Read kirikeni Luk 12 Bible Online

Luk 12 - kirikeni bible

Luk 12

¹Kịnị-a mẹndẹ oyiasi fịnjị fịnjị ḅe tọn apụ koḅirimamẹ, anịẹrẹchị ini jịnḅọ jịnḅọ nangaḅẹ, Jizọs Ḅe tatarị nwọse Oria ọḅụḍukoapụma ḅẹmẹ, “Ọ́ Farisiapụma ḅe fịturu sumaye mị ḅụ ọ́ ḅụ ọbị, à fiearịye anị inia epekelepepe mịẹmịẹye mị-ẹ.

²Gbẹịn koromaye layelaye ini finji koromaḅịa, ḅọịye layelaye ini pịkị nwọ mịẹse ini anị nemiḅịa.

³Anịọkụma, kanakana ḅie ó ḍukoye layelaye, ini enekaka fịafịa ogbo anị naaḅịa, ọ́ pịkị ḅọkọ palị se jukuru ḅie sime ḅeri ḅie miniminima ọkwẹịnḅịa yelayelaye ini nwọse warị ochuma ọgọnọ olokupakụmaḅịa.

⁴“À ḍuko ọ́ pịrịaḅẹ, ị̀ya ikiapụ, ómine ini ḍikiḅalafama, nwọ oju mị ḅaa so ọkụma, ḅarị ineda sitẹịn anị nẹngịye mịẹka apụma.

⁵Ó ḍikiḅalafaḅịa ḅọ à nwọse ó ḍieḅịa; Ọ́ Tamụnọ Ḅe ḍikiḅalafa, anị oju mị ḅaa so, kụrọ nyana pịkị tẹmẹ mị se kọrịfịnị mị ḅie gbin chuḅịaḅọ Ḅe. Iin, à ḍuko ọ́ pịrịaḅẹ, ómine Ò ḍikiḅalafa!

⁶“Ini kọkọ sọnọ-a tịḅịpẹlẹḍụẹịn nwọse mama kọbọ dẹrị dẹrị? Anịẹḅẹsọ Tamụnọ Ḅe arịa ḅụ gbọrịye sọnị Ò se ḅieḅaramakẹ.

⁷Ọ́mịna tịḅị inimema sọnị ini àrị kịẹnsam. Anịẹrẹchị ọ́ ḅalafama; ọ́ ḅakama yelatẹịn tọn-a tịḅịpẹlẹḍụẹịn nẹngịmẹ!

⁸“À ḍuko ọ́ pịrịaḅẹ na tomoni ogboku ḅụ, ḍukopakụma na iniḅọ sime ị̀ pịrịmẹ nwọḅẹ ḅọ goyegoye, Tomoniḅọ Tọkụ Ḅe pịkị anị gbọrịye mị mịẹ iniḅọ pịrịḅịa Tamụnọ enjẹlapụma tọrọkọ.

⁹Ọkụma tomoni ogboku ḅụ ị̀ sịkịḅọ goyegoye, Tomoniḅọ Tọkụ Ḅe sọnị pịkị iniḅọ sịkịḅịa Tamụnọ enjẹlapụma tọrọkọ.

¹⁰“Tomoniḅọ Tọkụ Ḅe ḅụ siye ọkwẹịnḅọ goyegoye ini ineda ḅarasin iniḅọ pịrịḅịa, ọkụma Fịafịa Tẹmẹ Ḅe ḅụ siye ḍukoḅọ goyegoye ini ḅarasin iniḅọ pịrị ẹkẹ.

¹¹“Ini ómine ọkịḅo tẹkẹwarịma ḅie ḅẹrẹkọn ọ́ pịrịḅịa sịkị, anịkanịka gọvịnapụ tọrọkọ ḅụ, anịkanịka ḅẹrẹtọn apụ tọrọkọ ḅụ, ómine ọ́mịnaḅụ ḍụaḅịa ḅara gose ḅụḅalaḅala nyana ma, anịkanịka ó ḍukoḅịaye gose.

