Read kirikeni Matio 9 Bible Online

Matio 9 - kirikeni bible

Matio 9

¹Jizọs Ḅe arụ mị ḅụkụlọ se vinpịkị ḍapa mị saḅa koro se Oria ama mị mun mẹ,

²anịanga gbọrịapụ oju fị owuḅọ nwọ ọkịḅo Ọ̀ pịrịmẹ, mọnọye ọgọnọ ḅọlọlọ sime waraḅẹ. Jizọs Ḅe inia ḅereni ḅaka la ọkụ nwọ ọrị sịkị, Ọ̀ nwọse oju fị owuḅọ ḅe ḅẹmẹ, “Kuḅie kụrọma, ị̀ya tọkụ! Ị́ya sima ḅụ ini ḅarasin ị́ pịrịsam.”

³Oloko ḍieapụma ḅe tọn apụ nwọse inia ḅụ ḅẹmẹ, “Ḅe ḅọ Ḅe ọ̀ Tamụnọ fiesimaḅẹ!”

⁴Jizọs Ḅe ini koromarịye nemi se nwọ ḅẹmẹ, “Nde ó gose nwọ sime siaye koromarịye?

⁵Cheye sarasaratẹịn nwọḅẹ na ‘Ị́ya sima ḅụ ini ḅarasin ị́ pịrịsam,’ anịkanịka ‘Sịsẹ se nwẹngị’?

⁶À se ó ḍie ḍọkịmẹ na Tomoniḅọ Tọkụ Ḅe mị tomonikiri ọ̀ kụrọ nyanamẹ, siḅụ-ḅarasin nweni pịrị.” Anị Ọ̀ nwọse oju fị owuḅọ ḅe ḅẹye-ẹ, “Sịsẹ chịẹ ị́ya mọnọye mị deki, se so warị mun!”

⁷Tomoniḅọ ḅe ọ̀ sịsẹ se so warị mun mẹ.

⁸Tomonima anị ọrị sịkị, inia ḅalafamẹ, se Tamụnọ Ḅe tokonimẹ, ọ̀ nwọ sime kụrọ se tomoni pịrịye gose.

⁹Jizọs Ḅe anịanga koromasomẹ, se Ọ̀ nwẹngịmamun-arị sịkị, Ọ̀ gbọrị amaigbiki ochoḅọ nwọ ọrịmẹ, Matio nwọ chịnḅọ, oria fịrịnwẹngị warị ḅie sime waraḅẹ. Ọ̀ nwọse ọ̀ ḅẹmẹ, “Ị̀ ḍuko.” Matio ḅe sịsẹ se Ò ḍukomẹ.

¹⁰Jizọs Ḅe Matio ḅe warị ḅie sime se ye fịarị ogbo anị tọn-a amaigbiki ocho apụ na simịẹapụ na sọ ḅo Jizọs Ḅe na oria ọḅụḍukoapụma na ḅụ sọ se dẹbụl ọgọnọ yefịye-ẹ.

¹¹Farisiapụma ḅie tọn apụ mịn mị ọrị se nwọse Oria ọḅụḍukoapụma gbelamẹ, “Cheye gose ọ́mịna yeḍieḅọ ḅe amaigbiki ocho apụ na simịẹapụ na ye fị gboloma-ao?”

¹²Jizọs Ḅe ini ḍukoayema naa se nwọ pẹkẹrẹmẹ, “Oju kpụrụkpụrụapụma ini ḅịrịḅọ ḍọkịkẹ, ọkụma obiapụma kẹngẹ-ẹ.

¹³Ó mun, se Tamụnọ ọkwẹịn mị fiearịye nwọ ḍọkị nemi, ‘À nama se mịẹ agba ḅikẹ, ọkụma iḅi ye mịẹ ḅara anị à ḅiye-ẹ.’ À ḅo simịẹka apụma nwọ chịn-ẹḅokẹ, ọkụma simịẹapụ ma-ẹ.”

¹⁴Jọn Mengisaraḅọ ḅe ọḅụḍukoapụma Jizọs Ḅe damaḅo se Ò gbelamẹ, “Nde mine na Farisiapụma na sịkịmamgba ḅuruseḅụḅaama ọkụ, ọkụma ị́ya ọḅụḍukoapụma ngịsị ḅuruseḅụḅaamaka ḅara?”

¹⁵Jizọs Ḅe nwọse ini pẹkẹrẹmẹ, “Ọ́ chịn ḅara ereya nyọ sime igoniapụma, ereya nyọ ḅụ kururu ḅe, ereyaḅọ ḅe ini na simearịogbo? Ye mịẹmịẹ ḅara ḅụ anị ọkọ paka ẹkẹ, ọkụma ene ḅoḅịa, ini inia ḅie ereyaḅọ ḅe nwọ dekisinḅịa, anịsịkị ini ḅuruseḅụḅaamaḅịa.

¹⁶“Ịwọ ḅịtẹ-pẹkẹrẹ se olomu ḅụchụaye sẹlẹḅịa ḅọ ofori-ẹ, anịatịḅị ịwọ ḅịtẹ-pẹkẹrẹ mị pụrụkụḅịa se anị ḅụchụaye mị kantẹịnḅịa.

¹⁷Anịkanịka ịwọ iru se olomusa nama apụra ololo ḅie chụaḅịa ḅọ ofori-ẹ, anịatịḅị olomu nama apụra ololoma kanḅịa, iru mị ọsụn faḅịa, se nama apụra ololoma siḅịa. Anịnakaraka, ịwọ iru mị ini anị se ịwọ nama apụra ololoma ḅie chụaḅịa se arịmgba iḅi ḅara ḅụ simeḅịa.”

