Read kirikeni Mak 14 Bible Online

Mak 14 - kirikeni bible

Mak 14

¹Mịọkụ mama ḍin kọnmẹ Saḅaḅọrọ pịkị Suka Fịturu Alalị mị ḅo la. Tịḅịnị agbamịẹapụma na Oloko ḍieapụma na ḅọkọ ḍọkịaḅẹ ḅọịma Jizọs Ḅe kun se Ọ̀ ḅaaḅịa ẹrẹchị.

²“Wa alalị mị fịarị sịkị ḅụ anị mịẹ ẹkẹ,” ini nwọ ḅẹmẹ, “tomonima ḅofa ama fiemaye mịẹ.”

³Jizọs Ḅe Saịmọn ḅụkan obi kọnḅọ ḅe warị simearị sịkị, Bẹtani ḅie, Ò yefịarịogbo, anị gbọrị eremeniḅọ alabasta nwọ chịn olo ololo na sọḅoye-ẹ, opuma yela kụnụ olo-ẹ iḅi nad nwọ chịn ye ini nwọse mịẹ olo-ẹ. Árị ololo mị ḅaa se kụnụ olo mị se Jizọs Ḅe tịḅị saramẹ.

⁴Anị anịnyọ sime dapụ ḅụosọmẹ, se nwọse jịnḅọ jịnḅọ ḅẹmẹ, “Nde á gose mị olo mị papa nwọ igweinmarịye?

⁵Ini ineda mgbọkụ anị seni seleḅa pẹkẹrẹ-a jieasi dẹrịḅịa, se igbiki mị se ḍie igwein apụma pịrịḅịa!” Se ini kụrọma á ḍiki ịganịmẹ.

⁶Ọkụma Jizọs Ḅe nwọ ḅẹmẹ, “Ómine á wẹrịso! Nde ó gose á ḅụfụkamarịye? Árị iḅi pịkị ḅụgbẹịnye nwọ mịẹ ị̀ pịrịsam.

⁷Sịkịmamgba igwein apụma ini ómine na omi-ẹ, ó ḅisịkị ḅisịkị ómine ineda ḅarachụa ini pịrịḅịa. Ọkụma ị̀rị̀ ọ́ sịkịmamgba ị̀ nyanaḅo ẹkẹ.

⁸Árị ineda mịẹḅịaye á nwọ mịẹsam; á kụnụ olo se ị̀ya oju saramẹ, se iḅi sịkị se anị karakarama ḍipi sịkị mị wẹrịmaḅẹ.

⁹Mịọkụ, à kọkọmaye ḍuko ọ́ pịrịaḅẹ na ini Iḅi Ọkwẹịn mị ḍukoḅịa nyọ layelaye, bebe tomonikiri mị kelema koro ḅụ, á se ḅiekoromaḅụ á mịẹye mị ini anị ḍuko gbasoḅịa.”

¹⁰Anịsịkị Judas Ịskarịọt, oyimaịn ọḅụḍukoapụ fịnjịma ḅie gbọrịḅọ ḅe pakaso tịḅịnị agbamịẹapụma damamunmẹ, Jizọs Ḅe se ịbafịḅịa ẹrẹchị.

¹¹Inia ḅie opuma ḅẹlẹmẹ ò ḍukoḅịaye naaḅịa ẹrẹchị, se igbiki ḅereni ọ̀ pịrịmẹ. Anị Judas ḅe sakị ẹmbẹ ḍọkịye-ẹ Jizọs Ḅe ḅọrọma ini pịrịḅịa ẹrẹchị.

¹²Suka Fịturu Alalị mị ḅe tatarị ene mị ḅụ, Saḅaḅọrọ Alalị Fịye mị ḅe ananama ini nwọ ḅaa ene mị, Jizọs Ḅe ọḅụḍukoapụma Ò gbelamẹ, “Nde ị́ ḅi na wa mun ị́ya Saḅaḅọrọ fịye mị karakarama ị́ pịrị nwọ ḅe nyọ?”

¹³Anịsịkị Jizọs Ḅe inia ḅie mama apụ fịrịma pakụma se nwọse ini ḅẹmẹ, “Ómine opuama mị ḅie mun, mengi ojongo pụra gbọrị owuḅọ ómine na ịrịaḅịa. Ómine ò ḍuko

¹⁴ọ̀ sọḅịa warị ḅie sọ, se nwọse warị mị nyanaḅọ ḅe ḅẹ: ‘Yeḍieḅọ ḅe nwọ ḅẹmẹ, Nde ị̀ya ḅie mị, ị̀ya ọḅụḍukoapụma na ị̀rị̀ na Saḅaḅọrọ fịye mị fịḅịa ḅie mị?’

