Read kirikeni Luk 15 Bible Online

Luk 15 - kirikeni bible

Luk 15

¹Gbọrị ene tọn-a amaochoapụ na ini depakụmasapụ na ḅo Jizọs Ḅe poki-ẹ ḅomẹ,

²Farisiapụma na Oloko ḍieapụma na sakị mukumukuma ọkwẹịnmẹ, “Ḅe ḅọ ḅe ini depakụmasapụma nwọ daọkị se ini na yefịaḅẹ!”

³Anị Jizọs Ḅe mị kaḅo mị kọn ini pịrịye-ẹ:

⁴“Ọ́mịna ḅụ gbọrịḅọ nemikase anana sọnọasi nwọ nyana se arịa ḅie gbọrị wu fa ọkụma cheye ọ̀ nwọ mịẹ ḅe? Ọ̀ gbọrịye fa sọnọasima nwọ wẹrị soḅịa àrị sime yefịarị nyọ ḅụ se so mun fa gbọrị wu ḅe ḍọkị mun ori ori ọrị sịkị laḅịa.

⁵Ori ori ọrị sịkị ò ḅie opuma ḅẹlẹḅịa, se ori ò se oria aba gbanaḅịa,

⁶se ọ̀ pụra vinpịkị so warị ḅoḅịa. Anịsịkị ori oria ikiapụma na ori na palịa angapụma na nwọ chịn koḅirimaḅịa, se nwọse ini ḅẹḅịa, ‘Ị̀ ḅie opuma ḅẹlẹmẹ na àrị ị̀ya fa anana ḅe ḍọkịḅosam. Ó ye wa alalị fị!’

⁷Anịgbọrị ḅara ḅụ à ḍuko ọ́ pịrịaḅẹ gbọrị simịẹḅọ siḅụ vinpịkịmẹ gose soḅie simeḅịa ḅieḅẹlẹ ḅakatẹịn siḅụ vinpịkị ḅụpalịmaka ngeifa kịnị-a sọnọasima gose simeḅịa ḅieḅẹlẹ nẹngịmẹ.

⁸“Anịkanịka oyi-a seleḅa igbiki nwọ nyana eremeniḅọ arịa ḅụ gbọrịye nwọ fama ọkụma cheye á nwọ mịẹ ḅe? Á tọnjie chụaḅịa, árị árịa warị ọfịnḅịa, se tọrụkweinma nyọ mị mgba ḍọkị kelemaḅịa ọkịmun árị anị ọrị sịkị laḅịa.

⁹Árị anị ọrị sịkị árị árịa ikiapụma na árị na palịa angapụma na nwọ chịn koḅirimaḅịa, se nwọse ini ḅẹḅịa, ‘Ị̀ ḅie opuma ḅẹlẹmẹ na à fama igbiki mị à nwọ ḍọkịḅosam. Ó ye wa alalị fị!’

¹⁰À ḍuko ọ́ pịrịaḅẹ, anị gbọrị ḅara mị ḅụ, Tamụnọ enjẹlapụma ini ḅieḅẹlẹmẹ siḅụ vinpịkị gbọrịḅọ ḅe gose.”

¹¹Jizọs Ḅe ọkwẹịnma mun se nwọ ḅẹmẹ, “Gbọrị sịkị mama owuapụ awọ nyana gbọrị owuḅọ simemẹ.

¹²Kalaḅọ ḅe nwọse ọ̀ ḅẹmẹ, ‘Ḍaḍa, sime ngọma ḅụ ị̀ lalamaye seni ị̀ pịrị.’ Anị nweniḅọ ḅe oria ngọma nwọ ḍiama oria mama owuapụ awọma pịrịye-ẹ.

¹³Boka ḍin ḅo ḅọrọ sịkị, kalaḅọ ḅe ọ̀ lalama ngọma nwọ dẹrịmẹ se igbiki mị na ama mị koroma somẹ. Ò so ḅọlọ sẹ mun mẹ, ò sime ofori ofori ḍumo ḅụ wẹrị oria igbiki fịfama nyọ mị.

¹⁴Ọ̀ nyanaye layelaye ọ̀ nwọ famamẹ. Anịsịkị opu ḅuruḅaa wasama anị sẹ mị kelemamẹ, se gbọrịye sọnị ḅarị kọn ọ̀ pịrịkẹ.

¹⁵Anị ò so mun fịrịnwẹngị anị sẹ mị ḅie gbọrị owuḅọ pịrị-ẹ mun ye-ẹ, ḅe ḅọ ḅe ò seni oria ozu ḅie fịrịmamẹ oporopo ḍikiḍiki ọ̀ pịrịḅịa ẹrẹchị.

¹⁶Ò ḅimẹ ori oporopo ma fịarị akịdị apụrama nwọse ọ̀ ḅụ ḍikiḍiki, ọkụma ọ̀ fịḅịaye seni ọ̀ pịrị gbọrịḅọ sọnị ofori-ẹ.

