Read kirikeni Matio 5 Bible Online

Matio 5 - kirikeni bible

Matio 5

¹Jizọs Ḅe tomonikpo mị ọrị se iwo gbọrị chịngị tanjịmẹ. Ọ̀ kpọnjị sime sịkị Oria ọḅụḍukoapụma koḅirima Ò kelemamẹ,

²se Ọ̀ sakị ye se ini ḍiemẹ:

³“Ḅieḅẹlẹ sime ini pịrịmẹ nwọ nemi na ini tẹmẹ anga igwein kọnmẹ nwọ ḅeapụma; Soḅie Amanyanakiri mị sime ini pịrịmẹ!

⁴Ḅieḅẹlẹ sime ini pịrịmẹ nwọ kururuapụma; Tamụnọ Ḅe inia kuḅie kụrọmaḅịa!

⁵Ḅieḅẹlẹ sime ini pịrịmẹ nwọ ḅụiderimapụma; Tamụnọ Ḅe ḅereniye mị inia ḅaralaḅịa!

⁶Ḅieḅẹlẹ sime ini pịrịmẹ nwọ Tamụnọ Ḅe ḅiarịye mịẹ ḍọkịtẹịn apụma; Tamụnọ Ḅe mịẹse anị ḅeinma ini na deinkoroḅịa!

⁷Ḅieḅẹlẹ sime ini pịrịmẹ nwọ ḍikiḅụgerere nyana jịn apụ pịrịarịapụma; Tamụnọ Ḅe ò ḍikiḅụgerere nyana ini pịrịḅịa!

⁸Ḅieḅẹlẹ sime ini pịrịmẹ kuḅie fịafịapụma; ini Tamụnọ Ḅe ọrịḅịa!

⁹Ḅieḅẹlẹ sime ini pịrịmẹ nwọ deinma mịẹ ḍọkịarịapụma; Tamụnọ Ḅe oria awọ Ọ̀ nwọse ini chịnḅịa!

¹⁰Ḅieḅẹlẹ sime ini ḅụfụka se pịrịarịapụma pịrịmẹ, ini Tamụnọ Ḅe ḅiarịye nwọ mịẹye gose; soḅie Amanyanakiri mị sime ini pịrịmẹ!

¹¹“Ḅieḅẹlẹ sime ọ́ pịrịmẹ tomoni ọ́ wọlọ, ḅụọ se ọ́ chụa pịkị si iruo goyegoye nwọ kọn ọ́ pụnụma sịkị, ómine ma ị̀ya ọḅụḍukoapụ-ẹ gose.

¹²Ọ́ tọrụḅẹlẹma se ḅieḅẹlẹ, anịatịḅị soḅie ini opu gbẹịnye nwọse ọ́ wẹrịma waraḅẹ. Mịn ini ḅụọ se ọ́mịna tọrọkọ tatarị ḅo ịkịankoroapụma chụa ọkụ mị-ẹ.

¹³“Ómine anị tomonikiri mị ḅe fụn-ẹ, fụn mị ḅọrọ nemikase anịa ḅẹlẹ wokuma ọkụma, cheye mịẹse anị pịkị fụn sọ? Anị ḅarị yeḅụsọkẹ, ini anị wokumaḅịa, se tomoni ḅụọ se anị nangaḅịa.

¹⁴“Ómine anị sẹkiri mị ḅe enekuḅu-ẹ. Se chịngị ọgọnọ nama opuama ineda ḅọị ẹkẹ.

¹⁵Tọnjie chụa se anị se bọlị chuku ḅie chu koromaḅịa gbọrịḅọ sọnị ofori-ẹ; anịnakaraka ori anị se tọnjie gbanaye ọgọnọ gbanaḅịa, anịanga ḅụ anị wẹrị enekuḅu se warị mị ḅie sime ḅọ goyegoye nwọ pịrịḅịa.

¹⁶Anị gbọrị ḅara ḅụ ye ọ́mịna enekuḅu mị tomonima tọrụkuḅu ḅịa paka, mịẹse ini ọ́mịna iḅi fịrịma ọrị se ọ́mịna soḅie Ḍaḅọ Ḅe tokoniḅịa ḅara.

¹⁷“Ó koroma ma, na à ḅo Moziz Olokoma na ịkịankoroapụma ḍieaye ma na nwọ kansin-ẹḅomẹ. À ḅo àrị kansin-eḅokẹ, ọkụma à ḅo àrị mịẹkụrọma-ẹḅomẹ.

¹⁸Mịn mị ọ́ nwọse ḅiekoroma! So na Tomonikiri na sime lasịkị lasịkị, Oloko mị ḅụ bokatẹịn pẹkẹrẹ mị sọnị ini sin anga pịrị ẹkẹ—yemamgba ḅe kuluma mị malaka simeogbo.

¹⁹Anịọkụma olokoma ḅie bokatẹịn ye mị kokoka ḅọ goyegoye, pịkị anị ḅara nwọse jịn apụ ḍieḅọ goyegoye, iniḅọ bokatẹịn ḅọ nwọ sọḅịa soḅie Amanyanakiri mị ḅie. Anịḅe jịnye, Oloko mị koko pịkị ọkọ se jịn apụ ḍieḅọ goyegoye, iniḅọ soḅie Amanyanakiri mị ḅie opu ḅọ sọḅịa.

