Read kirikeni Mak 1 Bible Online

Mak 1 - kirikeni bible

Mak 1

¹Mịn anị Jizọs Kraịst, Tamụnọ Tọkụ Ḅe gboloma Iḅi Ḅẹrẹ mị-ẹ.

²Ịkịankoro Aịzaya ḅe gịẹịn ḅara ḅụ anị wẹrị sakịmẹ: “Tamụnọ Ḅe nwọ ḅẹmẹ, ‘Àrị ị̀ya okunwẹngịḅọ ḅe seni ị́ tọrọkọ fịrịmaḅẹ, ateli mị finji ị́ pịrịḅịa ẹrẹchị.’

³Gbọrịḅọ piri ele mị ḅie olokuaḅẹ, ‘Ateli mị karakarama se Nyanaḅọ Ḅe pịrị; gbụkụkụ ateli nwọ karakarama Ọ̀ pịrị!’”

⁴Anị ḅara mị ḅụ, anị Jọn ḅe piri ele mị ḅie tolupakaḅoye-ẹ, ò mengi se tomoni sara se pịkị Tamụnọ ọkwẹịn nwọ kọn simemẹ. Ọ̀ nwọse tomonima ḅẹmẹ, “Ómine ọ́mịna sima ḅụ vinpịkị, se ini mengi se ọ́ sara, se Tamụnọ Ḅe Ori ọ́mịna sima ḅụ ḅarasin ọ́ pịrịḅịa.”

⁵Tọn-apụ Judia pẹkẹrẹ ḅụ na, Jerusalẹm opuama mị ḅie na, pakamun Jọn ḅe pokimẹ. Ini inia sima ḍukopakụmamẹ, se ò mengi seni ini saramẹ Jọdan tọrụ mị ḅie.

⁶Ike asụn namaichuka ini nwọse ḍori ḅụchụaye Jọn ḅe ọ̀ nwọ chụamẹ, nama apụra ḅirikunye ọ̀ nwọse ò ḅiri kunmẹ, igurube na ḅẹịn na ọ̀ nwọse fịye mịẹ fịmẹ.

⁷Ọ̀ nwọ ḍuko tomonima pịrịmẹ, “Ị̀ya ọḅụju ḅoarị ḅọ Ḅe, opu sọ ị̀ nẹngịmẹ. Anị ị̀ gbẹịnkẹ, tu Ọ̀ ḅụọ sime akpaka-ḍikima nwọ finma.

⁸Mengi mị à se ọ́ sararịye-ẹ, ọkụma Ori Fịafịa Tẹmẹ Ḅe mị Ò se mengi se ọ́ saraḅịaye-ẹ.”

⁹Ma ḅọlọka simeogbo, Jizọs Ḅe Nazarẹt, Galili pẹkẹrẹ sime ama mị ḅie, pakaḅo se Jọdan tọrụ ḅie, Jọn ḅe mengi se Ọ̀ saramẹ.

¹⁰Jizọs Ḅe mengi mị ḅie pakaḅo kirikiri, so mị finji ọkụ Ọ̀ nwọ ọrịmẹ, se Tẹmẹ Ḅe okuku ḅara se koro Ọ̀ damaḅomẹ.

¹¹Se pụkọ soḅie wẹrị ḅo se nwọ ḅẹmẹ, “Ị́rị́ anị ị̀ ḅụ yela Tọkụ Ḅe-ẹ. Àrị iḅiọkụ ị́ ḍikiḅieḅẹlẹmẹ.”

¹²Anịkirikiri Tẹmẹ Ḅe Ọ̀ mịẹse Ò piri ele mị ḅie mun mẹ,

¹³anị ḍin-a mesi Ọ̀ nwọse sime se, Oru ḅe Ò telima nyọ mị. Owoi-a nama sọnị anịnyọ ḅụ simemẹ, ọkụma enjẹlapụ ḅo fịrịnwẹngị Ọ̀ pịrịmẹ.

¹⁴Ini Jọn ḅe seni ikoli ḅie chu so sịkị, Jizọs Ḅe so Galili mun se Tamụnọ Ḅe Iḅi Ḅẹrẹ mị nwọ ḍukomẹ.