¹⁵Anịsịkị ò gbọrị opu ọgọnọ warị ḅie gbọrị ḅie se ó ḍieḅịa, ini anị tẹlịma pịkị anị ḅirima koroma waraḅẹ, anịnyọ ó yemamgba karakarama wa pịrịḅịa.”

¹⁶Ọḅụḍukoapụma paka opuama mị mun mẹ, se Jizọs Ḅe ḍuko ini pịrị ḅara mị mgba nwọ ḍọkị ọrịmẹ; se ini Saḅaḅọrọ fịye mị karakarama wẹrịmẹ.

¹⁷Saso sọ sịkị, Jizọs Ḅe oyimaịn ọḅụḍukoapụ fịnjịma na ḅomẹ.

¹⁸Ini dẹbụl ọgọnọ sime yefịarịogbo, Jizọs Ḅe nwọ ḅẹmẹ, “À ḍuko ọ́ pịrịaḅẹ na ọ́mịna ḅie gbọrịḅọ ị̀ se ịbafịḅịa, anị ị̀rị̀ na bọlị ḅie yefịarịḅọ.”

¹⁹Ọḅụḍukoapụma anị inia ḅụḅalaḅalamamẹ se gbọrịḅọ gbọrịḅọ sakị Ò gbelamẹ, “Pikipikiye ofori-ẹ, ị́ ị̀ ḅẹkẹ, anịka?”

²⁰Jizọs Ḅe pẹkẹrẹmẹ, “Ómine oyimaịn apụ fịnjịma ḅie gbọrịḅọ-ẹ, ị̀rị̀ na gbọrị bọlị ḅie fịturu se suarịḅọ ḅe-ẹ.

²¹Tomoniḅọ Tọkụ Ḅe ọ̀ fịḅịa, Fịafịa ḍiri ma ḍuko na ọ̀ fịḅịa nwọ ḅẹ ḅara ḅụ; ọkụma anị ḅalafamaye sọ oriḅọ ḅe pịrịḅịa nwọ Tomoniḅọ Tọkụ Ḅe se ịbafịḅịa ḅọ ḅe! Anị mgbọkụ iḅitẹịn oriḅọ ḅe pịrịḅịa ini nemikase ngịsị ò yika ọkụma!”

²²Ini yefịarịogbo, Jizọs Ḅe fịturu ọkịmẹ, mịẹḅaka ḅẹ tẹkẹ kọn, anị pu, se anị seni Oria ọḅụḍukoapụma pịrịmẹ. Se nwọ ḅẹmẹ, “Ómine anị ọkị, mị ị̀ya oju mị-ẹ.”

²³Anịsịkị ori ọmọngọ mị ọkịmẹ, mịẹḅaka se Tamụnọ Ḅe ḅẹ, se anị ḅọrọma ini pịrịmẹ; se inimgba anịa ḅie wẹrị ḅumẹ.

²⁴Jizọs Ḅe nwọ ḅẹmẹ, “Mịn ị̀ya oju pulo mị-ẹ, ọsụn sara tọn-a apụ pịrịye mị, ị̀ya oju pulo mị mịn Tamụnọ ọḅọkụ mị mịẹkụrọmaye-ẹ.

²⁵À ḍuko ọ́ pịrịaḅẹ, à ḅarị ngịsị mị iru mị ḅu ẹkẹ, ọkịmun à Tamụnọ Amanyanakiri mị ḅie ịwọ iru mị ḅuḅịa ene la.”

²⁶Anịsịkị ini gbọrị nime chu se so Oliv Tụndụ mị nwọ mun mẹ.

²⁷Jizọs Ḅe nwọse ini ḅẹmẹ, “Óminemgba ị̀ ḅụ mangị sikima se ị̀ koromasoḅịa, anịatịḅị Fịafịa ḍiri mị nwọ ḅẹmẹ, Tamụnọ Ḅe anana koruḅọ ḅe nwọ ḅaaḅịa, se anana mamgba galagalaḅịa.

²⁸Ọkụma fị ḅụ ini ị̀ sịsẹmasam ḅẹḅẹ, àrị ọ́ tọrọkọ pẹlẹma Galili munḅịa.”

²⁹Pita ḅe pẹkẹrẹmẹ, “Àrị ngịsị ị́ koromaso ẹkẹ, ísíapụ mamgba ọkọ mịẹ sọnị!”