²⁰Anịẹrẹchị, à ḍuko ọ́ pịrịaḅẹ na, ómine ineda soḅie Amanyanakiri mị ḅie sọḅịa ó nemikase kuḅie se ḅụgbana gbẹịn apụ nwọ sọtẹịn Oloko ḍieapụma na Farisiapụma na nẹngịmẹ ḅẹḅẹ, Tamụnọ Ḅe ḅiarịyema ọ́ nwọ mịẹ ḅụ.

²¹“Ọ́ naasam na ini nwọ ḍuko tomonima pịrịmẹ ḅọrọsa sịkị ḅụ, ‘Ị́rị́ nweni ḅaa ma, nweni ḅaa ḅọ goyegoye ini iniḅọ se ḅẹrẹkọn nyọ munḅịa.’

²²Ọkụma mịọkụ à ḍuko ọ́ pịrịaḅẹ na: yeḅụosọ nyana iniḅọ mịnaḅọ pịrị ḅọ goyegoye ini iniḅọ se ḅẹrẹkọn nyọ munḅịa pịkịna ‘Yeḅụoforikaḅọ!’ nwọse iniḅọ mịnaḅọ ḅẹ ḅọ goyegoye, ini nwọse Ḅẹrẹchiri mị munḅịa, pịkị ị́rị́ oḅori-ẹ nwọse iniḅọ mịnaḅọ chịnḅọ goyegoye kọrị fịnị mị ḅie sọḅịa.

²³Anịẹrẹchị ḍiepịrịye ị́ nwọse agbamịẹ ẹbẹ ọgọnọ gbana Tamụnọ Ḅe pịrị-ẹ tọn aḅẹ, se anị nyọ ḅụ ị́ se ḅiekoromamẹ, na ị́ mbire ḅe na ị́rị́ na nyana ịgbanịa ye omi-ẹ ḅẹḅẹ,

²⁴agbamịẹ ẹbẹ mị tọrọkọ ị́ya ḍiepịrịye mị se koroma, se so mun kirikiri ị́ mbire ḅe na ḅẹrẹfama; anịsịkị vinpịkị ḅo ị́ya ḍiepịrịye mị se Tamụnọ Ḅe pịrị.

²⁵“Tomoniḅọ nemikase ịlọ se ị́ gbo se ị́ ḅẹrẹkọn warị mun aḅẹ ḅẹḅẹ, ori na ḅẹrẹ mị fama sịkị pa sime warasịkị, tẹrẹrẹ ó mun ḅẹrẹkọn warị mị la. Anị ofori, ị́ nwọ anị nyọ la kirikiri, ori ị́ ḅọrọma ḅẹrẹkọnḅọ ḅe pịrịḅịa, ori ị́ ḅọrọma kurukuruyeḅiriapụ ma pịrịḅịa se ini ị́ se ikoli ḅie chuḅịa.

²⁶Anị nyọ mị ị́ simeḅịaye-ẹ, à ḍuko ị́ pịrịaḅẹ, ọkịmun ini ị́ ḅẹ gbẹịn nwọ ḅẹ ịlọ igbiki mị ḅe kuluma kọbọ mị ị́ nwọ gbẹịn sịkị laḅịa.

²⁷“Ọ́ naasam na anị nwọ ḅẹmẹ, ‘Sẹfị ma.’

²⁸Ọkụma ị̀rị̀ à ḍuko ọ́ pịrịaḅẹ mịọkụ: tọrụ se eremeniḅọ ḍiki, se iniḅọ kuḅiemgbọlụ ḅie á nyana ḍọkịḅọ goyegoye iniḅọ sẹfị ḅẹrẹḅarasi nwọ nyanasam.

²⁹Anịẹrẹchị ị́ya amaḅara anga tọrụmgbọlụ ị́ mịẹse ị́ mun si ḅie sọḅịa ḅẹḅẹ, anị sọkịsin, se anị se gbin wokuma! Anị opuma iḅitẹịn ị́ pịrịḅịa ị́ya oju ḅụ pẹkẹrẹ nwọ fama, ị́ya bebe oju mịmgba ini nwọse kọrịfịnị mị ḅie gbin chu nakaraka.

³⁰Ị́ya amaḅara mị ị́ mịẹse ị́ mun si ḅie sọḅịa ḅẹḅẹ, anị pẹlẹsin se anị se gbin wokuma! Anị opuma iḅitẹịn ị́ pịrịḅịa ị́ya oju pẹkẹrẹ ị́ nwọ fama, ị́ya bebe oju mị mgba mun kọrịfịnị mị ḅie sọ nakaraka.

³¹“Ini pịkị ọkọ se anị ḅẹmẹ na, ‘Iniḅọ ta na so ḅọ sime sime, ori árị na sosam nwọ ḅẹ ḍiri ọ̀ nwọ gịẹịn á pịrị.’

