹmẹ, “Árị ọkị mun Oputẹkẹwarị igbiki kokonyọ ḅie chụa.” Mịn à ḅo pẹkẹrẹ-a soi ma—ini se opu igbiki chịn ayema—se mun Oputẹkẹwarị igbiki kokonyọ ḅie chụaye-ẹ.

¹⁴Se à ḅo maịn karama amgbara mị anị à “Gboloma” nwọse chịnye mị anyịmamẹ, se Juda na Izrẹl na ḅe gboloma mị kangulugulumẹ.

¹⁵Anị Nyanaḅọ Ḅe ị̀ ḅẹye-ẹ, “Pịkị gbọrị sịkị ọkị se yeḅụsọka sitịḅịnyana anana ḍikiḍikiḅọ nwọ sọ.

¹⁶Àrị anana ḍikiḍikiḅọ se ị̀ya anana ogbo mị pịrịsam, ọkụma ọ̀ ḅarachụa faḅie sọ arịye ma pịrịkẹ, ọ̀ pịkị iriarịye ma ḍọkịkẹ, anịkanịka yelarị ayema kịlakẹ, ọ̀ pịkị fịye se kpụrụkpụrụ ayema pịrịkẹ. Anịnakaraka, arịa ḅụ ḍụḅatẹịn ananama mịnịma pẹị, pịkị arịa ḅụọ-ịkpalịkpa ma kanịsin, mị ọ̀ mịẹarịye-ẹ.

¹⁷Ori yeḅụsọka anana ḍikiḍikiḅọ ḅe, ò worinime nyanaḅịa! Ori oria anana ogboma wẹrịsosam. Ọmụ anị okorona okorona oria kụrọ mị ḅaaḅịaye-ẹ. Ọ̀ ḅarama fịḅịa, pịkịna oria amaḅaranga tọrụmgbọlụ mị pụnḅịa.”