Read kirikeni Matio 19 Bible Online

Matio 19 - kirikeni bible

Matio 19

¹Jizọs Ḅe mayema nwọ ḍuko so sịkị, Ọ̀ Galili mị koromaso Judia pẹkẹrẹ irima nwọ mun mẹ, Jọdan tọrụ mị ḅụ ísí pẹkẹrẹ mị.

²Ḅaka tomonikpo Ò ḍukomẹ, se Ori anịnyọ ḅụ inimgba gwọmẹ.

³Tọn-a Farisiapụ Ọ̀ damaḅo se ḍẹịntu Ọ̀ pịrịḅịa ye gose Ò gbelamẹ, “Mịna Oloko mị anị ḅereni owuḅọ pịrị, iniḅọ ta ḅụ ḅarasin, iniḅọ ḅụḅẹlẹ ḅara ḅụ?”

⁴Jizọs Ḅe ini pẹkẹrẹmẹ, “Fịafịa ḍiri mị ma ó go ka? Anị nwọ ḅẹmẹ na sakị ḅụ Tẹmẹḅọ Ḅe owuḅọ na eremeniḅọ na tẹmẹmẹ?

⁵Se Tamụnọ Ḅe nwọ ḅẹmẹ, ‘Mịn mị ẹrẹchị owuḅọ ḅe ọ̀ ḍawu ḅe na nyọngọrọma na nwọ koromaso se ọ̀ ḅụ se tarọ ma na gbọrịye mịẹ, se ini mamapụma ḅo gbọrịye sọḅịa.’

⁶Anịẹrẹchị ini ḅarị mamapụkẹ, ọkụma gbọrịapụ-ẹ. Anịọkụma Tomoniḅọ Tamụnọ Ḅe ọkị gbolomasaye mị nwọ pu sikima ẹkẹ.”

⁷Farisiapụma Ò gbelamẹ, “Nde anịọkụma Moziz ḅe gose kụrọpịrịye, oloko mị ḅie na owuḅọ ḅe ori árị na sosam nwọ ḅẹ ḍiri ọ̀ nwọse tarọ ma pịrịsa ḅẹḅẹ, ori árị na so?”

⁸Jizọs Ḅe ini pẹkẹrẹmẹ, “Moziz ḅe ò ḅereni ọ́ pịrịmẹ na ómine ọ́mịna erema na so, anịatịḅị ye se ó ḍie mị opuma kụrọmẹ. Ọkụma yema tẹmẹarị sịkị mị ḅụ anị ḅara anị nwọ simekẹ.

⁹À ḍuko ọ́ pịrịaḅẹ, na iniḅọ ta, jịn owuḅọ damamunka ḅụ ori á ḅụḅarasinmẹ ḅẹḅẹ ọ̀ sẹfịsam, ò jịn eremeniḅọ na simemẹ ḅẹḅẹ.”

¹⁰Oria ọḅụḍukoapụma nwọse ọ̀ ḅẹmẹ, “Mịn anị nemikase sime deḅọ na ịrọḅọ na pịrị ọkụ-ẹ ḅẹḅẹ, ere simeka mị iḅitẹịnmẹ.”

¹¹Ọkụma Jizọs Ḅe ini pẹkẹrẹmẹ, “Mịn ḍieye mị anị sime ḅẹḅọ ḅẹḅọ pịrịkẹ, ọkụma anị sime Tamụnọ Ḅe anị tọn pịrịapụma kẹngẹ nwọ pịrịmẹ.

¹²Anịatịḅị owuapụ anịkanịka ere sime ẹka tọn apụ omi-ẹ: anị ini ini yi pakụmaḅo ọkụ-ẹ; anịsịkị tọn apụ tomoni ọkọse ini wẹrịmẹ, tọn apụ ere anịkanịka owuḅọ simekẹ soḅie Amanyanakiri mị gose. Ye ineda mịn ḍieye mị ọkịḅịa ḅọ anị ọkị mịẹ.”

¹³Tọn apụ awọmẹnị ọkịḅo Jizọs Ḅe pịrịmẹ, ọ̀ ḅara se inia ọgọnọ gbana se tẹkẹ ini pịrịḅịa ḅara. Ọkụma ọḅụḍukoapụma ini ḍiki ịganịmẹ.

¹⁴Jizọs Ḅe nwọ ḅẹmẹ, “Ye awọmẹnịma ị̀ damaḅo ómine ini kiki ma, anịatịḅị soḅie Amanyanakiri mị sime mịn ḅara mị sime apụma nwọ pịrịmẹ.”

¹⁵Ori ọ̀ ḅarama nwọse inia ọgọnọ gbana so sịkị, ori ini koromasomẹ.