¹²Anịatịḅị Fịafịa Tẹmẹ Ḅe anịsịkị mị ḅụ ó ḍuko gbẹịnye nwọse ó ḍieḅịa.”

¹³Tomonikpo mị ḅie sime gbọrị owuḅọ nwọse Jizọs Ḅe ḅẹmẹ, “Yeḍieḅọ, ḍuko ị̀ mbire ḅe pịrị se ọ̀ mịna ḍaḅe koroma so wa pịrịayema nwọ se ị̀rị̀ na ḍia.”

¹⁴Jizọs Ḅe ọ̀ pẹkẹrẹmẹ, “Owuḅọ, tụḅọ ḅẹrẹkọn kụrọ se ị̀ pịrị, anịkanịka se ye ḍie ómine mama apụma pịrị-ẹ?”

¹⁵Se Ori ọkwẹịnma mun, se ḍuko inimgba nwọ pịrịmẹ, “Ómine ọ́ ḅụ ọbị ye ḍikipụkọsoli ḅụ, anịatịḅị tomoniḅọ kọkọma ḍumo mị anị iniḅọ nyanaye ḅụ sẹrẹrẹkẹ, iniḅọ ngọ kọn la-ọkụ la-ọkụ sọnị.”

¹⁶Anịsịkị Jizọs Ḅe mị kaḅo mị kọn ini pịrịmẹ: “Gbọrị ngọ kọnḅọ ozu nyanamẹ, iḅiọkụ fịye pakụmaye.

¹⁷Ọ̀ sakị koroma nyana ọ̀ ḅụ pịrịmẹ, ‘Ị̀ya fịye mamgba kokoḅịa nyọ à nyanakẹ. Nde àrị ineda mịẹḅịaye?

¹⁸Mịn à mịẹḅịaye-ẹ,’ ọ̀ nwọse ḅịpị se ọ̀ ḅụ fiemamẹ; ‘Àrị ị̀ya fịye koko warịma kansaraḅịa, se ḍụḅatẹịn aye namaḅịa, anị àrị ị̀ya ịpịamgbama na pịkị à nyana jịn-a ngọ na se kokoḅịa nyọ.

¹⁹Anịsịkị à nwọse ị̀ ḅụ ḅẹḅịa, Fụḅara iḅiḅọ! Tọn-a kụra ḅụ ị́ ḅụpalịmaḅịa iḅiaye ị́ nwọ nyanasam. Sarasara ḅara se ḍumo ọkị, fị, ḅu, se pịkị ị́ ḅụ tima!’

²⁰Ọkụma Tamụnọ Ḅe nwọse ọ̀ ḅẹmẹ, ‘Ị́rị́ yenemikaḅọ! Mịn gbọrị ḍin mị ḅie ị́ ḍumo mị ini nwọ ọkịḅịa anịsịkị tụḅọ maye mamgba nyana ḅe, ị́ se wẹrị ị́ ḅụ pịrị ayema?’”

²¹Se Jizọs Ḅe ḍukopẹlẹmẹ, “Mịn ḅara mị anị sime ngọ kpokponima inia ḅụ ma wẹrịma apụma nwọ pịrịḅịa ọkụ-ẹ, ọkụma Tamụnọ Ḅe tọrụkuḅu ini ngọ nyanakẹ.”

²²Anịsịkị Jizọs Ḅe nwọse ọḅụḍukoapụma ḅẹmẹ, “Anị gose à ḍuko ọ́ pịrịaḅẹ, na ómine ọ́ fị se ḍumoḅịa fịye gose ḅalaḅalama, anịkanịka oju ḅụ ọ́ chụaḅịa aye gose.

²³Ḍumo mị opu ma yesọtẹịn fịye nẹngịmẹ, oju mị pịkị opuma yesọtẹịn chụaḅịa aye nẹngịmẹ.

²⁴Tịḅịpẹlẹḍụẹịnma ḍiki: àrị chịnmgbọlụ ḍipikẹ, pịkị fịye sokukẹ, àrị fịye koko warị nyanakẹ; Tamụnọ Ḅe àrị kokoaḅẹ! Ómine opuma yelatẹịn fenima nẹngịmẹ!

