Read kirikeni Luk 16 Bible Online

Luk 16 - kirikeni bible

Luk 16

¹Jizọs Ḅe nwọse oria ọḅụḍukoapụma ḅẹmẹ, “Gbọrị ngọkọn owuḅọ simemẹ, se gbọrị fịrịtịḅịdaḅọ nwọ nyanamẹ, se ini ḍuko ọ̀ pịrịmẹ na ḅe fịrịtịḅịdaḅọ ḅe ọ̀ nyanaḅọ ḅe igbiki nwọ famaḅẹ,

²ori ọ̀ chịn warị ḅie chu se nwọse ọ̀ ḅẹmẹ, ‘Cheye ị́ ḅụ à nwọ naa-ao? Sọ ḅo se ị́ ị̀ya ngọma na nwẹngị kọn ḅara ḅe kịẹnḅịpị nwọse ị̀ pịrị ḅeinma. Anịatịḅị ị́ ḅarị ị̀ya fịrịtịḅịdaḅọ nwọ sọ ẹkẹ.’

³Fịrịnwẹngịḅọ ḅe ḅịpị se ọ̀ ḅụ fiema, se nwọ ḅẹmẹ, ‘Ị̀ nyanaḅọ ḅe ori ị̀ya fịrị ḅụ ị̀ desinḅịa ẹrẹchị ḅiaḅẹ. Nde à mịẹḅịa ọkụ? Àrị ineda ịnyọ nyana kiri soku ẹkẹ, ye ọmgbọ pịkị ị̀ ḅụgereremamẹ.

⁴Mịọkụ à mịẹḅịaye à nemisam! Anịsịkị à ḅarị fịrị nyana ẹka sịkị, ị̀ ọkị inia warịma ḅie chuḅịa ikiapụ à nwọ nyanaḅịa.’

⁵Anị ori ọ̀ nyanaḅọ ḅe ḅara safịapụ mamgba nwọ chịn warị ḅie chuye-ẹ. Ọ̀ nwọse tatarị ḅọ ḅe ḅẹmẹ, ‘Ndaye ị̀ nyanaḅọ ḅe ḅara ị́ nwọ ọlọ?’

⁶‘Oliv pulo tini-a sọnọasi à nwọ ọlọmẹ,’ ọ̀ nwọ pẹkẹrẹmẹ. Fịrịtịḅịdaḅọ ḅe nwọse ọ̀ ḅẹmẹ, ‘Kpọnjị sime se mesi oyi fịnjị nwọ gịẹịn. Anị ị́ ọlọye kịẹnḅịpị la-ọkụ-ẹ.’

⁷Ọ̀ nwọse jịnḅọ ḅẹmẹ, ‘ị́rị́ kwanị—ndaye ị́ nwọ ọlọ?’ ‘Ịpịamgba tọnye ḅụ kiri mẹndẹ oyiasi fịnjị-ẹ,’ ọ̀ nwọ pẹkẹrẹmẹ. ‘Mịn ị́ya kịẹnḅịpị mị la-ọkụ-ẹ, mẹndẹ nwọ gịẹịn,’ fịrịtịḅịdaḅọ ḅe nwọ ḍuko ọ̀ pịrịmẹ.

⁸Ọ̀ nyanaḅọ ḅe, ḅe si fịrịtịḅịnịḅọ ḅe nwọ tokonimẹ ori ọbịrịma nemi se mịẹye mị gose; anịatịḅị mị tomonikiri mị ḅe apụma nemi ọbịrị nwọ seni inia mịẹmịẹye nwọ mịẹ enekuḅu ḅe apụma nẹngịmẹ.”

⁹Jizọs Ḅe pịkị ọkwẹịnma mun se nwọ ḅẹmẹ, “Anị gose à ḍuko ọ́ pịrịaḅẹ: ó tomonikiri ḅe ngọma nwọse ikia mịẹ ọ́mịna ḅụ ma pịrị, mịẹse anị famẹ ḅẹḅẹ ini kuluma nyanaka warị ḅie iḅiọkụ ọ́ da chuḅịa ḅara.

