Read kirikeni Zẹkaraịa 8 Bible Online

Zẹkaraịa 8 - kirikeni bible

Zẹkaraịa 8

¹Kụrọmamgba Nyanaḅọ Ḅe, mị oku mị se Zẹkaraya ḅe pịrịmẹ:

²“Àrị opuma ḍọkịmẹ ḅarachụa Jerusalẹm pịrị, à nyana anịa tomonima pịrị gbun ḅẹlẹma mị gose, anị ḅẹlẹma mị ị̀ mịẹse àrị anị na tarakapụma ḍikiḅieḅu mị ḅẹlẹmamẹ.

³À vinpịkị Jerusalẹm munḅịa, ị̀ya fịafịa opuama mị, se àrị anị nyọ angaḅịa. Tomoni kuḅie-se-ḅụgbana gbẹịn opuama ḅara ini nwọse anị nemiḅịa, pịkị Kụrọmamgba Nyanaḅọ Ḅe chịngị mị, ini nwọse anị chịnḅịa osi nyana chịngị.

⁴Gbọrị sịkị amgbara se dọ nwẹngị opuma olomusa owuapụ na opuma olomusa eremeni na pịkịḅo inia amgbara ma na amaogbo ma ḅie simeḅịa.

⁵Se ateli ma ḅie owuapụ awọ na eremeni awọ na ḅein se tima ḅọrọḅịa.

⁶“Mịn mị ineda mịẹ-ẹka-ḅara sime ini mịọkụ koromaso-a sẹma pịrịḅịa, ọkụma anị ọkọ sime ị̀ pịrị-ẹkẹ.

⁷Àrị ị̀ya tomonima ḍụapakụmaḅoḅịa ini ini ọkị so mun amama ḅie,

⁸se ịrụapakapaka nyọ na, ịrụasọsọ nyọ na àrị ini ọkị pakụma ini ḅo Jerusalẹm ḅie angaḅịa. Ini ị̀ya tomoni sọḅịa, ị̀rị̀ pịkị inia Tamụnọ sọḅịa, kuḅie se ḅụgbana gbẹịn ḅaraḅụ na karakara ḅaraḅụ na à ḅẹrẹtọn ini pịrịḅịa.

⁹“Ó kuḅiekụrọ nyana! Ịkịankoro apụma anị ene, ini ị̀ya Oputẹkẹwarị mị kpoto nwọ namaḅịa ẹrẹchị chụa chuku sẹkẹ ḍụparị mị sara àrị sịkị, kọn gbọrị ọkwẹịn ma, ọ́ pịkị nwọ na aḅẹ mịọkụ.

¹⁰Tẹrẹrẹ anị anịsịkị la, ineda tomoniḅọ anịkanịka nama ọkị se ọkọ fịrịnwẹngị gbọrịḅọ sọ ofori-ẹ pịkị nụḅọ na tarakaḅọ na dein nyanaḅọ ofori-ẹ. À tomonima mịẹ se ini jụmḅọ jụmḅọ dapakamẹ.

¹¹Ọkụma mịọkụ à kịrịḅara se mị sẹ ḅie kọn apụma na anga aḅẹ.

¹²Ini deinma inia fịayema ḍipiḅịa. Inia irumịẹ chịnmgbọlụ ozuma àrị tụmgbakị elelenda chụaḅịa, kiri mị fịaye pakụmaḅịa, pịkị ene ḅakama koroḅịa. Mà ḅẹlẹma mamgba, à se ị̀ya sẹ mị ḅie sime kọn apụma pịrịḅịa.

¹³Juda na Izrẹl na tomoni! Jịn sẹ apụ ḅọrọsa sịkị ḅụ, se nime mịẹ jụmḅọ jụmḅọ wori wori se nwọ ḅẹmẹ, ‘Ye Juda apụma na Izrẹlapụma na ḅụ paka ḅụfụka ọ́mịna ḅụ paka!’ Ọkụma àrị ómine ḍụaḅịa se ini jịn sẹ apụma pịkị nwọse jụmḅọ jụmḅọ ḅẹḅịa na, ‘Juda apụma na Izrẹlapụma na damaḅo ḅẹlẹma ma ọ́ dapaka!’ Anịgose ó kuḅie kụrọ nyana, ọ́ pịkị ḅalafama.”

¹⁴Kụrọmamgba Nyanaḅọ Ḅe nwọ ḅẹmẹ, “Ọ́mịna ḅieju-a ḍapụma ị̀ ịganịma sịkị, à ḅụfụka tọn ini pịrịmẹ, à pịkị ị̀ kuḅie ḍinmakẹ, ọkụma à tọn ḅara à nwọ mịẹmẹ.

¹⁵Ọkụma mịọkụ à Jerusalẹm-a tomonima na Juda-a tomonima na ḅẹlẹmaḅịa nwọ tọn-aḅẹ. Anịgose ọ́ ḅalafama.

¹⁶Ma ma anị ọ́ mịẹḅịaye ma-ẹ, ọ́ karakaraye mị ḍuko jụmḅọ jụmḅọ pịrị. Ḅẹrẹkọn-a warịma ḅie karakara ḅẹrẹ ọ́ nwọ kọn—anị deinma ọkị ḅoḅoye mị.

¹⁷Ye se jịnḅọ jịnḅọ lamaḅịaye ọ́ nwọ tọnma. Yekarịfị se iruo onyechịẹma. Iruo kọn na karakarakaye na kụrọ-amịẹmịẹye na à nwọ ḍikiḅụjịjịmẹ.”

¹⁸Kụrọmamgba Nyanaḅọ Ḅe mị oku mị se Zẹkaraya ḅe pịrịmẹ:

¹⁹“Ini ḅurukụnma kụnma inein karama akalụ ma ḅie na sọnọ karama akalụ ma ḅie na sọnọmẹ karama akalụ ma ḅie na pịkị oyi karama akalụ ma ḅie na ḅo ḅieḅẹlẹ alalị sọ Juda apụma pịrịḅịa. Karakaraye na deinma na ọ́ nwọ ḅẹlẹma.”

²⁰Kụrọmamgba Nyanaḅọ Ḅe, nwọ ḅẹmẹ, “Tọntọn-a opuama ḅieapụ Jerusalẹm ḅoḅịa sịkị ḅoaḅẹ.

²¹Gbọrị sẹ ḅie pakaḅo apụ nwọse jịn sẹ ḅieapụ ḅẹḅịa, ‘Wa mun Kụrọmamgba Nyanaḅọ Ḅe, tẹkẹ se tịḅịtu ọ̀ pịrị-o mun-aḅẹ oria ḅẹlẹma gose. Ḅo mịna ḅụ sọ!’

²²Tọntọn-a apụ na kụrọ-a sẹ na Jerusalẹm ḅoḅịa, ḅo tịḅịtu pịkị Kụrọmamgba Nyanaḅọ Ḅe, tẹkẹḅịa oria ḅẹlẹma gose.

²³Árị-ene-ma-ḅie, oyi-a igoniapụ gbọrị Juḅọ damaḅo se ọ̀ ḅẹḅịa, ‘Wa ómine na simeḅịa anịatịḅị wa naasam na Tamụnọ Ḅe ori ómine na omi-ẹ.’”