Read kirikeni Mak 4 Bible Online

Mak 4 - kirikeni bible

Mak 4

¹Jizọs Ḅe Ọ̀ pịkị sakị Galili Tọrụ mị aka ḅụ yeḍiesimemẹ. Koḅirima Ò kelema tomonikpo mị ḅaka so ọkụma Ori arụ ḅụkụlọ anịa ḅie kpọnjị simemẹ. Arụ mị anị mengi aka ḅụ sikima sime waraḅẹ, anịsịkị tomonikpo mị ini mengi mị dachịẹ nyọ tọrụ mị aka ḅụ chịẹsimemẹ.

²Kaḅo Ọ̀ nwọse tọn-aye seni ini ḍiemẹ, se nwọ ḅẹmẹ:

³“Ó poki! Gbọrị sịkị paka yeḍipi-e mun gbọrị owuḅọ simemẹ.

⁴Ori ozu mị ḅie ḍipiyemgbọlụma nwọ sara wasama sịkị, arịa ḅụ daye ateli ḅụ koromẹ, se fenima àrị gbọ fịmẹ.

⁵Arịa ḅụ daye ḍụparị kiri ọgọnọ koromẹ, ḅoka onwun sime nyọ ḅụ. Ḍipiyemgbọlụma ḅọlọka sịkị ḅụ ḅịpị tolumamẹ.

⁶Ọkụma ịrụa mị pakaḅo sịkị, anị ịwọma pakaḅo ḍipiayema nwọ ḅaamẹ anịatịḅị arịa kunoma ma paka kiri ḅie sọ gbunkaye gose, àrị ḅọlọka samịnamẹ.

⁷Ḍipiyemgbọlụma ḅụ daye koro ịgama ḅie sọmẹ, ịgama àrị sẹnị paka se ḍipiayema temi sịkị, àrị chịnmgbọlụ chụakẹ.

⁸Ọkụma da ḍipiyemgbọlụ iḅi kiri ḅụ koromẹ, se ḍipiayema sopakamẹ, àrị sẹnị se chịnmgbọlụ chụamẹ; daye soi chụamẹ, ísíayema tesi, daye pịkị sọnọasi chụamẹ.”

⁹Se Jizọs Ḅe ḍukopẹlẹmẹ, “Anịọkụma, ó ḅeri nyanamẹ ḅẹḅẹ, ó poki!”

¹⁰Jizọs Ḅe ngẹrị sime sịkị, Ò ḍukoye naa apụma ḅie dapụ oyimaịn ọḅụḍukoapụ fịnjịma ḅụ sọ se Ọ̀ ḅara ḅimẹ na Ọ̀ kaḅoma fiearịye nwọ ḍuko ini pịrị.

¹¹Jizọs Ḅe ini pẹkẹrẹmẹ, “Tamụnọ Amanyanakiri mị ḅie ḅọịayema, ini nwọse ó ḍiesam.” Ọkụma, ísí mịna ḅie oforika apụma ini kaḅo ḅụ wẹrị ye mamgba nwọ naamẹ,

¹²mịẹso sịkị, ‘Ini ḍiki, pịkị ḍikiḅịa, ọkụma ini ọrị ẹkẹ; ini poki pịkị pokiḅịa, ọkụma ini kaịnḅo ẹkẹ. Anịatịḅị, ini nemikase ọrị pịkị na kaịnḅo ọkụma ini ineda vinpịkị Tamụnọ Ḅe damamunḅịa, se ò siḅụ-ḅarasin ini pịrịḅịa.’ ”

¹³Anịeso, Jizọs Ḅe ini gbelamẹ, “Mịn kaḅo mị ómine anị kaịnḅo ka? Anị-ẹ nwọ ḅẹ ọkụma, nde ó jịn kaḅo nwọ kaịnḅoḅịa ọkụ?

¹⁴Yeḍipiḅọ ḅe ọ̀ Tamụnọ ọkwẹịn mị ḍipimẹ.

