Read kirikeni Matio 21 Bible Online

Matio 21 - kirikeni bible

Matio 21

¹Ini ḅo Jerusalẹm mị na kpeki se ḅo Bẹtfagi mị lasịkị, ḅo Oliv Tụndụ mị la-ẹtọn-aḅẹ. Anị nyọ ḅụ Jizọs Ḅe ọḅụḍukoapụma ḅie mamapụ nwọse tọrọkọ fịrịmamẹ,

²se nwọse ini ḅẹmẹ, “Ọ́mịna tọrọkọ sime ịwọama mị ọ́ nwọ mun, ọ́ la kirikiri ini kpọ koroma ịrọrọ asụn ọ́ nwọ ọrịḅịa, oria tọkụ ḅe na ori na, ómine àrị finma, se àrị ọkịḅo ị̀ pịrị.

³Ọkwẹịn ḅọ sime sime ó ḍuko iniḅọ pịrị na, ‘Nyanaḅọ Ḅe àrị ḅimẹ,’ kirikiri iniḅọ arịa ḅụ ḅarasinḅịa.”

⁴Mịn mị mịẹse, ịkịankoroḅọ ḅe ḍukoye mị ḅo kọkọmaye sọḅịa ḅara na:

⁵“Ḍuko Zaịyọn opuama mị pịrị, Ḍiki, ị́ya amanyanaḅọ ḅe ori ị́ damaḅoaḅẹ! Ọ̀ ḅụiderima nyanamẹ yepụra asụn ọgọnọ ḅụ wẹrị ḅoaḅẹ, ayamburama asụn tọkụ na.”

⁶Anị ọḅụḍukoapụma tọrọkọ mun se Jizọs Ḅe ini ḅẹ ḅara mị nwọ mịẹye-ẹ:

⁷ini asụn ḅe na asụn tọkụ ḅe na nwọ ọkịḅomẹ inia ḅụchụayema se arịa ọgọnọ isemẹ, se Jizọs Ḅe arịa ọgọnọ simemẹ.

⁸Opuma ḅaka tomonikpo inia ḅụchụayema nwọse ateli mị ḅụ anyamẹ, ísíapụma kọrọḅara pẹlẹ se ateli isemẹ.

⁹Jizọs Ḅe tọrọkọ nwẹngị mun-arị tomonikpo mị na ọḅụju nwẹngị ḅoarị tomonikpo mị na sakị olokumẹ, “Tokoni sime Devid Tọkụ Ḅe pịrị! Tamụnọ Ḅe ọ̀ ḅẹlẹma, nwọ Nyanaḅọ Ḅe ẹrẹ ḅụ ḅoarị ḅọ ḅe! Tokoni sime Tamụnọ Ḅe pịrị!”

¹⁰Jizọs Ḅe Jerusalẹm mị ḅie sọ sịkị bebe ama mị mgba fiemẹ. “Ḅe tụḅọ?” Tomonima nwọ gbelaḅẹ.

¹¹“Ḅe ịkịankoro Jizọs Ḅe-ẹ, Galili ḅie Nazarẹt ama ḅụ ḅo ḅọ Ḅe,” tomonikpo mị nwọ pẹkẹrẹmẹ.

¹²Jizọs Ḅe Oputẹkẹwarị mị ḅie sọmunmẹ, se ye fẹ àrị apụma na dẹrịarị apụma na, Oputẹkẹwarị mị ḅie nwọ depakụmamẹ, igbiki ḍinmarị apụma dẹbụlma na nwọ pekele iḅomẹ, pịkị elesika dẹrịapụma se kpọnjị sime ịkasịema na,

¹³se nwọse ini ḅẹmẹ, “Fịafịa ḍiri mị ḅie gịẹịn mẹ na Tamụnọ Ḅe nwọ ḅẹmẹ, ‘Tẹkẹwarị ini nwọse Ị̀ya Oputẹkẹwarị mị chịnḅịa!’ Ọkụma ómine anị se furuapụ ḅọị nyọ nwọ mịẹ-aḅẹ!”

