Read kirikeni Zẹkaraịa 4 Bible Online

Zẹkaraịa 4 - kirikeni bible

Zẹkaraịa 4

¹Ọkwẹịn ị̀ pịrị sime enjẹlḅọ ḅe pịkị ḅo iwo sịsẹmamẹ à sịngị àrị nyọ ḅụ.

²Ori ị̀ gbelamẹ, “Cheye ị́ nwọ ọrị?” Àrị ọ̀ pẹkẹrẹmẹ, “Ini goli se tẹmẹ tọnjie gbanaye.” “Anịa ọgọnọju pulo chụa bọlị omi-ẹ. Tọnjie gbanaye ọgọnọ sọnọma tọnjie omi-ẹ, gbọrịye gbọrịye sọnọma tọnjie-a ḍiki nwọ nyanamẹ.

³Mama oliv chịn tọnjie gbanaye mị angasịkị omi-ẹ, ịkọlị-ịkọlị ḅụ.”

⁴Anịsịkị àrị enjẹlḅọ ḅe gbelamẹ, “Ị̀ nyanaḅọ mịnaye ma àrị che ẹrẹ ḅụ chịẹ?”

⁵Ori ị̀ gbelamẹ, “Ị́ nemika?” “Ẹn-ẹn, à nemikẹ, ị̀ nyanaḅọ” à nwọse ọ̀ pẹkẹrẹmẹ.

⁶Enjẹlḅọ ḅe ị̀ ḅẹmẹ na à mị Nyanaḅọ Ḅe ḅara ḅo oku mị ḅọrọma Zẹrubabẹl ḅe pịrị: “Mịẹaye ị́rị́ na deinḅịa owuni kụrọḅụkẹ anịkanịka ị́ya ịnyọ ḅụkẹ, ọkụma ị̀ kụrọḅụ-ẹ anị à se ị́ pịrịḅịaye mị.

⁷Tụndụ ḍụḅa ọkụ ḍụḅaye ị́ tọrọkọ kansoḅịa. Ị́ kpoto Oputẹkẹwarị mị namaḅịa, se ị́ ḅo kuluma ḍụparị mị se anị simeḅịa kiri chụaḅịa sịkị, tomonima ini olokuḅịa, ‘Iḅimẹ, iḅimẹ!’”

⁸Jịn oku pịkị ị̀ damaḅomẹ Nyanaḅọ Ḅe ḅara.

⁹Ọ̀ nwọ ḅẹmẹ, “Zẹrubabẹl ḅe Oputẹkẹwarị fịrị mị ḅe chuku mị ọ̀ sakịsam, ori pịkị warị mị nama famaḅịa. Mịn mị pakaḅịa sịkị, ị̀ya tomonima ini nemiḅịa na Ị̀rị̀ anị ị́ se ini fịrịmaye-ẹ.

¹⁰Inia kuḅie lọkọmẹ anịatịḅị, fịrị mị ini sarasarama nwẹngịkẹ. Ọkụma ini Zẹrubabẹl ḅe ọrịḅịa ọ̀ pa Oputẹkẹwarị mị namama mun aḅẹ se inia ḅie ḅẹlẹḅịa.” Enjẹlḅọ ḅe nwọse ị̀ ḅẹmẹ, “Sọnọma tọnjie ma anị Nyanaḅọ Ḅe oria sọnọma tọrụmgbọlụ ma-ẹ sẹkiri mị mgba ọrị kelemarị ye ma-ẹ.”

¹¹Anịsịkị àrị ò gbelamẹ, “Tọnjie gbanaye ma aka ḅụ sime mama oliv chịn ma àrị che fie?

¹²Pịkị mama oliv ịkpangị ma, anị mama goli-goli pulo ḅọrọma yema ḅụ oliv-pulo mị ḅọrọarịye ma, àrị che fie?”

¹³Ori ị̀ gbelamẹ, “Ị́ nemika?” “Ẹn-ẹn, à nemikẹ ị̀ nyanaḅọ,” à nwọse ọ̀ pẹkẹrẹmẹ.

¹⁴Anịsịkị ọ̀ nwọ ḅẹmẹ, “Mịna mama apụma, ini anị ori Tamụnọ Ḅe, bebe sẹkiri mgba Nyanaḅọ Ḅe, ini fịrịnwẹngị ọ̀ pịrịḅịa ẹrẹchị sẹlẹ ọkị pịkị pulo se tịḅịkiri sarasapụ-ẹ.”