Read kirikeni Mak 6 Bible Online

Mak 6 - kirikeni bible

Mak 6

¹Jizọs Ḅe anịnyọ koromaso se Oria ama mị nwọ mun mẹ, Oria ọḅụḍukoapụma Ò ḍukomẹ

²Ịnyọsara Ene mị ḅie Ọ̀ sakị tẹkẹwarị mị ḅie yeḍiemẹ. Tọn-a apụ anịnyọ simemẹ, se ini Ò ḍukoarịyema naa sịkị, anị inimgba ḅụbuamamẹ. Se ini nwọ gbelamẹ, “Ori nde ju maye mamgba nwọ nyana ḅo? Mịn ḅọrọ nde nde sime nemi ini nwọse Ọ̀ pịrị? Nde Ọ̀ mịẹse ḅụgbiripumaye nwọ mịẹarị ọkụ?

³Ḅe akanịḅọ ḅe orika, Meri ya, pịkị Jems na, Josẹf na, Judas na, pịkị Saịmọn ḅe na mịnaḅọ ḅe? Oria eremeni mịnapụma ini mịnyọ angaka?” Anị gose ini Ọ̀ sịkịmẹ.

⁴Jizọs Ḅe nwọse ini ḅẹmẹ, “Nyọ layelaye ḅụ ini osi seni ịkịankoroḅọ ḅe pịrịpịrịmẹ, oria ama na, ori na pakapụ na, pịkị ò furoapụ na ogboku sikima ọkụma.”

⁵Ori Ọ̀ ḅarama se boka obiapụ ọgọnọ gbana se ini gwọ mị sikima ọkụma, ori ineda anịnyọ gbọrị ḅụgbiripuma fịrị sọnị nwẹngịkẹ.

⁶Anị opuma Ọ̀ ḅụbuamamẹ, anịatịḅị tomonima ini ḅereni nyanakẹ. Anịeso Jizọs Ḅe Ò so anịnyọ kelema ịwọamama nwọ mun se ye se tomonima nwọ ḍiesimemẹ.

⁷Ori oyimaịn ọḅụḍukoapụ fịnjịma nwọ chịn koḅirima se mamapụ mamapụ ḅụ wẹrị ini fịrịma pakụmamẹ. Ọ̀ kụrọ se ini pịrịmẹ se ḅẹrẹtọn si-a-tẹmẹma pịrị,

⁸se tọn ini pịrịmẹ na, “Ó mun-arịye mị ḅụ, ọ́ gbọrịye sọnị nwọse chụa mun ma, amgbara sikima ọkụma—ó fịye ọkịma, yeọmgbọ akpa sọnị, igbiki sọnị ọ́mịna akpama ḅie sime ma.

⁹Ómine akpaka chụa, ọkụma ọ́ ḅụchụaye gbanama mun ma.”

¹⁰Ọ̀ pịkị nwọ ḅẹmẹ, “Ini iḅiọkụ se ómine ọkị nyọ layelaye, ómine anị warị mị ḅie sime mun ómine anị ama mị koromaso sịkị la.

¹¹Ó ḅo la se tomoni iḅiọkụ se ómine ọkị ka pịkị ó poki ka nyọ simemẹ ḅẹḅẹ, ómine anị koromaso se ọ́mịna ḅụọ sime funma nwọ gugu sara. Anị mị anị inia ḅerijineye nwọ sọ ḅịa!”

¹²Anị ini pakaye-ẹ, se Tamụnọ ḅẹrẹ mị ḍuko tomonima pịrịmẹ, na ini inia sima ḅụ vinpịkị.

¹³Ini tọn-a sitẹmẹ nwọ desinmẹ, se pịkị oliv pulo se tọn-a obiapụ ọmbị se ini gwọmẹ.

¹⁴Amanyanaḅọ Hẹrọd ḅe, ọ̀ maye mamgba nwọ naamẹ, anịatịḅị, Jizọs Ḅe Oria ẹrẹso mị anị wasama mun nyọ layelaye nwọ lamẹ. Da tomoni nwọ ḅẹaḅẹ, “Jọn Mengisaraḅọ ḅe, ọ̀ pịkịma ḅo ḍumosam! Anị ò gose mịn kụrọ mị nyana se ḅụgbiripuma fịrị nwẹngịarịye-ẹ.”

