Read kirikeni Zẹkaraịa 2 Bible Online

Zẹkaraịa 2 - kirikeni bible

Zẹkaraịa 2

¹Jịn tẹmẹ ḅie ḅụ, à gbọrị owuḅọ ọrịmẹ nyọtọnye ọ̀ ḅara omi-ẹ.

²Àrị ò gbelamẹ, “Ị́ chọmụn-ao?” “À mun Jerusalẹm tọn emun-aḅẹ,” “anịa nangwọ na anịa finji na nwọ nemiḅịa ẹrẹchị” ọ̀ nwọ pẹkẹrẹmẹ.

³Anịsịkị, à ḅo ọkwẹịn ị̀ pịrịsime enjẹlḅọ ḅe ọrịmẹ, ọ̀ ḅụọsụma tọrọkọ ḅomẹ, se jịn enjẹlḅọ pịkị ḅo ọ̀ lamẹ.

⁴Tatarịḅọ ḅe ísíḅọ ḅe ḅẹmẹ, “Mangị mun ḍuko ori nyọtọnye ọlọ asẹmẹnịḅọ ḅe pịrị, na tọn-a tomoni na ḅaka nama na Jerusalẹm ḅie simeḅịa, anịẹrẹchị onu nama anị pịrị mị opuma ḍụḅaḅịa.

⁵Nyanaḅọ Ḅe, ò ye ḅerenisam na ori-na-mịnaḅụ-na fịnị sọ opuama mị kelemaḅịa onu ḅaraḅụ, se anị ḍikiḍikiḅịa, se oria boma mamgba ọ̀ nwọse anịnyọ angaḅịa.”

⁶Nyanaḅọ Ḅe nwọse oria tomonima ḅẹmẹ, “Àrị ọ́ galagalama nyọnyọ ma fịrịmamẹ. Ọkụma mịọkụ, ómine ini depakụma apụma, ọ́ Babilọn ḅie pịọrụ pakaḅo se vinpịkị Jerusalẹm mun.

⁸Ḅara se ọ́ lamaḅọ ḅara se ị̀ ḅụ yelatẹịnye lamamẹ.” Anị ḅụ Kụrọmamgba Nyanaḅọ Ḅe mị oku mị se ị̀ fịrịmamẹ na à se mun oria sẹma ọfọịn apụma pịrị:

⁹“Nyanaḅọ Ḅe na mịnaḅụ na anị ómine na ọmụgbinḅịaye-ẹ, se gbọrị sịkị ḅụ, ómine ma se fịrịnwẹngị ọ́ pịrịapụ mịẹapụ ma ḅo ómine kọsịma se ómine ọfọịnḅịa.” Mịn mị pakaḅịa sịkị, nwenimgba nemiḅịa na Kụrọmamgba Nyanaḅọ Ḅe ị̀ fịrịmamẹ.

¹⁰Nyanaḅọ Ḅe nwọ ḅẹmẹ, “Ó ḅieḅẹlẹ ḅụ nime chu, Jerusalẹm apụ! À ḅo ọ́mịna ḅie anga-o-ḅo-aḅẹ!”

¹¹Anịsịkị, tọntọn-a sẹ Nyanaḅọ Ḅe damaḅoḅịa se ḅo oria tomoni sọḅịa. Ori ọ́mịna ḅie angaḅịa, se ó nemiḅịa na ori ị̀ se ọ́ fịrịmamẹ.

¹²Pịkị gbọrị sịkị ḅụ Juda mị ḅo Nyanaḅọ Ḅe oria fịafịa ama mị ḅie sosikima ò sokuḅuye nwọ sọḅịa, pịkị Jerusalẹm mị, anị ọ̀ ḅẹlẹmatẹịn opuama sọḅịa.

¹³Nwenimgba yawụma sime Nyanaḅọ Ḅe tọrụkuḅu, anịatịḅị ori anga fịafịa nyọ ḅụ, ọ̀ wẹrịḅoaḅẹ.