Read kirikeni Matio 27 Bible Online

Matio 27 - kirikeni bible

Matio 27

¹Dede funfun ḅụ tịḅịnị agbamịẹapụma na Ju sẹnịapụma na ḅẹrẹḅia se Jizọs Ḅe pịrịmẹ, ọ̀ ḅaaḅịa gose.

²Ini ikoli se Ori ịkasị se Ọ̀ ḅọrọma Paịlet Romapụ gọvịna ḅe pịrịmẹ.

³Judas, ịbafịḅọ ḅe naasam na ini ḅẹrẹpẹlẹ Jizọs Ḅe ḅara simasam nwọ ḅẹ sịkị, ọ̀ mịẹ si ḅụ ò vinpịkịmẹ, se seleḅa pẹkẹrẹ-a soima nwọse pịkị mun tịḅịnị agbamịẹapụma na sẹnịapụma na pịrịmẹ.

⁴Ọ̀ nwọ ḅẹmẹ, “À siye mịẹsam, siye mịẹkaḅọ nwọse ịbafị na ini Ọ̀ ḅaa-ẹ nwọḅẹ ye mị!” Ini ọ̀ pẹkẹrẹmẹ, “Nde anị mị wa gbakịma ọkụ?” “Anị mị ị́ya fịrị-ẹ!”

⁵Judas ḅe igbikima se Oputẹkẹwarị mị ḅie gbin koroma se somun ọ̀ ḅụ kpọ ḅaamẹ.

⁶Tịḅịnị agbamịẹapụma igbikima kolokolo se nwọ ḅẹmẹ, “Mịn mị pulo tịḅị igbiki-ẹ, anị mịna oloko na kurakẹ anị se Oputẹkẹwarị igbiki koko igbe ḅie chụa.”

⁷Ini anịa ḅịpịogbosọ nwọ nyana so sịkị, ini anị igbiki mị se ḅẹlẹ tẹmẹḅọ Ele mị nwọ fẹmẹ, se anị se igoniapụ ḍụẹịn ḍipi nyọ nwọ mịẹmẹ.

⁸Anị mị mịẹse ini “Pulo Ele” nwọse nyọ mị chịnmẹ ḅo mịmgba ene lamẹ.

⁹Anịsịkị ịkịankoro Jerimaya ḅe ḍukoye mị ḅo kọkọmaye nwọ sọmẹ. “Ini seleḅa soima, Izrẹlapụma ḅụ tọn-apụ se ọ̀ tịḅị ḅụ gbẹịnyema nwọ ọkịmẹ,

¹⁰se anị se ḅẹlẹ tẹmẹḅọ ḅe ele mị nwọ fẹmẹ, Nyanaḅọ Ḅe tọn ị̀ pịrịsa ḅaraḅụ.”

¹¹Jizọs Ḅe Romapụ Gọvịna ḅe tọrọkọ chịẹmẹ, se Gọvịna ḅe Ò gbelamẹ, “Juapụ amanyanaḅọ ḅe ị́rị́?” “Ị́rị́ anị ọkọ ḅẹye-ẹ,” Jizọs Ḅe nwọ pẹkẹrẹmẹ.

¹²Ọkụma tịḅịnị agbamịẹapụma na sẹnịapụma na se Ọ̀ pụnụmaye mamgba ḅụ Ò ye pẹkẹrẹkẹ.

¹³Anị Paịlet ḅe nwọse Ọ̀ ḅẹye-ẹ, “Mà ini se Ị́ pụnụmaye mamgba Ị́ naaka?”

¹⁴Ọkụma Jizọs Ḅe gbọrịye sọnị se ọ̀ pẹkẹrẹ ḍụkụkẹ, anị iḅiọkụma gọvịna ḅe ḅụgbiripumamẹ.

¹⁵Saḅaḅọrọ Alalị mị lasịkị lasịkị, Romapụ gọvịna ḅe tomonikpo mị ọ̀ ḅara ḅiḅimẹ gbọrị ikoliḅọ ḅụ ọ̀ ḅarasin ini pịrị, mịẹmịẹye ḅaraḅụ.

¹⁶Anịsịkị mị ḅụ ini iḅiọkụ nemi ikoliḅọ simemẹ, Barabas nwọ chịnḅọ.

¹⁷Se tomonikpo mị koḅirima so sịkị, Paịlet ḅe ini gbelamẹ, “Nde ó ḅi na à ḅarasin ọ́ pịrị nwọ ḅẹḅọ? Barabas ḅe mụnọ se Jizọs ini Mẹsaya se chịnḅọ Ḅe?”