¹⁵Da tomoni ateli ḅụ koro ḍipiyemgbọlụma na kịkịnamẹ; ini ọkwẹịn mị naa kirikiri, Oru ḅe ḅo se anị deki somẹ.

¹⁶Ísí apụma ini ḍụparị kiri ọgọnọ koro ḍipiyemgbọlụma na kịkịnamẹ. Ini ọkwẹịn mị naa kirikiri, ini ḅieḅẹlẹ ḅụ anị ọkịmẹ.

¹⁷Ọkụma anị ḍipi inia ḅie sọkẹ, se àrị ḍin lakẹ. Se ọkwẹịn mị gose ḅụfụka anịkanịka tọrụsiọrị pakaḅo sịkị ini kirikiri saḅama anịa ḅụ ḅarasinmẹ.

¹⁸Ísí apụma, anị ịga piri ḅie ini ḍipi ḍipiyemgbọlụma na kịkịnamẹ, mịna apụma anị ọkwẹịn mị naa apụma-ẹ,

¹⁹ọkụma mịn ḍumo mị ḅe ḅụḅalaḅala ma na, ngọ ḅẹlẹma na pịkị anị ḅiarị jịn tọrụkịrịkịrịayema na, ogbo chụa inia ḅie sọmun ọkwẹịn mị temi ḅaa se àrị chịnmgbọlụ chụakẹ.

²⁰Ọkụma, ísí-a tomonima, iḅi kiri ḅụ ini ḍipi ḍipiyemgbọlụma simeọkụ anị ini simeọkụ-ẹ. Ini ọkwẹịn mị naa, anị ọkị se chịnmgbọlụ chụamẹ: daye soi, daye tesi, daye pịkị sọnọasi.”

²¹Jizọs Ḅe pa pịkị ọkwẹịnmamun-aḅẹ, “Tọnjie ọkịḅo, se anị se bọlị anịkanịka mọnọye chuku ḅie koromaḅịa ḅọ omi? Ori anị seni tọnjie gbanaye ọgọnọ koroma ẹka?

²²Ḅọịma sime yelayelaye ini anị deki pakụmaḅịa, se ini gbẹịn koroma yelayelaye ini finji koromaḅịa.

²³Anịọkụma ó ḅeri nyanamẹ ḅẹḅẹ, ó poki!”

²⁴Ọ̀ pịkị na nwọse ini ḅẹmẹ, “Ọ́ tọrụ se ọ́ naayema ḅụ wẹrị! Ó seni ḅẹrẹpẹlẹ jịn apụ pịrị olokoma, anị Tamụnọ Ḅe pịkị se ḅẹrẹpẹlẹ ọ́ pịrịḅịaye-ẹ, ọkụma pịkị anị ḅara mị nwọ nẹngịmaḅịa.

²⁵Ye nyanaḅọ ḅe ini ye se ḅarị ọ̀ pịrịḅịa, anịsịkị, ye nyanaka ḅọ ḅe, ori ịkịẹnma nyanaye mị sọnị, ini ọ̀ ḅara pọkọ ọkịḅịa.”

²⁶Jizọs Ḅe ọkwẹịnmamun se nwọ ḅẹmẹ, “Tamụnọ Amanyanakiri mị, anị ozu ḅie tomoniḅọ wasama ḍipiyemgbọlụ simeọkụ simemẹ.

²⁷Ò ḍin ḅụ mọnọmẹ, enekaka ḅụ ọ̀ sịsẹ nwẹngịma ḅọrọmẹ, anịsịkị mayema mịẹarị sịkị ḅụ ḍipiyemgbọlụma àrị ḅịpịtoluma se sẹnịaḅẹ. Anị sọnị, anị wẹrị paka ọkụ ò nemikẹ.

²⁸Kiri mị na mịnaḅụ na ḍipiayema mịẹse àrị sẹnị se chịnmgbọlụ chụamẹ; tatarị mị ḅụ àrị ịwọ ịnyanya nwọ pakụmaḅomẹ, ọḅụkọ àrị tịḅị toluma pakaḅomẹ, anị ḅe kuluma arịa tịḅịma ḅo ịpịamgba mgbọlụ na ḅeinmẹ.