³⁰Jizọs Ḅe Pita ḅe ḅẹmẹ, “À ḍuko ị́ pịrịaḅẹ na mị ḍin ọḅọkọ ma maịn karama paịn ka simeogbo, tẹrẹ-a sịkị ị́ nwọse ị̀ pikiḅịa na ị́ ị̀ nemikẹ.”

³¹Pita ḅe kụrọma pẹkẹrẹtẹịn mẹ, “Àrị ngịsị ḅẹ ẹkẹ na àrị ị́ nemikẹ, àrị ị́rị́ na fịḅịa nwọ ḅẹ sọnị!” Se ísí ọḅụḍukoapụ mamgba anị gbọrịye mị nwọ ḍukomẹ.

³²Iniḅo Gẹtsimẹnị nwọ chịn nyọ mị lamẹ, Jizọs Ḅe nwọse Oria ọḅụḍukoapụma ḅẹmẹ, “Ọ́ mịọ sime à mun tẹkẹ.”

³³Anịsịkị Ò Pita ḅe na, Jems ḅe na, pịkị Jọn ḅe na, ọkị ọ̀ ḅụ chụamẹ. Opu kururu na opu ḅụọyị na Oria ọgọnọ gbanamẹ,

³⁴se Ọ̀ nwọse ini ḅẹmẹ, “Ị̀ kuḅiemgbọlụ sime kururu ḅaka so ọkụma, kalaye kẹngẹ kọnmẹ anị ị̀ kọsịmasam, mịọkụ fị mị ḅe oju akụ ḅụ àrị omi-ẹ. Ọ́ mịọ sime se koru.”

³⁵Ò kele sọma tọrọkọ mun, Ọ̀ ḅụ se chama kiri gbin se tẹkẹmẹ na, anị sarasaramẹ ḅẹḅẹ, ye ọ̀ mịn ḅụfụka sịkị mị ḅie sọma.

³⁶Ọ̀ tẹkẹmẹ, “Ḍaḅọ,” “ị̀ Ḍa! Yemamgba ị́rị́ na sarasaramẹ. Ị̀ ọgọnọ mịn tọrụsiọrị ọmọngọ mị dekisin. Ọkụma ị̀rị̀ ḅiyekẹ, ọkụma ị́rị́ ḅiye mị-ẹ.”

³⁷Anịsịkị Ò vinpịkị ḅo se tẹrẹ-a ọḅụḍukoapụma mọnọarị ọkụ nwọ ọrị, se nwọse Pita ḅe ḅẹmẹ, “Saịmọn, ị́ mọnọ-ao? Ị́ ineda gbọrị awa nwọse mọnọka ḅụ simeka?”

³⁸Se Ọ̀ nwọse ini ḅẹmẹ, “Ó koru se tẹkẹ mịẹse ọ́ ḅịkị telima ḅie sọ ẹka ḅara. Tẹmẹ mị anị ḅereni waraḅẹ, ọkụma oju mịnị mị anị ịnyọ nyanakẹ.”

³⁹Ọ̀ pịkị gbọrị sịkị se nwẹngị somun tẹkẹ se àrị gbọrị ọkwẹịnma kọnmẹ.

⁴⁰Anịsịkị Ò vinpịkị ọḅụḍukoapụma damaḅo, se ini mọnọarị ọkụ ọrịmẹ; ini ineda inia tọrụmgbọlụma finjikẹ. Ini ḍuko Ọ̀ pịrịḅịaye sọnị ini nemikẹ.

⁴¹Ọ̀ tẹrẹ-a sịkị karama vinpịkị ḅo sịkị, Ọ̀ nwọse ini ḅẹmẹ, “Ọ́ pa mọnọ se ịnyọ sara-ao? Iḅisam! Sịkị mị ḅo lasam! Ḍiki, mịọkụ ini Tomoniḅọ Tọkụ Ḅe ḅọrọma siḅụ-ḅein apụma kụrọ mị pịrịsam.

⁴²Ọ́ sịsẹ, ó ye wa so. Ḍiki, ị̀ se ịbafịarịḅọ ḅe ọ̀ mịọ omi-ẹ!”

⁴³Jizọs Ḅe pa ọkwẹịn ini pịrịarịogbo, anị Judas, oyimaịn ọḅụḍukoapụ fịnjịma ḅie gbọrịḅọ ḅe ḅo laye-ẹ. Tomonikpo ọ̀ ḅụ sọ ḅomẹ, okola-agijima na imgbelema na ini na; tịḅịnị agbamịẹapụma na, Oloko ḍieapụma na, sẹnịapụma na ini fịrịmamẹ.