¹⁵Jịn apụ pịkị nwọ ḅẹmẹ, “Ori Ịlaịja ḅe-ẹ.” Ísíapụma nwọ ḅẹmẹ, “Ori ịkịankoroḅọ-ẹ, ḅọlọ sịkị ḅụ sime ịkịankoroapụma ḅụ gbọrịḅọ ọkụ simemẹ.”

¹⁶Hẹrọd ḅe ori anị naa sịkị, ọ̀ nwọ ḅẹmẹ, “Ḅe Jọn Mengisaraḅọ ḅe! Àrị ọ̀ tịḅị nwọ pẹlẹsinmẹ, ọkụma ọ̀ pịkị ḅo ḍumosam!”

¹⁷Hẹrọd ḅe na mịnaḅụ na kụrọ pịrịmẹ na ini Jọn ḅe kun, se ò se ikoli ḅie chu ịkasị. Hẹrọd ḅe gose mịn mị mịẹye, anị Hẹrọdịas, numbireowu Filip ḅe ta, ori ọkị simeḅọ ma, tịḅị gose-ẹ.

¹⁸Jọn Mengisaraḅọ ḅe kunoka ḅụ pa ḍuko Hẹrọd ḅe pịrịaḅẹ, “Anị karakarakẹ, ị́rị́ ị́ mbire ḅe ta ma nwọ ọkị sime!”

¹⁹Anị gose, Hẹrọdịas ma á si-kuḅie nyana Jọn ḅe pịrịmẹ, se ọ̀ ḅaaḅịa ẹrẹchị ḍọkịmẹ, ọkụma árị ineda kẹ Hẹrọd ḅe gose.

²⁰Hẹrọd ḅe ọ̀ Jọn ḅe ḍikiḅalafamẹ, anịatịḅị ò nemimẹ na Jọn ḅe iḅi pịkị fịafịa tomoniḅọ-ẹ, anị mịẹse ori ò se deinma wẹrịmẹ. Anị ọ̀ ḅụḅẹlẹḅẹlẹmẹ Jọn ḅe nwọ poki, oria ọkwẹịnma ḅụḅalaḅala se ọ̀ pịrịpịrịmẹ nwọ ḅẹ sọnị.

²¹Anị ḅe kuluma ẹmbẹ paka Hẹrọdịas ma pịrịmẹ. Anị Hẹrọd ḅe ini ò yi ene se ḅiekoroma ḅụ, ori alalị koroma oria fịrịkiri-a tịḅịnịma na, ọmụ alapụma na pịkị Galili mị ḅe tịḅịnịma na pịrịarị sịkị ḅụ.

²²Hẹrọdịas ḅa ma sọ ḅo, se sẹkị sịkị, anị Hẹrọd ḅe na oria igoniapụma na ḅieḅẹlẹmamẹ. Anị ḅụ, amanyanaḅọ ḅe nwọse eremenitọkụ ma ḅẹmẹ, “Nde ị́ ḅụḅẹlẹ se ị́ ọkịḅịaye? Ị́ ḅiye layelaye à se ị́ pịrịḅịa.”

²³Ọ̀ tọn-a ye karịfị se ọkwẹịn á pịrịmẹ, “À ḅerenimẹ na ị́ ḅiye layelaye à se ị́ pịrịḅịa, ọkịmun ị̀ya amanyanakiri mị se maịn pu ḅe gbọrị pẹkẹrẹ la sọnị!”

²⁴Anị eremenitọkụ ma pakaso mun nyọngọrọ ma gbelaye-ẹ, “Cheye à nwọ ḅiḅịa nọ?” “Jọn Mengisaraḅọ ḅe tịḅị mị-ẹ,” á nwọ pẹkẹrẹmẹ.

²⁵Anị kirikiri eremenitọkụ ma á be vinpịkị amanyanaḅọ ḅe damamunmẹ, se nwọ ḅẹmẹ, “À ḅimẹ ị́ mịkirikiri Jọn Mengisaraḅọ ḅe tịḅị nwọse ẹfẹrẹ ḅie chụa ọkọmụ!”

²⁶Mịn mị anị opu kururu nwọse amanyanaḅọ ḅe pịrịmẹ, ọkụma ori ineda á ḅiye mị sịkịkẹ, ori oria igoniapụma tọrọkọ ḅereniyema gose.

