Read kirikeni Matio 26 Bible Online

Matio 26 - kirikeni bible

Matio 26

¹Jizọs Ḅe màye mamgba nwọ ḍie so sịkị, ọ̀ nwọse oria ọḅụḍukoapụma ḅẹmẹ,

²“Ó nemi ḅara ḅụ mama ḍin la ḅịa sịkị, Saḅaḅọrọ Alalị mị wa nwọ fịḅịa, se Tomoniḅọ Tọkụ Ḅe ini nwọ ḅọrọma se mgbẹsẹchịn ọgọnọ ọ̀ ḅakụḅaaḅịa.”

³Anịsịkị tịḅịnị Agbamịẹapụma na Ju sẹnịapụma na gele agbamịẹḅọ ḅe warị ḅie koḅirimamẹ, anị ini Kayafas nwọse chịnḅọ ḅe,

⁴se ḅịpị ọkịamẹ ini ḅọịma Jizọs Ḅe nwọ kun se Ọ̀ ḅaaḅịa ḅara.

⁵“Wa alalị mị ḅie anị mịẹ ẹkẹ,” ini nwọ ḅẹmẹ, “Tomonima ḅofa amafiemaye mịẹ.”

⁶Jizọs Ḅe Saịmọn, ḅụkan obi kọn ḅọ ḅe warị ḅie simearịogbo, Bẹtani ama mị ḅie.

⁷Gbọrị eremeniḅọ yela ololo, se kụnụ pịkị opu igbiki la olo ḅie ḅein ye nwọse ọ̀ damaḅomẹ, árị anị se Jizọs Ḅe tịḅị saramẹ ò yefịarị ogbo.

⁸Ọkụma ọḅụḍukoapụma mịn mị ọrị sịkị ini ịganịmẹ. Ini gbelamẹ, “Nde á gose papa mị ḅara se anị igweinmarịye?

⁹Mgbọkụ ini mịn kụnụ olo mị se opu igbiki dẹrị, se ḍie igwein apụma pịrịsam!”

¹⁰Jizọs Ḅe ini ḍukoarịye mị nwọ nemi se, nwọse ini ḅẹmẹ, “Nde ó gose ḅụfụka se eremeniḅọ ma pịrịarịye? Anịatịḅị árị opu iḅiye mịẹ ị̀ pịrịsam.

¹¹Ọ́ sịkịmamgba igwein apụma na simeḅịa, ọkụma àrị ómine na sịkịmamgba sime-ẹkẹ.

¹²Mịn kụnụ olo mị nwọse ị̀ya oju ḅụ sara mị ḅụ, árị ị̀ karakarama ị̀ya ḍipi mị pịrịmẹ.

¹³Mịọkụ, à ḍuko kụrọma ọ́ pịrịaḅẹ! Ini mịn iḅiọkwẹịn mị ḍukoḅịa nyọ layelaye, bebe tomonikiri mị mgba ḅie, á mịẹye mị ini nwọse chụa ḍukoḅịa, á se ḅiekoroma ḅụ.”

¹⁴Anịsịkị oyimaịn ọḅụḍukoapụ fịnjịma ḅie gbọrịḅọ, Judas Ịskarịọt nwọ chịnḅọ ḅe tịḅịnị agbamịẹapụma nwọ damamunmẹ

¹⁵se nwọ ḅẹmẹ, “Cheye ọ́ nwọse ị̀ pịrị ḅe à nemikase Jizọs Ḅe nwọ ḅọrọma ọ́ pịrị ọkụma?” Ini seleḅa pẹkẹrẹ-a soi nwọ kịẹn se ọ̀ pịrịmẹ.

¹⁶Anịsịkị ọkịmun, Judas ḅe achọ ḍọkịmẹ, Jizọs Ḅe nwọse ịbafịḅịa ọkụ.

¹⁷Suka Fịturu Alalị mị ḅe tatarị ene mị ḅụ ọḅụḍukoapụma Jizọs Ḅe damaḅo se ò gbelamẹ, “Nde Ị́ ḅi na wa Saḅaḅọrọ Alalị fịye mị nwọ karakarama Ị́ pịrịḅịa nyọ?”

¹⁸“Ómine ama mị ḅie gbọrị owuḅọ nwọ damamun,” ọ̀ nwọse ini ḅẹmẹ, “Se ḍuko ọ̀ pịrị: ‘Yeḍieḅọ ḅe nwọ ḅẹmẹ, ị̀ya sịkị mị anị ḅo ḅarakuḅu lasam ị̀ya ọḅụḍukoapụma na ị̀rị̀ na ị́ya warị ḅie wa Saḅaḅọrọ Alalị mị nwọ fịḅịa.’”