²⁵Ọ́mịna ḅụ tụḅọ ineda boka kụra nwọse iniḅọ ḍumo ḅụ ḅarị ḅe, iniḅọ anị gose ḅalaḅalamẹ nwọḅẹ ye gose?

²⁶Ómine ineda ọkọ sime kalaye nwọ mịẹ ẹka ọkụma, nde ó gose ísíayema gose kpalakpalarịye?

²⁷Tomoni ḍipika ngwengwema sẹnịarị ọkụ ḍiki: àrị fịrịnwẹngịkẹ, pịkị ḅiriaye nwọ mịẹ arịa ḅụ ma pịrịkẹ. Ọkụma à ḍuko ọ́ pịrịaḅẹ na Amanyanaḅọ Sọlọmọn ḅe sọnị, ori ngọ nyana laḅara mị ḅụ, ò ye ḅiri ngwengwema ḅụ ḅe gbọrịye na gbasịkẹ,

²⁸Tamụnọ Ḅe mị nweni ḍipika osueinma nwọ ḅirimaye-ẹ, mịmgba sime, ḅa ḅarị sime ẹka osueinma, ini se ye fọị fịnị ḅie dọkịmasinḅịaye ma. Ori anị ḅara mị nẹngịma ḅara nwọse ó ḅirimaẹka? Ọ́ nyana ḅereni boka la-ọkụ ḍiki!

²⁹“Anịẹrẹchị ómine opu koroma kọnma, sịkịmamgba ọ́ fịḅịaye na, ó ḅuḅịaye ma gose ọ́ ḅụḅalaḅala nyanama.

³⁰Mịn tomonikiri mị ḅe oru nemi apụma sịkịmamgba mayema gose ḅụḅalaḅala se inia ḅụ pịrịpịrịmẹ, ọ́mịna Ḍaḅọ Ḅe Ò nemimẹ na mayema ọ́mịna ḅụ palịmamẹ.

³¹Anịnakaraka ómine Oria Amanyanakiri mị gose kpalakpala se Ọ̀ mayema nwọse chụa ọ́ pịrịḅịa.”

³²“Kala anana ogbo, ọ́ ḅalafama anịatịḅị anị ọ́mịna Ḍaḅe ḅụḅẹlẹmẹ Amanyanakiri mị nwọse ọ́ pịrị.

³³Ọ́ nyana aye mamgba ọ́ nwọ dẹrị, se anịḅe igbiki se igwein apụma pịrị. Olomu ẹka igbiki chụa akpa ọ́ nwọ nyana ọ́ ḅụ pịrị, se ọ́mịna ngọma nwọse soḅie koko, arịa ḅụ yeso ẹka nyọ mị, anịatịḅị anịnyọ ineda mun àrị laḅịa furuḅọ ofori-ẹ, akakaraḅa pịkị ineda àrị pẹị ẹkẹ.

³⁴Anịatịḅị ị́ kuḅiemgbọlụ sịkịmamgba ị́ya ngọma sime nyọ ḅụ simeḅịa.”

³⁵“Ḅoḅịa yelayelaye ḅụ ḅụkarakarama, ọ́ kụrọma ọ́mịna konju ḅụ ịkpụkụma kpọ pịkị ọ́mịna tọnjiema chụa koroma,

³⁶ini nyanaḅọ ḅe, anị ereya alalị mun se ḅoḅịa ḅọ ḅe nwọ koru àrị fịrịnwẹngịapụ ḅara ḅụ, ò ḅo la se ḅọkọ gboloḅịa sịkị, ini kirikiri ḅọkọ mị finji ọ̀ pịrịḅịa ḅara.

³⁷Inia ḅieḅẹlẹ laḅịa ọkụ ḍiki, anị ini nyanaḅọ ḅe vinpịkị ḅoḅịa sịkị ḍọkịḅo ọrị na ini sịsẹ se ḅụkarakarama ò koruaḅẹ nwọḅẹ fịrịnwẹngịapụma! À kọkọmaye ḍuko ọ́ pịrịaḅẹ, ò ḅirikun ḅịtẹ se ò ḅirikunḅịa, se ini mịẹse ini dẹbụl ḅụ kpọnjị sime so sịkị, ọ̀ ḅara na fịye se ini pịrịḅịa.

