Read kirikeni Zẹkaraịa 5 Bible Online

Zẹkaraịa 5 - kirikeni bible

Zẹkaraịa 5

¹À pịkị ḍikimẹ, se mị sịkị àrị ọrịye anị, fọrụ ḅie fin ḅọrọ àrị fangala-ḍiri-pamba-ẹ.

²Enjẹlḅọ ḅe àrị ọrịye mị nwọse ị̀ gbelamẹ. Àrị ọ̀ pẹkẹrẹmẹ, “Fọrụ ḅie fin ḅọrọ àrị fangala-ḍiri-pamba-ẹ, anịa nangwọ mị ḅụọ-a soi, anịa finji mị jie-a ḅụọ.”

³Anịsịkị ọ̀ nwọse ị̀ ḅẹmẹ, “Anịa ọgọnọ gịẹịnye mị anị, mun ama mị mgba kanamaḅịa worinime mị-ẹ. Fangala-ḍiri mị ḅụ gbọrị pẹkẹrẹ ḅụ anị nwọ ḅẹmẹ na, furuḅọ goyegoye ini nụḅọ sinḅịa ama mị ḅie; pịkị ísí pẹkẹrẹ mị ḅụ anị nwọ ḅẹmẹ na yekarịfị se iruokọnḅọ goyegoye, ini pịkị nụḅọ ọkị soḅịa.

⁴Kụrọmamgba Nyanaḅọ Ḅe, nwọ ḅẹmẹ na, ọ̀ mị worinime mị gbo pakụmaḅịa, se anị mun furuḅọ goyegoye warị ḅie sọḅịa, pịkị yekarịfị se iruokọnḅọ goyegoye warị ḅie sọḅịa. Anị inia warịma ḅie sime se ini sima gulugulumaḅịa.”

⁵Enjẹlḅọ ḅe pịkị pakaḅo se nwọ ḅẹmẹ, “Ḍiki! Jịnye pịkị ḅoaḅẹ!”

⁶“Anị cheye?” à nwọ gbelamẹ. Ọ̀ pẹkẹrẹmẹ, “Gbọrị kana-ẹ, anị ama mị mgba mịẹ si ma ẹrẹ ḅụ chịẹmẹ.”

⁷Kana mị, ini ẹlẹjị se mịẹ ḅịpịgbẹịnye anị nwọ nyanamẹ. À ḍiki ọkụma ḅịpịgbẹịnye mị dekichịẹmẹ se kana mị ḅie gbọrị eremeniḅọ kpọnjị sime waraḅẹ!

⁸Enjẹlḅọ ḅe nwọ ḅẹmẹ, “Ma eremeniḅọ ma sitịḅịnyana ẹrẹ ḅụ à chịẹmẹ.” Se ori á suma kana mị ḅie gbin se pịkị ḅịpị mị gbẹịnmẹ.

⁹À tọrụ se ọgọnọ ḍiki se ḅo ọrịmẹ na mama eremeni fin ị̀ damaḅoaḅẹ, pịnabo pamba kụrọ ọkụ kụrọ pamba ma na ini na. Ini kana mị deki se anị se fin somẹ.

¹⁰Àrị enjẹlḅọ ḅe gbelamẹ, “Ini anị se nde nyọ mun-ao?”

¹¹Ọ̀ nwọ pẹkẹrẹmẹ, “Ini anị se Babilọn mun aḅẹ, anị nyọ ini oru tẹkẹ warị nama anị pịrịḅịa. Ini oru tẹkẹ warị mị namasosa ḅẹḅẹ ini kana mị se ḅie chuḅịa se anị tẹkẹtẹkẹḅịa.”