¹⁹Ọḅụḍukoapụma Jizọs Ḅe ḍuko ini pịrị ḅara mị nwọ mịẹmẹ, se Saḅaḅọrọ Alalị fịye mị nwọ karakaramamẹ.

²⁰Saso ḅiri lasịkị, Jizọs Ḅe oyimaịn ọḅụḍukoapụ fịnjịma na kpọnjị sime se yefịmẹ.

²¹Ini fịye mị fịarịogbo, Jizọs Ḅe nwọ ḅẹmẹ, “À ḍuko ọ́ pịrịaḅẹ, ọ́mịna ḅie gbọrịḅọ ị̀ se ịbafịḅịa.”

²²Ọḅụḍukoapụma opuma ngịrịmẹ, se gbọrịḅọ, gbọrịḅọ sakị ò gbelamẹ, “Karakaraye ḅụ ị́ ị̀ ḅẹkẹ, Nyanaḅọ?”

²³Jizọs Ḅe pẹkẹrẹmẹ, “Ị̀rị̀ na gbọrị-sịkịḅụ ḅarase bọlị ḅie fịye dekifịarị ḅọ ḅe, mị ị̀ se ịbafịḅịaye-ẹ.

²⁴Tomoniḅọ tọkụ Ḅe ọ̀ fịḅịa, Fịafịa ḍiri mị ḍuko ọkụ ḅụ, ọkụma anị ḅalafamaye sọ ori ḅọ ḅe pịrịḅịa nwọ Tomoniḅọ Tọkụ Ḅe se ịbafịḅịa ḅọ ḅe! Ini oyika mị iḅitẹịnmẹ!”

²⁵Judas, ịbafịḅọ ḅe nwọse ò gbelamẹ, “Pikipikiye ofori-ẹ, Yeḍieḅọ, na ị̀ ḅẹkẹ?” Jizọs Ḅe ọ̀ pẹkẹrẹmẹ, “Anị ị́ ḍuko ọkụ-ẹ.”

²⁶Ini ye mị fịarịogbo, Jizọs Ḅe fịturu deki se anị ḅẹlẹma, anị pu, anị se ọḅụḍukoapụma pịrịmẹ. Se nwọ ḅẹmẹ, “Ómine ọkị se fị, mị ị̀ya oju mị-ẹ.”

²⁷Ọ̀ pịkị ọmọngọ mị dekimẹ, mịẹḅaka se Tamụnọ Ḅe ḅẹ so sịkị ori anị se ini pịrịmẹ. Se nwọ ḅẹmẹ, “Ómine mgba anị ḅu,

²⁸mị ị̀ya oju pulo mị-ẹ, Tamụnọ ọḅọkụ mị mịẹ kụrọmaye mị, àrị ọsụn tọn-apụ pịrị pulo mị, siḅụ-ḅarasin mị gose.

²⁹À ḍuko ọ́ pịrịaḅẹ, à ḅarị jịn sịkị se mịn iru mị ḅu-ẹkẹ, ọkịmun àrị ómine na ịwọma anị ḅuḅịa ene la, ị̀ Ḍa Ḅe Amanyanakiri mị ḅie.”

³⁰Anịsịkị ini ḅo gbọrị nime nwọ chumẹ, se pakaso Oliv Tụndụ mị nwọ mun mẹ.

³¹Anị Jizọs Ḅe nwọse ini ḅẹye-ẹ, “Mị ḍin ḅie ómine mgba mangị ị̀ koromasoḅịa, anịatịḅị Fịafịa ḍiri mị nwọ ḅẹmẹ, ‘Tamụnọ Ḅe ananaḍikiḍikiḅọ ḅe ḅaaḅịa, se ananama galagalaḅịa.’

³²Ọkụma à fị ḅụ sịsẹḅịa sịkị, àrị ọ́ tọrọkọ pẹlẹma so Galili munḅịa.”

³³Pita ḅe pẹkẹrẹ se nwọse Jizọs Ḅe ḅẹmẹ, “Àrị ngịsị ị́ wẹrịso-ẹkẹ, ísí apụ mamgba ị́ wẹrịsoḅịa nwọ ḅẹ sọnị!”