¹⁸Anịatịḅị ori iḅiọkụnemi mẹ na ḍikitọrụfụka ḅụ ini Jizọs Ḅe nwọ ḅọrọma ọ̀ pịrịmẹ.

¹⁹Anịmịsikima, Paịlet ḅe ḅẹrẹkọn nyọ mị ḅụ simearịogbo, tarọ ma oku se ọ̀ fịrịmamẹ: “Simịẹkaḅọ ḅe na gbọrịye sọ mịẹma, anịatịḅị nwọ ḅọrọsa ḍin mị ḅie, àrị ò gose ḍawọju opuma tọrụsiọrịmẹ.”

²⁰Tịḅịnị agbamịẹapụma na sẹnịapụma na tomonikpo mị kpẹịnmamẹ na ini Paịlet ḅe ḅara ḅi, ọ̀ Barabas ḅe ḅụ ḅarasin, se Jizọs Ḅe nwọ ḅaa.

²¹Ọkụma Paịlet ḅe kpoto tomonikpo mị gbelamẹ, “Ini mama apụma ḅụ àrị nde ḅọ ḅụ ḅarasin ọ́ pịrị ọ́ nwọ ḅi?” Ini pẹkẹrẹmẹ, “Barabas ḅe-ẹ!”

²²“Nde, anịsịkị Jizọs ini Mẹsaya se chịnḅọ Ḅe à nwọ mịẹḅịa ọkụ?” Paịlet ḅe nwọ gbelamẹ. “Ò se mgbẹsẹchịn ọgọnọ ḅakụḅaa!” Inimgba nwọ pẹkẹrẹmẹ.

²³Ọkụma Paịlet ḅe gbelamẹ, “Che oloko Ọ̀ nwọ koro?” Anị sọnị ini pa gele pụkọ se olokuaḅẹ: “Mgbẹsẹchịn ọgọnọ Ọ̀ ḅakụḅaa.”

²⁴Paịlet ḅe ḅo ọrịmẹ na anị ḍukoma mun mị yeḅụsọkẹ, anịnakaraka anị amafiemaḅịa nwọ ḅẹ sịkị, ò mengi ọkị ọ̀ ḅarama sịkịrịmẹ tomonikpo mị tọrụkuḅu se nwọ ḅẹmẹ, “Ị̀ ḅara ḅe tomoniḅọ ḅe fị mị ḅụ ofori-ẹ! Ọ́mịna ḅụḅẹlẹ ọkụ ọ́ nwọ mịẹ!”

²⁵Bebe tomonikpo mị mgba pẹkẹrẹmẹ, “Ye Ọ̀ tịḅị pulo mịna ọgọnọ gbana, pịkị mịna awọma na!”

²⁶Anị Paịlet ḅe Barabas ḅe ḅụ ḅarasin tomonikpo mị pịrịye-ẹ, se ò Jizọs Ḅe fomu so sịkị, ori Ọ̀ ḅọrọma ini pịrịmẹ na ini Ò se mun mgbẹsẹchịn ọgọnọ ḅakụḅaa.

²⁷Anịsịkị Paịlet owunima Jizọs Ḅe se so gọvịna ḅe warị mun mẹ, se owuni-ogbo mị mgba koḅirima Ò kelemamẹ.

²⁸Ini Oria ḅụchụayema sin se awụwụ ḅụchụaye se Ọ̀ chụamẹ.

²⁹Anịsịkị ini ịga se amanyanaḅọchu ḍori se Ò chiramẹ, se chịn se Oria amaḅara mị ḅie chụamẹ, anịsịkị ini Ọ̀ tọrọkọ kpẹrẹkị se Ò kombo se nwọ ḅẹmẹ, “Gele Juapụ Amanyanaḅọ nangwọ ḍumo nyana!”

³⁰Ini fụla se Ọ̀ sara, se chịn mị ọkị se Ọ̀ tịḅị fomumẹ.

³¹Ini Ò kombo so sịkị, ini Ọ̀ ḅụ inia ḅụchụaye mị sin se Oria yema nwọse Ọ̀ chụamẹ. Anị ini Ọ̀ ḅọrọma pakụmaye-ẹ, Ò se mun mgbẹsẹchịn ọgọnọ ḅakụḅaaḅịa ẹrẹchị.

