Read kirikeni Matio 16 Bible Online

Matio 16 - kirikeni bible

Matio 16

¹Tọn-a Farisiapụ na Sadusiapụ na Jizọs Ḅe damaḅomẹ ḅụbuamaye nwọ mịẹ ini ḍie, se ḍiepakụma na Tamụnọ Ḅe ọḅụ omi-ẹ.

²Ọkụma Jizọs Ḅe ini pẹkẹrẹmẹ, “Ịrụa mị tumarị sịkị, ọ́ nwọ ḅẹmẹ, ‘Wa iḅi sịkị nyana se mịnaḅụtimaḅịa, anịatịḅị sotọrụ mị awụwụ ḅara ḅịa waraḅẹ.’

³Anịsịkị dede funfun ḅụ ọ́ nwọ ḅẹmẹ, ‘Ene koroḅịa, anịatịḅị sotọrụ mị awụwụ na kanakana tọrụ na nwọ chụa waraḅẹ.’ Ómine ineda ene mị simeḅịa ọkụ ḅe ịkịan nwọ koromẹ, sotọrụ mị nwọ ḍiki ḅụ, ọkụma ómine ineda maa sịkị ma ḅe elekimama fiearịyema nemikẹ!

⁴Mịn ḅụọ mị ḅe apụma si se pịkị Tamụnọ nemika ọkụ ḍiki! Ómine ị̀ ḅara ḅụbuamaye nwọ ḅiaḅẹ? Ẹn-ẹn! Jona ḅe ḅụbuamaye mị kẹngẹ mị ini se ọ́ pịrịḅịaye-ẹ.” Anị ori ini wẹrịso se nwẹngị soye-ẹ.

⁵Ọḅụḍukoapụma ḍapa mị saḅa ísí pẹkẹrẹ mun koro sịkị, inia ḅieḅaramẹ fịturu nwọ ọkị chụa mun.

⁶Jizọs Ḅe nwọse ini ḅẹmẹ, “Ọ́ tọrụkweinma Farisiapụma na Sadusiapụma na fịturu-sumaye mị ḅụ ọ́ ḅụ ọbị.”

⁷Ini sakị ḅịpị se inia ḅụ fiemamẹ, “Ò gose mịn mị ḍukoye anị wa fịturu se chụa ḅokaye gose-ẹ.”

⁸Jizọs Ḅe ini ḍukoarịye mị nwọ nemimẹ, anị ori ini gbelaye-ẹ, “Nde ó gose ọ́mịna ogboku ọkwẹịnma ḅọrọarịye, na ọ́ fịturu ọlọkẹ? Ọ́mịna ḅereni boka ọkụ ḍiki!

⁹Mà ọ́ pa kaịnḅoka? Ó se ḅiekoromaka à sọnọ-a fịturu okpokpoma nwọ pu owuapụ oyimaịn ẹndẹ fịnjị na oyiasima nwọ pịrị sịkị mị? Nda kana ọ́ nwọ tan ḅeinma?

¹⁰Ó se owuapụ oyi ẹndẹ ma pịrị sọnọma fịturu okpokpoma kwanị? Nda kana ọ́ nwọ tan ḅeinma?

¹¹Nde mịẹse ọ́ kaịnḅoka ḅara na à fịturu na gboloma ọkwẹịn nwọ kọn ọ́ pịrịkẹ? Farisiapụma na Sadusiapụma na fịturu sumaye mị ḅụ ọ́ ḅụ ọbị!”

¹²Anịsịkị mị ọḅụḍukoapụma kaịnḅoye-ẹ, na fịturu sumaye ḅụ ọ́ ḅụ ọbị ọ̀ nwọ ḅẹkẹ, ọkụma Farisiapụma na Sadusiapụma na ḍieye ḅụ mị ọ̀ ḅẹ aye-ẹ.

¹³Jizọs Ḅe Sizaria Filipaị ama na kpeki iri ma nwọ mun mẹ, anịanga Ori Oria ọḅụḍukoapụma nwọ gbelamẹ na, “Tomonima Tomoniḅọ Tọkụ Ḅe tụḅọ-ẹ ini nwọ ḅẹ?”

¹⁴Ini nwọ pẹkẹrẹmẹ, “Tọn-apụ nwọ ḅẹmẹ Jọn mengisaraḅọ ḅe-ẹ. Ísí apụma nwọ ḅẹmẹ Ịlaịja ḅe-ẹ, anịsịkị jịn apụ nwọ ḅẹmẹ, Jerimaya ḅe-ẹ anịkanịka jịn ịkịankoroḅọ-ẹ.”

¹⁵Ọ̀ nwọse ini gbelamẹ, “Ómine kwanị?” “Ị̀rị̀ tụḅọ-ẹ ọ́ nwọ ḅẹ?”