³⁴Jizọs Ḅe nwọse Pita ḅe ḅẹmẹ, “Kọkọmaye à nwọ ḍuko ị́ pịrịaḅẹ na, mị ḍin, ọḅọkọ ma paịnka simeogbo, ị́ tẹrẹ-a sịkị se ị̀ pikiḅịa.”

³⁵Pita ḅe pẹkẹrẹ se nwọ ḅẹmẹ, “Ngịsị àrị ị́ piki-ẹkẹ, àrị ị́rị́ na fịḅịa nwọ ḅẹ sọnị!” Se ísí ọḅụḍukoapụ mamgba anị gbọrị ḅara mị nwọ ḅẹmẹ.

³⁶Anị Jizọs Ḅe oria ọḅụḍukoapụma na so Gẹtsimẹnị nwọ chịn gbọrị nyọ mun ye-ẹ, se ọ̀ nwọse ini ḅẹmẹ, “Ọ́ mịanga sime, anịsịkị ị̀rị̀ à somun anịanga tẹkẹḅịa.”

³⁷Ò Pita ḅe na, Zẹbidi mama owuapụ awọma na, ọkị ọḅụ chụamẹ. Ngịrị na fị ḅụḅalaḅala na Ọ̀ pụnụmamẹ,

³⁸se Ọ̀ nwọse ini ḅẹmẹ, “Ị̀ kuḅie mị anị opuma ibo dekisam, ọkịmun fị mị lamẹ. Ọ́ mịanga sime se ị̀rị̀ na koru.”

³⁹Ò kele nwẹngị sikima mun se, ọ̀ ḅụ se chịẹma gbin, tọrụ se kiri iḅo se tẹkẹmẹ, “Ị̀ Ḍa, anị ḅọrọ ineda mịẹḅịa ọkụma, ye mị tọrụsiọrị ọmọngọ mị ị̀ gbarị ḅọrọ! Ọkụma à ḅi ḅara mịkẹ, Ị́ ḅi ḅara mị-ẹ.”

⁴⁰Ò vinpịkị tẹrẹ-a ọḅụḍukoapụma damaḅomẹ, se ọrịmẹ na ini mọnọaḅẹ, Ọ̀ nwọse Pita ḅe ḅẹmẹ, “Nde mịẹse ómine tẹrẹ-apụma ineda ị̀ ḅụ sọ gbọrị sịkị kẹngẹ sọ se ị̀rị̀ na korukaye?

⁴¹Ó koru, se tẹkẹ, mịẹse ọ́ ḅịkịmun telima ḅie sọẹka ḅara. Tẹmẹ mị anị ḅụ karakarama waraḅẹ, ọkụma ịnyọ ojumịnị mị ḅụ ofori-ẹ.”

⁴²Jizọs Ḅe pịkị maịn karama sịkị se somun tẹkẹmẹ, “Ị̀ Ḍa à mị tọrụsiọrị ọmọngọ mị ḅuka simeogbo anị ḅọrọ ẹkẹ ḅẹḅẹ, Ị́ ḅi ye mị mị-ẹ.”

⁴³Ọ̀ pịkị kpoto vinpịkị mun mẹ se ọḅụḍukoapụma mọnọarị ọkụ nwọ ọrịmẹ, ini ineda inia tọrụmgbọlụma finjikẹ.

⁴⁴Jizọs Ḅe pịkị ini koromasomẹ, se tẹrẹ-a sịkị karamaye nwọse tẹkẹmẹ, àrị gbọrị ọkwẹịnma nwọ kọnmẹ.

⁴⁵Anịsịkị ò vinpịkị ọḅụḍukoapụma damamun se nwọ ḅẹmẹ, “Ọ́ pa mọnọ se ịnyọ sara-ao? Ḍiki! Sịkị mị anị ḅo ḅarakuḅu lasam ini Tomoniḅọ Tọkụ Ḅe ḅọrọma si apụma pịrịsam.

⁴⁶Ọ́ Sịsẹ, ó ye wa so. Ḍiki, ḅe anị ị̀ se ịbafị ḅọ ḅe-ẹ!”

⁴⁷Jizọs Ḅe pa ọkwẹịn simearịogbo anị Judas, oyimaịn ọḅụḍukoapụ fịnjịma ḅie gbọrịḅọ ḅo laye-ẹ. Ḅaka tomonikpo ọ̀ ḅụ sọmẹ, okola-agiji na imgbele na nwọ ọlọ waraḅẹ. Tịḅịnị agbamịẹapụma na Ju sẹnịapụma na ini fịrịmamẹ.