¹⁸Jizọs Ḅe mịn mị nwọ ḍuko ini pịrịarịogbo, gbọrị Juapụ tịḅịnịḅọ Ọ̀ damaḅomẹ, Ọ̀ tọrọkọ kpẹrẹkị koro, se nwọ ḅẹmẹ, “Ị̀ ndụḅa ma mịkirikiri á fịmẹ, ọkụma ḅo Ị́ ḅarama se árịa ọgọnọ gbana, se á ḍumoḅịa.”

¹⁹Anị Jizọs Ḅe sịsẹ se ò ḍukoye-ẹ, oria ọḅụḍukoapụma Ọ̀ ḅụ sọ mun mẹ.

²⁰Gbọrị eremeniḅọ, pulo oyimaịn kụra fịnjị nwọse siḅara se ḅụ ideri ḅọ, Jizọs Ḅe ọḅụju ḅụ wẹrị ḅo se ḅara se Oria ḅụchụaye ḅịpị okolo lamamẹ.

²¹Á nwọse á ḅụ ḅẹmẹ, “À pa ḅara se Oria ḅụchụaye mị kẹngẹ nwọ lama ọkụma, ị̀ ḅụ iḅiḅịa.”

²²Jizọs Ḅe vinpịkị se árị ọrịmẹ, se nwọ ḅẹmẹ, “Kụrọ kuḅie nyana ị̀ ndụḅa, ị́ya ḅereni mị mịẹse ị́ ḅụ iḅisam.” Anị gbọrị kirikiri eremeniḅọ ma á ḅụ iḅimẹ.

²³Jizọs Ḅe ḅo tịḅịnịḅọ ḅe warị lasịkị. Ọ̀ ḍụẹịn ḍipi gose ti kọn-arịapụma na, tomonikpo mị na nyọ fiemarị ḅara nwọ ọrị sịkị,

²⁴Ọ̀ nwọ ḅẹmẹ, “Ómine mgba ọ́ paka! Tọkụ ma á fịkẹ á papa mọnọaḅẹ!” Inimgba sakị Ò se kpọtimẹ.

²⁵Tomonima nwọ pakaso kirikiri, Jizọs Ḅe tọkụ ma jukuru ḅie sọmunmẹ, á ḅara ọlọ, se á sịsẹmẹ.

²⁶Mịn nwọ pakaye mị wasama anị ama mị mgba kelemamẹ, sẹ mị ḅie.

²⁷Jizọs Ḅe anị nyọ mị nwọ koromasomẹ, se Ọ̀ nwẹngịmamun-arị ogbo, mama tọrụmgbọlụpụn owuapụ sakị Ò ḍuko se olokuaḅẹ, “Ḍikiḅụgerere nyana wa pịrị, Devid Tọkụ!”

²⁸Jizọs Ḅe warị mị ḅie sọ sịkị tọrụmgbọlụpụn mama owuapụma Ọ̀ damaḅomẹ, se ori ini gbelamẹ, “Ó ḅereni na àrị ineda ọ́ gwọḅịa-ẹ?” Ini nwọ pẹkẹrẹmẹ, “Iin, Nyanaḅọ!”

²⁹Jizọs Ḅe ḅara se inia tọrụmgbọlụma lama se nwọ ḅẹmẹ, “Ye anị ó ḅereni ḅara mị nwọ paka!”—

³⁰inia tọrụmgbọlụma finji mẹ. Jizọs Ḅe kụrọma nwọse ini ḅẹmẹ, “Mịn mị ó ḍuko gbọrịḅọ sọ pịrị ma!”

³¹Anịsọ ini pakaso sịkị, Jizọs Ḅe gboloma ḅẹrẹ mị ini nwọ ḍuko sẹ mị ḅie anị ama mị ḅie mgba nwọ kelemamẹ.

³²Tomonima soarị ogbo, jịn apụ pịkị gbọrị sitẹmẹ ḅie ḅụ sime ḅịpị iniki kọn ḅọ se Jizọs Ḅe damaḅomẹ.

³³Ò sitẹmẹ ḅe desin kirikiri, tomoniḅọ ḅe sakị ọkwẹịnmẹ, se ijira tomonikpo mị ḅụ saramẹ. Ini nwọ ḅẹmẹ, “Mịn mị kịkẹye Izrẹl ḅie ngịsị ma wa ọrịkẹ!”

³⁴Ọkụma Farisiapụma nwọ ḅẹmẹ, “Si-a-tẹmẹma ḅe tịḅịnịḅọ ḅe mị kụrọ se ọ̀ pịrị se Ò si-a-tẹmẹma desin-arịye-ẹ.”

³⁵Jizọs Ḅe ọ̀ nwẹngị amama na ịwọ amama na kelemamẹ. Tẹkẹwarịma ḅie ò yeḍiemẹ, ori Amanyanakiri mị ḅe Iḅi Ḅẹrẹ nwọ ḍukowasamamẹ, se pịkị si-obi goyegoye na, obi tọrụkịrịkịrị kọn apụ mamgba na gwọmẹ.

³⁶Ò tomonikpo mị ọrị sịkị, ori ini ḍikitịḅịfoinmẹ, anịatịḅị inia ḅụḅalaḅalaḅẹ, ini pịkị ḅarachụa nyanakẹ, ḍikiḍikiḅọ oforika anana simeọkụ.

³⁷Anị ọ̀ nwọse oria ọḅụḍukoapụma ḅẹye-ẹ, “Sokusịkị ḅe fịayema ḅaka waraḅẹ, ọkụma àrị koḅirimaḅịa fịrịnwẹngịapụma bokẹ.

³⁸Sokuḅịayema nyanaḅọ ḅe ọ́ nwọ tẹkẹ, mịẹse ọ̀ fịrịnwẹngịapụ fịrịma pakụma se oria sokuayema koḅirima.”