¹⁷Anịḅe kuluma ò ḅo ọ̀ ḅụ kaịnḅomẹ se nwọ ḅẹmẹ, ‘Ị̀ ḍaḅe ọkọ fịrịnwẹngịapụ mamgba ini yefị ḅụlọ ḅeinma pịkị kọnmẹ, anịsịkị ị̀rị̀ mịanga ḅuru ị̀ ḅaa-ẹ tọn aḅẹ!

¹⁸À sịsẹ ị̀ ḍaḅe damamunḅịa, se nwọse ọ̀ ḅẹḅịa, “Ḍaḍa, à simịẹsam, Tamụnọ Ḅe na ị́rị́ na tọrụkuḅu.

¹⁹Ị́ya tọkụ se ị̀ chịn mị ḅarị ị̀ gbẹịnkẹ; ị́ya ọkọ fịrịnwẹngịapụma ḅie gbọrịḅọ ḅara nwọse ị̀rị̀ na anga.” ’

²⁰Anị ọ̀ sịsẹ se vinpịkị ḍawu ḅe damamunye-ẹ. “Ọ̀ pa opuma warị mị na sasa wara àrị ogbo, ḍawu ḅe ori ọrịmẹ, ò kuḅie ḅụ opu ḍikitịḅịfoin ọ̀ nwọ nyana ọ̀ pịrịmẹ, anị ọ̀ mangị mun oria tọkụ ḅe nwọ oḅolo se ọ̀ ḅịpị nọnjụye-ẹ.

²¹‘Ḍaḍa,’ tọkụ ḅe nwọ ḅẹmẹ, ‘Tamụnọ Ḅe na ị́rị́ na tọrụkuḅu ḅụ à simịẹsam. Ị́ya tọkụ seni ị̀ chịn mị ḅarị ị̀ gbẹịnkẹ.’

²²Ọkụma ḍawu ḅe oria fịrịnwẹngịapụma chịn se nwọse ini ḅẹmẹ, ‘Be! Se ḍọkịḅo ọrị na iḅitẹịn ḅụchụaye ọ́ nwọ seni ọ̀ chụa mẹ. Iringi se ọ̀ ḅaratụmgbalị chụa pịkị akpaka se ọ̀ ḅụọma chụa.

²³Anịsịkị mun yela nambulo ḅe ḅaa, wa se alalị fị!

²⁴Anịatịḅị ḅe ị̀ya tọkụ ḅe ọ̀ fịmẹ, ọkụma mịọkụ ò ḍumosam; ọ̀ famẹ, ọkụma mịọkụ ini ọ̀ ḍọkịḅosam.’ Anị alalị mị sakịye-ẹ.

²⁵“Anịsịkị mị ḅụ, sẹnịḅọ ḅe ọ̀ paka ozu mun anga ḅụ omi-ẹ, ò vinpịkịḅo warị na kpeki sịkị, ori akwa na nime na sẹkị na nwọ naamẹ.

²⁶Ọ̀ fịrịnwẹngịapụma ḅie gbọrịḅọ chịnmẹ, ‘Se pakarịye nwọse ò gbelamẹ?’

²⁷Fịrịnwẹngịḅọ ḅe ọ̀ pẹkẹrẹmẹ, ‘Ị́ mbire ḅe ò vinpịkị warị ḅosam,’ ‘se ị́ ḍaḅe yela nambulo ḅe nwọ ḅaasam, ò deinma ḅụ na oju kụrọ na ḅụ vinpịkịḅo ye gose!’

²⁸Numbireowu sẹnịḅọ ḅe ịganị so ọkụma warị ḅie ọ̀ sọ ḍụkụkẹ; anị ḍawu ḅe pakaḅo se ọ̀ tẹkẹye-ẹ na ọ̀ sọ ḅo-ẹ.

²⁹Ọ̀ ḍawu ḅe pẹkẹrẹ se nwọ ḅẹmẹ, ‘Ḍiki, ma kụrama ḅie mgba omoniḅọ fịrịnwẹngị ọkụ à nwọse fịrịnwẹngị ị́ pịrịmẹ, à pịkị ị́ tọn aye nwọ mịẹka sịkị ofori-ẹ. Cheye ị́ nwọse ị̀ pịrịsa? Se ị̀ya ikiapụ na alalị fịḅịa gbọrị oḅori sọnị ị́ se ị̀ pịrịkẹ!

³⁰Ọkụma ḅe ị́ya tọkụ ḅe sẹfị ere ḅụ ị́ya ngọma famaḅọ ḅe vinpịkịḅo sịkị, yela nambulo ḅe ị́ nwọ ḅaa ọ̀ pịrịsam!’

³¹Ḍawu ḅe pẹkẹrẹmẹ, ‘Ị̀ya tọkụ,’ ‘ị́ sịkịmamgba ị̀rị̀ na mịanga omi-ẹ, à nyanaye layelaye pịkị ị́yaye-ẹ.

³²Ọkụma wa alalị fị se ḅieḅẹlẹ gbẹịnmẹ, anịatịḅị ị́ mbire ḅe ọ̀ fịmẹ, se mịọkụ ò ḍumosam, ọ̀ famẹ, ọkụma mịọkụ ọ̀ pakaḅosam.’ ”