Read kirikeni Mak 9 Bible Online

Mak 9 - kirikeni bible

Mak 9

¹Ọ̀ pịkị ọkwẹịnma mun se nwọ ḅẹmẹ, “À kọkọmaye nwọ ḍuko ọ́ pịrịaḅẹ, mịọ chịẹsimearị dapụ omi-ẹ, fị ẹka apụ, ọkịmun Tamụnọ Amanyanakiri mị kụrọ na ḅo ḅịa sịkị nwọ la.”

²Sonio-a ḍin ḅọrọ sịkị, Jizọs Ḅe Ò Pita ḅe na, Jems ḅe na, pịkị Jọn ḅe na nwọ ọkị Ọ̀ ḅụ chụa se ini na ngẹrị iwo gele tụndụ ọgọnọ mun mẹ. Ini ḍikiarị sịkị Jizọs Ḅe Ò ḍinmamẹ,

³se Oria ḅụchụaye mị pàmá ḅịamẹ—anị ḅịa tẹịn abalala nẹngịmẹ.

⁴Anịsịkị tẹrẹ-a ọḅụḍukoapụma ini Ịlaịja ḅe na Moziz ḅe na nwọ ọrịmẹ, Jizọs Ḅe na ọkwẹịn aḅẹ.

⁵Pita ḅe ọ̀ pụkọ deki ọkwẹịn se nwọse Jizọs Ḅe ḅẹmẹ, “Yeḍieḅọ anị iḅi ḅịa na wa mịọ omi-ẹ nwọ ḅẹ sịkị! Wa tẹrẹ-a ikowarị nwọ pike, gbọrịye sime ị́ pịrị, gbọrịye sime Moziz ḅe pịrị, gbọrịye pịkị sime Ịlaịja ḅe pịrị.”

⁶Ori na ísíapụma na inia ḅalafa so ọkụma ò ḍukoḅịaye sọnị ọ̀ ḅarị nemikẹ.

⁷Anịsịkị soḅuno tolupaka se ini gbẹịnmẹ, se pụkọ soḅuno mị ḅie wẹrị pakaḅomẹ, “Ḅe, ị̀ ḅụ yela Tọkụ Ḅe-ẹ—ómine Ò poki!”

⁸Ini nyọ mị ḍiki kelemamẹ, ọkụma ini jịn gbọrịḅọ sọnị ọrịkẹ; Jizọs Ḅe kẹngẹ mị ini na omiye-ẹ.

⁹Ini tụndụ mị ọgọnọ koroḅo sịkị, Jizọs Ḅe Ọ̀ tọn ini pịrịmẹ, “Ómine ọrịsaye ma ó ḍuko gbọrịḅọ sọnị pịrịma, ọkịmun Tomoniḅọ Tọkụ Ḅe fị ḅụ sịsẹḅịa sịkị la.”

¹⁰Ọ̀ tọn ini pịrị ḅara mị ini nwọ mịẹmẹ, ọkụma inia ogboku ḅụ ini ḅẹrẹ mị nwọ ḅẹlẹmamẹ, “Nde mị ‘fị ḅụ sịsẹ mị’ fiearịye?”

¹¹Se ini Jizọs Ḅe gbelamẹ, “Nde Oloko ḍieapụma gose ḅẹye na Ịlaịja ḅe tatarị ḅo ḅịa?”

¹²Ọ̀ nwọse ini pẹkẹrẹmẹ, “Ịlaịja ḅe ọ̀ kọkọma tatarị ḅo se yegoyegoye nwọ karakaramasam. Anị sọnị cheye gose Fịafịa ḍiri mị nwọ ḅẹ na, Tomoniḅọ Tọkụ Ḅe ori opuma tọrụsiọrịḅịa, na ini pịkị ọ̀ sịkịḅịa.