⁴⁴Ịbafịḅọ ḅe, ori elekima se tomonikpo mị pịrịmẹ: “À ḅịpị nọnjụḅịa ḅọ ḅe anị ó ḅi ḅọ ḅe-ẹ. Ómine ò kun, se ó juju ḅụ ori ọlọ so.”

⁴⁵Judas ḅe ḅo la kirikiri, ọ̀ sọ Jizọs Ḅe damamun se nwọ ḅẹmẹ, “Yeḍieḅọ!” se ọ̀ ḅịpị nọnjụmẹ.

⁴⁶Anị ini Jizọs Ḅe kun se gagama ori ọlọye-ẹ.

⁴⁷Ọkụma anịnyọ chịẹsime apụma ḅie gbọrị owuḅọ oria okola-agiji nwọ wọrọ se Gele Agbamịẹḅọ ḅe omoniḅọ ḅe gbogbo se, ò ḅeri pẹlẹsin mẹ.

⁴⁸Anịsịkị Jizọs Ḅe pụkọ deki ọkwẹịn pakụma se nwọse ini ḅẹmẹ, “Ómine okola-agijima na imgbelema na nwọse pakaḅo ị̀ kun-e ḅo, oloko se yechịnka ḅọ mịẹ ọkụ?

⁴⁹Ene mamgba à kọkọ ómine na Oputẹkẹwarị mị ḅie yeḍiesime, se ómine ị̀ kunkẹ. Ọkụma Fịafịa ḍiri ma kọkọmaye anị nwọ sọḅịa.”

⁵⁰Anịsịkị ọḅụḍukoapụ mamgba ò koroma mangị somẹ.

⁵¹Gbọrị asẹmẹnịḅọ, lọkọ ḅịtẹ kẹngẹ nwọse ọ̀ ḅụ gbẹịn se, Jizọs Ḅe ḍukosimemẹ. Ini ò kun ḍọkịmẹ,

⁵²ọkụma ọ̀ papaḅụsin se mangị, lọkọ ḅịtẹ mị wẹrịso se somẹ.

⁵³Anịeso, ini Jizọs Ḅe se Gele Agbamịẹḅọ ḅe warị mun mẹ, tịḅịnị agbamịẹapụma na sẹnịapụma na, pịkị Oloko ḍieapụma na koḅirima sime nyọ mị.

⁵⁴Pita ḅe ọ̀ sasama ḅụ ini ḍuko, se Gele Agbamịẹḅọ ḅe warị mị ḅe odo mị ḅie sọ mun mẹ. Anịnyọ ọ̀ nyọ koruapụma na kpọnjị simemẹ, fịnị mị anga sịkị fịnị temi simemẹ, ọ̀ ḅụ nwana nwanamaḅịa ẹrẹchị.

⁵⁵Tịḅịnị agbamịẹapụma na bebe ḅẹrẹchiri mị mgba na onyechịẹ, ḅẹrẹ se Jizọs Ḅe pụnụmaḅịa apụ ḍọkịmẹ, ọ̀ ḅaaḅịa ẹrẹchị, ọkụma ini ineda gbọrịḅọ sọnị ḍọkịḅokẹ.

⁵⁶Tọn-a onyechịẹapụ iruokọn Jizọs Ḅe pụnụmamẹ, ọkụma inia ḅịpịogbosọkẹ ini ḍukoarị ḅẹrẹ ma ḅụ.

⁵⁷Anịsịkị, da owuapụ sịsẹ se mị iruo mị kọn Jizọs Ḅe pụnụmamẹ:

⁵⁸“Wa naamẹ ò ḍuko sịkị na, ‘À tomoni nama sa Oputẹkẹwarị mị nwọ suma gbinḅịa, se tẹrẹ-a ḍin ḅọrọ sịkị, tomoni namaka gbọrịye à nwọ nama chịẹmaḅịa.’”

⁵⁹Anị simeọkụ simeọkụ sọnị, ini ineda ḅịpịogbosọ nyanakẹ inia ḍukoaye ma ḅụ.

⁶⁰Inimgba tọrụkuḅu ḅụ, Gele Agbamịẹḅọ ḅe ọ̀ sịsẹ se ḅẹrẹ se Jizọs Ḅe gbelamẹ, “Ị́ pẹkẹrẹḅịpị nyana se ini se ị́ pụnụma ọkwẹịn mị pịrịka?”