¹⁵Se Ọ̀ nwọ ḅẹmẹ, “Sịkị mị anị ḅo sam, Tamụnọ Amanyanakiri mị pịkị kpekisam! Ómine ọ́mịna sima ḅụ vinpịkị se Iḅi Ḅẹrẹ mị ḅereni!”

¹⁶Jizọs Ḅe Galili tọrụaka mị ḅụ nwẹngịarịogbo, Ọ̀ mama injiḅaapụ ọrịmẹ, Saịmọn ḅe na numbireowu Andru ḅe na, ini ịgbọ se tọrụ mị ḅie inji kun-aḅẹ.

¹⁷Jizọs Ḅe nwọse ini ḅẹmẹ, “Ómine ị̀ ḍuko ḅo, se à tomoni inji kun ọkụ se ó ḍieḅịa.”

¹⁸Anịkirikiri, ini inia ịgbọma wẹrịso se Ò ḍuko mun mẹ.

¹⁹Ò kele pịkị nwẹngị tọrọkọ mun-arịogbo, Ò jịn mama mịnapụ nwọ ọrịmẹ, Jems ḅe na Jọn ḅe na, anị Zẹbidi owuapụ awọma. Ini inia arụ ḅie sime se inia ịgbọma sẹlẹaḅẹ.

²⁰Jizọs Ḅe ini ọrị kirikiri, Ori ini chịnmẹ ini arụ mị ḅie inia ḍa Zẹbidi ḅe na ini ọkọ owuapụma na wẹrịso se Jizọs Ḅe ḍukomẹ.

²¹Jizọs Ḅe na Oria ọḅụḍukoapụma na ḅo Kapanịọm ama mị lamẹ, se Ịnyọsara Ene mị ḅie ḅụ, Jizọs Ḅe tẹkẹwarị mị ḅie mun se sakị yeḍiemẹ.

²²Oria yeḍie ḅara mị naa apụma anị inia ḅụgbiripumamẹ, anịatịḅị Oloko ḍieapụma simeọkụ Ọ̀ nwọ simekẹ; anịnakaraka, kụrọ nyanaḅọ ḅara Ọ̀ nwọse yeḍiemẹ.

²³Anị gbọrị sịkị mị ḅụ, sitẹmẹ ḅie ḅụ sime gbọrị owuḅọ tẹkẹwarị mị ḅie sọ ḅo, se olokumẹ,

²⁴“Che mịẹgboloma wa ị́rị́ na nwọ nyana Jizọs Nazarẹt ḅọ? Ị́ ḅo mịnyọ wa fama-ẹ ḅo? Àrị ị́ nemimẹ—ị́rị́ anị Tamụnọ Fịafịa Okunwẹngịḅọ Ḅe-ẹ!”

²⁵Jizọs Ḅe sitẹmẹ ḅe ḍiki ịganịmẹ, “ị́ ḅịpị gbẹịn, se tomoniḅọ ḅe ḅie pakaḅo!”

²⁶Sitẹmẹ ḅe kụrọma tomoniḅọ ḅe jike se gelema olokumẹ, se ò ḅie pakaḅomẹ.

²⁷Anị tomonima ḅụgbiripuma so ọkụma, ini sakị nwọse jịnḅọ jịnḅọ ḅẹmẹ, “Mịn ḅọrọ cheye? Mịn ịwọ yeḍie ḅara mụnọ? Ḅe tomoniḅọ ḅe Ọ̀ kụrọ nyanamẹ ḅẹrẹtọn sitẹmẹma pịrị, se àrị Ọ̀ ḅịpị pokimẹ!”

²⁸Mịn mị gose, Jizọs Ḅe ḅụ ḅẹrẹ mị, wasama Galili pẹkẹrẹ mị ḅie nyọ layelaye nwọ kelemamẹ.

²⁹Jizọs Ḅe na Oria ọḅụḍukoapụma na pịkị Jems ḅe na Jọn ḅe na tẹkẹwarị mị wẹrịso se dada Saịmọn ḅe na Andru ḅe na warị nwọ mun mẹ.

³⁰Saịmọn ḅe fuarọma, árị ọfịrị se mọnọye ọgọnọ ḅọlọlọ sime waraḅẹ, se Jizọs Ḅe anịnyọ la kirikiri ini á gbolomaye nwọ ḍuko Ọ̀ pịrịmẹ.

³¹Ori á damamun se á ḅara ḅụ árị ọlọmẹ, se á dekichịẹmamẹ. Ọfịrị mị á wẹrịso se á fịrịnwẹngị ini pịrịmẹ.