¹³Anị simeọkụ simeọkụ sọnị, à ḍuko ọ́ pịrịaḅẹ na Ịlaịja ḅe ò ḅo ḅọrọsam, na tomoni pịkị ini se ọ̀ mịẹḅịaye nwọse ọ̀ mịẹsam, Fịafịa ḍiri mị ọ̀ ḅụ ḍuko ḅọrọ sa ḅara ḅụ.”

¹⁴Ini mun kọn ọḅụḍukoapụma ḅụ sọ sịkị, ini anịnyọ ḅaka tomonikpo nwọ ọrịmẹ, ini Oloko ḍieapụma ḅe dapụ na ḅẹrẹjineaḅẹ

¹⁵Tomonima ini Jizọs Ḅe ọrị kirikiri, inia ḅụ opuma gbiripumẹ, se ini mangị Ọ̀ damamun se Ò kerenimẹ.

¹⁶Jizọs Ḅe Oria ọḅụḍukoapụma gbelamẹ, “Cheye ómine ini na nwọ jine-ao?”

¹⁷Tomonikpo mị ḅie sime gbọrị owuḅọ pẹkẹrẹmẹ, “Yeḍieḅọ, ị̀ya owutọkụ à nwọ ọkịḅo Ị́ pịrịmẹ, anịatịḅị sitẹmẹ ò ḅie omi-ẹ, ọ̀ pịkị ineda ọkwẹịnkẹ.

¹⁸Sitẹmẹ ḅe ori ọlọ sịkị goyegoye, ori ò se kiri gbinḅịa, ọkọkọ ọ̀ ḅịpị ḅie pịkị saraḅịa, ori aka farịḅịa, orimgba pịkị gagaḅịa. Àrị Ị́ya ọḅụḍukoapụma ḅara ḅimẹ na ini sitẹmẹ ḅe nwọ desin, ọkụma ini ineda kẹ.”

¹⁹Jizọs Ḅe nwọse ini ḅẹmẹ, “Ó ḅereni nyanaka laḅara ḍiki! Àrị ómine na sime mun nde sịkị nwọ laḅe? Àrị ómine gose inema nde sịkị laḅe? Ọ́ tọkụ ḅe ọkịḅo ọkọmụ!”

²⁰Ini ori ọkịḅo Jizọs Ḅe pịrịmẹ. Sitẹmẹ ḅe Jizọs Ḅe ọrị kirikiri, ọ̀ tọkụ ḅe jinemẹ, se tọkụ ḅe suma kiri gbin se ori mbimbilemẹ, se ọkọkọ pịkị ọ̀ ḅịpị ḅie saramẹ.

²¹“Che sịkị ngịsị ọ̀ mịn ḅara mị nwọ sime?” Jizọs Ḅe nwọse ḍawu ḅe gbelamẹ. “Ma ò boka sịkị ngịsị-ẹ,” ọ̀ nwọ pẹkẹrẹmẹ.

²²“Tọn-a sịkị, anị nwọse ọ̀ ḅaa ḍọkịsam, ò seni fịnị ḅie gbin na, pịkị mengi ḅie na. Wa ḍikiḅụgerere, se ḅarachụa wa pịrị Ị́ ineda anị mịẹḅịa ḅẹḅẹ!”

²³“Iin,” Jizọs Ḅe nwọ ḅẹmẹ, “Ị́rị́ na mịna ḅụ na ineda ḅịa ḅẹḅẹ! Yegoyegoye sarasara ḅereni nyana tomoniḅọ ḅe pịrịmẹ.”

²⁴Ḍawu ḅe be kirikiri olokumẹ, “À kọkọma ḅereni nyanamẹ, ọkụma anị bokẹ. Ḅarachụa ị̀ pịrị àrị anị nyana ḅakamatẹịn!”

²⁵Jizọs Ḅe Ọ̀ ḍọkịḅo ọrịmẹ na tomonikpo mị ḅo ini gbẹịn-eḅoaḅẹ nwọ ḅẹ sịkị, anị Ọ̀ tọn sitẹmẹ ḅe pịrịye-ẹ. “Ị́rị́ ḅeri na ḅịpị na iniki sitẹmẹ,” “à tọn ị́ pịrịaḅẹ, tọkụ ḅe ḅie pakaḅo, se ḅarị ngịsị jịn sịkị seni ò ḅie sọ ma!”

