Read kirikeni Luk 18 Bible Online

Luk 18 - kirikeni bible

Luk 18

¹Anịsịkị Jizọs Ḅe gbọrị kaḅo kọn oria ọḅụḍukoapụma pịrịmẹ, se ye se ini ḍie na ini sịkịmamgba tẹkẹ gbẹịnmẹ kuḅie lọkọmaka ḅara ḅụ.

²“Gbọrị ama ḅie gbọrị ḅẹrẹkọnḅọ simemẹ, ọ̀ Tamụnọ ḍikiḅalafakẹ, pịkị tomoni osikẹ.

³Se deḅọ koromafị eremeniḅọ anị ama mị ḅie pịkị simemẹ, á sịkịmamgba ọ̀ damaḅoḅo mẹ, árịa ḅẹrẹ karakara nwọ nyanaḅịa ẹrẹchị, ‘Ḅarachụa ị̀ pịrị, ị̀rị̀ na tarakaḅọ ḅe ḅara ḅie!’

⁴Ḅọlọ sịkị lamẹ ḅẹrẹkọnḅọ ḅe ọ̀ gbọrị ḅara sọ mịẹ ḍụkụkẹ, ọkụma anị ḅe kuluma ọ̀ nwọ seni ọ̀ ḅụ ḅẹmẹ, ‘À Tamụnọ ḍikiḅalafakẹ se pịkị tomoni osikẹ nwọḅẹ sọnị,

⁵ọkụma ma deḅọ koromafị eremeniḅọ ma seni ị̀ pịrịarị ḅụfụka mị gose à mịẹse árị árịa karakara ḅẹrẹ mị nwọ nyanaḅịa. Anịka ọkụma á sịkịmamgba ị̀ damaḅo se ị̀ ḅụ ịnyọ famaḅịa!’”

⁶Se Nyanaḅọ Ḅe ọkwẹịnma mun se nwọ ḅẹmẹ, “Anị si ḅẹrẹkọnḅọ ḅe ḍukoye mị ọ́ nwọ poki.

⁷Mịọkụ, Tamụnọ Ḅe ọ̀ ḅẹrẹkọn oria tomonima ḅara iḅima ẹka, ḅarachụa gose ḍin na enekaka na nwọse owu ọ̀ pịrịarị apụma? Ḅarachụa ini pịrị ḅụ ọ̀ tẹtẹ ḅe?

⁸À ḍuko ọ́ pịrịaḅẹ, ọ̀ ḅẹrẹkọn inia ḅara iḅimaḅịa, ọ̀ pịkị sarama anị mịẹḅịa. Ọkụma Tomoniḅọ Tọkụ Ḅe tomonikiri ḅoḅịa sịkị ò ḅereni nyana apụ ọrị ḅe?”

⁹Jizọs Ḅe pịkị mị kaḅo mị kọn inia ḅụ ma se iḅi apụ kịẹnma se jịn apụ ḍikisimapụma pịrịmẹ.

¹⁰“Gbọrị sịkị mama owuapụ mun Tamụnọ opu warị mị ḅie tẹkẹ-ẹ mun mẹ: gbọrịḅọ Farisiḅọ-ẹ, ísíḅọ ḅe amaigbiki ochoḅọ-ẹ.

¹¹Farisiḅọ ḅe ọ̀ ḅụ sikima chịẹ sime se tẹkẹmẹ, ‘À mịẹḅaka se ị́ ḅẹmẹ Tamụnọ, na àrị ngẹrịfị ḍọkịkẹ, à jịnḅọ inuma inumakẹ, anịkanịka sẹ fịfịḅọkẹ, jịn apụ mịẹmịẹ ọkụ mị. À mịẹḅaka se ị́ ḅẹmẹ, na àrị ori amaigbiki ochoḅọ ḅe simeọkụ nwọ simekẹ.

