Read kirikeni Matio 18 Bible Online

Matio 18 - kirikeni bible

Matio 18

¹Anị gbọrị sịkị mị ḅụ ọḅụḍukoapụma Jizọs Ḅe damaḅo se gbelaḅẹ na, “Tụḅọ soḅie Amanyanakiri mị ḅie opu sọtẹịn?”

²Jizọs Ḅe gbọrị kala tọkụ nwọ chịnḅomẹ, ò se inia tọrọkọ chịẹmamẹ,

³se nwọ ḅẹmẹ, “Kọkọmaye à nwọ ḍuko ọ́ pịrịaḅẹ ọ́ pịkị ḍinma se awọmẹnị simeọkụ simeka ogbo, Soḅie Amanyanakiri mị ḅie ọ́ sọ ẹkẹ.

⁴Soḅie Amanyanakiri mị ḅie opu sọtẹịn ḅọ, anị ḅụiderima, se ḅo mịn tọkụ mị simeọkụ sime ḅọ-ẹ.

⁵Pịkị ị̀ya ẹrẹ ḅụ mịn tọkụ mị simeọkụ sime ḅọ nwọ ọkịḅọ goyegoye iniḅọ ị̀ ọkịmẹ.”

⁶“Mịna boka awọmẹnịma ḅe gbọrịḅọ mịẹse iniḅọ ị̀ ḅụ nyana ḅereni ḅụ vinpịkị mun si mịẹḅọ goyegoye, anị ḅụgbẹịnḅịa, ini opu yegbẹịn ḍụparị se iniḅọ kọngọ ḅụ kpọ, se iniḅọ se mun tọrụ ogboku gbun nyọ ḅụ simbi ḅaa.

⁷Sifụla sime sẹkiri mị pịrị anịatịḅị tomoni telima mun si ḅie chụaye anịa ḅie omi-ẹ! Kọkọmaye ḅụ telima ḅo na gbẹịn-a mẹ, ọkụma sifụla sime ọ̀ pịrị ọ̀ ḅụ ḅụ telima ḅọrọ ḅoḅịa ḅọ ḅe!

⁸“Ị́ ḅara anịkanịka ị́ ḅụọ ị́ mịẹse ị́ mun si ḅie sọḅịa ḅẹḅẹ, anị pẹlẹsin, se anị se gbin wokuma! Anị iḅitẹịn ị́ pịrịḅịa, ị́ gbọrị ḅara anịkanịka gbọrị ḅụọ oforika ḅụ mun ḅene ḅene ḍumo ḅie sọ, se mama ḅara anịkanịka mama ḅụọ ị́ ḅụ sime se ini ị́ se ḅene ḅene fịnị mị ḅie gbin chu mị nẹngịmẹ.

⁹Se ị́ tọrụmgbọlụ ị́ mịẹse ị́ mun si ḅie sọḅịa ḅẹḅẹ, anị sọkịsin se anị se gbin wokuma! Anị iḅitẹịn ị́ pịrịḅịa, ị́ gbọrị tọrụmgbọlụ kẹngẹ nwọse ḅene ḅene ḍumo ḅie sọ, se ị́ mama tọrụmgbọlụ nyana ḅụ ini ị́ se kọrị fịnị mị ḅie gbin chu mị nẹngịmẹ.

¹⁰“Ómine ọrị na mịna ḍọkọḍọkọ awọmẹnịma ḅie gbọrịḅọ sọnị ọ́ nwọ ḍikisimakẹ. À ḍuko ọ́ pịrịaḅẹ, soḅie inia enjẹlapụma sịkịmamgba Ị̀ Ḍa Ḅe na omi-ẹ.

¹¹Anịatịḅị Tomoniḅọ Tọkụ Ḅe ò ḅo fapụ ḍụaḅọrọma-ẹ ḅomẹ.