¹⁰Bokaye ḅụ kuḅie se ḅụgbana gbẹịnḅọ goyegoye pịkị ḅakaye ḅụ kuḅie se ḅụgbana gbẹịnḅọ sọḅịa, bokaye ḅụ kuḅie se ḅụgbana gbẹịnkaḅọ goyegoye iniḅọ pịkị ḅakaye ḅụ kuḅie se ḅụgbana gbẹịnkaḅọ sọḅịa.

¹¹Anịọkụma, ị́ tomonikiri ngọ ọlọ ḅụ kuḅie se ị́ ḅụgbana gbẹịnkẹ nwọḅẹ ọkụma, nde ini kọkọma ngọ ḅụ kuḅie se ị́ ḅụgbanaḅịa ọkụ?

¹²Jịnḅọ nyanaye ḅụ kuḅie se ị́ ḅụgbanaḅịa ọkụ ofori-ẹ nwọḅẹ ọkụma, tụḅọ sime ị́ pịrịye mị nwọse ị́ pịrịḅe?

¹³“Gbọrịḅọ sọnị ineda ye seni gbọrị sịkị mị ḅụ mama tịḅịnị kọnma ẹkẹ; ò gbọrịḅọ tarị ẹkẹ, se ísí ḅọ ḅe nwọ ḅẹlẹmaḅịa, ọ̀ nyana ḅereni gbọrịḅọ pịrịḅịa, se ísí ḅọ ḅe ḍikisimaḅịa. Ị́ ineda gbọrị kirikiri fịrịnwẹngị Tamụnọ Ḅe na igbiki na pịrị ẹkẹ.”

¹⁴Farisiapụma mịnaye mamgba nwọ naa sịkị, ini Jizọs Ḅe nwọse kpọtimẹ, anịatịḅị ini igbiki ḅẹlẹmamẹ.

¹⁵Jizọs Ḅe nwọse ini ḅẹmẹ, “Ómine mị ọ́ ḅụ seni tomoni-a tọrụkuḅu karakarapụ nwọ mịẹ apụma-ẹ, ọkụma Tamụnọ Ḅe ọ́mịna kuḅiemgbọlụma nemimẹ. Anịatịḅị tomoni seni opuye kịẹnmaye Tamụnọ tọrụkuḅu papaye-ẹ.

¹⁶“Moziz Oloko mị na ịkịankoroapụma gịẹịn ayema na àrị yeḅụsọ mun Jọn Mengisaraḅọ ḅe sịkị mị lamẹ, anị anịsịkị ngịsị Tamụnọ Amanyanakiri mị ḅe Iḅi Ḅẹrẹ mị ini nwọ ḍukoaḅẹ, se simeḅọ simeḅọ gagama iniḅọ ḅụ se ḅie chụaḅẹ.

¹⁷Ọkụma so mị na tomonikiri mị na maịn so mị sarasaratẹịn Oloko mị ḅụ bokatẹịn pẹkẹrẹ nwọ wẹrịso mị nẹngịmẹ.

¹⁸“Tomoniḅọ goyegoye iniḅọ ta ḅụḅarasin se jịn eremeniḅọ simemẹ ḅẹḅẹ iniḅọ sẹfịmẹ; se ini ḅụḅarasin sa eremeniḅọ ma sime owuḅọ ḅe ọ̀ pịkị sẹfịmẹ.

¹⁹“Gbọrị sịkị ngọ kọn gbọrị owuḅọ simemẹ, ene ḅene ḅene ò yela ḅiriaye nwọ ḅiriḅirimẹ, pịkị opu igbiki la fịye nwọ fịfịmẹ.

²⁰Lazụrọs nwọ chịn gbọrị igweinḅọ, pịkị simemẹ, ịnọ ọ̀ ḅụ ḅein waraḅẹ. Ini ori ọkịḅo ngọ kọnḅọ ḅe warị ḅọkọ ḅụ koroma koromamẹ.