²⁹Ịpịamgba mị kpọsa ḅẹḅẹ, tomoniḅọ ḅe, ọ̀ sakị oria ozu pẹlẹ agiji mị seni anị pẹlẹḅịa, anịatịḅị fịye soku sịkị mị lasam.”

³⁰Jizọs Ḅe gbelamẹ, “Tamụnọ Amanyanakiri mị anị cheye na kịkịnamẹ wa nwọ ḅẹ ḅe? Che kaḅo wa nwọse anị ḍuko ḅelema ḅe?

³¹Mọstad nwọ chịn chịnmgbọlụ mị anị na kịkịnamẹ; anị ma tomonikiri mị ḅie bokatẹịn ḍipiyemgbọlụ-ẹ. Tomoniḅọ anị ọkị se kiri ḅie ḍipimẹ.

³²Sịkị kalaye ḅọrọ sịkị, anị sẹnị pakaḅo ḍụḅatẹịn chịn nwọ sọmẹ. Anị opu ịkpangị nwọ chụa pakụmamẹ, anịẹrẹchị fenima ḅo arịa tịḅị kikima nyọ mị ḅụ arịa warịma namamẹ.”

³³Jizọs Ḅe Oria ọkwẹịn mị kọn tomonima pịrịmẹ, ma kaḅoma na kịkịna jịn-a kaḅo nwọse ḅẹrẹ ḍuko ḅụ ini ineda kaịnḅoḅịa ḅara Ọ̀ nwọse ọkwẹịn kọn ini pịrịmẹ.

³⁴Ori ọkwẹịn ini pịrị ḍụkụkẹ Ọ̀ kaḅo kọnka simeogbo, ọkụma Ori Oria ọḅụḍukoapụma na ngẹrị sime sịkị ḅụ Ò ye goyegoye nwọ ḍuko ḅelema ini pịrịmẹ.

³⁵Anị gbọrị ene mị ḅe saso ḅiri ḅụ, Jizọs Ḅe nwọse Oria ọḅụḍukoapụma ḅẹmẹ, “Ó ye wa ḍapa mị saḅa ísí pẹkẹrẹ mun.”

³⁶Anị ini tomonikpo mị koromasoye-ẹ, ọḅụḍukoapụma ini Jizọs Ḅe sime arụ mị ḅie ḅụkụlọ se, Ori na dọkụ pakamẹ. Jịn arụ pịkị anịnyọ simemẹ.

³⁷Ḅụnemika ḅara ḅụ kụrọ fọrụ fiepakamẹ, se amburama sakị ḅakụ arụ mị ḅie saramẹ, anịẹrẹchị kalaye kẹngẹ kọnmẹ mengi arụ mị ḅie sọ ḅeinsam.

³⁸Jizọs Ḅe ḍukuno da nyọ ḅụ Ò simemẹ, Ori Ọ̀ tịḅị seni tịḅịsẹkẹye ọgọnọ gbana se mọnọaḅẹ. Ọḅụḍukoapụma Ò wosịsẹma se nwọ ḅẹmẹ, “Yeḍieḅọ, anị ị́ ḅụ yesọka na wa fa-ẹ tọn aḅẹ?”

³⁹Jizọs Ḅe sịsẹ chịẹ se ḅẹrẹtọn fọrụ mị pịrịmẹ, “Deinma sime!” pịkị nwọse amburama ḅẹmẹ, “Ḅụjike ma!” Fọrụ mị binmẹ, se nyọ mị opuma yawụmẹ.

⁴⁰Anịeso, Jizọs Ḅe nwọse Oria ọḅụḍukoapụma ḅẹmẹ, “Nde ó gose ḅalafaye? Ma ọ́ pa ḅereni nyanaka?”

⁴¹Ọkụma inia ḅala opuma famẹ, se ini sakị nwọse jịnḅọ jịnḅọ gbelamẹ, “Ḅe ḅọrọ tụḅọ? Fọrụ mị na amburama na sọnị Ọ̀ ḅịpị pokimẹ!”