Read kirikeni Matio 24 Bible Online

Matio 24 - kirikeni bible

Matio 24

¹Jizọs Ḅe Oputẹkẹwarị mị ḅie pakasoarị sịkị, Oria ọḅụḍukoapụma ọ̀ damaḅo, se Oputẹkẹwarị mị ḅụ ịkọlị-ịkọlịma nwọse Ò ḍiemẹ.

²Ọkụma Ọ̀ nwọse ini ḅẹmẹ, “Iin iḅimẹ, ọ́ màye mamgba nwọ ḍiki. À ḍuko ọ́ pịrịaḅẹ: na mịnyọ gbọrị ḍụparị sọnị ḅarị jịn ḍụparị ọgọnọ gbana-ẹkẹ, àrịmgba ini suma gbin kọsịmaḅịa.”

³Jizọs Ḅe Oliv Tụndụ mị ọgọnọ kpọnjị simearịogbo, ọḅụḍukoapụma ḅọịma Ọ̀ damaḅo se nwọ ḅẹmẹ, “Nde sịkị màye mamgba mịẹ ḅe? Ḍuko wa pịrị, cheye paka ḅe, se ḍiepakụma na Ị́ya ḅo sịkị mị na mị ḅụọ mị ḅe kuluma mị na lasam.”

⁴Jizọs Ḅe ini pẹkẹrẹmẹ, “Ọ́ tọrụ kweinma ọ́ pịkị ḅereni se gbọrịḅọ sọnị ọ́ dairima ma.

⁵Anịatịḅị tọn apụ ị̀ya ẹrẹ ḅụ ḅoḅịa, se ḅẹḅịa, ‘Ị̀rị̀ anị Mẹsaya Ḅe-ẹ!’ se tọn apụ nwọ dairimaḅịa.

⁶Ọmụ ḅe iriaḅa kpeki anga ḅụ na, pịkị sasaju ḅụ na ọ́ nwọ naaḅịa ọkụma ómine anị gose ḅụḅalaḅala nyana ma. Ọkọ sime ayema mịẹḅịa, ọkụma anị fiekẹ na kuluma mị ḅosam.

⁷Anịatịḅị sẹ owu se jịnye jịnye pakaḅịa, Amanyanakiri pịkị jịnye jịnye na bịamaḅịa. Se ḅuruḅaa na kiri jike na tọn-a nyọ ḅụ pakaḅịa.

⁸Màye mamgba yi jikearị eremeniḅọ nyana tatarị ḅụakụ simeọkụ simemẹ.

⁹“Anịsịkị ini ó kun se ọ́ ḅọrọma ḅụfụka se ọ́ pịrịḅịa apụ pịrịḅịa, se ó seni fị ḅie chuḅịa. Ị̀ gose tomoni mamgba taraka se ọ́ wẹrịmaḅịa.

¹⁰Tọn apụ anịsịkị inia ḅereni ḅụ ḅarasinḅịa, ini jịnḅọ jịnḅọ se ịbafịḅịa, pịkị taraka se jịnḅọ jịnḅọ wẹrịmaḅịa.

¹¹Anịsịkị tọn-a iruo ịkịankoroapụ ḅụḍiepakụma se tọn-a tomoni nwọ dairimaḅịa.

¹²Simịẹmịẹye mị wasama so ọkụma, tọn-a tomoni ḅẹlẹma inia juo tomoni ḅụ oḅokuḅịa.

¹³Ọkụma kụrọma chịẹ mun kuluma la ḅọ kẹngẹ anị ḍụaḅọrọma nyanaḅịaye-ẹ.

¹⁴Soḅie Amanyanakiri mị ḅe Iḅi Ḅẹrẹ mị ini nwọ ḍuko tomonikiri mị mgba kelemaḅịa, se onyechịẹma tomoni mamgba pịrịḅịa ẹrẹchị anịsịkị anị kuluma mị ḅoḅịaye-ẹ.

¹⁵“Opu Ḅalafama pakaḅịaye mị ‘Ọ́ nwọ ọrịḅịa’ ịkịankoro Danịẹl ḅe ḍukoye mị Oputẹkẹwarị mị ḅie fịafịa nyọ mị ḅụ anị chịẹ simeḅịa.” (Ye mịn ḍiri mị goḅịa ḅọ anị fiearịye kaịnḅo!)

¹⁶“Anịsịkị Judia ḅie sime apụma, ini mangị mun chịngịma tanjị.

¹⁷Ye warị ochu ọgọnọ sime ḅọ koroḅo warị ḅie ye deki ma.