³⁸Inia ḅieḅẹlẹḅịa ọkụ ḍiki ini ḅụkarakaramamẹ nwọḅẹ ḅara ọ̀ nwọse ini ḍọkịḅomẹ nwọḅẹ ọkụma, ọ̀ ḅọrọ karakara ḍin ogbo anịkanịka anịsịkị mị ḅọrọ se ḅomẹ nwọḅẹ sọnị!

³⁹Ọ́ pịkị mịn mị nwọse ḅiekoroma, warị mị nyanaḅọ ḅe nemikase furuḅọ ḅe ḅoḅịa sịkị mị nemi ọkụma ò ḅereni ẹkẹ furuḅọ ḅe kan oria warị ḅie sọ.

⁴⁰Se ómine sọnị ọḅụkarakarama, anịatịḅị Tomoniḅọ Tọkụ Ḅe ómine Ò se ḅietọnka sịkị ḅụ Ò ḅoḅịa.”

⁴¹Pita ḅe nwọ ḅẹmẹ, “Nyanaḅọ, mị kaḅo mị ị́ kọn wa pịrị-a mụnọ se anị sime ḅẹḅọ ḅẹḅọ pịrị?”

⁴²Nyanaḅọ Ḅe pẹkẹrẹmẹ, “Tụḅọ anị ọkụma kuḅie se ḅụgbana gbẹịn pịkị ye nemi fịrịnwẹngịḅọ? Ori ḅọ ḅe anị ọ̀ nyanaḅọ ḅe warị mị seni ḅara chụaḅọ ḅe-ẹ, pịkị ini lalama fịye se anị ḅụgbẹịn sịkị ḅụ ísí fịrịnwẹngịapụma pịrịḅịa ḅọ ḅe-ẹ.

⁴³Ori fịrịnwẹngịḅọ ḅe nyanaḅịa ḅieḅẹlẹ laḅịa ọkụ ḍiki, ọ̀ nyanaḅọ ḅe vinpịkị ḅo sịkị, mịn ḅara mị ọ̀ nwọ mịẹarị ọkụ nwọse ọ̀ ḍọkịḅo ọkụma!

⁴⁴À ḍuko ọ́ pịrịaḅẹ na, anị kọkọma mịẹḅịa na ọ̀ nyanaḅọ ḅe ọ̀ nyana aye mamgba nwọse ọ̀ ḅara chụaḅịa.

⁴⁵Ọkụma ori fịrịnwẹngịḅọ ḅe nemikase nwọse ọ̀ ḅụ ḅẹ, na ‘ị̀ nyanaḅọ ḅe ọ̀ fịkịrị ḅo ẹkẹ,’ se sakị ísí fịrịnwẹngịapụma fomu, owuapụ na eremeni na, se fị na ḅu tọrụḅaama na ḅụ simemẹ ḅẹḅẹ,

⁴⁶anịọkụma ọ̀ nyanaḅọ ḅe, fịrịnwẹngịḅọ ḅe ḅietọnka ene ḅụ vinpịkị ḅoḅịa, pịkị ò nemika sịkị ḅụ. Ọ̀ nyanaḅọ ḅe ọ̀ pẹlẹ kọsịmaḅịa, pịkị ọ̀ mịẹse ọ̀ ḅịpịpokika apụma na gbọrị fomuḅara nyanaḅịa.

⁴⁷“Ọ̀ nyanaḅọ ḅe ḅi na mịẹ nwọḅẹ ye nemi fịrịnwẹngịḅọ ḅe, ọkụma ḅụkarakaramakẹ se anị mịẹka fịrịnwẹngịḅọ ḅe, opu fomuye ọ̀ nwọ daḅịa.