¹²“Nde ó koroma ọkụ? Anana sọnọasi nyanaḅọ mịẹḅịaye, arịa ḅie gbọrị wu nemikase fa ọkụma? Chịngị anga ḅụ sime osuein fịarị gbọrịyefa anana sọnọasi ma ọ̀ nwọ wẹrịso se mun fa anana ḅe ḍọkịḅịa.

¹³Ori ọ̀ ḍọkịḅo sịkị, à ḍuko ọ́ pịrịaḅẹ na ḅe fa gbọrị anana ḅe gose ò ḅieḅẹlẹ nyanatẹịn kirikọn faka gbọrịye fa anana sọnọasi ma nẹngịḅịa.

¹⁴Anị gbọrị ḅara mị ḅụ anị ọ́mịna soḅie Ḍaḅọ Ḅe sọnị, mịna ḍọkọḍọkọ awọmẹnịma ḅie gbọrịḅọ fa mị ḅika ọkụ-ẹ.

¹⁵“Ị́ mbire nemikase ị́ mịẹirimamẹ ḅẹḅẹ, ọ̀ damamun se ọ̀ mịẹ siye mị nwọ ḍuko ọ̀ pịrị. Ọkụma ḅọịma anị mịẹ, ómine mamapụma ogboku ḅụ. Ò nemikase ị́ pokimẹ ḅẹḅẹ, ị́ mbire ḅe ị́ ọ̀ nyana ị̀ ḅụ pịrịsam.

¹⁶Ọkụma ò nemikase ị́ ḅịpịpoki ḍụkụkẹ ḅẹḅẹ, gbọrịḅọ anịkanịka mamapụ nwọ ọkị ị́ ḅụ chụa se mun, mịẹso sịkị ḍumoḅịaye goyegoye ḅụ mamapụma anịkanịka tẹrẹ-a apụma ḅịpị onyechịẹ anị mịẹkụrọmaḅịa ḅara, fịafịa ḍiri mị ḍuko ḅara ḅụ.

¹⁷Ọkụma ò nemikase ini poki ḍụkụkẹ ḅẹḅẹ, anịsịkị anị ḍuko chọchị mị pịrị. Anịḅe-kuluma ọ̀ ḅọrọ chọchị mị sọ pokikẹ ḅẹḅẹ, jịn sẹ ḅọ anịkanịka amaochoḅọ ḅara nwọse ori ọkị.

¹⁸“Anị gose à ḍuko óminemgba pịrịaḅẹ: mị tomonikiri ó kikichụa pịrịye goyegoye mamgba, soḅie ini kikichụa anị pịrịḅịa, pịkị mị tomonikiri ọ́ ḅarasin-pịrịye goyegoye mamgba, soḅie ini ḅarasin anị pịrịḅịa.

¹⁹“À pịkị jịnye se chụa ḍuko ọ́ pịrịaḅẹ: sẹkiri ḅie ómine mama apụ ḅịpị ogbosọ ḅụ tẹkẹ se ḅiḅịaye goyegoye, ị̀ Ḍa Ḅe, soḅie sime ḅọ ḅe anị mịẹ ọ́ pịrịḅịa.

²⁰Anịatịḅị mama apụ anịkanịka tẹrẹ-a apụ ị̀ya ẹrẹ ḅụ ḅo gboloma nyọ goyegoye, àrị ini na omi-ẹ.”

²¹Anịsịkị Pita ḅe Jizọs Ḅe damaḅo se ò gbelamẹ, “Nyanaḅọ, nda sịkị ị̀ mbire ḅe pa sịkịmamgba ị̀ mịẹirima ọkụma, à ḅarasin ọ̀ pịrịḅe? Sọnọma-a sịkị?”

²²“Ẹn-ẹn, sọnọma sịkịkẹ,” Jizọs Ḅe nwọse ọ̀ pẹkẹrẹmẹ, “Ọkụma sọnọma sịkị ḅe kiri-a tesioyifịnjị (anị ẹndẹ iniasi oyi fịnjị-ẹ),

²³anịatịḅị Soḅie Amanyanakiri mị, mịn anị simeọkụ-ẹ. Gbọrị sịkị gbọrị amanyanaḅọ ḅimẹ na oria fịrịnwẹngịapụma ini opoli tọn ọ̀ pịrị.