¹⁸Ozu ḅie sime ḅọ vinpịkị mun warị ḅie oria ḅụchụaye deki ma.

¹⁹Àrị enema ḅie anị opu ḅalafamaye sọ simekọn eremeni pịrịḅịa, pịkị ndondoarị awọ ọlọ nyengiapụma na!

²⁰Ọ́ Tamụnọ Ḅe tẹkẹ mịẹse ọ́ fọngụ sịkị se mangị-ẹka ḅara, anịkanịka Ịnyọsara Ene ḅụ!

²¹Anịatịḅị anịsịkị simeḅịa ḅụfụka opuma ḅalafamatẹịn pakaḅọrọsa ayema nwọ nẹngịḅịa, tomonikiri mị sakị sịkị ngịsị ọkị ḅo mịmgba ene mị la. Pịkị anị kịkẹye sọnị ḅarị ngịsị paka ẹkẹ.

²²Ọkụma Tamụnọ Ḅe enema ḅụ yesinsam, ò nemikase ọkọ mịẹka ọkụma, gbọrịḅọ sọnị ḍụaḅọrọma nyana-ẹkẹ, ọkụma ọ̀ sẹlẹsapụma gose, ori enema ḅụ yesinḅịa.

²³“Anịsịkị, nweniḅọ nemikase nwọse ọ́ ḅẹ, ‘Ḍiki, Mẹsaya Ḅe ọ̀ mịanga omi-ẹ ḅẹḅẹ!’ anịkanịka ‘Anịanga ori omi-ẹ ḅẹḅẹ!’ — ó ḅereni ma.

²⁴Anịatịḅị iruo Mẹsaya na iruo ịkịankoroapụ na pakaḅoḅịa; ini opu elekima na ḅụgbiripumaye na nwọ mịẹḅịa, se tọn apụ dairimaḅịa Tamụnọ Ḅe sẹlẹsapụma sọnị, anị sarasaraḅịa ọkụma.

²⁵Ḍiki! À tatarị mịn mị nwọ ḍuko ọ́ pịrịsam, sịkị ma laka simeogbo.

²⁶“Tomoni nemikase ḍuko ọ́ pịrịmẹ na, ‘Ḍiki, eleogbo ori omi-ẹ!’ — paka mun ma; anịkanịka ini nwọse ọ́ ḅẹmẹ ‘Ḍiki, mịanga ọ̀ ḅọị waraḅẹ!’ — ó ḅereni ma.

²⁷Anịatịḅị Tomoniḅọ Tọkụ Ḅe ò ḅoḅịa, so mị wakam ma ḅịa sotọrụ mị kelema ọkụ mị ịrụapakapaka nyọ ọkịmun ịrụasọsọ nyọ la.

²⁸“Fịsa ojumịnị mị simeanga simeanga anị ẹdẹlẹma koḅirimaḅịaye-ẹ.

²⁹“Àrị enema ḅe ḅụfụka ḅọrọso kirikiri, ịrụa mị kanakanaḅịa, akalụ mị ḅarị ḅịa-ẹkẹ, loliama sotọrụ sokoro koroḅịa, se so mị ḅie sime kụrọma arịa ḅụ jikeḅịa.

³⁰Anịsịkị Tomoniḅọ Tọkụ Ḅe elekima mị sotọrụ ḅụ anịaḅụ ḍiepakụmaḅịa; anịsịkị tomonikiri ḅie sime-a tomoni mamgba owu kururuḅịa, ini Tomoniḅọ Tọkụ Ḅe ọrịḅịa so elekimama ḅie Ọ̀ wẹrị soḅie koroḅoarị sịkị, Oria opu boma na Ori na.

³¹Opu oḍu mị fieḅịa, se Ori Oria enjẹlapụma fịrịma pakụma tomonikiri inein-a ịkọlịma munḅịa, anịsịkị ini Ọ̀ sẹlẹsapụma koḅirimaḅịa, tomonikiri mị ḅe gbọrị ịkọlị ḅụ ọkịmun ísí kuluma mị la.

³²“Ye figi chịnmgbọlụ eje mị ḍawọye sọ ọ́ pịrị. Anịa ịkpangịma lọkọ se anịa ịnyanyama chụa ḅeinma sa ḅẹḅẹ, ó nemimẹ na ịrụa kpoin kpekisam.

³³Anị gbọrị ḅara mị ḅụ, ọ́ màye mamgba ọrịḅịa sịkị, ó nemiḅịa na sịkị mị kpekisam, anị ḅo ḅọkọkọ lasam.

