Read kirikeni Matio 12 Bible Online

Matio 12 - kirikeni bible

Matio 12

¹Mà opuma ḅọlọka simeogbo Jizọs Ḅe ịpịamgba ozuma ḅie nwẹngị ḅọrọarịogbo, Ịnyọsara Ene mị ḅụ, ḅuru oria ọḅụḍukoapụma tarịmẹ. Anị ini sakị ịpịamgbama kaịn fịye-ẹ.

²Farisiapụma mịn mị ọrị sịkị, ini nwọse Jizọs Ḅe ḅẹmẹ, “Ḍiki, anị mịna Olokoma na kurakẹ ị́ya ọḅụḍukoapụma Ịnyọsara Ene mị ḅụ mịn mị mịẹ!”

³Jizọs Ḅe ini pẹkẹrẹmẹ, “Devid ḅe mịẹye mị ngịsị ma ó goka ḅuru ori na oria tomonima na tarị sịkị?

⁴Ọ̀ Tamụnọ warị mị ḅie sọmunmẹ, se ori na oria tomonima na ini se Tamụnọ pịrị fịturu nwọ deki fịmẹ, anị Oloko na kurakẹ nwọ ḅẹ sọnị ini anị deki fịmẹ—agbamịẹapụma kẹngẹ mị anị fịturu mị sime pịrịye-ẹ nwọ ḅẹ sọ.

⁵Anịkanịka Moziz Oloko mị ḅie ma ó goka, na Ịnyọsara Ene goyegoye Oputẹkẹwarị mị ḅie sime agbamịẹapụma Ịnyọsara Ene Oloko mị nwọ kankanmẹ ḅẹye mị, anị sọnị ḅẹrẹ inia ḅara sika-ẹ?

⁶À ḍuko ọ́ pịrịaḅẹ, na ḍụḅatẹịn Oputẹkẹwarị mị nẹngịye mịanga omi-ẹ.

⁷Fịafịa ḍiri mị nwọ ḅẹmẹ, ‘Nama se mịẹ agbama à nwọ ḅikẹ, ọkụma, iḅi mịẹmịẹye re-ẹ.’ Mịn mị fiearịye ọ́ kọkọma nwọ nemi ọkụma, mgbọkụ ọ́ ḅẹrẹsi kọn se ḅẹrẹḅarasikapụ pịrị ẹkẹ;

⁸anịatịḅị Tomoniḅọ Tọkụ Ḅe mị Ịnyọsara Ene mị Nyanaye-ẹ.”

⁹Jizọs Ḅe anị nyọ koromaso se inia tẹkẹwarịma ḅe gbọrịye nwọ mun mẹ,

¹⁰gbọrị owuḅọ anị nyọ simemẹ, oria gbọrị ḅara fịmẹ. Jịn apụ pịkị anị nyọ ḅụ omi-ẹ anị Jizọs Ḅe ḍukosima ḍọkịapụma. Anị ini ò gbelaye-ẹ, “Anị mịna Oloko na kuraka Ịnyọsara Ene ḅụ nweni gwọ mị?”

¹¹Jizọs Ḅe ini pẹkẹrẹmẹ, “Nde ọ́ mịẹḅịa ọkụ, ọ́mịna ḅie gbọrịḅọ nemikase gbọrị anana nwọ nyana, se ori Ịnyọsara Ene mị ḅụ sokoro olulu ḅie koro ọkụma? Ori ori ọlọ se ò jine pakụmaḅo ẹka?

¹²Ọkụma tomoniḅọ ḅe ori iḅi ḅara nwọse yela gbọrị anana nẹngịmẹ! Anịẹrẹchị, Oloko mị anị kọkọma ḅereni wa pịrịmẹ na wa ḅarachụa tomoniḅọ pịrị Ịnyọsara Ene mị ḅụ.”

¹³Anị ọ̀ nwọse ḅara fị ḅọ ḅe ḅẹye-ẹ, “Ị́ ḅara ịsụn pakụma.” Ori anị ịsụn pakụmamẹ, se anị ḅo pịkị iḅimẹ, ísí ye mị simeọkụ.

¹⁴Ọkụma Farisiapụma somun ḅẹrẹḅia Jizọs Ḅe pịrịmẹ ọ̀ ḅaaḅịa ẹrẹchị.