²⁷Anị ọ̀ gbọrị owuniḅọ nwọ fịrịma pakụmaye-ẹ, se tọn ọ̀ pịrịmẹ na ọ̀ Jọn ḅe tịḅị nwọ ọkịḅo, owuniḅọ ḅe ò so ikoli warị mị sọmunmẹ se Jọn ḅe tịḅị nwọ pẹlẹsinmẹ.

²⁸Se ori anị se ẹfẹrẹ ḅie chụa ḅo se tọkụ ma pịrịmẹ, anịsịkị árị anị se mun nyọngọrọ ma pịrịmẹ.

²⁹Jọn ḅe ọḅụḍukoapụma ḅo mịn mị naa sịkị, iniḅo oria oju mị ọkị ḍipimẹ.

³⁰Okunwẹngịapụma ini vinpịkịḅo Jizọs Ḅe na ịrịamẹ, se ini mịẹye mamgba na, ini ḍie sa ye mamgba na nwọ ḍuko Ọ̀ pịrịmẹ.

³¹Tọn-a tomoni ḅo na so na ḅụ simemẹ, mịẹso ọkụma, Jizọs Ḅe na Oria ọḅụḍukoapụma na ini yefị sịkị nyanakẹ. Anị Ọ̀ nwọse ini ḅẹye-ẹ, “Ó ye wa sikima so wa ngẹrị simeḅịa nyọ nwọ mun, se ó kele ịnyọsara.”

³²Anị ini ngẹrị arụ ḅụkụlọ se pakaso gbọịn nyọ nwọ mun ye-ẹ.

³³Anị simeọkụ simeọkụ, tọn-a tomoni ini pakaso ọkụ mị nwọ ọrị se kirikiri ini nemimẹ; se ini ama mamgba ḅụ wẹrị paka se kiri ọgọnọ wẹrị mangị ini pẹlẹma se tatarị Jizọs Ḅe na Oria ọḅụḍukoapụma na ḅọrọ mun ini mun-arị nyọ mị lamẹ.

³⁴Jizọs Ḅe arụ mị ḅie koroḅo se mịn ḅaka tomonikpo mị ọrị sịkị, Ò kuḅiemgbọlụ ḅụ Ori opuma ini ḍikitịḅịfoinmẹ, anịatịḅị ḍikiḍikiḅọ oforika anana simeọkụ ini nwọ simemẹ. Anị Ọ̀ sakị tọn-aye nwọse ini ḍieye-ẹ.

³⁵Sịkị ḅo opuma mun sịkị, Oria ọḅụḍukoapụma Ọ̀ damaḅo se nwọ ḅẹmẹ, “Sịkị opuma ḅọrọsam, mịn nyọ mị pịkị gbọịn nyọ-ẹ.

³⁶Tomonima ḅẹ ini so, se kpeki ozuma na ịwọamama na nwọ mun se ini fịḅịaye nwọ fẹ inia ḅụma pịrị.

³⁷“Ómine ḅarana ini fịḅịaye nwọse ini pịrị,” Jizọs Ḅe nwọse ini pẹkẹrẹmẹ. Ini nwọ gbelamẹ, “Ị́ ḅi-ao wa pakamun seleḅa pẹkẹrẹ oyiasi laḅịa fịturu nwọ fẹ se ini pịrị?”

³⁸Anị Jizọs Ḅe ini gbelaye-ẹ, “Nde ọ́ nyana fịturu la ọkụ? Ó mun ḍiki.” Ini ḍọkịḅo ọrị sịkị, ini ḍuko Ọ̀ pịrịmẹ, “Sọnọ-a okpokpo na mama inji na-ẹ.”

³⁹Jizọs Ḅe anịsịkị ḍuko Oria ọḅụḍukoapụma pịrịmẹ na ini tomonima mịẹse ini inia ḅụma ḍiama, se kpokpo ḅụ wẹrị osueinma ọgọnọ kpọnjị sime.

⁴⁰Anị tomonima kpokpo ḅụ kpọnjị simeye-ẹ, sọnọasi ḅụ na mesi oyifịnjị ḅụ na.