⁴⁸Ịbafịḅọ ḅe ori elekima se tomonikpo mị pịrịmẹ na, “À ḅịpị nọnjụḅịa ḅọ ḅe, anị ọ́ ḍọkịarịḅọ ḅe-ẹ. Ómine ò kun!”

⁴⁹Judas ḅe ọ̀ gbụkụkụma Jizọs Ḅe damamun se nwọ ḅẹmẹ, “Dein ị́rị́ na sime, Yeḍieḅọ,” se ọ̀ ḅịpị nọnjụmẹ.

⁵⁰Jizọs Ḅe nwọse ọ̀ ḅẹmẹ, “Ikiaḅọ nde ị́ nwẹngịarị ọkụ?” Anị ini ḅo Jizọs Ḅe kun se kụrọma ori ọlọ se soye-ẹ.

⁵¹Jizọs Ḅe na sime apụma ḅie gbọrịḅọ, oria okola-agiji mị wọrọpakụma, anị se Gele Agbamịẹḅọ ḅe warị omoniḅọ ḅe ḅeri pẹlẹ sinmẹ.

⁵²Anị Jizọs Ḅe nwọse ọ̀ ḅẹye-ẹ, “Ị́ya okola-agiji mị se anịa lubu ḅie chụa, anịatịḅị okola-agiji deki apụ mamgba okola-agiji fị nwọ kọnḅịa.

⁵³Ó nemika na àrị ineda Ị̀ Ḍa Ḅe chịnḅịa na ọ̀ ḅarachụa ị̀ pịrị, se Ọ̀ pịkị kirikiri owuni poku-a tesi oyimaịn fịnjị nẹngịma owuni enjẹlapụ nwọse ị̀ fịrịmaḅịa?

⁵⁴Anị ọkọ paka ọkụma nde Fịafịa ḍiri mị ḅo kọkọmaye nwọ sọḅịa ọkụ, na anị mị ḅara nwọ pakaḅịa ḅẹye mị?”

⁵⁵Anị Jizọs Ḅe ọkwẹịn tomonikpo mị pịrịye-ẹ, “Ómine okola agijima na imgbelema na nwọse ḅo ị̀ kun-e ḅo, ị̀rị̀ furuḅọ ọkụ? Eneḅeneḅene àrị Oputẹkẹwarị mị ḅie sime yeḍie-ḍiemẹ, ómine ị̀ kunkẹ.

⁵⁶Ọkụma màye mamgba pakasam ịkịankoroapụma Fịafịa ḍiri mị ḅie gịẹịnsa yema ḅo kọkọmaye nwọ sọḅịa gose.” Anị ọḅụḍukoapụ mamgba ò koroma mangị soye-ẹ.

⁵⁷Jizọs Ḅe kun apụma Ò se Kayafas Gele Agbamịẹḅọ ḅe warị mun mẹ, anị Oloko ḍieapụma na, sẹnịapụma na koḅirima nyọ mị.

⁵⁸Ọkụma Pita ḅe sasaju ḅụ wẹrị Ò ḍuko mun Gele Agbamịẹḅọ ḅe odo mị ḅọkọ lamẹ. Ori odo mị ḅie sọmun se nyọ koruapụma na kpọnjị simemẹ, anịanga kuluma mị ọrịḅịa ẹrẹchị.

⁵⁹Tịḅịnị agbamịẹapụma na bebe ḅẹrẹchiri mị mgba na ini se Ọ̀ tịḅị gbanaḅịa iruoaye nwọ ḅiamẹ, se Jizọs Ḅe pụnụma se Ọ̀ ḅaaḅịa gose;

⁶⁰ọkụma ini ineda ḍọkịḅoye ofori-ẹ, tọn-apụ pakaḅo Ọ̀ ḅụ iruoaye nwọ ḍukomẹ ḅẹ sọnị. Anịḅe kuluma mama owuapụ nwẹngị pakaḅo

⁶¹se nwọ ḅẹmẹ, “Ḅe ḅọ Ḅe nwọ ḅẹmẹ, ‘Àrị ineda Oputẹkẹwarị mị nwọ sumagbinḅịa, se tẹrẹ-a ḍin ḅụ anị nama chịẹmaḅịa.’”

⁶²Gele Agbamịẹḅọ ḅe sịsẹ chịẹ se nwọse Jizọs Ḅe ḅẹmẹ, “Ini se Ị́ pụnụmayema ḅụ Ị́ nyana se pẹkẹrẹḅịaye ofori?”