¹⁵Jizọs Ḅe ini ò se ịbafịaḅẹ nwọḅẹ ye mị naa sịkị, ori anị nyọ mị koromasomẹ, se ḅaka tomonikpo ò ḍukomẹ, se ori obiapụ mamgba nwọ gwọmẹ.

¹⁶Ori inia ḅeri jinemẹ na ini ọ̀ ḅụ ḅẹrẹ ḍuko jịn apụ pịrị ma-ẹ.

¹⁷Mịẹse Tamụnọ Ḅe, ịkịankoro Aịzaya ḅe ḅụ ḅọrọ kọn ọkwẹịn mị ḅo kọkọmaye sọḅịa ḅara:

¹⁸“Ḅe ị̀ya fịrịnwẹngịḅọ ḅe-ẹ, à sẹlẹ ọkịsa ḅọ ḅe, à ḅẹlẹmaḅọ ḅe, àrị iḅiọkụ ḍikiḅieḅẹlẹ ḅọ ḅe. Àrị ị̀ Tẹmẹ se oria ọgọnọ gbanaḅịa, se ori ị̀ya ḅẹrẹkọn mị ḍuko sẹ mamgba pịrịḅịa.

¹⁹Ọkụma ọ̀ ḅẹrẹ nụnụa ẹkẹ anịkanịka oloku ẹkẹ, pịkị ateliogbo oloku ọkwẹịn ẹkẹ.

²⁰Ori andasa nangwọ osuein anyịma ẹkẹ, anịkanịka mụnụmụnụma kọrịarị tọnjie binma ẹkẹ. Karakara ḅẹrẹkọn mị ḅe ọmụḅaraiḅi ọ̀ nwọ ḍọkịḅịa ọkịmun anịa kuluma nwọ la,

²¹se tomoni mamgba kuḅie se ọ̀ ḅụ gbanaḅịa.”

²²Anịeso gbọrịapụ gbọrị owuḅọ nwọ ọkịḅo Jizọs Ḅe pịrịmẹ, tọrụmgbọlụpụn se pịkị ineda ọkwẹịnka ḅọ, anịatịḅị sitẹmẹ ò ḅie omi-ẹ. Jizọs Ḅe tomoniḅọ ḅe gwọmẹ, se, ori ineda ọkwẹịn se pịkị ye ọrịmẹ.

²³Tomonikpo mị mgba ḅụgbiripumẹ Jizọs Ḅe mịẹye mị ḅụ. Ini nwọ gbelamẹ, “Ḅe Devid Tọkụ ḅe ori mọnọ?”

²⁴Farisiapụma mịn mị naa sịkị ini pẹkẹrẹmẹ, “Ò si-a-tẹmẹma nwọ desinmẹ, anịatịḅị, si-a-tẹmẹma tịḅịnịḅọ ḅe kụrọ se ọ̀ pịrịmẹ ò se nwọ sime fịrị nwọ nwẹngị.”

²⁵Jizọs Ḅe ini koromarịye mị nemimẹ, se nwọse ini ḅẹmẹ, “Maịn pua se jịnye jịnye na owusọarị sẹ goyegoye anị faḅịa ḅọlọka sịkịḅụ. Ama anịkanịka furo nemikase maịn pua se jịnye jịnye na owusọ ọkụma, àrị galagalaḅịa.

²⁶Nemikase oru amanyanakiri mị ḅie, gbọrị kpo owu se ísí kpo mị paka àrị ọkụma, anị mị fieaḅẹ na anị pua pẹkẹrẹ pẹkẹrẹ ḅụ simesam, nde ọkọsime amanyanakiri tọrọkọmunḅịa ọkụ?

²⁷À ḅọrị nemikase Si-a-tẹmẹma tịḅịnịḅọ se ị̀ pịrị kụrọ nwọse sitẹmẹ desin aḅẹ nwọḅẹ ọkụma, tụḅọ kụrọ se ọ́mịna ọḅụḍukoapụma pịrị se ini se àrị depakụma-ao? Ye ọ́mịna ọḅụḍukoapụma ngẹrị anị ḅẹrẹ kọn ọ́ pịrị!