²⁶Sitẹmẹ ḅe olokumẹ, se si ḅara se tọkụ ḅe jine, se pakasomẹ. Tọkụ ḅe ọ̀ ḍụẹịn kịkẹmẹ, se nwenimgba nwọ ḅẹmẹ, “Ọ̀ fịsam!”

²⁷Ọkụma Jizọs Ḅe ḅara ḅụ ori ọlọ se ò dekichịẹmamẹ se ọ̀ sịsẹ chịẹmẹ.

²⁸Jizọs Ḅe ḅo warị mị ḅie sọ sịkị, Oria ọḅụḍukoapụma ḅọịma Ò gbelamẹ, “Cheye mịẹse wa ineda sitẹmẹ ḅe depakụmaka?”

²⁹Jizọs Ḅe pẹkẹrẹmẹ, “Tẹkẹ kẹngẹ mị ineda mị ḅara mị simeye nwọ depakụmaḅịaye-ẹ. Ineda anị mịẹḅịa jịnye ofori-ẹ.”

³⁰Jizọs Ḅe na Oria ọḅụḍukoapụma na anịnyọ koromaso se Galili mị ḅie toluḅọrọ somẹ. Jizọs Ḅe Ò ḅikẹ gbọrịḅọ sọnị Ò sime nyọ nwọ nemi,

³¹anịatịḅị Ò ye seni Oria ọḅụḍukoapụma ḍie simemẹ na: “Ini Tomoniḅọ Tọkụ Ḅe nwọ ḅọrọma seni Ọ̀ ḅaaḅịa apụ nwọ pịrịḅịa. Anị simeọkụ simeọkụ sọnị, tẹrẹ-a ḍin ḅọrọ sịkị Ọ̀ sịsẹ se ḍumoḅịa.”

³²Ọkụma mị ḍieye mị fiearịye ini kaịnḅokẹ, inia ḅalafamẹ anịse Ò gbela.

³³Ini Kapanịọm nwọ ḅomẹ, se ini warị ḅie sọ sịkị Jizọs Ḅe Oria ọḅụḍukoapụma gbelamẹ, “cheye ọ́ nwọ jinea sime ateliogbo?”

³⁴Ọkụma ini Ọ̀ pẹkẹrẹ ḍụkụkẹ anịatịḅị ini ateliogbo inia ogboku opusọtẹịnḅọ nwọ jinea simemẹ.

³⁵Jizọs Ḅe Ọ̀ kpọnjị sime, se oyimaịn ọḅụḍukoapụ fịnjịma nwọ chịnmẹ, se nwọse ini ḅẹmẹ, “Tatarịḅọ nwọ sọ ḅiḅọ goyegoye, kuluma nyọ ḅụ iniḅọ mịnaḅụ se koromaḅịa, se pịkị fịrịnwẹngịḅọ sọ nwenimgba pịrịḅịa.”

³⁶Se anị Ò gbọrị tọkụ nwọ ọkị, se ò seni inia tọrọkọ chịẹmaye-ẹ. Anịsịkị Ori Ọ̀ ḅarama nwọse oria ọgọnọ gbana, se nwọse ini ḅẹmẹ,

³⁷“Ị̀ya ẹrẹ ḅụ mịna awọmẹnịma ḅie gbọrịḅọ nwọ ọkịḅọ goyegoye, ị̀ ọkịmẹ; se ị̀ ọkịḅọ goyegoye, ị̀rị̀ kẹngẹ nwọ ọkịkẹ, ọkụma pịkị ị̀ se fịrịmaḅọ ḅe sọnị nwọ ọkịmẹ.”

