Read kirikeni Luk 11 Bible Online

Luk 11 - kirikeni bible

Luk 11

¹Gbọrị sịkị Jizọs Ḅe gbọrị anga tẹkẹ simemẹ. Ọ̀ tẹkẹ so sịkị, Oria ọḅụḍukoapụma ḅie gbọrịḅọ nwọse Ọ̀ ḅẹmẹ, “Nyanaḅọ, tẹkẹ ọkụ se wa ḍie, Jọn ḅe seni oria ọḅụḍukoapụma ḍie ḅara mị.”

²Jizọs Ḅe nwọse ini ḅẹmẹ, “Ọ́ tẹkẹḅịa sịkị ọ́ nwọ ḅẹ! ‘Ḍaḅọ: Ye ị́ya ẹrẹ mị osiḅụ sime; ye ị́ya Amanyanakiri mị ḅo.

³Ene ḅene ḅene ḅe fịye se wa pịrị.

⁴Mịna sima ḅụḅarasin wa pịrị, anịatịḅị wa ḅarasin mine mịẹirima ḅọ goyegoye pịrịpịrịmẹ. Pịkị ḅerenima se wa mun telima ḅie sọ.’”

⁵Se Jizọs Ḅe nwọse Oria ọḅụḍukoapụma ḅẹmẹ, “Nemikase ọ́mịna ḅie gbọrịḅọ ḍin ogbo se iniḅọ ikiaḅọ warị mun se nwọse ọ̀ ḅẹ, ‘Ị̀ nikio, kele fịturu tẹrẹ-a okpokpo se ị̀ ḅọlọ.

⁶Ị̀ inikio gbọrịḅọ ḅọlọju simeḅọ ḅo ị̀ya warị bịanmẹ, à se ọ̀ pịrịḅịa fịye à nyanakẹ!’

⁷Se ị́ nikio ḅe nemikase warị ḅieju sime ị́ pẹkẹrẹ na, ‘Ị̀ ḅụfụkamama! Ḅọkọ mị palịsam, ị̀ya awọma na ị̀rị̀ na wa mọnọsam, àrị ineda sịsẹ ḅo gbọrịye sọnị se ị́ pịrị-ẹkẹ.’

⁸Iḅimẹ, anịọkụma cheye pakaḅe? À ḍuko ọ́ pịrịaḅẹ na, ị́rị́ ori ikiaḅọ-ẹ gose ọ̀ sịsẹ ḅo fịturu mị se ị́ pịrị-ẹkẹ nwọ ḅẹ sọnị, ọ̀ pa sịsẹ ḅọ ị́ ḅụpalịmaye layelaye se ị́ pịrịḅịa, anịatịḅị ị́ ḅụgerereka ḅụ pa ọ̀ ḅara ḅiarịye gose.

⁹Anịẹrẹchị à ḍuko ọ́ pịrịaḅẹ: Ḅi, ọ́ nyana ḅo ḅịa, ḍọkị, ómine ọrịḅịa, gbolo, ḅọkọ mị pịkị finji ọ́ pịrịḅịa.

¹⁰Anịatịḅị ḅi ḅọ goyegoye nyana ḅoḅịa, ḍọkịḅọ ḅe pịkị ọrịḅịa, ḅọkọ mị pịkị finji gboloarịḅọ ḅe pịrịḅịa.

¹¹Ómine ḍapụma ḅụ ḅereni se oruwu se iniḅọ owutọkụ pịrịḅịa ḅọ omi, iniḅọ inji ḅi sịkị?

¹²Anịkanịka ị́ pirikambulo seni ọ̀ pịrị ḅe ori anyị ḅi sịkị?

¹³Ó si laḅara laḅara, ómine iḅiaye se ọ́mịna awọma pịrịḅịa ọkụ ọ́ nwọ nemimẹ. Nde anị mị nẹngịma ḅara soḅie Ḍaḅọ Ḅe nwọse Ọ̀ ḅara Fịafịa Tẹmẹ Ḅe ḅi apụma nwọ pịrị-ẹka ọkụ!”

¹⁴Jizọs Ḅe ineda ọkwẹịnka sitẹmẹ nwọ depakụma simemẹ; sitẹmẹ ḅe pakaso sịkị, tomoniḅọ ḅe sakị ọkwẹịnmẹ. Anị ijira se tomonikpo mị ḅụ saramẹ,

¹⁵ọkụma tomonima ḅe dapụ nwọ ḅẹmẹ, “Bẹlzibọl, si-a-tẹmẹma ḅe tịḅịnịḅọ ḅe mị kụrọ se Ọ̀ pịrị se Ò seni àrị depakụmaye-ẹ.”