²⁸Ẹn-ẹn, Si-a-tẹmẹma tịḅịnịḅọkẹ, ọkụma Tamụnọ Tẹmẹ Ḅe mị kụrọ se ị̀ pịrị, à se si-a-tẹmẹma depakụmarịye-ẹ, anị mị ḍiepakụmamẹ na Tamụnọ Amanyanakiri mị anị ḅo ọ́mịna ọgọnọ gbanasam.

²⁹“Gbọrị tomoniḅọ sọnị ineda kụrọḅọ warị kan se sọmun ọ̀ nyana aye nwọ dekiso ẹkẹ, ọ̀ tatarị kụrọḅọ ḅe fịna koromaka simeogbo, anịsịkị re mị ori ineda oria warị nwọ ọfọịnḅịaye-ẹ.

³⁰“Ị̀ ḅụ simeka ḅọ omi-ẹ ḅẹḅẹ iniḅọ owuse ị̀ dapakaḅẹ, ḅarachụa ị̀rị̀ na koḅirika ḅọ goyegoye iniḅọ galagalamaḅẹ.

³¹Mịn mị gose à ḍuko ọ́ pịrịaḅẹ: tomoni mịẹ si goyegoye pịkị ḍuko siye goyegoye ini ḅarasin iniḅọ pịrịḅịa, ọkụma Fịafịa Tẹmẹ Ḅe na tụḅụrụye ḍuko ḅọ goyegoye ini si ḅụ ḅarasin iniḅọ pịrị ẹkẹ.

³²Tomoniḅọ Tọkụ Ḅe ḅụ si ọkwẹịn kọn ḅọ goyegoye ini ḅarasin iniḅọ pịrịḅịa, ọkụma Tamụnọ Tẹmẹ Ḅe ḅụ siye ḍuko ḅọ goyegoye ini ḅarasin iniḅọ pịrị ẹkẹ—mịọkụ, anịkanịka ọkịmun ḅẹsịkị ḅẹsịkị la.

³³“Chịn mị nwọ mịẹ iḅima, anịsịkị mị anịa mgbọlụ mị sọ iḅiḅịaye-ẹ, ị́ nemikase si chịn nyanamẹ ḅẹḅẹ, ị́ pịkị si chịnmgbọlụ nwọ nyanaḅịa. Anịatịḅị ị́ se chịn mị nemiḅịaye, anị anị chụa chịnmgbọlụ mị ḅụ-ẹ.

³⁴Ómine sịkịmamgba si ọkwẹịn kọn àrị apụ nde ómine ineda iḅiye ḍukoḅịa ọkụ, ó si warasịkị? Anịatịḅị kuḅiemgbọlụ ḅie sime ye, mị ḅịpị mị anị ọkwẹịn pakụmaḅịaye-ẹ.

³⁵Iḅi ḅọ ḅe oria iḅi ye koko nyọ mị ḅie mị ori iḅi-a ye pakụmaḅoḅịaye-ẹ, anị si ḅọ ḅe sọ oria si ye koko nyọ mị ḅie si aye pakụmaḅoḅịa ọkụ-ẹ.

³⁶“Anị ị́ ḅụokoroḅịa na Ḅẹrẹkọn Ene mị ḅie tomoniḅọ goyegoye iniḅọ kọnsa si ọkwẹịn ḅe opoli nwọ tọnḅịa.

³⁷Ị́ya ọkwẹịnma ini nwọ ḍikima ḅẹrẹkọn ị́ pịrịḅịa—se ḍiepakụma na ị́ mịẹye ofori-ẹ, anịkanịka ḅẹrẹ ị́ ḅara sime, ini nwọse ị́ ḅẹḅịa.”

³⁸Anịeso tọn-a Oloko ḍieapụ na tọn-a Farisiapụ na nwọse Ọ̀ ḅẹmẹ, “Yeḍieḅọ,” ini nwọ ḅẹmẹ, “Wa ḅimẹ ị́ gbọrị ḅụbuamaye mịẹ wa ọrị.”

³⁹“Mịmgba ene mị ḅe apụma si, se pịkị Tamụnọ nemika ọkụ ḍiki! Jizọs Ḅe nwọse ini pẹkẹrẹmẹ. Ómine ị̀ ḅara ḅụbuamaye nwọ ḅi? Ẹn-ẹn! Se ọ́ pịrịḅịa ḅụbuamaye anị ịkịankoro Jona ḅe ḅụbuamaye mị kẹngẹ-ẹ.