³⁸Jọn ḅe nwọse Ọ̀ ḅẹmẹ, “Yeḍieḅọ, ị́ya ẹrẹ ḅụ sitẹmẹ desin àrị gbọrị owuḅọ wa nwọ ọrịmẹ, se wa ḍuko ọ̀ pịrịmẹ na ọ̀ ḅarị ọkọ mịẹ ma, anịatịḅị ọ̀ mịna ogbo ḅie ofori-ẹ.”

³⁹Jizọs Ḅe nwọ ḅẹmẹ, “Ómine ò kikima, anịatịḅị ị̀ya ẹrẹ nwọse ḅụgbiripuma fịrịnwẹngịḅọ ineda anị mị nwọ mịẹ so kirikiri ị̀ ḅụ siaye ḍuko ẹkẹ.

⁴⁰Anịatịḅị mine na tụḅụrụka ḅọ goyegoye iniḅọ mịnaḅụ omi-ẹ.

⁴¹Kọkọmaye ḅụ, à ḍuko ọ́ pịrịaḅẹ na ó sime ị̀ pịrịmẹ gose mengi kalaye nwọse ọ́ pịrị se ó ḅu ḅọ goyegoye iniḅọ gbẹịnye nwọ nyanaḅịa.

⁴²“Mịna kala awọmẹnịma mịẹse inia ḅie gbọrịḅọ nemikase ị̀ ḅụ ḅụ ḅereni nyana ḅụ tọmbụlọmẹ nwọ ḅẹḅẹ, ḍụparị se oriḅọ ḅe kọngọ kpọ se ò seni tọrụ ogbo gbin wokuma iḅitẹịnmẹ.

⁴³Anị gose, ị́ ḅara nemikase ị́ mịẹse ị́ya ḅereni ḅụ ị́ ḅịkịḅịa ḅẹḅẹ, anị pẹlẹsin! Se ikeli ḅụ ḍumo ḅie sọ mị iḅitẹịn mama ḅarama nyana se mun kọrịfịnị mị ḅie sọ mị nẹngịmẹ, ngịsị bin ẹka fịnị mị.

⁴⁴(Anịnyọ arịa akakaraḅa ma fịfịkẹ, fịnị mị sọnị pịkị bin binkẹ.)

⁴⁵Pịkị ị́ya gbọrị ḅụọ ị́ mịẹse ị́ya ḅereni ḅụ ị́ ḅịkịḅịa ḅẹḅẹ, anị pẹlẹsin! Se ikeli ḅụ ḍumo ḅie sọ mị iḅitẹịn se mama ḅụọma nyana se ini ị́ se kọrịfịnị mị ḅie gbin chu mị nẹngịmẹ.

⁴⁶(Anịnyọ arịa akakaraḅa ma fịfịkẹ, fịnị mị sọnị pịkị bin binkẹ.)

⁴⁷Ị́ya gbọrị tọrụmgbọlụ ị́ mịẹse ị́ya ḅereni ḅụ ị́ ḅịkịḅịa ḅẹḅẹ, anị sọkịsin! Anị iḅitẹịn mama tọrụmgbọlụ ị́ ḅụ sime se ini ị́ deki kọrị fịnị mị ḅie gbin mị nẹngịmẹ.

⁴⁸(Anịnyọ arịa akakaraḅa ma fịfịkẹ, fịnị mị sọnị pịkị bin binkẹ.)

⁴⁹“Tomoniḅọ goyegoye fịnị mị ini se iniḅọ mịẹ kpaịnmaḅịaye-ẹ, anị fụn mị agba mịẹ kpaịnma ḅara mị.

⁵⁰“Fụn mị iḅimẹ, ọkụma anị ḅọrọ nemikase anịa ḅẹlẹ mị fama ọkụma, nde ị́ anị mịẹse anị ḅo fụn pụkọ sọḅịa ọkụ? “Ọ́mịna ḅie, ọ́ fụn nyana se deinma ḅụ jịnḅọ jịnḅọ na anga.”