Read kirikeni Matio 15 Bible Online

Matio 15 - kirikeni bible

Matio 15

¹Anịsịkị tọn-a Farisiapụ na Oloko ḍieapụma na Jerusalẹm ḅụ wẹrị Jizọs Ḅe damamun se Ò gbelamẹ,

²“Cheye ẹrẹchị ị́ya ọḅụḍukoapụma mịna ḅieju-aḍapụma se wa pịrị ḍieye mị nwọ mịẹ ḍụkụka? Ini iḅiḅara se inia ḅarama sịkịrịka se ye fịfịmẹ!”

³Jizọs Ḅe ini pẹkẹrẹmẹ, “Ómine ó cheye gose Tamụnọ Ḅe tọnye mị nwọ mịẹka se ọ́mịna ḍieye mị nwọ ḍuko nwẹngị-ao?

⁴Anịatịḅị Tamụnọ Ḅe nwọ ḅẹmẹ, ‘Ị́ ḍa na ị́ nyengi na osi,’ na ‘ḍaḅọ anịkanịka nyengiḅọ wori ḅọ goyegoye ini iniḅọ ḅaa.’

⁵Ọkụma ómine nwọ ḍiemẹ na tomoniḅọ nemikase ye nyana se ḅarachụa iniḅọ ḍaḅọ, anịkanịka nyengiḅọ pịrị ḍọkịmẹ, se iniḅọ nwọ ḅẹ na, ‘Mịn ye mị sime Tamụnọ Ḅe pịrịmẹ ḅẹḅẹ,’

⁶ḍaḅọ osi mị ḅarị ḅụpalịmaye ḅụ ofori-ẹ. Mịn ọ́ wẹrị Tamụnọ ọkwẹịn mị se yeḅụsọkaye nwọ mịẹ ọkụ-ẹ ọ́mịna ḍieye mị nwọ ḍukonwẹngịḅịa ẹrẹchị.

⁷Ómine epekelepepe-a tomoni! Aịzaya ḅe karakaraye ḍuko ọkụ ḍiki, ori ọ́mịna ḅụ mịn ịkịan mị nwọ koro sịkị ọ̀ nwọ ḅẹmẹ!

⁸‘Mịnapụma inia ḅịpịḅọkọ ḅụ mị ini ị̀ osi ye-ẹ, ọkụma inia kuḅiemgbọlụma iḅi ḅara se ị̀ ḅụ wẹrị sasamẹ.

⁹Ini kpẹrẹkị ị̀ tẹkẹarị ye mị papaye-ẹ, anịatịḅị tomoni mịẹ olokoma ini nwọse Tamụnọ Ḅe tọn ayema tọrụ ḍinma se inia ye nwọ ḍieaḅẹ.!’”

¹⁰Anịsịkị Jizọs Ḅe tomonikpo mị chịn ọ̀ ḅụ pịrị se nwọse ini ḅẹmẹ, “Ó poki, pịkị kaịnḅo!

¹¹Tomoniḅọ ḅe ḅịpị ḅie sọ ye mị anị iniḅọ ịlọlịma ẹkẹ anịnakaraka, tomoniḅọ ḅe ḅịpị ḅie pakaḅoye mị re, mị iniḅọ mịẹse iniḅọ fịafịa aka ye-ẹ.”

¹²Anịsịkị ọḅụḍukoapụma Ọ̀ damaḅo, se nwọ ḅẹmẹ, “Ị́ nemi na Ị́ ḍukoye mị anị Farisiapụma ḅụosọmẹ?

¹³“Ị̀ Ḍa soḅie sime ḅọ Ḅe, ḍipika chịn goyegoye ini anị burasinḅịa,” Jizọs Ḅe nwọ pẹkẹrẹmẹ.

¹⁴“Ómine ini gose ḅụḅalaḅala se ọ́mịna ḅụ pịrị ma! Ini anị, tọrụmgbọlụpụn se ateli se tọrụmgbọlụpụn apụ ḍiearịapụ-ẹ. Tọrụmgbọlụpụn ḅọ ateli se jịn tọrụmgbọlụpụn ḅọ ḍie ọkụma, ini mamapụ mamgba sokoro olulu ḅie sọḅịa.”

¹⁵Pita ḅe nwọse Ọ̀ ḅẹmẹ, “Mịn kaḅo mị fiearịye nwọ ḍuko wa pịrị.”

¹⁶Jizọs Ḅe nwọ ḅẹmẹ, “Ma ọ́ pa nemi nyana ísíapụma nẹngịka?

¹⁷Ma ọ́ kaịnḅoka na tomoniḅọ ḅịpị ḅie sọye goyegoye iniḅọ ḅụlọ ḅie sọmẹ se anị iniḅọ oju ḅie ḅọrọ pịkị pakasomẹ.

¹⁸Ọkụma ḅịpị ḅie pakaḅo ayema kuḅiemgbọlụ ḅie àrị wẹrị pakaḅomẹ, ọkọ simeayema mị tomoniḅọ ḅe mịẹse ọ̀ fịafịa ẹkaye-ẹ.

¹⁹Anịatịḅị ò kuḅiemgbọlụ mị ḅie anị si koroma goyegoye pakaḅoarịye-ẹ; anị mị tomoniḅọ ḅe ọkịmun ḅaa na, sẹfị na, ere simeka owuapụ na, owuapụ simeka eremeni ḅe nwẹngịgboloma na, furu na, iruokọn na, pịkị jịn apụ ḍuko sima na ḅie chumẹ.

²⁰Mayema mị mịẹse tomoniḅọ fịafịa ẹkaye-ẹ. Ọkụma ḅara sịkịrịka se yefị mị—tomoniḅọ ḅe ini ḅe mịẹ nwọḅẹye mị mịẹse ọ̀ fịafịaka ḅọ sọ ẹkẹ.”