¹²Wiki mị ḅie à mama ene nwọse ḅuruseḅụḅaama ḅamamẹ, à nyana aye mamgba se oyi-a kiri pu ḅe gbọrị kiri à nwọse ị́ pịrịpịrịmẹ.’

¹³Ọkụma amaigbiki ochoḅọ ḅe sasaju ḅụ wẹrị chịẹ simemẹ, ọ̀ tọrụ deki chịẹma so mị dakẹ, ọkụma ḅara se oria ekpe ḅụrọ se nwọ ḅẹmẹ, ‘Tamụnọ, ị̀ ḍikitịḅịfoin, ị̀rị̀ si ḅọ-ẹ!’

¹⁴À ḍuko ọ́ pịrịaḅẹ,” Jizọs Ḅe nwọ ḅẹmẹ, “Amaigbiki ochoḅọ ḅe-ẹ, Farisiḅọ ḅe kẹ, anị Tamụnọ Ḅe na karakara ḅụ simeye-ẹ ọ̀ warị lasịkị. Anịsịkị mịnaḅụ se opuḅọ mịẹḅọ goyegoye ini nwọ iderimaḅịa, se mịnaḅụ iderimaḅọ goyegoye ini nwọse opuḅọ mịẹḅịa.”

¹⁵Dapụ inia ḍọkọḍọkọ awọmẹnị nwọ ọkịḅo Jizọs Ḅe pịrịmẹ ò ḅara seni ini ọgọnọ gbanaḅịa ẹrẹchị. Ọkụma ọḅụḍukoapụma ini ọrị se ini ḍiki ịganịmẹ, ini ọkọ mịẹye gose,

¹⁶ọkụma Jizọs Ḅe awọmẹnịma chịn ọ̀ ḅụ pịrị se nwọse ini ḅẹmẹ, “Ye awọmẹnịma ị̀ damaḅo, ómine ini kikima, anịatịḅị Tamụnọ Amanyanakiri mị sime nwọ simeapụ pịrịmẹ.

¹⁷Ọ́ mịn se ḅiekoroma! Kala tọkụ ḅara nwọse Tamụnọ Amanyanakiri mị ọkịka ḅọ goyegoye ngịsị anịa ḅie sọ ẹkẹ.”

¹⁸Gbọrị Ju tịḅịnịḅọ Jizọs Ḅe gbelamẹ, “Iḅi yeḍieḅọ, cheye à nwọ mịẹse simegbaso ḍumo nyana ḅe?”

¹⁹Jizọs Ḅe nwọse ò gbelamẹ, “Ị́ che gose iḅi ḅọ se ị̀ chịn? Iḅi gbọrịḅọ sọ ofori-ẹ, Tamụnọ Ḅe sikima ọkụma.

²⁰Olokoma ị́ àrị nemimẹ: ‘Sẹfị ma, nweni ḅaa ma, furu ma, iruo kọn ma, ị́ ḍa na ị́ nyengi na osi.’”

²¹Nweniḅọ ḅe pẹkẹrẹmẹ, “Àrị asẹ ḅụ sime sịkị ngịsị à ma olokoma ḍukoye nwọ mịẹmẹ.”

²²Jizọs Ḅe mịn mị naa sịkị, ọ̀ nwọse ọ̀ ḅẹmẹ, “Ị́ mịẹ na iḅi gbọrịye pa omi-ẹ. Ị́ nyana aye mamgba dẹrị, se igbiki mị se igwein apụma pịrị, ị́ pịkị soḅie ngọ nyanaḅịa, anịsịkị vinpịkịḅo ị̀ ḍuko.”

²³Ọkụma owuḅọ ḅe mịn mị naa sịkị, ori opuma ngịrịmẹ, anịatịḅị ori opuma ngọ nyanamẹ.

²⁴Jizọs Ḅe ori ngịrị ọkụ ọrị sịkị, ọ̀ nwọ ḅẹmẹ, “Ngọ nyana apụma Tamụnọ Amanyanakiri mị ḅie sọ mị ḅụfụkama ọkụ ḍiki!