³²Ịrụa mị sọ se saso ḅiri ḅụ tomoni obiapụ na sitẹmẹ ḅie sime apụ na nwọ ọkịḅo Jizọs Ḅe pịrịmẹ.

³³Se ama mị ḅie sime tomoni mamgba ḅo warị mị tọrọkọ koḅirimamẹ.

³⁴Jizọs Ḅe obi tọrụkịrịkịrị kọn apụ mamgba nwọ gwọ se sitẹmẹ ḅie sime apụma ḅie sitẹmẹma desinmẹ. Ò ḅerenikẹ sitẹmẹma gbọrị ọkwẹịn sọnị kọn, anịatịḅị àrị Ò nemimẹ.

³⁵Anị ḍukoma ene mị ḅe dede funfun ḅie, enema ḅa soka simeogbo, Jizọs Ḅe sịsẹ seni warị mị koroma pakamẹ. Ori ama mị ḅie pakaso gbọịn nyọ nwọ mun mẹ, se anịnyọ sime tẹkẹmẹ.

³⁶Ọkụma Saịmọn ḅe na ori na nwẹngịapụma na paka mun Ọ̀ ḍọkịmẹ,

³⁷ini Ọ̀ ḍọkị se Ori ọrị sịkị, ini nwọ ḅẹmẹ, “Nweni mamgba Ị́ ḍọkịaḅẹ.”

³⁸Ọkụma, Jizọs Ḅe pẹkẹrẹmẹ, “Wa pa nwẹngịmamun mịnyọ sime ísí ịwọamama laḅịa. À pịkị arịa ḅie sọnị Tamụnọ ḅẹrẹ mị ḍukoḅịa, anịatịḅị anị mị à gose ḅoye-ẹ.”

³⁹Anịẹrẹchị Ọ̀ nwẹngị Galili mị mgba nwọ kelemamẹ se, inia tẹkẹwarịma ḅie Tamụnọ ḅẹrẹ mị ḍuko, pịkị si-a-tẹmẹma desinmẹ.

⁴⁰Gbọrị ene ḅụkan obi kọn gbọrịḅọ Jizọs Ḅe damaḅo, kpẹrẹkị koro se Ọ̀ ḅara ḅarachụa nwọ ḅimẹ. Ọ̀ nwọse Jizọs Ḅe ḅẹmẹ, “Ị́ ḅimẹ ḅẹḅẹ Ị́ ineda ị̀ mịẹfịafịamaḅịa.”

⁴¹Ḍikitịḅịfoin Jizọs Ḅe ḅie ḅeinmẹ, se ori Ọ̀ ḅara ịsụn ọ̀ lamamẹ. Se nwọse ọ̀ ḅẹmẹ, “À kọkọma ḅimẹ, ye ị́ fịafịa!”

⁴²Anịkirikiri, ḅụkan obi mị tomoniḅọ ḅe koromaso se ọ̀ fịafịamẹ.

⁴³Anịeso, Jizọs Ḅe kụrọma ọkwẹịn ọ̀ pịrị se, anịkirikiri ọ̀ ḅẹ se ò somẹ,

⁴⁴“Ọrị na, mịn mị ị́ ḍuko gbọrịḅọ sọnị pịrịkẹ Ọ̀ nwọse ọ̀ ḅẹmẹ. Ọkụma, dada agbamịẹḅọ ḅe damamun se ori ị́ ḍiki anịsịkị Moziz ḅe tọnkoroma agba mị nwọ mịẹ, se ḍiepakụma ḅẹḅọ ḅẹḅọ nwọ pịrị na mịọkụ ị́ fịafịasam.”

⁴⁵Ọkụma, tomoniḅọ ḅe ọ̀ nwẹngị somẹ, se sakị nyọ mamgba ḅụ ḅẹrẹ mị nwọ ḍuko wasamamẹ. Kọkọmaye-ẹ, ori anị ḍuko so ọkụma Jizọs Ḅe Ọ̀ ḅarị ineda ḅụpakụma gbọrị ama ḅie sọnị sọ munkẹ. Anịnakaraka, Ò so mun gbọịn-a nyọma ḅụ simemẹ, se tomoni nyọ layelaye ḅụ Ọ̀ damaḅomẹ.