²¹Jizọs Ḅe anị nyọ mị koromaso se Taya na Saịdọn na kpeki opuamama nwọ mun mẹ.

²²Gbọrị Kenan eremeniḅọ anị pẹkẹrẹ anga ḅọ Ọ̀ damaḅomẹ. Árị owu oloku pakụmamẹ, “Devid Tọkụ ị̀ ḍikiḅụgerere, Nyanaḅọ, ndụḅa ma sitẹmẹ á ḅie omi-ẹ, á pịkị ḅalafama ḅara ḅụ omi-ẹ.”

²³Ọkụma Jizọs Ḅe gbọrị ọkwẹịn sọnị kọn á pịrịkẹ. Oria ọḅụḍukoapụma Ọ̀ damaḅo, se Ọ̀ tẹkẹmẹ na, “Á ḅẹ á so! Árị owu owu wa ḍukoaḅẹ pịkị nyọ fiemaḅẹ!”

²⁴Jizọs Ḅe ini pẹkẹrẹmẹ, “Izrẹl mị ḅie fa ananama gose ini ị̀ se fịrịmamẹ.”

²⁵Mịn mị ḅụ eremeniḅọ ma ḅo Ọ̀ ḅụọchuku ḅịkị koromẹ. Se nwọ ḅẹmẹ, “Ḅarachụa ị̀ pịrị, Nyanaḅọ!”

²⁶Jizọs Ḅe pẹkẹrẹmẹ, “Anị ḅụgbẹịnkẹ awọmẹnịma fịḅịaye mị nwọse gbin obirima pịrị.”

²⁷Á nwọse Ọ̀ pẹkẹrẹmẹ, “Anị mị kọkọmaye-ẹ Nyanaḅọ, ọkụma obirima sọ àrị nyanapụma dẹbụl chuku sokoro koroyema nwọ gbala fịfịmẹ.”

²⁸Anị Jizọs Ḅe á pẹkẹrẹye-ẹ, “Ị́rị́ opu ḅereni nyana eremeniḅọ-ẹ! Ị́ ḅiye mị anị ọkọ paka ị́ pịrị.” Se anị gbọrị kirikiri ḅụ ḅarọ ma ḅụ iḅimẹ.

²⁹Jizọs Ḅe anị nyọ koromaso se Galili tọrụaka irima nwọ mun mẹ. Ọ̀ gbọrị chịngị tanjị se kpọnjị simemẹ.

³⁰Ḅaka tomonikpo Ọ̀ damaḅomẹ, ikeliapụ, tọrụmgbọlụpụn apụ, ikiriapụ, ḅịpị inikikọn apụ, pịkị tọn-a jịn obiapụ na ini nwọse chụa ḅomẹ, ini ini se Jizọs Ḅe ḅụọ chuku koromamẹ se ori ini gwọmẹ.

³¹Anị tomonima ḅụgbiripumamẹ, na ḅịpị inikikọn apụ ọkwẹịn aḅẹ, oju ḅụ yetọrọkọapụ tekereaḅẹ, ikeliapụ nwẹngịaḅẹ, tọrụmgbọlụpụn apụ yeọrịaḅẹ nwọ ḅẹye mị ini nwọ ọrị sịkị, ini Izrẹl Tamụnọ Ḅe tokonimẹ.

³²Jizọs Ḅe Oria ọḅụḍukoapụma chịn ọ̀ḅụ paka se nwọ ḅẹmẹ, “À mịna tomonima ḍikitịḅịfoin aḅẹ, anịatịḅị tẹrẹ-aḍin ini nwọse ị̀rị̀ na simesam, se mịọkụ ini ḅarị fịḅịaye nyanakẹ. À ḅikẹ àrị ini ḅẹ na ini so, fịye se ini pịrịka ḅụ, ọbịasi ateli ogbo ini fụmụḅịa ini so inia warịma mun-arị sịkị.”

³³Ọḅụḍukoapụma nwọse Ò gbelamẹ, “Mịn eleogbo mị ḅie wa nde nyọ ḅakama fịye nyana ḅo mịn tomonikpo mị pịrị se ini fị ḅụlọ ḅeinmaḅe?”

³⁴Jizọs Ḅe nwọse ini gbelamẹ, “Nde ọ́ nyana fịturu la ọkụ?” Ini nwọse ọ̀ pẹkẹrẹmẹ, “Sọnọma okpokpo-ẹ, pịkị boka inji awọ na.”

³⁵Anị Jizọs Ḅe tomonikpo mị ḅẹye-ẹ, na ini kiri kpọnjị sime.

³⁶Ò fịturu sọnọma okpokpoma na inji mị na nwọ ọkịmẹ, Ò mịẹḅaka se Tamụnọ Ḅe ḅẹ so sịkị, Ori àrị pumẹ, se àrị se ọḅụḍukoapụma pịrịmẹ, ọḅụḍukoapụma àrị se tomonima pịrịmẹ.

³⁷Inimgba fị inia ḅụlọ ḅeinmamẹ. Se ọḅụḍukoapụma sara pumburoma ḅụ sọnọma kana nwọ tan ḅeinmamẹ.

³⁸Yefịapụma ḅe kịẹnḅịpị owuapụ oyi ẹndẹ nwọ lamẹ, eremeni na awọmẹnị na nwọ kịẹnka ḅụ.

³⁹Anịsịkị mị Jizọs Ḅe tomonima ḅẹ se ini soye-ẹ, se ori arụ ḅụkụlọ, se so Magadan ama pẹkẹrẹ mị nwọ mun mẹ.