²⁴Ọ̀ sakị ananga, mị ini inia ḅụ gbọrịḅọ nwọ ọkịḅo ọ̀ pịrịye-ẹ, ọ̀ ḅara tọn-a igbiki poku sa nwọ fị ḅọ.

²⁵Fịrịnwẹngịḅọ ḅe se anị sa mị gbẹịnḅịa ye ọ̀ nyanakẹ, anị amanyanaḅọ ḅe ḅẹye-ẹ na ini omoniḅọ ḅara nwọse ọ̀ dẹrị, tarọ ma na oria awọma na, pịkị ọ̀ nyana yegoyegoye mamgba, seni sa mị nwọ gbẹịnḅịa ẹrẹchị.

²⁶Fịrịnwẹngịḅọ ḅe ọ̀ ḅụọ ịkpụkụ se amanyanaḅọ ḅe tọrọkọ kpẹrẹkị koro se ọ̀ tẹkẹ ḅụ ḅẹmẹ, ‘Nyanaḅọ sịkị se ị̀ pịrị, yemamgba à gbẹịnḅịa!’

²⁷Amanyanaḅọ ḅe ò ḍikiḅụgereremẹ, se sa mị ḅụ ḅarasin ọ̀ pịrị se ò somẹ.

²⁸“Ọkụma ḅe ḅọ ḅe pakaso, se mun ò juo fịrịnwẹngịḅọ na ịrịamẹ, ọ̀ ḅara boka igbiki sa fị ḅọ. Ọ̀ kịkịma ọ̀ pụkọ ọgbụrụgbụ ḅụ ori ọlọ se nwọse ọ̀ ḅẹmẹ, ‘Ị̀ ḅara ị́ fị sa mị nwọse ị̀ gbẹịn!’

²⁹Ò juo fịrịnwẹngịḅọ ḅe ḅịkị koro se ọ̀ tẹkẹmẹ, ‘Ịnyọ ḅaa ị̀ pịrị, sa mị à se ị́ gbẹịnḅịa!’

³⁰Ọkụma ọ̀ ḍụkụkẹ anịnakaraka, ori ò se ikoliwarị ḅie gbin chumẹ, ọkịmun ọ̀ sa mị gbẹịn sịkị, gbẹịn sịkị la.

³¹Ísí fịrịnwẹngịapụma pakaye mị ọrị sịkị, anị ḅieḅẹlẹ se ini pịrịkẹ, anị ini so mun pakaye mị nwọ ḍuko amanyanaḅọ ḅe pịrịye-ẹ.

³²Anị ọ̀ fịrịnwẹngịḅọ ḅe chịn ḅoye-ẹ. Se nwọse ọ̀ ḅẹmẹ, ‘Ị́rị́ sitịḅịnyana omoniḅọ-ẹ! Ị̀ ḅara ị́ ọlọ igbiki mamgba à ḅarasin ị́ pịrịmẹ, à ḅarasin ị́ pịrị ị́ nwọ ḅiye gose.

³³Mgbọkụ ị́ pembe fịrịnwẹngịḅọ ḅe ị́ nwọ ḍikiḅụgereresam, ị̀rị̀ sọnị à nwọ ị́ ḍikiḅụgerere ọkụ mị.’

³⁴Anị opuma amanyanaḅọ ḅe ịganịmamẹ, se ọ̀ fịrịnwẹngịḅọ ḅe se ikoli sẹịnmẹ ḅụfụka se ọ̀ pịrị ọkịmun ọ̀ fị sa mị mgba ọ̀ nwọ gbẹịn so sịkị la.”

³⁵“Mị ị̀ Ḍa soḅie simeḅọ Ḅe seni ọ́mịna ḅie kuḅie ḅụ si wẹrịso iniḅọ mịnaḅọ pịrịka ḅọ goyegoye mịẹḅịa ọkụ-ẹ.”