³⁴Karakaraye à nwọ ḍuko ọ́ pịrịaḅẹ na! Màye mamgba mịẹḅịa mị ḅụọ ḅe apụ mamgba mà fị famaka simeogbo.

³⁵So na tomonikiri na ḅọrọḅịa, ọkụma ị̀ya ọkwẹịnma àrị ḅọrọ-ẹkẹ.

³⁶“Anị ene mị na sịkị mị na, gbọrịḅọ sọnị nemikẹ, soḅie sime enjẹlapụma sọnị, pịkị Tọkụ Ḅe sọnị; Ḍaḅọ Ḅe kẹngẹ mị nemiye-ẹ.

³⁷Tomoniḅọ Tọkụ Ḅe ḅo mị, Noa ḅe sịkị ḅụ anị paka ọkụ mị anị anị simeḅịa ọkụ-ẹ.

³⁸Tẹrẹmẹ mengi mị tomonikiri ḅilema, tomonima fị na ḅu na ḅụ ini simemẹ, àmá na ere na simemẹ, ọkịmun Noa ḅe arụ mị ḅụkụlọ sịkị lamẹ;

³⁹ini pakarịye nwọ nemikẹ, ọkịmun mengi mị seri ḅo inimgba ḅilema sịkị lamẹ. Anị anị simeḅịa ọkụ-ẹ Tomoniḅọ Tọkụ Ḅe ḅoḅịa sịkị ḅụ.

⁴⁰Anịsịkị mị ḅụ mamapụ ozu ḅie fịrịnwẹngị simeḅịa ini gbọrịḅọ ọkị soḅịa, se ísíḅọ mị se gbin koromaḅịa.

⁴¹Mama eremeni ḍụparị ọgọnọ fịye gbẹịn simeḅịa; ini gbọrịḅọ ọkị soḅịa, ini ísíḅọ ma se gbin koromaḅịa.

⁴²Anịẹrẹchị, ó koru ḅụ sime, anịatịḅị ọ́ Nyanaḅọ Ḅe ḅoḅịa ene mị ó nemikẹ.

⁴³Warị mị nyanaḅọ ḅe nemikase furu ḅọ ḅe ḅoḅịa sịkị nwọ nemi ọkụma, ọ̀ mọnọka ḅụ simeḅịa, ò ḅereni se furuḅọ ḅe oria warị mị ḅie kan sọẹkẹ.

⁴⁴Mịn mị ẹrẹchị ómine sọnị sịkịmamgba ọ́ ḅụ karakaramaḅịa, anịatịḅị Tomoniḅọ Tọkụ Ḅe ó se ḅietọnka sịkị ḅụ mị ò ḅoḅịaye-ẹ.

⁴⁵“Tụḅọ anị ọkụma, kuḅie se ḅụgbana gbẹịn, pịkị nemi fịrịnwẹngịḅọ? Ori ḅọ ḅe anị ọ̀ nyanaḅọ ḅe se ísí fịrịnwẹngịapụma tịḅịnịḅọ mịẹ fịrịnwẹngịḅọ ḅe-ẹ, ye fị na iḅi sịkị ḅụ fịye se ini pịrịarị ḅọ ḅe-ẹ.

⁴⁶Ori fịrịnwẹngịḅọ ḅe nyanaḅịa ḅieḅẹlẹ laḅịa ọkụ ḍiki ọ̀ nyanaḅọ ḅe pịkịma ḅo warị laḅịa sịkị, ọ̀ mị ḅara nwọ mịẹ-aḅẹ nwọḅẹ ọkụma!

⁴⁷Kọkọmaye, à nwọ ḍuko ọ́ pịrịaḅẹ, ọ̀ nyanaḅọ ḅe oria ye mamgba se ọ̀ ḅarachụaḅịa.

⁴⁸Ọkụma ori nemikase si fịrịnwẹngịḅọ-ẹ ḅẹḅẹ, ọ̀ nwọse ọ̀ ḅụ ḅẹḅịa, ị̀ nyanaḅọ ḅe ò sime ḅọlọ sịkị laḅịa,

⁴⁹se ọ̀ sakị ò juo fịrịnwẹngịapụma fomuḅịa, se opu iruḅuapụma na fị na ḅu na ḅụ simeḅịa.

⁵⁰Anịsịkị ọ̀ nyanaḅọ ḅe vinpịkị ḅoḅịa, ò se ḅietọnka pịkị nemika sịkị ḅụ.

⁵¹Ọ̀ nyanaḅọ ḅe fomuḅara se ọ̀ pịrịḅịa, pịkị ò se epekelepepe apụma ḅie chụaḅịa anị owu na akafarị na sime nyọ mị-ẹ.