Read kirikeni Mak 10 Bible Online

Mak 10 - kirikeni bible

Mak 10

¹Anịeso Jizọs Ḅe ori anị nyọ wẹrịso Judia sẹ iri ma mun mẹ, se Jọdan Tọrụ mị saḅamẹ. Tomonikpo pịkị ḅo Ò gborimẹ, se Ọ̀ mịẹmịẹ ḅara ḅụ, Ò ye se ini ḍiemẹ.

²Da Farisiapụ Ọ̀ damaḅo ḍẹịntu Ọ̀ pịrịḅịa ḅara nwọ ḍọkịmẹ. Ini nwọse Ò gbelamẹ, “Ḍuko wa pịrị, mịna Oloko mị anị ḅereni owuḅọ ḅe pịrị na ọ̀ tarọ ma na so?”

³Jizọs Ḅe ḅẹrẹ gbela ḅụ wẹrị pẹkẹrẹmẹ, “Che Oloko ḅara Moziz ḅe nwọse ọ́ pịrị?”

⁴Ini nwọ ḅẹmẹ, “Moziz ḅe ọ̀ kụrọ se owuḅọ ḅe pịrịmẹ, so ḍiri nwọ gịẹịn tarọ ma pịrị se árị na so.”

⁵Jizọs Ḅe nwọse ini ḅẹmẹ, “Moziz ḅe ọ̀ mị Oloko mị gịẹịn ọ́ pịrịmẹ anịatịḅị ye se ó ḍie mị opuma ḅụfụkamamẹ.

⁶Ọkụma ye sakị sịkị, tomonikiri mị tẹmẹarị sịkị, ‘Tamụnọ Ḅe owoi na ịrọrọ na tẹmẹ mẹ,’ anị Fịafịa ḍiri mị ḍuko ḅara ḅụ.

⁷‘Mịn mị gose, owuḅọ ḅe ọ̀ ḍawu na nyọngọrọ na koromasoḅịa, se tarọ ma na gbọrịye mịẹḅịa,

⁸se ini mama apụma ḅo gbọrịapụ sọḅịa.’ Anịẹrẹchị ini ḅarị mama apụkẹ, ọkụma gbọrịapụ-ẹ.

⁹Tamụnọ Ḅe ọkị gbolomasaye mị gbọrịḅọ sọnị anị pu sikimama.”

¹⁰Ini vinpịkị so warị mun sịkị, ọḅụḍukoapụma mị ḅẹrẹ mị gbolomaye nwọse Jizọs Ḅe gbelamẹ.

¹¹Ọ̀ nwọse ini ḅẹmẹ, “Tarọ na so se jịn eremeniḅọ na sime owuḅọ ḅe, ọ̀ sẹfịmẹ.

¹²Anị gbọrị ḅara mị ḅụ, deḅọ na so se mun jịn owuḅọ na sime eremeniḅọ ma, á pịkị sẹfịmẹ.”

¹³Tomoni awọmẹnị ọkịḅo Jizọs Ḅe pịrịmẹ mịẹse Ọ̀ ḅara se inia ọgọnọ gbanaḅịa ḅara, ọkụma ọḅụḍukoapụma ini ḍiki ịganịmẹ.

¹⁴Jizọs Ḅe anị ọrị sịkị, anị ori ịganịmamẹ, se Ọ̀ nwọse Oria ọḅụḍukoapụma ḅẹmẹ, “Ó ye awọmẹnịma ị̀ damaḅo, ómine ini kikima, anịatịḅị Tamụnọ Amanyanakiri mị anị sime nwọ sime apụ pịrịmẹ.

¹⁵Kọkọmaye à nwọ ḍuko ọ́ pịrịaḅẹ, na kala tọkụ ḅara nwọse Tamụnọ Amanyanakiri mị ọkịka ḅọ goyegoye ngịsị anịa ḅie sọ ẹkẹ.”

¹⁶Anịsịkị Ori Ọ̀ ḅara finji awọmẹnịma deki se Ọ̀ ḅarama seni inia ọgọnọ gbana se ini ḅẹlẹmamẹ.