¹⁶Dapụ ḍẹịntu Jizọs Ḅe pịrị ḅimẹ, anị ini Ọ̀ ḅara ḅiye-ẹ na Ọ̀ ḅụgbiripumaye mịẹ se ḍiepakụma na Tamụnọ Ḅe Ọ̀ mịẹaye ma nwọ ḅereni Ọ̀ pịrịmẹ.

¹⁷Ọkụma Jizọs Ḅe inia koromama nemi se nwọ seni ini ḅẹmẹ, “Mịnaḅụ se pẹkẹrẹ pẹkẹrẹ pu se mama pẹkẹrẹ ma jịnye jịnye na owusọ ama layelaye sime ḅọlọ sịkị la-ẹkẹ; mịnaḅụ pu sikima sa furo pịkị ḅịkị sikimaḅịa.

¹⁸Oru ḅe amanyanakiri nemikase pua, se jịnye jịnye na owusọmẹ ḅẹ ọkụma, nde anị ineda sime ḅọlọsịkị laḅịa ọkụ? Ọ́ nwọ ḅẹmẹ na à si-a-tẹmẹma nwọ depakụmamẹ anịatịḅị Bẹlzibọl ḅe mị ọkọ sime kụrọ se ị̀ pịrịye-ẹ.

¹⁹À ḅọrọ nemikase Bẹlzibọl nwọse si-a-tẹmẹma depakụmamẹ nwọ ḅẹ ọkụma, ómine ḍukonwẹngịapụma cheye ini nwọse àrị depakụma? Anịẹrẹchị ini vinpịkị ḅẹrẹkọn ọ́ pịrịḅịa na ó ḍuko ọkụ mị anị ọkọ pakakẹ!

²⁰Anịkẹ, anịnakaraka Tamụnọ Ḅe kụrọ ḅụ re, mị à seni si-a-tẹmẹma depakụmaye-ẹ, anị mị ḍiepakụmamẹ na Tamụnọ Amanyanakiri mị anị kọkọma ọ́ damaḅosam.

²¹“Kụrọḅọ ḅe oria owuni ayema nwọ karakarama oria warị koruarị sịkị, oria yemamgba àrị kokomẹ.

²²Ọkụma kụrọ ọ̀ nẹngịḅọ owu seni ọ̀ paka, se ọ̀ nẹngịmamẹ ḅẹḅẹ, ye nyana ḅọ ḅe kuḅie se ḅụgbana owuniaye mamgba ò deki soḅịa, se mun ori ọ̀ fọịn ayema ḍia ọkịḅịa.

²³“Sime ị̀ pịrịkaḅọ goyegoye iniḅọ kọkọma ị̀rị̀ na tụḅụrụmẹ; ḅarachụa ị̀rị̀ na koḅirikaḅọ goyegoye iniḅọ kọkọma galagalamaḅẹ.

²⁴“Sitẹmẹ ḅe tomoniḅọ ḅe ḅie pakaso sịkị ò so mun kpoinkpoin kiri ḅụ nwẹngịma ḅọrọ, sime ịnyọsaraḅịa nyọ ḍọkịmẹ. Ori ineda ḍọkịḅo nyọ ofori-ẹ ḅẹḅẹ, ọ̀ nwọse mịnaḅụ ḅẹḅịa, ‘À vinpịkị à koromaso ị̀ya warị mị munḅịa.’

²⁵Anị ò vinpịkị mun ye-ẹ, se ḍọkịḅo mẹ na warị mị fịafịa waraḅẹ, yemamgba pịkị ọrụtọnma sime waraḅẹ.

²⁶Anịsịkị ọ̀ pịkị so mun si ọ̀ nẹngị jịn sọnọma tẹmẹ nwọ ọkị ọ̀ ḅụ chụamẹ, se àrị ḅo anịnyọ sọ angamẹ. Anịḅe kuluma ori ḅe ḍumo mị anị pịkịḅo sitẹịn tatarị ḅara mị nẹngịḅịa.”

²⁷Jizọs Ḅe mịn mị nwọ ḍuko so sịkị, gbọrị eremeniḅọ tomonikpo mị ḅie pụkọ deki ọkwẹịn se nwọ ḅẹmẹ, “Ị́ yi se ị́ ḍikiḍiki pakụmaḅo eremeniḅọ ma nyana ḅieḅẹlẹ la-ọkụ ḍiki!”

²⁸Ọkụma Jizọs Ḅe pẹkẹrẹmẹ, “Anịnakaraka, Tamụnọ ọkwẹịn mị naa, se anị ḍukoye mịẹapụma nyanaḅịa ḅieḅẹlẹ la-ọkụ ḍiki!”

