Read kirikeni Malakaị 2 Bible Online

Malakaị 2 - kirikeni bible

Malakaị 2

¹Kụrọmamgba Nyanaḅọ Ḅe nwọse agbamịẹapụma ḅẹmẹ, “Mị oloko mị anị sime ọ́ pịrịmẹ.

²Ọ́mịna mịẹmịẹaye ḅụ ómine osi se ị̀ pịrị nyanamẹ. Ó nemikase à ḍukoye mị naa se anị mịẹkẹ ḅẹḅẹ, à fomuḅara se ọ́ pịrịḅịa. Ómine ọkị se ḅarachụa ọ́mịna ḅụ pịrịarịaye ma ọgọnọ à worinime se gbanaḅịa. À jokoma worinime se arịa ọgọnọ gbanasam anịatịḅị ọ́mịna kuḅie laḅara ọ́ nwọse ị̀ya olokoma ọkịkẹ.

³À fomuḅara se ọ́mịna awọma pịrịḅịa, se àrị ọ́mịna tọrụ ma se ó se agbamịẹ namama ḅịẹ fịnya ma ḅie guroḅịa se àrị ómine se gbin wokumaḅịa.

⁴Anịsịkị ó nemiḅịa na, Ị̀rị̀ mị oloko mị chụa ọ́ pịrịmẹ, mịẹso sịkị ị̀rị̀na Livaị furoḅie pakaḅo agbamịẹ apụma na fị ọḅọkụ mị kan ẹka ḅara.

⁵“Ị̀ya ọḅọkụ mị ḅie, ḍumo na yedein na à nwọse yeḅereni ini pịrịmẹ, mị anị à pịkị se ini pịrịye-ẹ, mịẹse ini ị̀ osiḅịa ḅara. Àrị enema ḅie, ini ị̀ osi pịkị ị̀ ḍikiḅalafafamẹ.

⁶Karakaraye ini nwọse nweni telima-telimamẹ, siaye ini nwọ telima-telimakẹ. Ini ị̀rị̀ na ḅịpịse-ogbosọ ḅụ angamẹ; ini na mịnaḅụ na karakaraye kẹngẹ ini nwọ mịẹmịẹmẹ, ini pịkị ḅarachụa tọn apụ pịrịse ini ḅarị siaye mịẹmịẹkẹ.

⁷Karakara Tamụnọ nemi mị se tomonima telima fịrị mị, sime agbamịẹ apụma pịrịmẹ. Tomoni ini damamun se à tọn ayema ḍawọḅịa, anịatịḅị ini ma, Kụrọmamgba Nyanaḅọ Ḅe oria fịrịnwẹngịapụ-ẹ.

⁸“Ọkụma, mịọkụ ómine agbamịẹ apụ, ómine ọḅụ pịkị karakara ateli mị gbinsam. Ó se tomonima telimarịaye ma, tọn apụ damun iriaye mịẹmẹ. Àrị ómine na fị ọḅọkụ mị ọ́ kansam.

⁹Anịẹrẹchị ị̀rị̀, mị sịkị, à mịẹḅịa Izrẹlapụma ini ómine ḍikisimaḅịa, anịatịḅị ị̀ya olokoma ó kokokẹ, ọ́ pịkị yese ị̀ya tomonima telimarị sịkị, inimgba gbọrị ḅara ọ́ nwọse ini na angakẹ, anịatịḅị ọ́ tọrụ ḍikiḍiki angaḅẹ.”

¹⁰Mine mgba gbọrị ḍaḅọ wa nwọ nyanaka? Gbọrị Tamụnọ Ḅe mine mgba tẹmẹka? Anịọkụma cheye gose wa ḅereni jụmḅọ jụmḅọ pịrịayema wa nwọ kansin, cheye gose Tamụnọ Ḅe na mịna olomu-aḍapụma na fị ọḅọkụ mị wa pịkị nwọ ḍikisima-ao?