¹⁶Gbọrịḅọ Jizọs Ḅe damaḅomẹ, se gbelamẹ, “Yeḍieḅọ, che iḅiye à nwọ mịẹse sime gbaso ḍumo nwọ nyana ḅe?”

¹⁷“Nde ị́ gose iḅi mịẹye gbolomaye nwọse ị̀ gbelarịye?” Jizọs Ḅe nwọse ọ̀ pẹkẹrẹmẹ. “Gbọrịḅọ kẹngẹ mị iḅiye-ẹ. Ị́ ḍumo ḅie sọ ḍọkịaḅẹ ḅẹḅẹ, Olokoma koko.”

¹⁸“Che Oloko?” ọ̀ nwọ gbelamẹ. Jizọs Ḅe pẹkẹrẹmẹ, “Nweni ḅaa ma, furu ma, iruo onyechịẹma,

¹⁹ị́ ḍa na ị́ nyengi na osi, pịkị ị́ ḅụ ḅẹlẹma ḅara nwọse ị́ juo tomoniḅọ ḅẹlẹma.”

²⁰“Mà oloko mamgba à koko ḅọrọsam, à mịẹḅịa jịnye cheye?” asẹmẹnịḅọ ḅe nwọ pẹkẹrẹmẹ.

²¹Jizọs Ḅe nwọse ọ̀ ḅẹmẹ, “Ị́ karagbasị ị́ nwọ ḅiḅi, mun ị́ nyana ye mamgba nwọ dẹrị, igbiki mị se igwein apụma pịrị, ị́ soḅie ngọ nyanaḅịa; anịsịkị ḅo ị̀ ḍuko.”

²²Asẹmẹnịḅọ ḅe mịn mị naa sịkị, ò kururu ḅụ vinpịkị somẹ, anịatịḅị ori opuma ala kọnmẹ.

²³Anị Jizọs Ḅe nwọse oria ọḅụḍukoapụma ḅẹye-ẹ, “À ḍuko kụrọma ọ́ pịrịaḅẹ: anị opuma ḅụfụkamaḅịa ala kọn apụma soḅie Amanyanakiri mị ḅie sọ.

²⁴À pịkị ḅarị ḍuko ọ́ pịrịaḅẹ: na ala kọnḅọ ḅe Tamụnọ Amanyanakiri mị ḅie sọ mị ḅụfụkamatẹịn ike-nambulo ḅe laga mị tọrụmgbọlụ ḅie tolu ḅọrọ mị nẹngịḅịa.”

²⁵Ọḅụḍukoapụma mịn mị naa sịkị anị kpọma inia ḅụgbiripumamẹ, anị ini gbelaye-ẹ. “Anị-ẹ nwọ ḅẹ ọkụma, tụḅọ ineda ḍụaḅọrọma nyana ḅe?”

²⁶Jizọs Ḅe gbụkụkụma ini ḍiki se pẹkẹrẹmẹ, “Mịn mị anị sarasarakẹ tomoni-a ḅụ, ọkụma Tamụnọ Ḅe ḅụ, yegoyegoye sarasaramẹ.”

²⁷Anịsịkị Pita ḅe pẹkẹrẹ se nwọ ḅẹmẹ, “Ḍiki, wa ye mamgba wẹrịso se ị́ ḍukosam. Cheye wa nwọ nyanaḅe?”

²⁸Jizọs Ḅe nwọse ini ḅẹmẹ, “À ḍuko kụrọma ọ́ pịrịaḅẹ, ḅoḅịa sẹkiri mị ḅie, Tomoniḅọ Tọkụ Ḅe oria boma Amanyanaḅọ ngada mị ọgọnọ kpọnjị simeḅịa sịkị, anịsịkị ómine ị̀ya ọḅụḍuko oyimaịn apụ fịnjịma pịkị Amanyanaḅọ ngadama ọgọnọ kpọnjị simeḅịa, se ḅẹrẹtọn Izrẹl mị ḅie oyimaịn furo fịnjịma pịrịḅịa.

²⁹Mịna warị, anịkanịka owuapụ mịnapụ, anịkanịka eremeni mịnapụ, anịkanịka ḍaḅọ anịkanịka nyengiḅọ, anịkanịka awọ, anịkanịka ozu, ị̀ tịḅị gose nwọ wẹrịso ḅọ goyegoye, anịa ḅụ kiri-a sọnọasi nẹngịmaye nwọ nyanaḅịa, iniḅọ pịkị simegbamaso ḍumo nyanaḅịa.

³⁰Ọkụma mịọkụ tọrọkọdapụma ḅe tọn apụ ḅo ọḅụkulumapụ nwọ sọḅịa, anịsịkị ọḅụkuluma tọn apụ ḅo tọrọkọdapụ nwọ sọḅịa.