⁴¹Anịsịkị mị Jizọs Ḅe Ò fịturu sọnọ-a okpokpoma na mama injima na nwọ ọkị, se Ori Ọ̀ tọrụ dekichịẹma so mị ḍikimẹ, se mịẹḅaka se Tamụnọ Ḅe ḅẹmẹ. Ò fịturu okpokpoma pu se àrị seni Oria ọḅụḍukoapụma pịrịmẹ, na ini àrị ḍie tomonima pịrị. Ọ̀ pịkị mama injima ḍie inimgba nwọ pịrịmẹ.

⁴²Simeḅọ simeḅọ fị ḅụlọ ḍụḅamamẹ.

⁴³Anịeso ọḅụḍukoapụma fịturu ma ḅụ kọn-aye na injima ḅụ kọn-aye na oyimaịn kana fịnjị nwọ tan ḅeinmamẹ.

⁴⁴Ini fịye se pịrị owuapụma ḅe kịẹnḅịpị anị kịnị oyimaịn ẹndẹ fịnjị na oyiasi nwọ lamẹ.

⁴⁵Anị kirikiri Jizọs Ḅe mịẹse Oria ọḅụḍukoapụma arụ mị ḅụkụlọmẹ, mịẹse ini tatarị mun Bẹtsaịda ḍapa mị ḅụ ísí pẹkẹrẹ mị nwọ laḅịa ḅara, se tomonikpo mị ḅẹmẹ na ini so-ẹ.

⁴⁶Ọ̀ ḅaḅa nwọse tomonima ḅẹ so sịkị, Ò so mun gbọrị chịngị ọgọnọ sime tẹkẹmẹ.

⁴⁷Saso ḅo lasịkị, arụ mị anị ḅo ḍapa mị ogboku lasam, anịsịkị ḅụ Jizọs Ḅe ngẹrị ngẹrị pa kiri ọgọnọ sime waraḅẹ.

⁴⁸Ori ọrịmẹ na oria ọḅụḍukoapụma ini arụ dọkụ tọrụsiọrịaḅẹ, anịatịḅị ini fọrụ tụḅụrụ nwọ dọkụsimemẹ. Mịn mị gose ḅaso ḅie sokịẹnye tẹrẹ-a so anịkanịka sonio-a so na pembe ḅiri ḅụ, Ò mengi mị ọgọnọ nwẹngị ini damaḅomẹ. Ori ini kọkọrọ ḅọrọ-ẹtọnmẹ,

⁴⁹ọkụma ini Ori ọrịmẹ Ò mengi mị ọgọnọ nwẹngịarị sịkị. “Anị ḍụẹịn-ẹ!” ini nwọ koromamẹ, se olokumẹ.

⁵⁰Inimgba inia ḅalafamẹ, ini Ori ọrị sịkị. Jizọs Ḅe Ori anịkirikiri ọkwẹịn ini pịrịmẹ, “Ọ́ kụrọ kuḅie nyana, Ị̀rị̀-ẹ. Ọ́ ḅalafa ma!”

⁵¹Anị Ori arụ mị ḅụkụlọ se ini na simeye-ẹ, se fọrụ mị yawụmẹ. Anị gbọtụḅara ọḅụḍukoapụma ḅụbuamamẹ,

⁵²anịatịḅị fịye se kịnị oyimaịn ẹndẹ fịnjị na oyiasi ma pịrị mị jokoma fieye mị, ma ini nwọ kaịnḅo kẹ; inia kuḅiema ineda anị ọlọḅo kẹ.

⁵³Ini ḍapa mị saḅa se ḅo Gẹnẹsarẹt ama mị lamẹ, ini arụ mị kpọ koroma nyọ mị.

⁵⁴Ini arụ mị ḅie koroḅo sịkị, tomonima kirikiri Jizọs Ḅe nwọ lekirimẹ.

⁵⁵Anị ini mangị bebe sẹ mị kelemaye-ẹ; se Ò simemẹ ini nwọ naa nyọ layelaye ini obikiri sime apụma ọkị ḅo Ọ̀ pịrịmẹ.

⁵⁶Se Jizọs Ḅe ò mun la nyọ la nyọ ịwọama-o, ama-o, anịkanịka ozuma ḅie sọnị tomoni, inia obiapụma nwọ ọkị fẹchiri ma mun mẹ se Ọ̀ tẹkẹaḅẹ na Ò ḅereni, jịnye ka sọ, obiapụma pa ḅara se Oria ḅụchụaye mị aka lama. Se ḅara se anị lama apụ mamgba inia ḅụ iḅimẹ.