³²Ọkụma mịọkụ à ḍuko ọ́ pịrịaḅẹ owuḅọ nemikase iniḅọ ta na soaḅẹ ḅẹḅẹ, á jịn owuḅọ damamunmẹ nwọ ḅẹ ye sikima ọkụma, ori á mịẹse á sẹfịmẹ nwọ ḅẹ ḅẹrẹḅarasi sime ọ̀ pịrịmẹ, á nemikase pịkị jịnḅọ na simemẹ ḅẹḅẹ árị na sime ḅọ ḅe sọnị ọ̀ sẹfịsam.

³³“Ọ́ pịkị naasam na ḅọrọsa sịkị, ini nwọ ḍuko tomoni pịrịmẹ, ó ḅereni Nyanaḅọ Ḅe pịrịye mị ọ́ kanma, ọkụma ó ḅerenisaye mị ọ́ nwọ mịẹ Nyanaḅọ Ḅe pịrị.”

³⁴Ọkụma mịọkụ à ḍuko ọ́ pịrịaḅẹ: ó yekarị fị ma, ó ye ḅereniarị sịkị. Ó so mị karịfị ma, anịatịḅị so mị Tamụnọ Ḅe amanyana-ngada-ẹ;

³⁵anịkanịka Tomonikiri mị sọnị, anịatịḅị anị mị oria ḅụọ gbanamaye-ẹ anịkanịka Jerusalẹm mị sọnị, anịatịḅị anịnyọ mị anị opu Amanyanaḅọ ḅe opuama mị-ẹ.

³⁶Ọ́mịna tịḅị sọnị ó se yekarịfị ma, anịatịḅị ómine ineda gbọrị tịḅị inime mịẹse anị ḅịaḅịa anịkanịka kurukuru ẹkẹ.

³⁷Papa ḅẹ ‘Iin’ anịkanịka ‘Ẹn-ẹn’—mịn mị sikima se ọ́ ḅẹ jịnye goyegoye si ḅọ ḅe ḅụ ḅomẹ.

³⁸“Ọ́ naasam na ini nwọ ḅẹmẹ, ‘Tọrụmgbọlụ, tọrụmgbọlụ na ḅọrọma, aka pịkị aka na ḅọrọma.’

³⁹Ọkụma mịọkụ à ḍuko ọ́ pịrịaḅẹ: ị́ mịẹirima ḅọ ḅara gbẹịn-fịye ḅi ma, Gbọrịḅọ nemikase ị́ya amaḅara anga loku ḅụ ị́ ḅụrọmẹ ḅẹḅẹ, ye iniḅọ pịkị ereḅara anga loku ḅụ sọnị ị́ ḅụrọ.

⁴⁰Tomoniḅọ nemikase ị́ya ḅie chụa ḅụchụaye gose ị́ se ḅẹrẹkọn warị mun mẹ ḅẹḅẹ, ye iniḅọ pịkị ị́ya ọgọnọ-gbanaḅụchụaye nwọse chụa ọkị.

⁴¹Tomoniḅọ nemikase kụrọ ḅara se ị́ ḅẹmẹ na oria ye pụra ọ̀ pịrịmamun gbọrị tombi la nwọ ḅẹḅẹ, pụra ori na mun mama tombi sọnị nwọ la.

⁴²Nweniḅọ ị́ ḅara yeḅiḅi, anị se iniḅọ pịrị se nweniḅọ pịkị ị́ ḅara ye ḅọlọaḅẹ ḅẹḅẹ, se iniḅọ ḅọlọ.

⁴³“Ọ́ naasam na ini nwọ ḅẹmẹ, ‘ị́ya ikiapụma ḅẹlẹma, taraka se ị́rị́ na tarakapụma wẹrịma.’

⁴⁴Ọkụma ị̀rị̀ mịọkụ à ḍuko ọ́ pịrịaḅẹ: ị́rị́ na tarakapụma ḅẹlẹma se tẹkẹ ḅụọ se ị́ chụarịapụma pịrị,

⁴⁵mịẹso ọkụma soḅie Ḍaḅọ Ḅe awọ ọ́ nwọ sọḅịa ḅara. Anịatịḅị ọ̀ mịẹmẹ, oria ịrụa mị ḅịa siapụma na iḅiapụma na ḅụ saramamẹ, pịkị ene koroma se iḅimịẹapụma na, siyemịẹapụma na pịrịmẹ.

⁴⁶Nde Tamụnọ Ḅe gose ye se ị́ gbẹịnḅịa ye, ị́ nemikase ị́ ḅẹlẹma apụma kẹngẹ ḅẹlẹmamẹ nwọ ḅẹ ọkụma? Amaigbiki ocho apụma sọnị ọkọ mịẹmịẹ wara sịkị!

⁴⁷Ị́ nemikase ị́ya ikiapụma kẹngẹ na ọkwẹịnmamẹ nwọ ḅẹ ọkụma, ị́ mịẹ kịrịma ye omi? Oruḅẹrẹ nemiapụma sọnị anị ḅara mị mịẹmịẹmẹ!

⁴⁸Ọ́ karagbasịḅịa—anị ọ́mịna Ḍaḅọ soḅie sime ḅọ Ḅe karagbasị ọkụ.