¹⁷Jizọs Ḅe ọ̀ pakaḅo ateli lasịkị, gbọrị owuḅọ mangị ọ̀ damaḅomẹ. Ori ọ̀ tọrọkọ kpẹrẹkị se nwọse ò gbelamẹ, “Iḅi Yeḍieḅọ, cheye à nwọ mịẹse sime gbaso ḍumo nyana ḅe?”

¹⁸“Ị́ che gose iḅi se ị̀ chịn?” Jizọs Ḅe nwọse ò gbelamẹ. “Iḅi gbọrịḅọ ofori-ẹ, Tamụnọ Ḅe sikima ọkụma.

¹⁹Olokoma ị́ àrị nemi waraḅẹ: ‘Nweni ḅaa ma, sẹfị ma, furu ma, iruokọn jịnḅọ pụnụma ma, nweni inuma ma, ị́ ḍa na ị́ nyengi na osi.’”

²⁰“Yeḍieḅọ,” nweniḅọ ḅe nwọ ḅẹmẹ, “Àrị asẹ ḅụ sime sịkị ngịsị, à ma olokoma nwọ kokomẹ.”

²¹Jizọs Ḅe ḅẹlẹma ḅụ kweinma ò ḍiki se nwọ ḅẹmẹ, “Gbọrịye kẹngẹ mị ị́ ḅụpalịmaye-ẹ. Mun ị́ nyana ye mamgba dẹrị, se anịḅe igbiki mị nwọse igwein apụma pịrị, anịsịkị ị́ soḅie ḅakama ngọ nyanaḅịa; anịsịkị ḅo se ị̀ ḍuko.”

²²Tomoniḅọ ḅe ọ̀ mịn mị naa sịkị, ọ̀ tọrụfụrụma se kururu ḅụ nwẹngị somẹ, anịatịḅị ọ̀ ḅakama ngọkọnmẹ.

²³Jizọs Ḅe Oria ọḅụḍukoapụma ḍiki kelema se nwọse ini ḅẹmẹ, “Anị ngọ nyanapụma ḅụfụkamaḅịa ọkụ ḍiki Tamụnọ Amanyanakiri mị ḅie sọ ḅụ!”

²⁴Ma ọkwẹịnma àrị opuma ọḅụḍukoapụma ḅụgbiripumamẹ, ọkụma Jizọs Ḅe pa ọkwẹịnma mun se nwọ ḅẹmẹ, “Ị̀ya awọ, Tamụnọ Amanyanakiri mị ḅie sọ mị ḅụfụkama ọkụ ḍiki!

²⁵Ngọ kọn ḅọ ḅe Tamụnọ Amanyanakiri mị ḅie sọ mị ḅụfụkamatẹịn nambulo ḅe laga mị tọrụmgbọlụ ḅie tolu ḅọrọ mị nẹngịmẹ.”

²⁶Anị ḅo nwọ lasịkị, anị gbọtụḅara ọḅụḍukoapụma ḅụgbiripumamẹ, se ini jịnḅọ jịnḅọ gbelamẹ, “Anịọkụma tụḅọ ḍụaḅọrọma nyana ḅe?”

²⁷Jizọs Ḅe Ò kweinma ini ḍiki se pẹkẹrẹmẹ, “Tomoniḅọ ḅụ, mịn mị ineda mịẹ ẹkaye-ẹ, ọkụma Tamụnọ Ḅe ḅụkẹ; Tamụnọ Ḅe ḅụ yegoyegoye sarasaramẹ.”

²⁸Pita ḅe nwọse Ọ̀ ḅẹmẹ, “Mine kwanị? Wa ye mamgba ḅụ ḅarasin se ị́ ḍukosam.”

