Read kirikeni Mak 13 Bible Online

Mak 13 - kirikeni bible

Mak 13

¹Jizọs Ḅe Oputẹkẹwarị mị nwọ koromasoarị sịkị, Oria ọḅụḍukoapụma ḅie gbọrịḅọ nwọ ḅẹmẹ, “Yeḍieḅọ! Ḍiki, mịọ sime ḍụparịma na ini nama warịma na ḅụgbiripuma ọkụ ḍiki!”

²Jizọs Ḅe pẹkẹrẹmẹ, “Ma ini nama opu-a warịma ómine àrị ọrị? Mịanga gbọrị ḍụparị sọnị jịn ḍụparị ọgọnọ kọn ẹkẹ, àrịmgba ini àrị suma gbinḅịa.”

³Jizọs Ḅe Oliv Tụndụ mị ọgọnọ kpọnjị sime sịkị, Oputẹkẹwarị mị na damadama nyọ ḅụ anị Pita ḅe na, Jems ḅe na, Jọn ḅe na, pịkị Andru ḅe na, ḅọịma Ọ̀ damaḅoye-ẹ.

⁴Ini nwọ ḅẹmẹ, “Mịn mị mịẹḅịa sịkị mị ḍuko wa pịrị, pịkị paka se mayema mịẹḅịa sịkị lasam nwọ ḅẹ elekima nwọ ḍuko wa pịrị.”

⁵Jizọs Ḅe nwọse ini ḅẹmẹ, “Ómine ọbị, ó ḅereni se gbọrịḅọ sọnị oḅori se ọ́ chịnma.

⁶Tọn-apụ ị̀ya ẹrẹ nwọse ḅoḅịa, ḅẹ ḅịa, ‘Ị̀rị̀ ori-ẹ!’ se oḅori se tọn-a tomoni chịnḅịa.

⁷Ọ́ pịkị ḅụfụka se ọ́ ḅụ pịrịma ó kpekima owu ḅe iriaḅa naaḅịa sịkị na ọ́ pịkị sasaju ḅụ owu ḅe ḅẹrẹ naaḅịa sịkị na. Ọkọ sime aye pakaḅịa, ọkụma àrị fiekẹ na kuluma mị ḅo lasam.

⁸Ama jịnye jịnye na owusọḅịa; amanyanakiri owu se jịnye jịnye pakaḅịa. Kiri jikeḅịa nyọ nyọ ḅụ, ḅuruḅaa pịkị simeḅịa. Mayema eremeniḅọ tatarị yi ḅụ jikearị sịkị dada ḅụọyị ḅara àrị nwọ simemẹ.

⁹“Ọkụma ómine ọ́ ḅụ ọbị se koru ḅụ simeḅịa, ini ó kun se ó se ḅẹrẹkọn warị munḅịa. Tẹkẹwarịma ḅie ini ó fomuḅịa, ị̀ tịḅị gose ọ́ ḅẹrẹtọn apụ na amanyanapụ na tọrọkọ chịẹḅịa; Iḅi Ḅẹrẹ mị nwọ ḍuko ini pịrịḅịa ẹrẹchị.

¹⁰Tẹrẹmẹ kuluma mị ḅo la ini tatarị Iḅiọkwẹịn mị ḍuko tomoni mamgba pịrịḅịa.

¹¹Se ini ó kun se ó se ḅẹrẹkọn warị mun mẹ ḅẹḅẹ, sịkị ma laka simeogbo ómine ọkwẹịnḅịaye gose ọ́ ḅụḅalaḅala se ọ́ ḅụ pịrịma; sịkị mị ḅo lasịkị, ini anịsịkị se ọ́ pịrịḅịaye mị ọ́ nwọ ḍuko. Anịatịḅị ọ́ kọnḅịa ọkwẹịnma ọ́mịna ye kẹ; Fịafịa Tẹmẹ Ḅe ḅụ àrị ḅọrọ ḅoḅịa.

¹²Tomoni inia mịnapụ daḅọrọma mun fị ḅie chuḅịa, dapụ pịkị anị ḅara se inia awọ mịẹḅịa, awọmẹnị pịkị ini yiapụ na tụḅụrụ se ini daḅọrọma mun fị ḅie chuḅịa.

¹³Tomoniḅọ goyegoye ị̀ gose taraka se ọ́ wẹrịmaḅịa. Ọkụma anị inema mun kuluma la ḅọ goyegoye ḍụaḅọrọma nyanaḅịa.

¹⁴“Opuma Ḅalafamaḅọ ḅe ọ́ nwọ ọrịḅịa anị ò sime gbẹịnka nyọ ḅụ ọ̀ chịẹ simearịogbo.” (Ḍirigoḅọ: mịn mị fiearịye mị kaịnḅo!) “Anịsịkị Judia ḅie simeḅịa apụma mangị so chịngịma sime nyọ munḅịa.

¹⁵Ye iniḅọ warị ochu ọgọnọ simearịḅọ sịkị fama koroḅo ma, warị ḅie sọ mun ye ọkị se chụa soḅịa ẹrẹchị.

¹⁶Ye ozu ḅie simeḅọ ḅe vinpịkị so warị mun ma oria ḅụchụaye gose.

¹⁷Àrị enema ḅalafamaye sọ fura eremenima pịrịḅịa ọkụ ḍiki, pịkị ḅaka awọ ọlọ nyengiapụma na!

¹⁸Ọ́ Tamụnọ Ḅe tẹkẹ na mayema fọngụ sịkị àrị pakama!

