Read kirikeni Malakaị 1 Bible Online

Malakaị 1 - kirikeni bible

Malakaị 1

¹Mịn mị anị Nyanaḅọ Ḅe se Malakaị ḅe pịrị na ḍuko Izrẹlapụma pịrị-ẹ nwọḅẹ oku mị-ẹ.

²Nyanaḅọ Ḅe nwọse oria tomonima ḅẹmẹ, “Sịkịmamgba àrị ọ́ ḅẹlẹmamẹ.” Ọkụma ini nwọ pẹkẹrẹmẹ, “Nde mịnaḅụ ị́ya ḅẹlẹma mị ị́ nwọ ḍiepakụma ọkụ?” Nyanaḅọ Ḅe nwọ pẹkẹrẹmẹ, “Isọ ḅe na Jekọb ḅe na mịnapụ-ẹ, ọkụma à Jekọb ḅe na ò furo ḅie pakaḅo apụma na nwọ ḅẹlẹmamẹ,

³se à pịkị taraka se Isọ ḅe na ò furo ḅie pakaḅo apụ na wẹrịmamẹ. Isọ ḅe oria chịngị-chịngị sẹ mị àrị anị fama se anị wẹrị so piri obirima pịrịsam, na piri obirima ḅo anịa ḅie anga, mịẹse tomoni ḅarị ḅo anịa ḅie anga-ẹka ḅara.”

⁴Isọ furo ḅie pakaḅo apụma, anị Idọm apụma nemikase nwọḅẹmẹ na, “Mịna amama fasosam, ọkụma wa pịkị àrị nama chịẹmaḅịa nwọḅẹ ọkụma,” anịsịkị Nyanaḅọ Ḅe ọ̀ nwọ pẹkẹrẹḅịa, “Ye ini pịkị kpoto àrị nama chịẹma—à pịkị àrị kan kiri saraḅịa.Tomoni nwọse ini chịnḅịa ‘Siaye mịẹmịẹ ama’ Nyanaḅọ Ḅe pịkị ịganị nyana pịrị gbaso sẹ.”

⁵Izrẹlapụma ini ḅarana inia tọrụmgbọlụma se mịn mị ọrịḅịa, se ini nwọḅẹḅịa na “Nyanaḅọ Ḅe ori opuḅọ-ẹ Izrẹl mị na sasa amama ḅie sọnị!”

⁶Kụrọmamgba Nyanaḅọ Ḅe nwọse agbamịẹ apụma ḅẹmẹ, “Tọkụ mịna ḍaḅọ osisimẹ, fịrịnwẹngịḅọ pịkị ọ̀ nyanaḅọ ḅe osisimẹ. Ị̀rị̀ ọ́mịna ḍa-ẹ—cheye gose ómine ị̀ osisika? Ị̀rị̀ ómine nyanaḅọ-ẹ—cheye gose ómine ị̀ osisika? Ómine ị̀ ḍikisimamẹ, anịẹḅẹsọ, ó gbelaḅẹ, ‘Nde wa ị́ ḍikisima ọkụ?’

⁷Mị ó se ị̀ ḍikisima àrị ọkụ-ẹ—yeḅụsọka ḍiepịrịaye agbamịẹ fịaye se ị̀ya agbamịẹ ẹbẹ ọgọnọ gbana ḅụ. Anịsịkị ọ́ pịkị gbelamẹ, ‘Nde osi se ị́ pịrị mị ḅụ wa ḅịkị ọkụ?’ À ḍuko ọ́ pịrịḅịa—ị̀ya agbamịẹ ẹbẹ mị se yechịnka ḅụ-ẹ.

⁸Ọ́ nwọ tọrụmgbọlụ pụn, anịkanịka obi, anịkanịka ikeli nama nwọse ḅo agbamịẹ ị̀ pịrịarị sịkị, ọ́ chịnḅara anị mị ḅụ mịẹ irimaye ofori? Ọ́ pa ọkọ sime nama se ọ́mịna gọvịna ḅe pịrị ḍiki! Ori ómine ḍikiḅieḅẹlẹ se iḅitọrụ se ó ḍikiḅe?”

⁹Mịọkụ, ómine agbamịẹ apụ, ọ́ Tamụnọ Ḅe ḅẹaḅẹ na, ọ̀ pa iḅiọkụma mine na anga, ọ́mịna tẹkẹma ọ̀ pẹkẹrẹ ẹkẹ, anị mị ọ́mịna ḅara ḅomẹ.

¹⁰Kụrọmamgba Nyanaḅọ Ḅe nwọ ḅẹmẹ, “À ḅiḅịa, mgbọkụ ọ́mịna ḅie gbọrịḅọ Oputẹkẹwarị ḅọkọ ma palị, se ómine dachịẹma, mịẹse ómine ị̀ya agbamịẹ ẹbẹ mị ọgọnọ yeḅụsọka fịnị tọnọ ẹka ọkụ. Àrị ómine ḍikiḅieḅẹlẹkẹ. Ó se ḅo ị̀ pịrịarị ḍiepịrịaye agbama à àrị ọkị ẹkẹ.

¹¹Tomonikiri mị ḅie, gbọrị ịkọlị ọkịmun ísí ịkọlị la, tomoni osi nyana ị̀ pịrịmẹ. Nyọ goyegoye ḅụ ini insẹnsị dọkịma ị̀ pịrị, pịkị ị̀ ḅụḅẹlẹ agba nwọ mịẹ ị̀ pịrịpịrịmẹ. Inimgba ini osi nyana ị̀ pịrịmẹ!

¹²Ọkụma ómine ma ómine osi nyana ị̀ pịrịkẹ, ọ́ nwọ agbamịẹ ẹbẹ mị ọgọnọ ó ḍikisimasa fịaye nwọse agbamịẹarị sịkị, anị ọ́ ḅẹaḅẹ na, ị̀ya agbamịẹ ẹbẹ mị anị yeḅụofori-ẹ.

¹³Ọ́ nwọ ḅẹmẹ na, ‘Mịmịmgba mịẹfama sosịkị, mịnaḅụ ịnyọfasam!’ se ómine ọ́mịna nini ma dekichịẹma ị̀ daḅịa. Ó furu nama, anịkanịka ikeli nama, anịkanịka obi-ḅụ-sime-nama anị ó se ḍiepịrịaye agbamịẹ ị̀ pịrịarịye-ẹ. Ọ́ chịnḅara anị mị ọ́mịna ḅara àrị anị daọkịḅe?

¹⁴Oria namama ḅie gbọrị iḅi nama ọ̀ nwọse agbamịẹ ị̀ pịrịḅịa nwọse ye ḅereni, se ḅo yeḅụsọka nama nwọse agbamịẹ ị̀ pịrị nweni inumaḅọ ḅe, worinime sime ọ̀ pịrịmẹ! Anịatịḅị ị̀rị̀ opu amanyanaḅọ-ẹ, sẹ sẹma ḅie sime tomoni mamgba ini ị̀ ḍikiḅalafamẹ.”