⁶³Ọkụma Jizọs Ḅe gboinma ò pokimẹ. Gele Agbamịẹḅọ ḅe pịkị ḅarị ọkwẹịn Ọ̀ pịrịmẹ, “Ḍumo gbamaso Tamụnọ Ḅe ẹrẹ ḅụ, à mịọkụ ye karị ị́ pịrịaḅẹ: ḍuko wa pịrị ị́rị́ Mẹsaya Ḅe-ẹ ḅẹḅẹ, Tamụnọ Tọkụ Ḅe.”

⁶⁴Jizọs Ḅe ọ̀ pẹkẹrẹmẹ, “Ị́rị́ ọkọ ḅẹmẹ. Ọkụma à ḍuko ómine mgba pịrịaḅẹ: na mịọkụ ọkịmun, ọ́ Tomoniḅọ Tọkụ Ḅe ọrịḅịa Kụrọmamgba Nyanaḅọ Ḅe amaḅara anga ò sime waraḅẹ, pịkị so elekimama ọgọnọ wẹrị ḅoḅịa sịkị!”

⁶⁵Mịn mị ḅụ, Gele Agbamịẹḅọ ḅe ịganị ḅụ oria ḅụchụaye kan se nwọ ḅẹmẹ, “Mịn Tamụnọ ḍukosima-ẹ! Wa ḅarị jịn onyechịẹapụ ḅikẹ! Mịnyọ ḅụ ómine Oria sitịḅị ọkwẹịnma nwọ naasam!

⁶⁶Nde ó koroma ọkụ?” Ini ọ̀ pẹkẹrẹmẹ, “Ḅẹrẹ Ọ̀ ḅara sisam, Ọ̀ fị na gbẹịnmẹ.”

⁶⁷Anịsịkị ini fụla se Ọ̀ tọrụ sara se Ò fomumẹ se Ọ̀ ḅụrọ apụma

⁶⁸nwọ ḅẹmẹ, “Mẹsaya ịkịankoro wa pịrị! Mgbamgba tụḅọ Ị́ ḅakụ!”

⁶⁹Pita ḅe odo mị ḅie kpọnjị sime waraḅẹ, fịrịnwẹngị Gele Agbamịẹḅọ ḅe pịrịarị iremeniawọma ḅie gbọrịḅọ ọ̀ damaḅo se nwọ ḅẹmẹ, “Ị́rị́ sọnị Jizọs Galili ḅọ Ḅe na nwẹngịḅọ-ẹ.”

⁷⁰Ọkụma ori inimgba tọrụkuḅu ḅụ anị pikimẹ. “Ị́ ḍukoarịye tịḅị à nemikẹ,” ọ̀ nwọ pẹkẹrẹmẹ,

⁷¹se odo mị ḅie ḅọrọ pakaso nyọ mị mun mẹ. Jịn fịrịnwẹngị iremenitọkụ ori ọrị se nwọse anịanga ḅụ sime owuapụma ḅẹmẹ, “Ò Jizọs Nazarẹt ḅọ Ḅe na nwẹngị simemẹ.”

⁷²Pita ḅe pịkị anị pikimẹ, se pẹkẹrẹmẹ na, “À yekarịfịmẹ na ori ḅọ Ḅe àrị Ò nemikẹ!”

⁷³Sịkị kele ḅọrọ sịkị anịnyọ ḅụ chịẹsime owuapụma Pita ḅe damaḅo se nwọ ḅẹmẹ, “Anị sime ḅara ị́rị́ inia ḅụ gbọrịḅọ-ẹ, ị́ya ọkwẹịn ḅara mị ị́ ḍiepakụmamẹ!”

⁷⁴Anịsịkị Pita ḅe yekarịfịmẹ, “Ye Tamụnọ Ḅe ḅụfụka se ị̀ pịrị à nwọ ḍukoarịye mị kọkọmayekẹ ḅẹḅẹ! Ori ḅọ Ḅe ngịsị àrị Ò nemikẹ!” Anị gbọrị kirikiri ḅụ ọḅọkọ ḅe paịnmẹ,

⁷⁵se Pita ḅe Jizọs Ḅe ḍuko ọ̀ pịrịye mị nwọse ḅiekoromamẹ: “Ọḅọkọ ma paịnka simeogbo tẹrẹ-a sịkị ị́ nwọse ị̀ pikiḅịa na ị́ ị̀ nemika-ẹ.” Ọ̀ pakaso se mun ḅụ akụ ḅara nwọse owumẹ.