²⁹Jizọs Ḅe nwọ ḅẹmẹ, “Kọkọmaye ḅụ, à ḍuko ọ́ pịrịaḅẹ na, ị̀ gose pịkị iḅiọkwẹịn mị gose mịna warị anịkanịka owuapụ mịnapụ, eremeni mịnapụ anịkanịka nyengiḅọ anịkanịka ḍaḅọ anịkanịka awọ anịkanịka ozu nwọ koromaso ḅọ goyegoye,

³⁰mị ḅụọ ḅụ iḅi ḅara nwọse anị nẹngịaye nwọ ọkịḅịa. Mayema ḅe kiri-a sọnọasi sọnọasi, warị na, owuapụ mịnapụ na, eremeni mịnapụ na, nyengiapụ na, awọ na, ozu na pịkị ḅụọchụa na se chụa ọkịḅịa; pịkị ḅoḅịa ḅụọ mị ḅụ sime gbaso ḍumo nwọ nyanaḅịa.

³¹Ọkụma mịọkụ tọrọkọdapụma ḅie tọn apụ ọḅụdaḅịa se ọḅụdapụma ḅie tọn apụ tọrọkọdaḅịa.”

³²Ini ateli mị ḅie nwẹngị so Jerusalẹm mun-arị sịkị, Jizọs Ḅe oria ọḅụḍukoapụma tọrọkọda mun simemẹ. Ọḅụḍukoapụma kuḅie taịntaịnmẹ, anịsịkị ḅalafa ọḅụju ini ḍukoarịapụma ḅie sọmẹ. Jizọs Ḅe Ọ̀ pịkị ini oyimaịn ọḅụḍukoapụ fịnjịma ọkị sikimamẹ, se ọ̀ ḅụ paka-ẹmun-arịyema nwọ ḍuko ini pịrịmẹ.

³³“Ó poki,” ọ̀ nwọse ini ḅẹmẹ, “wa Jerusalẹm mun aḅẹ, ini Tomoniḅọ Tọkụ Ḅe nwọ ḅọrọma tịḅịnị agbamịẹapụma na Oloko ḍieapụma na pịrịḅịa nyọ mị. Ini ḅaa ḅẹrẹ kọn Ọ̀ pịrịḅịa, se Ọ̀ ḅọrọma Jịnsẹapụma pịrịḅịa,

³⁴mịna apụma Ò se kpọtiḅịa, fụla se Ọ̀ ḅụ sara, Ò fomuḅịa, se Ọ̀ ḅaaḅịa; se tẹrẹ-a ḍin ḅọrọ sịkị Ọ̀ sịsẹ se ḍumoḅịa.”

³⁵Jems ḅe na Jọn ḅe na, Zẹbidi mama owuapụ awọma, Jizọs Ḅe damaḅo se nwọ ḅẹmẹ, “Yeḍieḅọ,” “wa ḅi se ị́ mịẹ wa pịrịḅịaye omi-ẹ.”

³⁶“À che mịẹ ọ́ pịrị ọ́ nwọ ḅi?” Jizọs Ḅe nwọse ini gbelamẹ.

³⁷Ini pẹkẹrẹmẹ, “Ị́ya boma Amanyanakiri mị ḅie Ị́ya amanyanaḅọ ngada mị ọgọnọ Ị́ simeḅịa sịkị, wa ḅimẹ Ị́ ḅereni wa pịrị wa ị́rị́ na sime, gbọrịḅọ Ị́ya amaḅara anga, gbọrịḅọ pịkị Ị́ya ereḅara anga sime.”

³⁸Jizọs Ḅe nwọse ini ḅẹmẹ, “Ó ḅiarịye ó nemikẹ. Ómine ineda à ḅuḅịa ọmọngọ mị nwọ ḅu ḅe? Anịkanịka à saraḅịa mengi mị ómine ineda anị saraḅe?”

³⁹“Wa inedaḅịa,” ini nwọ pẹkẹrẹmẹ. Jizọs Ḅe nwọse ini ḅẹmẹ, “Ọ́ kọkọma ineda à ḅuḅịa ọmọngọ mị nwọ ḅuḅịa, se pịkị ineda à saraḅịa mengi ḅara mị nwọ saraḅịa.