³²Ini pakasoarịogbo ini gbọrị Saịrini owuḅọ na ịrịamẹ Saịmọn nwọ chịnḅọ, se owunima kụrọ ḅara se ori ọlọ se ò Jizọs Ḅe mgbẹsẹchịn mị pụramẹ.

³³Ini ḅo Gọlgọta nwọ chịn nyọ mị lamẹ, anị mị fiearịye, “Kukure-tịḅị Nyọ.”

³⁴Anịnyọ ini akụ iru se Jizọs Ḅe pịrịmẹ; Ọ̀ ḅịpị se anị lama so sịkị, Ò ḅu ḍụkụkẹ.

³⁵Ini Ò se mgbẹsẹchịn ọgọnọ ḅakụḅaamẹ, se Oria ḅụchụayema nwọ ḍiama ọkịmẹ, ịkịan wakị ḅụ.

³⁶Anị mị mịẹso sịkị, ini kpọnjị sime se Ò korumẹ.

³⁷Ọ̀ tịḅị ọgọnọju ḅụ, ini ḍuko se Ọ̀ pụnụmaye mị gịẹịn waraḅẹ: “Ḅe Jizọs Ḅe-ẹ, Juapụ Amanyanaḅọ Ḅe.”

³⁸Anịsịkị ini jịn mama kụrọḅara se furufuruapụ se chụa mgbẹsẹchịnma ḅụ Jizọs Ḅe na ḅakụḅaamẹ, gbọrịḅọ Oria amaḅara anga ísíḅọ ḅe pịkị Oria ereḅara anga ḅụ.

³⁹Nwẹngị ḅọrọ sime-a tomoni inia tịḅịma jike se wọlọ ọkwẹịn tan Jizọs Ḅe ọgọnọ saramẹ:

⁴⁰“Ị́rị́ Oputẹkẹwarị mị nwọ kan sara se tẹrẹ-a ḍin ḅụ anị nama chịẹmaḅịa ḅọ ḅe! Ị́ ḅụ ḍụaḅọrọma, ị́rị́ nemikase Tamụnọ Tọkụ-ẹ ḅẹḅẹ! Mgbẹsẹchịn ọgọnọ koro ḅo!”

⁴¹Anị gbọrị ḅara mị ḅụ tịḅịnị agbamịẹapụma na Oloko ḍieapụma na, sẹnịapụma na ọkọ se Ò kombomẹ:

⁴²“Ò jịn apụ ḍụaḅọrọmamẹ, ọkụma ori ineda Ọ̀ ḅụ ḍụaḅọrọmakẹ! Izrẹl Amanyanaḅọ ḅe orika? Ye Ori mgbẹsẹchịn ọgọnọ koroḅo anịsịkị, wa Ò ḅereniḅịa!

⁴³Ò kuḅie se Tamụnọ Ḅe ḅụgbanamẹ, se nwọ ḅẹmẹ, Ori Tamụnọ Tọkụ-ẹ. Iḅimẹ, ye anịọkụma wa ḍiki Tamụnọ Ḅe mịọkụ Ọ̀ ḍụaḅọrọmaḅịa-ẹtuḅo!”

⁴⁴Ini se Ori na chụa ḅakụḅaa kụrọḅara se furufuruapụma sọnị anị gbọrị ḅara mị nwọse Ọ̀ wọlọmẹ.

⁴⁵Karakarama eneogboin ḅiri, kanakana bebe ama mị gbẹịn mun ḅọlọ sịkị nwọ lamẹ.

⁴⁶Tẹrẹ-a so pembe ḅiri ḅụ Jizọs Ḅe kụrọ pụkọ nwọse olokumẹ, “Ẹlaị, Ẹlaị, lama sabaktani?” Anị fiearịye, “Ị̀ Tamụnọ, Ị̀ Tamụnọ, nde ị́ gose ị̀ sịkịye?”

⁴⁷Anị nyọ chịẹ sime apụma ḅie tọn-apụ Ọ̀ pụkọ naa se nwọ ḅẹmẹ, “Ori Ịlaịja ḅe chịn aḅẹ!”

⁴⁸Inia ḅie gbọrịḅọ kirikiri mangị mun sapo ọkị, anị se tụmgbakị iru ḅie su, anị se chịn ḅịpị sụka se Ọ̀ pịrịmẹ na Ò ḅu-ẹ.