¹¹Juda apụma ini ḅereni Tamụnọ Ḅe pịrịye mị ini kansam, ini pịkị Jerusalẹm mị ḅie na pịkị bebe sẹ mị mgba kanakoro, tomoni ḅụḅẹlẹka opu ḅalafama siye nwọ mịẹsam. Nyanaḅọ Ḅe ḅẹlẹma Oputẹkẹwarị mị, ini anị pụlamasam. Owuapụma, jịn-a sẹ oru tẹkẹtẹkẹ eremeni ini nwọ ọkị simesam.

¹²Nyanaḅọ Ḅe Izrẹl tomoni ogbo mị ḅie ma ayema mịẹapụ ma sin, se ngịsị ọ́ ḅarị ḅereni ini pịrịma, mịna sẹ mị ḍiepịrịaye agba se ḅo Kụrọmamgba Nyanaḅọ Ḅe pịrịḅịa sịkị ini ḅụ se chu.

¹³Mị ọ́ pịkị mịẹmịẹ jịnye-ẹ. Nyanaḅọ Ḅe oria agbamịẹ ẹbẹ mị, ọ́mịna tọrụmgbọlụ owu-a mengi ma ọ́ nwọse anị ḅilema-ḅilemamẹ, ómine owuwu olokuaḅẹ, ó se ḅo ọ̀ pịrị ḍiepịrịaye agbama ọ̀ ḅarị nwọ ọkịkaye gose.

¹⁴Ị́ gbelaḅẹ, cheye gose ọ̀ ḅarị àrị ọkịkịka nọ? Anịatịḅị, ò nemimẹ na ị́ya asẹmẹnị sịkị ḅụ, ị́ sime eremeniḅọ, ị́ ta ma, ị́ ḅereni á pịrịye mị ị́ kansam. Árị ma ị́ya arụḅọ-ẹ, se ị́ ḅereni á pịrịye mị ị́ kansam anị Tamụnọ Ḅe tọrụkuḅu ị́ ḅereni ọkịmẹ na, ị́ iḅiọkụma árị ọkị pịkị á ḅụ ḅereni nyanaḅịa nwọḅẹye mịẹ.

¹⁵Tamụnọ Ḅe ị́rị́na-árị-na gbọrị oju, gbọrị tẹmẹ ọ̀ nwọse ọ́ tẹmẹka? Ò gose mịn mị mịẹye cheye? Anịatịḅị ómine awọmẹnị nyanaḅịa jokoma sime Tamụnọ Ḅe pịrị apụ. Anịẹrẹchị ọ́ ḍọkịḅo ọrị na, ọ́mịna ḅie gbọrịḅọ ḅereni tarọ ma pịrịye mị nwọ kankẹ.

¹⁶Kụrọmamgba Nyana Izrẹl Tamụnọ Ḅe ọkọ ḅẹmẹ, “Ama-na-ere-na kan mị ị̀ ḅụḅẹlẹ ḅẹlẹkẹ.” “Ọ́mịna ḅie gbọrịḅọ ọkọsime siye se nụḅọ na sime eremeniḅọ mịẹ mị, ị̀ ḅụḅẹlẹ ẹkẹ. Ḍọkịḅo ọrị na ị́ ḅereni ị́ ta ma pịrị na ị́ iḅiọkụma árị ọkị pịkị á ḅụ ḅereni nyanaḅịa nwọḅẹye mị ị́ anị kankẹ.”

¹⁷Ọ́mịna ọkwẹịn ma ó se Nyanaḅọ Ḅe ḅụ ịnyọ famasam, ọkụma ọ́ nwọ gbelamẹ na, “Nde wa ọ̀ ḅụ ịnyọ fama ọkụ?” Ọ́ ḅẹaḅẹ na, “Tamụnọ Ḅe, Kụrọmamgba Nyanaḅọ Ḅe, ò kuḅie ḅụ siyemịẹapụma sọ iḅi apụ-ẹ; na inia mịẹmịẹye jokoma ọ̀ ḅụḅẹlẹmẹ.” Anịkanịka ó gbelaḅẹ na, “Karakara Tamụnọ Ḅe nde oria karakara mị?”