²⁹Tomonima koḅirima Jizọs Ḅe gbori kelema sịkị, Ori ọkwẹịnma mun se nwọ ḅẹmẹ, “Mịmgba ene mị ḅe-a tomonima si laḅara ḍiki! Ini ḅụgbiripumaye ḅimẹ, ọkụma se ini pịrịḅịaye ofori-ẹ Jona ḅụgbiripumaye mị sikima ọkụma.

³⁰Ịkịankoro Jona ḅe elekima sọ Ninivẹ apụma pịrị ḅara mị, anị Tomoniḅọ Tọkụ Ḅe pịkị elekima sọ mị ḅụọ ḅe apụma pịrịḅịa ọkụ-ẹ.

³¹Ḅẹrẹkọn Ene mị ḅụ, Shiba Amanyanaḅọ ma chịẹsime ye ḍuko mị ḅụọ ḅe apụma tịḅị sẹịnḅịa, anịatịḅị árịa ama ngịsị á ḅo Amanyanaḅọ Sọlọmọn ḅe nemi mị ḅe ḍieye nwọ poki-ẹ ḅomẹ, se à ḍuko ọ́ pịrịaḅẹ na mịanga opusọ Sọlọmọn ḅe nẹngịḅọ omi-ẹ.

³²Ḅẹrẹkọn Ene mị ḅụ, Ninivẹ apụma ini chịẹsime ye ḍuko ọ́mịna tịḅị sẹịnḅịa, anịatịḅị ini inia sima ḅụ vinpịkịmẹ, ini Jona ḅe ḍuko Tamụnọ ḅẹrẹ mị naa sịkị se à kọkọmaye ḍuko ọ́ pịrịaḅẹ na opusọ Jona ḅe nẹngịḅọ mịanga omi-ẹ!”

³³“Gbọrịḅọ sọnị tọnjie chụa se anị seni ḅọị, anịkanịka bọlị se anị gbẹịn ẹkẹ, anịnakaraka ori anị se tọnjie gbanaye ọgọnọ gbanaḅịa, mịẹse tomoni sọḅoarị sịkị ini anị se tọrụ ọrịmaḅịa ḅara.

³⁴Ọ́mịna tọrụmgbọlụma àrị tọnjie sọ ọ́mịna oju mị pịrịmẹ. Ọ́mịna tọrụmgbọlụma ma obika sịkị, ọ́mịna bebe oju mị enekuḅu anị na ḅeinmẹ, ọkụma ọ́mịna tọrụmgbọlụma ḅarị iḅika sịkị, ọ́mịna bebe oju mị mgba kanakana ḅie simeḅịa.

³⁵Anịẹrẹchị, ọ́ ḍọkịḅo ọrị na ọ́mịna ḅie sime enekuḅu mị kanakanakẹ.

³⁶Anịsịkị, ị́ya bebe oju mị mgba enekuḅu na ḅeinmẹ ḅẹḅẹ, anịa ḅụ gbọrị pẹkẹrẹ sọnị kanakana ḅie ofori-ẹ ḅẹḅẹ, anị ḅịa ị́ kelemaḅịa, anị tọnjie ḅịa ị́ sarama sịkị anị simeḅịa ọkụ mị.”

³⁷Jizọs Ḅe ọkwẹịn so sịkị, gbọrị Farisiḅọ Ọ̀ chịnmẹ na Ò ḅo ori na yefị-ẹ, anị Ò so mun kpọnjị simeye-ẹ ye mị fịḅịa ẹrẹchị.

³⁸Anị Farisiḅọ ḅe ḅụgbiripumamẹ ori ọrị na Jizọs Ḅe ḅara sịkịrịka ḅụ yefịaḅẹ nwọḅẹye mị.

³⁹Anị Nyanaḅọ Ḅe nwọse ọ̀ ḅẹye-ẹ, “Anịọkụma mịọkụ, ómine Farisiapụma ọmọngọ na ẹfẹrẹ na ọḅụ nwọ sịkịrị fịafịamamẹ, ọkụma kụrọ kụrọ mịẹaye na simịẹmịẹaye na ó ḅie ḅeinmẹ.

⁴⁰Oḅoriapụ! Nwọ ọḅụ mị tẹmẹ Tamụnọ Ḅe anị pịkị ḅie mị tẹmẹḅọ Ḅe orika?

⁴¹Ọkụma ómine ọ́mịna ọmọngọma na ẹfẹrẹma na ḅie sime ayema nwọse igwein apụma pịrị, anịsịkị yelayelaye pịkị tẹmẹ ḅụ fịafịa ọ́ pịrịḅịa.