²¹Ọ̀ tọrụ se ḍikimẹ na ori ngọ kọnḅọ ḅe dẹbụl ḅụ sokoro fịye pumburoma nwọ fịḅịa. Obirima sọnị ḅo ọ̀ ḅụ sime ịnọma nwọ taḅataḅamẹ.

²²Igweinḅọ ḅe fịmẹ, se enjẹlapụ ò deki mun Ebraham ḅe anga sịkị koromamẹ, soḅie alalị fị nyọ mị ḅụ. Ngọ kọnḅọ ḅe pịkị fịmẹ se ini ò ḍipimẹ.

²³Ọ̀ ḍụẹịn ama ḅụ opu ḅụfụka ḅie simemẹ se ọ̀ tọrụ deki chịẹma se Ebraham ḅe ọrịmẹ, sasaju ḅụ, Lazụrọs ḅe oria anga sịkị omi-ẹ.

²⁴Anị ori olokuye-ẹ, ‘Ebraham ị̀ya Ḍaḅọ! Ị̀ ḍikitịḅịfoin, Lazụrọs ḅe fịrịma se ori ọ̀ ḅaratụmgbalị se mengi ḅie su se ḅo ị̀ ḅẹlẹ pisima, anịatịḅị àrị opu ḅụfụka ḅie omi-ẹ mị fịnị mị ḅie!’

²⁵Ọkụma Ebraham ḅe nwọ ḅẹmẹ, ‘Ị̀ya tọkụ se ḅiekoroma na, ị́rị́ ḅe ḍumo sịkị ḅụ ini iḅi aye mamgba nwọ seni ị́ pịrịmẹ, anị Lazụrọs ḅe si aye mamgba nwọ nyana sịkị-ẹ. Ọkụma mịọkụ, ori ọ̀ ḅụ timaḅẹ mịanga, ị́rị́ ị́ ḅụfụka ḅie omi-ẹ.

²⁶Àrịmgba sikima ọkụma, gbun olulu mịna ogboku omi-ẹ, anị gose mịnyọ wẹrị saḅa anịnyọ ọ́ damaḅoḅịa ẹrẹchị ḅi apụma ini ineda ẹkẹ, ineda pịkị ị́ sime anga saḅa wa damaḅoḅịa ḅọ ofori-ẹ.’

²⁷Ngọ kọnḅọ ḅe nwọ ḅẹmẹ, ‘Iḅimẹ, ḍaḅọ, Ebraham àrị ị́ tẹkẹmẹ, Lazụrọs ḅe fịrịma ị̀ ḍa warị mị nwọ sẹịnma,

²⁸à sọnọ-a owuapụ mịnapụ nwọ nyana waraḅẹ anịnyọ, ye ò mun inia ḅeri jine, mịẹse ini pa mị ḅụfụka sime anga mị nwọ ḅo ẹka ḅara.’

²⁹Ebraham ḅe nwọ ḅẹmẹ, ‘Ị́ya owuapụ mịnapụma ini Moziz ḅe na ịkịankoroapụma na nwọ nyana waraḅẹ inia ḅeri jineḅịa apụ; ye ị́ya owuapụ mịnapụma ini ḍukoarịye nwọ poki.’

³⁰Ngọ kọnḅọ ḅe pẹkẹrẹmẹ, ‘Anị mị inia ḅụ la-ẹkẹ, Ebraham ị̀ya ḍaḅọ! Ọkụma tomoniḅọ nemikase fịḅụsịsẹ se ini damamun ọkụma, anịsịkị ini inia sima ḅụ vinpịkịḅịa.’

³¹Ọkụma Ebraham ḅe nwọ ḅẹmẹ, ‘Ini nemikase Moziz ḅe na ịkịankoroapụma na poki ẹkẹ ḅẹḅẹ, anị inia ḅụ okoro ẹkẹ nweniḅọ fịḅụsịsẹ mun mẹ nwọḅẹ sọnị.’”