¹⁴Tọrụmgbọlụpụn apụma na ikeliapụma na Oputẹkẹwarị mị ḅie Ọ̀ damaḅomẹ, se Ori ini gwọmẹ.

¹⁵Ọkụma anị tịḅịnị agbamịẹapụma na Oloko ḍieapụma na ịganịmamẹ, ini Ọ̀ mịẹarị ḅụgbiripumayema nwọ ọrị sịkị, awọmẹnịma pịkị Oputẹkẹwarị mị ḅie oloku pịkị ịḅanị se nwọ ḅẹaḅẹ, “Tokoni sime Devid Tọkụ Ḅe pịrị!”

¹⁶Anị ini nwọse Jizọs Ḅe ḅẹye-ẹ, “Ini ḍukoarịyema ị́ naa-ao?” “Iin, à naamẹ” Jizọs Ḅe nwọ pẹkẹrẹmẹ. “Fịafịa ḍiri mị ḅie ma ó goka na, ‘Ḍọkọḍọkọ awọmẹnị na ndondoarị awọ na ḅịpị ḅụ mị, ị́ karasa tokoni nwọ nyanaḅịaye-ẹ?’”

¹⁷Jizọs Ḅe ini koromaso ḅụ, opuama mị ḅie pakaso Bẹtani nwọ mun mẹ, se anịnyọ mọnọ ḅamamẹ.

¹⁸Jizọs Ḅe eneḅa mị ḅụ vinpịkị opuama mị mun-arị ogbo, fịye Ọ̀ tarịmẹ.

¹⁹Ori ateli anga figi eje nwọ ọrịmẹ se nwẹngị anị kpekimamẹ, ọkụma Ori anịa ọgọnọ ọrị ye ofori-ẹ, ịnyanyama sikima ọkụma. Anị Ọ̀ nwọse chịn mị ḅẹye-ẹ, “Ngịsị ị́ ḅarị chịnmgbọlụ chụaka gbasoḅịa!” Anị kirikiri figi eje mị samịnamẹ.

²⁰Ọḅụḍukoapụma mịn mị ọrị sịkị, inia ḅụgbiripumẹ. “Nde figi eje mị kirikiri samịna kpatụ ọkụ?” ini nwọ gbelamẹ.

²¹Jizọs Ḅe ini pẹkẹrẹmẹ, “À kọkọmaye ḍuko ọ́ pịrịaḅẹ, ó ḅereni nyana se makuḅie nyanaka ọkụma, ómine ineda à se mịn figi eje mịẹye nwọ mịẹḅịa. Mịn mị kẹngẹkẹ, ọkụma ómine ineda nwọse mịn chịngị mị ḅẹḅịa, ‘Sịsẹ se mun tọrụogbo koro,’ anị pịkị ọkọ mịẹḅịa.

²²Ó ḅerenimẹ ḅẹḅẹ, tẹkẹ ḅụ ó ḅi yelayelaye ọ́ ḅara laḅịa.”

²³Jizọs Ḅe Oputẹkẹwarị mị ḅie sọmunmẹ, se Ò yeḍiearịogbo, tịḅịnị agbamịẹapụma na Ju Sẹnịapụma na Ọ̀ damaḅo se gbelamẹ, “Che kụrọ ị́ nwọ nyana se mayema mịẹ-ao? Tụḅọ mịn kụrọ mị se ị́ pịrị?”

²⁴Jizọs Ḅe ini pẹkẹrẹmẹ, “À pa gbọrịye nwọse ó gbelaḅịa, se ọ́ pẹkẹrẹ ḅịpị se ị̀ pịrịmẹ ḅẹḅẹ, anịsịkị à kụrọ mị nyana ọkụ à nwọ ḍuko ọ́ pịrịḅịa.