⁴²“Anị ḅalafamaye sọ ọ́ pịrị ọkụ ḍiki, ómine Farisiapụma! Ọ́ kụnụ yechụọ ịnyanya layelaye ḅụ oyi-a kiri ḅe gbọrị kiri se Tamụnọ Ḅe pịrịaḅẹ, kụnụḍiri na olubu kịkẹ ịnyanya ma na, ọkụma ḅẹrẹ karakaraye na ḅẹlẹma na ọ́ nwọ ḍikitọrụsinmẹ Tamụnọ Ḅe ḅụ. Mayema anị ọ́ mịẹ gbẹịnye-ẹ, ísí ayema nwọ ḍikitọrụsinka ḅụ.

⁴³“Anị ḅalafamaye sọ ọ́ pịrị ọkụ ḍiki ómine Farisiapụ! Tẹkẹwarịma ḅie ini se sosikima koroma simearịyema ọ́ nwọ ḅẹlẹmamẹ, pịkị fẹchirima ḅie iḅiḅara se ó kereni ọ́ nwọ ḅẹlẹmamẹ.

⁴⁴Anị ḅalafamaye sọ ọ́ pịrị ọkụ ḍiki! Elekima chụaka iḍupu simeọkụ ọ́ nwọ simemẹ, se tomoni nemika ḅụ nangama ḅọrọarịyema.”

⁴⁵Oloko mị ḍiearị apụma ḅie gbọrịḅọ nwọse Ọ̀ ḅẹmẹ, “Yeḍieḅọ, ị́ ọkọ ḅẹ ọkụma, mine sọnị ị́ wa wọlọaḅẹ!”

⁴⁶Jizọs Ḅe pẹkẹrẹmẹ, “Anị pịkị ḅalafamaye nwọsọ ómine Oloko ḍieapụma pịrị ọkụ ḍiki! Iku-a pụraye ọ́ nwọse tomonima ọgọnọ gbanamẹ, ọkụma ómine na mịnaḅụ na ó ḅereni se gbọrị ḅaratụmgbalị kẹngẹ sọnị pakụma se ḅarachụa iku ayema pụra ḍụkụkẹ.

⁴⁷Anị ḅalafamaye sọ ọ́ pịrị ọkụ ḍiki! Ómine iḅi iḍupu mịẹ ịkịankoroapụma pịrịmẹ, ọ́mịna opu-aḍapụma nini ịkịankoroapụma.

⁴⁸Ómine na mịnaḅụ na ḅereni ọkịmẹ na, ọ́mịna opu-aḍapụma mịẹye mị ọ́ ḅụḅẹlẹmẹ anịatịḅị ini ịkịankoroapụma nwọ ninimẹ, se ómine inia iḍupuma namamẹ.

⁴⁹Mịn mị ẹrẹchị Tamụnọ Ḅe Nemi mị nwọ ḅẹmẹ, ‘Àrị ịkịankoroapụ na okunwẹngịapụ na se ini fịrịmaḅịa ini inia ḅụ ḅe dapụ nwọ ḅaaḅịa se ísí apụma tọrụsiọrịmaḅịa.’

⁵⁰Anịẹrẹchị ini ḅụfụka se mịn ḅụọ ḅe apụma pịrịḅịa, tomonikiri mị tẹmẹ sịkị ngịsị ini ḅaasa ịkịankoroapụma gose,

⁵¹Ebẹl ḅe ini nwọ nini sịkị mị ḅụ ọkịmun ini Zẹkaraya ḅe nini sịkị mị la, ini agbamịẹ ẹbẹ mị na Fịafịa Nyọ mị na ḅe ogboku ḅụ ḅaa ḅọ ḅe. Iin, à ḍuko ọ́ pịrịaḅẹ, na ini ḅụfụka se mịn ḅụọ ḅe apụma pịrịḅịa inimgba tịḅị gose!

⁵²“Anị ḅalafamaye sọ ọ́ pịrị ọkụ ḍiki Oloko ḍieapụ! Nemi ḍawọḅịa warịḅọkọ mị finjiḅịa sambị mị ọ́ ḅara omi-ẹ; ómine ọ́ sọmun ḍụkụkẹ, ọ́ pịkị ḅụkụrọma sọmun ḍọkịapụma kikimẹ!”

⁵³Jizọs Ḅe anịanga mị koroma so sịkị, Oloko ḍieapụma na Farisiapụma na iḅiọkụma Ò ḍuko simamẹ se ḅẹrẹ se tọn aye ḅụ Ò gbelamẹ,

⁵⁴ḍẹịntu Ọ̀ pịrịaḅẹ, ọkwẹịn irima ḅụ wẹrị Ori ọlọḅịa ḅara.