Read kirikeni Mak 15 Bible Online

Mak 15 - kirikeni bible

Mak 15

¹Dede funfun ḅụ tịḅịnị agbamịẹapụma na sẹnịapụma na, Oloko ḍieapụma na, bebe ḅẹrẹkọn chiri mị mgba na ịrịa se ḅẹrẹ ḅiamẹ. Ini ikoli se Jizọs Ḅe ịkasịmẹ, ori ọkị se Ọ̀ ḅọrọma Paịlet ḅe pịrịmẹ.

²Paịlet ḅe ḅẹrẹ se Ò gbelamẹ, “Juapụ amanyanaḅọ ḅe ị́rị́?” Jizọs Ḅe pẹkẹrẹmẹ, “anị ị́ ḅẹ ọkụ-ẹ.”

³Tịḅịnị Agbamịẹapụma tọn-a ye ḍuko Jizọs Ḅe ọgọnọ gbanamẹ,

⁴anị Paịlet ḅe pịkị ḅẹrẹ se Ò gbelaye-ẹ, “Ị́ ḅịpị ị́ pẹkẹrẹ ẹka? Ini ḍuko ị́ya ọgọnọ gbanaye ma ḅaka la-ọkụ ḍiki!”

⁵Jizọs Ḅe pịkị gbọrị ọkwẹịn sọnị kọn ḍụkụkẹ, anị opuma Paịlet ḅe ḅụgbiripumamẹ.

⁶Saḅaḅọrọ Alalị lasịkị lasịkị Paịlet ḅe ọ̀ gbọrị ikoliḅọ ḅụ ḅarasinḅịa tomonima ọ̀ ḅara ḅi ḅọ goyegoye.

⁷Anịsịkị mị ḅụ Barabas nwọ chịn gbọrị owuḅọ ikoli ḅie simemẹ, nyana ḅerenika amafiema ḅie nweni ḅaa apụ na ori na.

⁸Tomonikpo mị koḅirima se sakị Paịlet ḅe ḅara ḅimẹ na ọ̀ ḅarachụa ini pịrị anị mịẹmịẹ ḅara ḅụ,

⁹ori ini gbelamẹ, “Ó ḅi-ao à Juapụ amanyanaḅọ ḅe ḅụ ḅarasin ọ́ pịrị?”

¹⁰Ori iḅiọkụ nemimẹ na tịḅịnị agbamịẹapụma ḍikitọrụfụka ḅụ Jizọs Ḅe nwọ ḅọrọma ḅo ọ̀ pịrịmẹ.

¹¹Ọkụma tịḅịnị agbamịẹapụma tomonikpo mị chukurumamẹ na Jizọs Ḅe nakaraka ini Paịlet ḅe ḅara ḅi se, ọ̀ Barabas ḅe ḅụ ḅarasin ini pịrị.

¹²Paịlet ḅe pịkị ọkwẹịn tomonikpo mị pịrịmẹ, “Nde anịọkụma Juapụ amanyanaḅọ ọ́ nwọse chịn ḅọ ḅe à nwọ mịẹḅịa ọkụ?”

¹³Ini pịkị oloku ọ̀ pịrịmẹ, “Ò se mgbẹsẹchịn ọgọnọ kakịḅaa!”

¹⁴Paịlet ḅe gbelamẹ, “Che siye Ọ̀ nwọ mịẹ?” Ini pịkị kụrọma olokutẹịnmẹ, “Ò se mgbẹsẹchịn ọgọnọ kakịḅaa!”

¹⁵Paịlet ḅe ò ḅimẹ ò tomonikpo mị ḅieḅẹlẹmaḅịaye nwọ mịẹ anị ọ̀ Barabas ḅe ḅụ ḅarasin ini pịrịye-ẹ. Anịsịkị ò Jizọs Ḅe fomu se ọ̀ ḅọrọma ini pịrịmẹ; Ò se mgbẹsẹchịn ọgọnọ kakịḅaaḅịa ẹrẹchị.

¹⁶Owunima Jizọs Ḅe ọkị se ḅẹrẹkọn warị odo mị ḅie sọmẹ, anị gọvịna ḅe warị mị sime anga mị-ẹ, se ísí kirikọn apụ mamgba chịn koḅirimamẹ.

¹⁷Ini awụwụ ḅụchụaye se Jizọs Ḅe chụamẹ, ịga ḅụ sime chịn ịkpangị se amanyanaḅọchu mịẹ, se Ò chiramẹ.