¹⁹Anịatịḅị àrị enema ḅie pakaḅịa ḅụfụka mị sitẹịn tomonikiri mị ḅie pakasa ḅụfụka layelaye nwọ nẹngịḅịa, Tamụnọ Ḅe sakị tomonikiri mị tẹmẹ sịkị ngịsị ḅo mị sịkị mị sọ la. Ọkọ simeye sọnị ḅarị pịkị paka ẹkẹ.

²⁰Ọkụma Nyanaḅọ Ḅe àrị enema ḅe kịẹnḅịpị mị ḅụ Ò yesinsam; Ò nemikase ọkọ mịẹka ọkụma, anịa ḅie ḍumo pakaḅoḅịa gbọrịḅọ sọnị ofori-ẹ. Ọ̀ sẹlẹọkịsa tomonima gose, anị simeọkụ simeọkụ sọnị ori enema ḅụ yesinsam.

²¹“Anịsịkị tomoniḅọ nemikase nwọse ọ́ ḅẹmẹ, ‘Ḍiki, Mẹsaya Ḅe ọ̀ mịọ omi-ẹ!’ anịkanịka, ‘Ḍiki, anịnyọ ori omi-ẹ ḅẹḅẹ!’—ó ḅereni ma.

²²Anịatịḅị iruo Mẹsayapụ na iruo ịkịankoroapụ na pakaḅoḅịa. Ini elekima na ḅụgbiripumaye na nwọ ḍiepakụmaḅịa se oḅori se Tamụnọ Ḅe sẹlẹọkịsa apụma sọnị chịnḅịa ẹrẹchị, anị ḅọrọ sarasaramẹ ḅẹḅẹ.

²³Ómine ọ́ ḅụ ọbị! À yemamgba ḍuko ọ́ pịrịsam, sịkị mị ma laka simeogbo.

²⁴“Àrị enema ḅie, ḅụfụka sịkị mị ḅọrọ sịkị, ịrụa mị kanakanaḅịa, akalụ mị ḅarị ḅịa ẹkẹ,

²⁵lolia ma soḅie wẹrị sokoro koroḅịa, soḅie sime kụrọma jike se arịa nyọma ḅụ sikimaḅịa.

²⁶Anịsịkị Tomoniḅọ Tọkụ Ḅe tolupakaḅịa soḅuno ma ḅie wẹrị opu kụrọ na boma na ḅụ ḅoḅịa.

²⁷Ori enjẹlapụma fịrịma pakụmaḅịa, tomonikiri mị ḅe inein-a ịkọlịma ḅie mun Tamụnọ Ḅe sẹlẹọkịsa apụma koḅiriḅịa, tomonikiri mị ḅe gbọrị ịkọlị ḅie ọkịmun ísí ịkọlị la.

²⁸“Ye figi chịn mị ḍawọye sọ ọ́ pịrị. Anịa ịkpangịma ịwọ pịkị lọkọ warasịkị, se anị sakị ịnyanya chụarị sịkị, ó nemimẹ na ịrụakpoin kpekisam.

²⁹Anị gbọrị ḅara ḅụ mayema paka se ómine ọrịḅịa sịkị, ó nemiḅịa na sịkị mị kpekisam, anị sakịḅịa ẹrẹchị ḅụkarakaramaḅẹ.

³⁰Mịn mị ọ́ nwọse ḅiekoroma! Maye mamgba mịẹḅịa mịọkụ ḍumo sime tomoni mamgba ma fịfamaka simeogbo.

³¹So na tomonikiri na ḅọrọḅịa, ọkụma ị̀ya ọkwẹịnma ngịsị ḅọrọ ẹkẹ.

³²“Gbọrịḅọ sọnị anị simeọkụ simeọkụ ene mị anịkanịka sịkị mị ḅo laḅịa sịkị nwọ nemikẹ—soḅie sime enjẹlapụma sọnị ini nemikẹ, pịkị Tọkụ Ḅe sọnị; Ḍaḅọ Ḅe kẹngẹ mị anị nemiye-ẹ.

³³Koru ḅụ ó sime pịkị ọbị ḅụ na, anịatịḅị sịkị mị laḅịa sịkị ó nemikẹ

³⁴Anị simeḅịa ḅara, anị mịna warị koromaso ḅọlọ nyọ mun ḅọ simeọkụ anị anị simeḅịa ọkụ-ẹ, warị se oria fịrịnwẹngịapụma ḅara chụa, se iniḅọ nwẹngịḅịa fịrị se ḅọḅọ pịrịmẹ na ini nwẹngị; se ḍuko ḅọkọ koruḅọ ḅe pịrịmẹ na ò koru ḅụ sime.

³⁵Anịẹrẹchị ó koru, anịatịḅị warị nyanaḅọ ḅe ḅoḅịa sịkị ó nemikẹ—sosi saso ḅiri-ẹ, anịkanịka ḍin karakarama ogbo-ẹ, anịkanịka enema ḅaka simeogbo-ẹ, anịkanịka ịrụapaka kirikiriḅịa.

³⁶Bẹkẹma ḅụ ò ḅomẹ ḅẹḅẹ, ọ̀ mọnọ ḅụ ọ́ ḍọkịḅo ọrị ma.

³⁷À ḍuko ọ́ pịrịarịye mị, anịọkụma, à ḍuko nwenimgba pịrịaḅẹ: Ó koru ḅụ sime!”