⁶¹Ọkụma Jizọs Ḅe Ò gboinma simemẹ, se Ọ̀ pịkị gbọrị ọkwẹịn kẹngẹ sọnị kọnkẹ. Se Gele Agbamịẹḅọ ḅe pịkị ḅẹrẹ se Jizọs Ḅe gbelamẹ, “Mẹsaya Ḅe ị́rị́, Ḅẹlẹmasa Tamụnọ Tọkụ Ḅe?”

⁶²Jizọs Ḅe Pẹkẹrẹmẹ, “Ị̀rị̀-ẹ, ọ́ pịkị Tomoniḅọ Tọkụ Ḅe ọrịḅịa ọ̀ Kụrọmamgba Nyanaḅọ Ḅe amaḅara anga sime, se soḅie soḅuno ma na ḅoarị ọkụ mị na!”

⁶³Gele Agbamịẹḅọ ḅe oria ḅụchụayema jine kan se nwọ ḅẹmẹ, “Jịn onyechịẹapụ ḅarị mịna ḅụpalịmakẹ!

⁶⁴Ómine oria Tamụnọ fiesima mị naasam. Ọ́mịna ḅẹrẹ pẹlẹḅịpị cheye?” Inimgba ini ḅẹrẹsi kọn Ọ̀ pịrịmẹ: na Ọ̀ fị gbẹịnmẹ.

⁶⁵Inia ḅụ dapụ sakị fụla se Jizọs Ḅe saramẹ, se ini ye seni ọ̀ tọrụ fịna se Ọ̀ ḅakụmẹ. Ini nwọ ḅẹmẹ, “Mgba mgba, tụḅọ ị́ ḅakụ!” Se nyọ koruapụma Ori ọkị se Ọ̀ ḅụrọmẹ.

⁶⁶Fịrịnwẹngị Gele Agbamịẹḅọ ḅe pịrịarị eremeni awọma ḅie gbọrịḅọ sọḅo sịkị, Pita ḅe ọ̀ pa ḅẹrẹkọn odo mị ḅie omi-ẹ.

⁶⁷Á Pita ḅe ọrị sịkị, ọ̀ fịnịtemiaḅẹ, á kweinma ò ḍiki se nwọ ḅẹmẹ, “Ị́rị́ sọnị Jizọs Nazarẹtḅọ Ḅe ḅụ ḅọ-ẹ.”

⁶⁸Ọkụma, ori anị piki se nwọ pẹkẹrẹmẹ. “À nemikẹ…ị́ ḍukoarịye tịḅị à kaịnḅokẹ,” se ọ̀ nwẹngị pakaso nyọ mị mun mẹ. Anị gbọrị sịkị ḅụ ọḅọkọ paịnmẹ.

⁶⁹Fịrịnwẹngị eremeni tọkụ ma árị anịnyọ ori ọrịmẹ se sakị á kọn ḅọrọsa ọkwẹịn mị ḍuko anịnyọ chịẹsimeapụma pịrịmẹ na, “Ori inia ḅie ḅọ-ẹ!”

⁷⁰Ọkụma Pita ḅe ọ̀ pa pịkị anị pikimẹ. Ḅọlọka sịkị ḅụ, chịẹsimeapụma pịkị anị ḍuko Pita ḅe ọgọnọ gbanamẹ, “Ị́ ineda piki ẹkẹ, ị́rị́ inia ḅie ḅọ-ẹ, anịatịḅị ị́rị́ sọnị Galili ḅọ-ẹ.”

⁷¹Anị Pita ḅe nwọ ḅẹye-ẹ, “À yekarịfịmẹ, na à kọkọmaye mị ḍukoaḅẹ! Ye Tamụnọ Ḅe ḅụfụka se ị̀ pịrị, à ḍukoarịye mị kọkọmaye kẹ ḅẹḅẹ! Ọ́ ḅẹrẹ ḅẹarịḅọ ḅe àrị ò nemikẹ!”

⁷²Anị gbọrị sịkị ḅụ, maịn karama ọḅọkọ paịnmẹ, se Pita ḅe Jizọs Ḅe mị ḅara mị nwọse ọkwẹịn ọ̀ pịrịmẹ nwọ ḅẹ ọkụ mị se ḅiekoromamẹ na, “Ọḅọkọ ma mama sịkị se paịnka simeogbo ị́ tẹrẹ-a sịkị se ị̀ pikiḅịa na ị́ nemikẹ.” Se ọ̀ kpọma akụ ḅara se owumẹ.