¹⁸Anịsịkị ini sakị Ò kerenimẹ: “Nangwọ ḍumo sime ị́ pịrị Juapụ amanyanaḅọ!”

¹⁹Ini chịn se Ọ̀ tịḅị fomumẹ, fụla se Ọ̀ sara, inia ḅụọịkpụkụ ma se kpẹrẹkị, se tịḅịtu Ọ̀ pịrịmẹ.

²⁰Ini Ò se kpọti so sịkị, ini anị awụwụ ḅụchụaye mị sin, se Oria ḅụchụayema se kpoto Ọ̀ chụamẹ. Ini Ori ọkị paka somẹ Ò seni mgbẹsẹchịn ọgọnọ kakịḅịa ẹrẹchị.

²¹Ateliogbo ini Saịmọn nwọ chịn gbọrị owuḅọ na ịrịamẹ ọ̀ nwẹngị opuama mị ḅie sọḅoarịogbo, se owunima kụrọ ḅara ḅụ ọ̀ mịẹse ò Jizọs Ḅe Mgbẹsẹchịn mị pụramẹ. (Saịmọn ḅe Saịrini ama ḅie ḅọ-ẹ, Alẹkzanda ḅe na Rufọs ḅe na ḍaḅe-ẹ.)

²²Ini Jizọs Ḅe ọkị se Gọlgọta nwọ chịn nyọ mị mun mẹ, anị mị fiearịye, “Kukure Tịḅị Nyọ.”

²³Anịnyọ ini maah nwọse chịn ḍiri se gwa iru se Ọ̀ pịrị ḍọkịmẹ, ọkụma Jizọs Ḅe anị ḅu ḍụkụkẹ.

²⁴Anị ini Ò se mgbẹsẹchịn ọgọnọ kakịḅaaye-ẹ se Oria ḅụchụayema ḍiama ọkịmẹ inia ogboku ḅụ, ini ịkịan wakị àrị pịrịmẹ ḅọḅọ ọkịḅịaye nwọ nemiḅịa ẹrẹchị.

²⁵Dede ḅie esenia-a so ḅiri ḅụ mị ini Ò se mgbẹsẹchịn ọgọnọ kakịḅaaye-ẹ.

²⁶Ini se Ọ̀ pụnụma ḅẹrẹ mị ini nwọ gịẹịnmẹ, anịaḅụ simeye “Juapụ Amanyanaḅọ.”

²⁷Ini pịkị mama kụrọkọn furuapụ se chụa Jizọs Ḅe na kakịḅaamẹ. Mgbẹsẹchịn ọgọnọ ḅụ, gbọrịḅọ oria amaḅara anga, ísíḅọ ḅe pịkị oria ereḅara anga ḅụ.

²⁸(Mịn ḅara mị ḅụ Fịafịa ḍiri mị ḅie gịẹịnye mị ḅo kọkọmaye nwọ sọmẹ, anị nwọ ḅẹmẹ na, “Ò siyemịẹapụma na gboloma gbọrị fị nwọ kọnmẹ.”)

²⁹Nwẹngị ḅọrọarị apụma inia tịḅị ma ganaganamamẹ se wọlọ ọkwẹịn kọn Jizọs Ḅe pịrịmẹ, “Ẹn-ẹn! Ị́ kọkọ Oputẹkẹwarị mị nwọ suma gbin se tẹrẹ-a ḍin ḅụ anị namaḅịa ị́ nwọ ḅẹ mama!

³⁰Mịọkụ mgbẹsẹchịn ọgọnọ koroḅo se ị́ ḅụ ḍụaḅọrọma!”

³¹Anị gbọrị ḅara mị ḅụ tịḅịnị agbamịẹapụma na Oloko ḍieapụma na pịkị Jizọs Ḅe nwọse kpọti ḅụ, nwọse jịnḅọ jịnḅọ ḅẹaḅẹ, “Ọ̀ jịn apụ ḍụaḅọrọmamẹ ọkụma Ori ineda Ọ̀ ḅụ ḍụaḅọrọmakẹ!

³²Ye wa Mẹsaya Ḅe ọrị, Izrẹl amanyanaḅọ ḅe, mịọkụ mgbẹsẹchịn mị ọgọnọ Ò koroḅo, anịsịkị wa Ò ḅereniḅịa!” Ini se Jizọs Ḅe na chụa mgbẹsẹchịn ọgọnọ kakịḅaa mama apụma sọnị pịkị Ọ̀ wọlọmẹ.

³³Eneogboin ḅiri ḅụ kanakana bebe ama mị mgba gbẹịnmẹ, anị sime mun tẹrẹ-a awa nwọ lamẹ.