²⁵Jọn ḅe se Tamụnọ ẹrẹ ḅụ mengisara kụrọ mị nde nyọ ḅụ anị ḅo: Tamụnọ ḅara ḅụ anị ḅọrọ ḅo mụnọ se tomoni ḅara ḅụ?” Ini sakị inia ogboku ye jineamẹ, “Cheye wa nwọ ḍuko ḅe? ‘Tamụnọ Ḅe ḅụ ḅọrọ ḅomẹ,’ wa nwọ ḅẹ ọkụma Ọ̀ nwọse wa ḅẹḅịa, ‘Nde anị ọkụma ó gose Jọn ḅe ḅerenikaye?’

²⁶‘Ọkụma tomoni ḅara ḅụ ḅọrọ ḅomẹ,’ wa nwọ ḅẹ ọkụma, tomonima nde nde mịẹḅịa-ẹtuḅo, anịatịḅị anị inimgba ḅụokoromẹ na Jọn ḅe ịkịankoroḅọ-ẹ.”

²⁷Anị ini Jizọs Ḅe pẹkẹrẹye-ẹ, “Wa nemikẹ.” Orisọ nwọse ini ḅẹmẹ, “Ị̀rị̀ sọnị, anịọkụma, à se mayema mịẹarị kụrọ mị ḅo nyọ à ḍuko ọ́ pịrị-ẹkẹ.

²⁸“Mịọkụ, nde ó koroma ọkụ? Gbọrịḅọ, mama owuapụ awọ nyanamẹ. Ọ̀ tatarị ḅọ ḅe damamun se nwọ ḅẹmẹ, ‘Ị̀ya tọkụ, mun mịmgba ị̀ya irumịẹ chịnmgbọlụ ozu mị ḅie fịrịnwẹngị.’

²⁹‘À mun-ẹkẹ,’ ọ̀ nwọse ọ̀ pẹkẹrẹmẹ, ọkụma ọḅụkọ ori ò kuḅie ḍinma se mun mẹ.

³⁰Ḍaḅọ ḅe pịkị ísí tọkụ ḅe damamun, se anị gbọrị ḅara mị nwọse ọ̀ ḅẹmẹ. ‘Iin, à munḅịa ḍaḅọ,’ ọ̀ nwọ pẹkẹrẹmẹ, ọkụma ò munkẹ.

³¹Mamapụma ḅụ tụḅọ ḍaḅọ ḅe ḅi ye mị nwọ mịẹ?” Ini nwọ pẹkẹrẹmẹ, “Tatarị ḅọ ḅe-ẹ.” À mịn mị ḍuko ọ́ pịrịaḅẹ, Jizọs Ḅe nwọse ini ḅẹmẹ: “Ama igbikiocho apụma na ama nwẹngị eremenima na ọ́mịna tọrọkọ ḅọrọ mun Tamụnọ Amanyanakiri mị ḅie sọḅịa.

³²Anịatịḅị Jọn Mengisaraḅọ ḅe ọ́ damaḅomẹ, se ómine ọkịḅịa karakara ateli mị nwọse ó ḍiemẹ, ómine ò ḅerenikẹ; ọkụma ama igbikiocho apụma na ama nwẹngị eremenima na Ò ḅerenimẹ. Mịn mị ọ́ nwọ ọrị sọnị, ómine ó kuḅie ḍinma se Ò ḅerenikẹ.”

³³Jizọs Ḅe nwọ ḅẹmẹ, “Ọ́ pịkị jịn kaḅo nwọ poki,” “Gbọrị kiri nyanaḅọ omi-ẹ, irumịẹ chịnmgbọlụ ozu nwọ ḍipi ḅọ, ogbokiaye mịẹ anị kelema, olulu soku se iru imimaye mị pịrị se, sime nyọ koruḅịa gele warị nwọ namamẹ. Se irumịẹ chịnmgbọlụ ozu mị se ọkọ pịrị se, warị koromaso jịn-anga mun mẹ.