⁴⁹Ọkụma ísíapụma nwọ ḅẹmẹ, “Koru, ye wa ḍiki nwọfa Ịlaịja ḅe ò ḅo Ọ̀ ḍụaḅọrọmaḅịa-ẹtuḅo!”

⁵⁰Jizọs Ḅe pịkị gele pụkọ ḅụ olokumẹ, se Oria kuluma ịnyọ nwọ saramẹ.

⁵¹Anịsịkị Oputẹkẹwarị mị ḅie kikichụa ḅịtẹ mị gbụama maịn pumẹ, ọgọnọ ọkịmun chuku la. Kiri mị jikemẹ, se ḍụparịma pumẹ,

⁵²iḍupuma pu finjimẹ, se fị ḅọrọsa Tamụnọ tomonima ḅie tọn-apụ fịḅụsịsẹmẹ.

⁵³Ini iḍupuma koroma somẹ, se Jizọs Ḅe fịḅụsịsẹ seso sịkị, ini Fịafịa Opuama mị ḅie sọmẹ, se tọn-apụ ini ọrịmẹ.

⁵⁴Owuni tịḅịnịḅọ ḅe na, ori na sime Jizọs Ḅe koruarị owunima na kiri mị jike ọkụ na pakaye mamgba na nwọ ọrị sịkị, inia ḅalafa, se nwọ ḅẹmẹ, “Kọkọmaye ḅụ Ḅe Tamụnọ Tọkụ-ẹ!”

⁵⁵Tọn-a eremeni sasaju ḅụ wẹrị yeḍiki simemẹ, anị Galili ḅie wẹrị Jizọs Ḅe ḍuko se ḅarachụa Ọ̀ pịrị sime apụma-ẹ.

⁵⁶Inia ḅie sime apụ anị Meri Magdalin ma na, Jems na Josẹf na nyengi Meri ma na, pịkị Zẹbidi ta ma na.

⁵⁷Anị ḅo saso ḅiri lasịkị, Arịmatia ḅie gbọrị alaḅọ ḅomẹ oria ẹrẹ anị Josẹf, ori sọnị Jizọs ọḅụḍukoḅọ-ẹ.

⁵⁸Ọ̀ Paịlet ḅe tọrọkọ mun se Jizọs Ḅe oju nwọ ḅimẹ. Paịlet ḅe kụrọpịrịmẹ na ini Jizọs Ḅe oju mị nwọse Josẹf ḅe pịrị.

⁵⁹Anị Josẹf ḅe anị ọkịye-ẹ, ịwọ Sịnịnị ḅịtẹ se anị fịna,

⁶⁰se anị seni ọ̀ ḅarakuḅu iḍupu ḅie ḍipimẹ, ori ịwọma ḍụparị ḅụ pupakụma ọ̀ ḅụ pịrịye mị. Se opu ḍụparị nwọ imbibile anịa ḅịpị gbẹịn, se nwẹngị somẹ.

⁶¹Meri Magdalin ma na ísí Meri ma na anị nyọ ḅụ kpọnjị sime se tọrụ se iḍupu mị damẹ.

⁶²Ịnyọsara Ene ḍukoma ene mị ḅụ, tịḅịnị agbamịẹapụma na Farisiapụma na Paịlet ḅe na ịrịa

⁶³se nwọ ḅẹmẹ, “Tịḅịnịḅọ, wa se ḅiekoromaḅịa na Ori iruoḅọ ḅe ḍumo sime sịkị Ọ̀ nwọ ḅẹmẹ, ‘Tẹrẹ-a ḍin ḅọrọ sịkị à fịḅụ sịsẹḅịa.’

⁶⁴Anịẹrẹchị kụrọpịrị, se ini tọrụkweinma iḍupu mị koru mun tẹrẹ-a ḍin karama ene mị la, mịẹse Oria ọḅụḍukoapụma ḅo Ò furu ẹka ḅara, anịsịkị ḍuko tomonima pịrị na, Ọ̀ fịḅụ sịsẹmẹ. Mịn kuluma iruo mị sitẹịn tatarịye mị nẹngịḅịa.”

⁶⁵Paịlet ḅe nwọse ini ḅẹmẹ, “Ọ́ nyọ koruapụ ọkị, se ómine na iḅitẹịnḅịa ḅara nwọse iḍupu mị koru.”

⁶⁶Anị ini soye-ẹ, se iḍupu mị se ye anị la-ẹka ḅara ḅụ wẹrịmẹ, se pịkị nyọ koruapụ nwọse koromamẹ.