³⁴Saso tẹrẹ-a so ḅiri ḅụ Jizọs Ḅe gele pụkọ nwọse olokumẹ, “Elọị, Elọị, lama sabaktani?” Anị mị fiearịye, “Ị̀ Tamụnọ, ị̀ Tamụnọ, nde ị́ gose ị̀ ḍikitọrụsin àrị ye?”

³⁵Anịnyọ sime dapụ Ò ḍukoye naa, se nwọ ḅẹmẹ, “Ó poki, Ori Ịlaịja ḅe chịn aḅẹ!”

³⁶Inia ḅụ gbọrịḅọ mangị mun sapo ọkịmẹ, anị se yelaka iru ḅie sumẹ se anị seni chịn ḅịpị ḅụ sụka, se anị dekichịẹma se Jizọs Ḅe ḅịpị damẹ, se nwọ ḅẹmẹ, “Ó koru! Ye wa ḍiki nwọfa Ịlaịja ḅe ò koroḅo ḅịa-etuḅo mgbẹsẹchịn ọgọnọ Ò sin koromaḅịa ẹrẹchị!”

³⁷Jizọs Ḅe gelema oloku se fịmẹ.

³⁸Oputẹkẹwarị mị ḅie sime kikichụa ḅịtẹ mị maịn pumẹ, ọgọnọ ọkịmun chuku la.

³⁹Mgbẹsẹchịn mị tọrọkọ kpekima chịẹsime owunitịḅịnịḅọ ḅe Jizọs Ḅe oloku se fị ọkụ mị ọrịmẹ. Ọ̀ nwọ ḅẹmẹ, “Ḅe ḅọ ḅe anị kọkọma Tamụnọ Tọkụ Ḅe-ẹ!”

⁴⁰Da eremeni anịnyọ sime se sasaju ḅụ wẹrị ḍikiaḅẹ. Inia ḅie sime apụ anị Meri Magdalin ma na, pịkị kala Jems ḅe na Josẹf ḅe na nyengi Meri ma na, pịkị Salomi ma na-ẹ.

⁴¹Jizọs Ḅe Galili ḅie simearị sịkị ini mị Ò ḍuko nwẹngị se pịkị ḅarachụa Ọ̀ pịrịye-ẹ. Tọn-a jịn eremeni sọnị pịkị anịnyọ simemẹ, Ori na Jerusalẹm mị ḅo apụma.

⁴²Anị saso ḅiri nwọ la-ẹmuaḅẹ, Josẹf Arịmatiaḅọ ḅe ḅo lamẹ. Ori anị ḅẹrẹtọn ogbo apụma ḅụ osi nyanaḅọ-ẹ, pịkị tọrụ se Tamụnọ amanyanakiri mị ḅoḅịa sịkị mị ḍiki sime ḅọ-ẹ. Anị ene mị Ḅụkarakarama Ene-ẹ, (anị mị fiearịye Ịnyọsara Ene mị ḍukoma ene-ẹ) anị Josẹf ḅe kuḅie kụrọma Paịlet ḅe tọrọkọ mun se Jizọs Ḅe fị oju mị nwọ ḅiye-ẹ.

⁴³

⁴⁴Anị Paịlet ḅe ḅụgbiripumamẹ naa na Jizọs Ḅe Ọ̀ gbọtụḅara ịnyọ binma sam. Ori owunitịḅịnịḅọ ḅe nwọ chịnmẹ, se gbelamẹ nwọfa Jizọs Ḅe ori ịnyọ binma ḅọlọsa-etuḅo?

⁴⁵Owunitịḅịnịḅọ ḅe ḍukoye ọ̀ nwọ na so sịkị Paịlet ḅe ḍuko Josẹf ḅe pịrịmẹ na ori ineda oju mị nwọ ọkịḅịa.

⁴⁶Josẹf ḅe lọkọ ḅịtẹ kpo nwọ fẹmẹ, Jizọs Ḅe oju mị sin koroma se lọkọ ḅịtẹ mị se anị fịna se anị seni ini ḍụparị ḅụ soku iḍupu ḅie chụamẹ. Anịsịkị opu ḍụparị pẹkẹrẹ nwọ mbimbile iḍupu mị ḅịpị gbẹịnmẹ.

⁴⁷Meri Magdalin ma na Josẹf nyengi Meri ma na anị ḍikisimemẹ, se ini Jizọs Ḅe se koroma nyọ mị nwọ ọrịmẹ.