Read kirikeni Zẹkaraịa 7 Bible Online

Zẹkaraịa 7 - kirikeni bible

Zẹkaraịa 7

¹Darịọs ḅe sẹ da inein karama kụra ḅie, esenie-a akalụ (Kislev) nwọ chịn akalụ mị ḅie inein karama ene ḅụ, Nyanaḅọ Ḅe, ori oku se ị̀ fịrịmamẹ.

²Bẹtẹl apụma ini Sharẹza ḅe na Rigẹmilẹk ḅe na, inia owuapụma na, nwọ se Kụrọmamgba Nyanaḅọ Ḅe, Oputẹkẹwarị mị fịrịmasam na ini mun Nyanaḅọ Ḅe ḅẹlẹma gose tẹkẹ,

³pịkị mị gbela ḅịpị mị se agbamịẹ apụma na ịkịankoroapụma na gbela; “Wa pa kururu ma munḅe Oputẹkẹwarị mị kanye gose, anị sọnọ karama akalụ mị ḅie ḅurukụnma ḅụ, wa tọn-a kụra ḅụ mịẹmịẹsa ḅaraḅụ?”

⁴Mịn anị Nyanaḅọ Ḅe ḅara ḅo ị̀ la oku mị-ẹ.

⁵Ọ̀ nwọ ḅẹmẹ, “Ḍuko ama apụma na ịkịankoroapụma na pịrị, na ini sọnọ karama akalụ mị na sọnọmẹ karama akalụ mị na ḅie ḅurukụnma pịkị kururu àrị sịkị, mà kụra-tesi-oyi-fịnjị ma ḅie, ini ị̀ gose mịẹkẹ.

⁶Inia tọrụḅẹlẹ gose mị ini fị pịkị ḅuarịye-ẹ.”

⁷Mịn anị Nyanaḅọ Ḅe ḅọrọsa ịkịankoroapụma ḅụ ḅọrọ ḍuko aye ma-ẹ, anị mịẹaye Jerusalẹm na werewere ma mun-arị sịkị ḅụ, se tomoni pịkị anịa ḅie ḅein sịkị-ẹ, pịkị tomoni anị kelema opuamama ḅie kẹngẹ angakẹ ọkụma anịa chukuju na pịkị ịrụasọsọ nyọ tụndụma ḅụọ-chuku ama mamgba ḅie na nweni ḅeinmẹ.

⁸Nyanaḅọ Ḅe mị oku mị se Zẹkaraya ḅe pịrịmẹ:

⁹“Ḅọlọsa sịkị ḅụ, à mayema tọn ị̀ya tomonima pịrịmẹ, ‘Ọ́ ḍọkịḅo ọrị na ọ́ karakaraye mị mịẹmẹ pịkị iḅimịẹmịẹye na ḍikiḅụgerere na nyana jụmḅọ jụmḅọ pịrị.

¹⁰Deḅọ nyanakapụ na, ḍaḅọ-na-nyengiḅọ-na-ofori-apụ na, ọ́mịna ogboku anga igoni apụ na, pịkị ḍọkịfịye nyanakapụma na ómine ini pụnụmama. Se ọ́ pịkị jụmḅọ jụmḅọ se ḅụfụka ḅie chuḅịaye mịẹma.’

¹¹“Ọkụma ị̀ya tomonima ininachịn ḅụ ini poki ḍụkụkẹ. Ini inia kuḅie ma gbẹịnmẹ

¹²se inia kuḅiemgbọlụma mịẹmẹ àrị ḍụparị kụrọ ọkụ kụrọmẹ. Ḅọrọsa ini na anga ịkịankoroapụma ḅụ, à ḅọrọ se ini telimaye ma, ini nwọ pokikaye gose, àrị opuma ịganịmẹ.

¹³Àrị ọkwẹịn sịkị ini ị̀ pokikaye gose, àrị ini pẹkẹrẹkẹ ini ị̀ tẹkẹ sịkị.

¹⁴Irisi nyọ ọfịn ọkụ à nwọse ini ọfịn mun jịn sẹ ḅie koroma angamẹ. Mị iḅi ama mị ini anị se kpọngọlọma koromasam, gbọrịḅọ sọ anịa ḅie angaka ḅaraḅụ.”