⁴⁰Ọkụma ị̀ya amaḅara na ị̀ya ereḅara na ḅụ simeḅịaḅọ sẹlẹ kụrọ à nwọ nyanakẹ. Tamụnọ Ḅe mị Ọ̀ karakarama sa nyọma ḅụ simeḅịa apụma kụrọ nwọ nyanaye-ẹ.”

⁴¹Ísí oyi-a ọḅụḍukoapụma mịn mị nwọ naa sịkị, ini ḅụosọ nyana Jems ḅe na Jọn ḅe na pịrịmẹ.

⁴²Anị Jizọs Ḅe inimgba nwọ chịn Ọ̀ ḅụ pịrị se nwọ ḅẹye-ẹ, “Ó nemimẹ na ini Tamụnọ nemikapụ ma ḅe ḅẹrẹtọn apụma, ini tomonima ḅụ kụrọ nyanamẹ, ini se tọrọkọ ịsụn apụma, pịkị ḅẹrẹtọn ini pịrịpịrịmẹ.

⁴³Anị ọkọ simekẹ ọ́mịna ogboku ḅụ. Ọkụma ọ́mịna ḅie gbọrịḅọ opusọ nwọ ḅimẹ ḅẹḅẹ, ọ̀ fịrịnwẹngịḅọ sọ se kirikọn apụma nwọ pịrịḅịa;

⁴⁴se ọ́mịna ḅie tatarịḅọ nwọ sọ ḅiḅọ omi-ẹ ḅẹḅẹ, iniḅọ omoniḅọ sọ nwenimgba nwọ pịrịḅịa.

⁴⁵Anịatịḅị Tomoniḅọ Tọkụ Ḅe sọnị, tomoni fịrịnwẹngị Ọ̀ pịrị gose Ò ḅokẹ; ọkụma Ọ̀ fịrịnwẹngịḅịa ẹrẹchị ḅomẹ, pịkị Ò ḍumo se tọn apụ pẹkẹrẹḅịaye gose.”

⁴⁶Ini ḅo Jẹriko mị lamẹ, Jizọs Ḅe Oria ọḅụḍukoapụma na ḅaka tomonikpo mị na soarị sịkị, gbọrị tọrụmgbọlụpụn yeọmgbọḅọ, Batimịọs nwọ chịnḅọ, Timaịọs yaḅe ateli aka ḅụ kpọnjị sime waraḅẹ.

⁴⁷Ò ḅo naa, na Nazarẹt Jizọs Ḅe ori-ẹ nwọ ḅẹ sịkị ọ̀ sakị olokumẹ, “Jizọs! Devid Tọkụ! Ị̀ ḍikiḅụgerere!”

⁴⁸Tọn apụ ò ḍiki ịganị se nwọse ọ̀ ḅẹmẹ, na ori ọ̀ ḅịpị gbẹịn. Ọkụma ò gelema olokutẹịnmẹ, “Devid Tọkụ, ị̀ ḍikiḅụgerere!”

⁴⁹Jizọs Ḅe dachịẹ se nwọ ḅẹmẹ, “Ọ̀ chịn.” Anị ini tọrụmgbọlụpụn ḅọ ḅe chịnye-ẹ. Ini nwọse ọ̀ ḅẹmẹ, “Ḅụkụrọma sịsẹ chịẹ, Ori ị́ chịn aḅẹ.”

⁵⁰Ori oria ḅụchụaye mị se gbin wokumamẹ, ḍosi chịẹ, se Jizọs Ḅe damaḅomẹ.

⁵¹Jizọs Ḅe nwọse ò gbelamẹ, “À cheye mịẹ ị́ pịrị ị́ nwọ ḅi?” Tọrụmgbọlụpụn ḅọ ḅe nwọ pẹkẹrẹmẹ, “Yeḍieḅọ, à ḅimẹ, à pịkị yeọrị.”

⁵²Jizọs Ḅe nwọse ọ̀ ḅẹmẹ, “So, ị́ya ḅereni mịẹse ị́ ḅụ iḅisam.” Anị gbọrị kirikiri, ori ineda yeọrị, se ateli ḅie Jizọs Ḅe ḍukomẹ.