⁴⁸Ọkụma ọ̀ nyanaḅọ ḅe ḅiarịye nwọ nemika fịrịnwẹngịḅọ ḅe, se fomu na gbẹịn aye nwọ mịẹḅọ ḅe, ini kụrọ fomuye se ò fomu ẹkẹ. Ini opu ye se pịrịḅọ ḅe ḅara ini pịkị ḅakama ye ḅiḅịa, opuma ḅakatẹịnye ini nwọse pịrịḅọ ḅe ḅara ini pịkị opuma ḅakatẹịnye nwọ ḅiḅịa.”

⁴⁹“À fịnị se tomonikiri chụa-ẹ ḅomẹ, à ḅimẹ mgbọkụ anị kọrị sa ye nwọ sọ!

⁵⁰À saraḅịa mengi omi-ẹ, anị ị̀ ḅụḅalaḅalamarị ḅara mị, anị sara ḅọrọka simeogbo ị̀ ḅụ dein ẹkẹ!

⁵¹Ó koroma ḅara à deinma nwọse tomonikiri mị pịrị-ẹ ḅo? Ẹn-ẹn, deinmakẹ, à ḍuko ọ́ pịrịaḅẹ, ọkụma pua-ẹ.

⁵²Mịọkụ ọkịmun sọnọapụ sime furo puaḅịa, tẹrẹ-apụ mamapụ na tụḅụrụḅịa, mamapụ pịkị tẹrẹ-apụ na tụḅụrụḅịa.

⁵³Ḍapụ inia owuapụ awọ na tụḅụrụḅịa, owuapụ awọ pịkị inia ḍapụ na tụḅụrụḅịa, nyengiapụ inia eremeni awọ na tụḅụrụḅịa, eremeni awọ pịkị inia nyengiapụ na tụḅụrụḅịa, fua nyengiapụ inia fua eremeni awọ na tụḅụrụḅịa, fua eremeni awọ inia fua nyengiapụ na tụḅụrụḅịa.”

⁵⁴Jizọs Ḅe pịkị nwọse tomonima ḅẹmẹ, “Ómine ịrụasọsọ nyọ ḅụ wẹrị ḅoarị so elekima nwọ ọrị sịkị, anịkirikiri ọ́ nwọ ḅẹmẹ, ene koro-e mun aḅẹ, se anị ọkọ pakamẹ.

⁵⁵Se chuku fọrụ fie ọ́ ḅụ sarama sịkị, ọ́ nwọ ḅẹmẹ, nyọ ọfịrị-ẹ mun aḅẹ, se anị ọkọ mịẹmẹ.

⁵⁶Ómine epekelepepe-a tomoni! Ómine ineda tomonikiri mị na sotọrụ mị na ḍiki, se anị fiearịye ḍukoḅịa, anịọkụma cheye mịẹse ọ́ mị sịkị mị fiearịye nwọ nemi ḍụkụka?

⁵⁷“Nde ó gose karakaraye mị nwọ kọn ọ́mịna ḅụma pịrịkaye?

⁵⁸Tomoniḅọ nemikase oloko kịẹn ị́ pịrị se ị́ seni ḅẹrẹkọn warị mun aḅẹ ḅẹḅẹ, ị́ya ịnyọ la-ọkụ mịẹ se ori na ḅẹrẹ mị fama, ómine ateliogbo simearị sịkị, mịẹse ori ị́ se ḅẹrẹkọnḅọ ḅe tọrọkọ mun ẹka ḅara. Anị ofori ori ị́ fọnọ ḅẹrẹkọnḅọ ḅe tọrọkọ munḅịa, se ḅẹrẹkọnḅọ ḅe ị́ saḅama kurukuru ḅụchụaye chụa ḅọ ḅe pịrị, se kurukuru ḅụchụaye chụa ḅọ ḅe ị́ seni ikoli ḅie chuḅịa.

⁵⁹Anịanga ị́ pakaḅo ẹkẹ, à ḍuko ị́ pịrịaḅẹ, ọkịmun ini pẹlẹ ị́ pịrị gbẹịn nwọḅẹ ye ḅụ kuluma kọbọ mị ị́ nwọ gbẹịn soḅịa sịkị la.”