¹⁶Saịmọn Pita ḅe pẹkẹrẹmẹ, “Ị́rị́ anị Kraịst Ḅe-ẹ, ḍumo Tamụnọ Ḅe Tọkụ Ḅe.”

¹⁷Jizọs Ḅe pẹkẹrẹmẹ, “Ḅieḅẹlẹ sime ị́ pịrị, Saịmọn Jọn ya! Anịatịḅị mị kọkọmaye mị gbọrị tomoniḅọ ḅara ḅụ sọ anị ḅọrọ ḅo ị́ lakẹ, ọkụma soḅie ị̀ Ḍa Ḅe ḅara ḅụ mị anị ḅọrọ ḅo ị́ laye-ẹ.

¹⁸Anịẹrẹchị à ḍuko ị́ pịrịaḅẹ, ị́rị́ anị Pita ḅe-ẹ, se mị chuku sẹkẹ ḍụparị mị ọgọnọ mị àrị ị̀ya chọchị mị namaḅịaye-ẹ, anị, fị mị ḅe kụrọ sọnị, ineda nẹngịma ẹka ye mị.

¹⁹À Soḅie Amanyanakiri sambịma se ị́ pịrịḅịa ị́ tomonikiri kikichụa pịrịye soḅie ini kikichụa anị pịrịḅịa, pịkịna, ị́ tomonikiri ḅerenipịrịye, soḅie sọnị ini ḅereni anị pịrịḅịa.”

²⁰Anịsịkị Jizọs Ḅe oria ọḅụḍukoapụma ḅerijinemẹ, na ini ḍuko gbọrịḅọ sọ pịrịma, na ori Kraịst Ḅe-ẹ nwọ ḅẹye mị.

²¹Anịsịkị ọkị tọrọkọ mun Jizọs Ḅe sakị ḍuko oria ọḅụḍukoapụma pịrịmẹ, “Gbarịmaka ḅara ḅụ à Jerusalẹm munḅịa se sẹnịapụma na, tịḅịnị agbamịẹapụma na, Oloko ḍieapụma na ḅara ḅie opuma tọrụsiọrịḅịa. Ini ị̀ ḅaaḅịa, se tẹrẹ-a ḍin karama ene ḅụ à sịsẹḅịa.”

²²Pita ḅe orina ḅụsikima se sakị Ò ḍiki ịganịmẹ. Ọ̀ nwọ ḅẹmẹ, “Tamụnọ siye ḅereni ma, Nyanaḅọ! Mịn mị ngịsị ị́ ḅụ pakama!”

²³Jizọs Ḅe vinpịkị nwọse Pita ḅe ḅẹmẹ, “Oru ị̀ ọḅụ ḅọrọ-ọ! Ị́rị́ ị̀ya ateli ḅụ kikichụaye nwọ sọ ma, anịatịḅị mà ị́ya koroma ma tomoni-a koroma-ẹ, Tamụnọ-a yekẹ.”

²⁴Anị Jizọs Ḅe nwọse oria ọḅụḍukoapụma ḅẹye-ẹ, “Ị̀ ḍukoḅịa ḅọ omi-ẹ ḅẹḅẹ, iniḅọ iniḅọ ḅụ se ḅieḅarama, anịsịkị iniḅọ mgbẹsẹchịn mị nwọ pụra, se ị̀ ḍuko.

²⁵Anịatịḅị mịna ḍumo juaḅọ goyegoye iniḅọ anị famaḅịa; ọkụma ị̀ gose mịna ḍumo famaḅọ goyegoye iniḅọ anị ḍọkịḅoḅịa.

²⁶Tomoniḅọ bebe tomonikiri mị mgba nwọ nyana se iniḅọ ḍumo nwọ fama ọkụma iniḅọ che sọye nwọ nyanaḅe? Sọye ngịsị ofori-ẹ! Tomoniḅọ se iniḅọ ḍumo na ḍinmaḅịaye ofori-ẹ.

²⁷Anịatịḅị Tomoniḅọ Tọkụ Ḅe oria enjẹlapụma na Ḍawu Ḅe boma na ḅoḅịa; anịsịkị anị ò tomoniḅọ goyegoye nwọ gbẹịnḅịaye-ẹ, iniḅọ fịrị wẹrị sime ḅara ḅụ.

²⁸À ḍuko kụrọma ọ́ pịrịaḅẹ! Mịanga sime tọn apụ omi-ẹ, ini fịẹkẹ ọkịmun ini Tomoniḅọ Tọkụ Ḅe nwọ ọrịḅịa ori Amanyanaḅọ ḅara nwọse ḅoḅịa sịkị la.”