³⁴Mgbọlụ kaịn sịkị mị ḅo lasịkị, ori oria omoniapụma nwọse ozu mị ọkọapụma fịrịmamẹ, ọ̀ lalamaye ọkịḅịa ẹrẹchị.

³⁵Ozu mị ọkọapụma oria omoniapụma ọlọmẹ, gbọrịḅọ nwọ fomu, ísí ḅọ ḅe ḅaa, se ḍụparị se jịnḅọ gbinmẹ.

³⁶Tomoniḅọ ḅe pịkị jịn omoniapụ nwọ fịrịmamẹ, tarị sịkị ò se fịrịma apụma nẹngị apụ. Ozu mị ọkọapụma pịkị anị gbọrị ḅara mị nwọse ini mịẹmẹ.

³⁷Arịmgba ḅe kuluma ori oria tọkụ ḅe se ini fịrịmamẹ. ‘Pikipikiye ofori-ẹ, ini ị̀ya tọkụ ḅe nwọ osiḅịa,’ ọ̀ nwọ ḅẹmẹ.

³⁸Ọkụma ozu mị ọkọapụma oria tọkụ ḅe ọrị sịkị, ini nwọse inia ḅụma ḅẹmẹ, ‘Ḅe anị yema nyanaḅọ ḅe-ẹ. Ye ọ̀ sọḅo, wa ọ̀ ḅaa, se oria yema ọkịḅịa!’

³⁹Anị ini ori ọlọye-ẹ, irumịẹ chịnmgbọlụ ozu mị ḅie ò suma pakụma se ọ̀ ḅaaye-ẹ.

⁴⁰“Mịọkụ, irumịẹ chịnmgbọlụ ozu mị nyanaḅọ ḅe ḅoḅịa sịkị, cheye ọ̀ nwọse ozu mị ọkọapụma mịẹ ḅe?” Jizọs Ḅe nwọ gbelamẹ.

⁴¹“Pikipikiye ofori-ẹ, ori anị siapụma nwọ ḅaaḅịa,” ini nwọ pẹkẹrẹmẹ, “se irumịẹ chịnmgbọlụ ozu mị nwọse jịn ọkọapụ pịrịḅịa, se sịkị sịkị ḅụ ọ̀ lalama mgbọlụ nwọ kaịn ọ̀ pịrịḅịa apụ.”

⁴²Jizọs Ḅe nwọse ini ḅẹmẹ, “Fịafịa ḍiri mị ḅie gịẹịn ayema ngịsị ma ọ́ goka? ‘Warị namapụma sịkị ḍụparị mị vinpịkị ḅo yelatẹịn ḍụparị nwọ sọ sam. Nyanaḅọ Ḅe mịn mị mịẹmẹ; anị ḅụgbiripuma ọkụ ḍiki!’

⁴³“Anị gose à ḍuko ọ́ pịrịaḅẹ,” Jizọs Ḅe pịkị nwọ ḅẹmẹ, “ini ọ́mịna ḅara Tamụnọ Amanyanakiri mị nwọ ọkịḅịa se anị se kọkọma chịnmgbọlụ chụaḅịa apụma pịrịḅịa.”

⁴⁴“Ḅịkị mịn ḍụparị mị ọgọnọ koroḅọ goyegoye iniḅọ kọsịḅịa, se ḍụparị mị ḅịkị pụnụma ḅọ omi-ẹ ḅẹḅẹ, anị iniḅọ gbẹịn dẹkịdẹkịmaḅịa.”

⁴⁵Tịḅịnị agbamịẹapụma na Farisiapụma na Jizọs Ḅe kọn kaḅoma naamẹ, se anị inia ḅụokoromẹ, na inima anị ọ̀ ḅẹ àrịye-ẹ,

⁴⁶ini mịẹse ò kunḅịa ḅara nwọ ḍọkịmẹ. Ọkụma ini tomonikpo mị ḍikiḅalafamẹ, ịkịankoroḅọ ḅara ini nwọse Jizọs Ḅe kịẹnmaye gose.