⁴⁰Jona ḅe opu inji ḅe ḅụlọ ḅie tẹrẹ-a enekaka na tẹrẹ-a ḍin na nwọse sime ḅara mị, anị Tomoniḅọ Tọkụ Ḅe pịkị kiri mị ḅie tẹrẹ-a enekaka na tẹrẹ-a ḍin na nwọse simeḅịa ọkụ-ẹ.

⁴¹Ḅẹrẹkọn Ene mị ḅụ, Ninivẹ-apụma sịsẹ chịẹ, ḅẹrẹkọn ọ́mịna ọgọnọ gbanaḅịa, anịatịḅị ini inia sima ḅụ vinpịkịmẹ, Jona ḅe Tamụnọ ḅẹrẹ mị ḍuko ini pịrị sịkị; à pịkịna ḍuko ọ́ pịrịaḅẹ na Jona ḅe nẹngịḅọ mịanga omi-ẹ!

⁴²Ḅẹrẹkọn Ene mị ḅie Shiba Amanyanaḅọ eremeniḅọ ma sịsẹ ḅẹrẹkọn ọ́mịna ọgọnọ gbanaḅịa, anịatịḅị árị arịa ama wẹrịso se Amanyanaḅọ Sọlọmọn ḅe ḅie sime yenemi ọkwẹịnma nwọ pokimẹ ọkụma à ḍuko ọ́ pịrịaḅẹ na, Sọlọmọn ḅe nẹngịḅọ mịanga omi-ẹ!

⁴³“Sitẹmẹ mị tomoniḅọ ḅie pakaso sịkị, anị kpoinkpoin kiri nwọ nwẹngị kelema se ịnyọsara anga ḍọkịḅịa, anị ineda gbọrị nyọ sọ ḍọkịḅoka ọkụma,

⁴⁴anị nwọse mịnaḅụ ḅẹḅịa, ‘À vinpịkị à koromaso ị̀ya warị mị nwọ munḅịa.’ Se anị vinpịkị mun se ọrịmẹ na, ye anịa ḅie ofori-ẹ, fịafịa, se yemamgba ọrụtọnma sime waraḅẹ.

⁴⁵Anịsịkị anị pakamun si anị nẹngị jịn sọnọma siatẹmẹ nwọ ọkị anịa ḅụ chụaḅịa, se ḅo anị nyọ angaḅịa. Anị ḅe kuluma, ori tomoniḅọ ḅe ò sitẹịn tatarị ò sime ḅara mị nẹngịḅịa. Mịn ḅara mị anị anị paka mịmgba ene mị ḅie sime siapụma pịrịḅịa ọkụ-ẹ.”

⁴⁶Jizọs Ḅe ọ̀ pa ọkwẹịn tomonima pịrịarịogbo anị nyọngọrọma na oria owuapụ mịnapụma na ḅo laye-ẹ. Ini nụngọ ogbo chịẹ simemẹ, se ori na ọkwẹịnḅịa ẹrẹchị.

⁴⁷Anị tomonima ḅie gbọrịḅọ nwọse ọ̀ ḅẹye-ẹ, “Ḍiki, ị́ nyengima na ị́ya owuapụ mịnapụma na nụngọ ogbo ini chịẹ waraḅẹ, ị́rị́ na ọkwẹịnḅịa ẹrẹchị.”

⁴⁸Jizọs Ḅe nwọse ọ̀ pẹkẹrẹmẹ, “Ị̀ nyengima anị tụḅọ? Ị̀ya owuapụ mịnapụ anị tapụ?”

⁴⁹Anị ọ̀ ḅara se oria ọḅụḍukoapụma tọkụma se nwọ ḅẹye-ẹ, “Ḍiki! Mịnapụma anị ị̀ nyengima na ị̀ya owuapụ mịnapụma na-ẹ!

⁵⁰Soḅie ị̀ Ḍa Ḅe ḅi na mịẹ nwọ ḅẹ ye mịẹ ḅọ goyegoye anịḅọ mị ị̀ mbire-ẹ, pịkị ị̀ mbụra-ẹ, pịkị ị̀ nyengi-ẹ.”