²⁵Ngọ kọnḅọ Tamụnọ Amanyanakiri ḅie sọ mị ḅụfụkamatẹịn ike-nambulo ḅe laga tọrụmgbọlụ ḅie tolu ḅọrọ mị nẹngịmẹ.”

²⁶Ò ḍukoye naa apụma gbelamẹ, “Anị ọkụma, tụḅọ re ineda ḍụaḅọrọma nyana ḅe?”

²⁷Jizọs Ḅe pẹkẹrẹmẹ, “Tomoni ineda mịẹ ẹka ye mị, Tamụnọ Ḅe ḅụ sarasaramẹ.”

²⁸Anịsịkị Pita ḅe nwọ ḅẹmẹ, “Ḍiki! Wa mịna warịma wẹrịso se ị́ ḍukoaḅẹ.”

²⁹Jizọs Ḅe nwọse ini ḅẹmẹ, “Iin, se à kọkọmaye ḍuko ọ́ pịrịaḅẹ na Tamụnọ Amanyanakiri mị gose warị, anịkanịka iniḅọ ta, anịkanịka owuapụ mịnapụ, anịkanịka iniḅọ yiapụ, anịkanịka awọ koroma soḅọ goyegoye Tamụnọ Amanyanakiri mị gose

³⁰mịn ḅụọ mị ḅụ, opuma àrị nẹngị aye nwọ nyanaḅịa, ḅoḅịa ḅụọ ḅụ simegbaso ḍumo pịkị nwọ nyanaḅịa.”

³¹Jizọs Ḅe oyimaịn ọḅụḍukoapụ fịnjịma ọkị sikima anga pịrị se nwọse ini ḅẹmẹ, “Ó poki! Wa Jerusalẹm mun aḅẹ, ịkịankoroapụma Tomoniḅọ Tọkụ Ḅe gbolomaye ḅụ se ḍiri ḅie gịẹịn yegoyegoye ḅo kọkọmaye nwọ sọḅịa nyọ mị.

³²Ini ọ̀ ḅọrọma Jịnsẹapụma pịrịḅịa, ò seni kpọti, ọ̀ wọlọ, se fụla se ọ̀ ḅụ saraḅịa apụma.

³³Ini ò fomu, se ọ̀ ḅaaḅịa, ọkụma tẹrẹ-a ḍin karama ene mị ḅụ ọ̀ sịsẹḅịa.”

³⁴Mayema ḅụ gbọrịye sọnị ọḅụḍukoapụma ini kaịnḅokẹ; ọkwẹịnmgbọlụ ma fiearịye ma sọnị ini se ini ḅọịmamẹ, pịkị Jizọs Ḅe ḍukoarịaye ma sọnị ini nemikẹ.

³⁵Jizọs Ḅe ḅo Jẹriko na kpeki sịkị, gbọrị tọrụmgbọlụ pụn owuḅọ ateli anga ye ọmgbọ simemẹ.

³⁶Tomonikpo mị ḅọrọarị ḅara ọ̀ nwọ naa sịkị, ò gbelamẹ, “Mịn mị cheye?”

³⁷Ini ḍuko ọ̀ pịrịmẹ na, “Jizọs Nazarẹt ḅọ ḅe ọ̀ ḅọrọaḅẹ.”

³⁸Ori olokumẹ, “Jizọs! Devid Tọkụ! Ị̀ ḍikiḅụgerere!”

³⁹Tọrọkọ sime tomonima ò ḍiki ịganị se nwọse ọ̀ ḅẹmẹ, deinma sime. Ọkụma anịsịkị ori olokutẹịnmẹ, “Devid Tọkụ! Ị̀ ḍikiḅụgerere!”

⁴⁰Anị Jizọs Ḅe dachịẹ se tọnye-ẹ na ini tọrụmgbọlụ pụn ḅọ ḅe nwọ ọkịḅo ọ̀ pịrị. Ò ḅo kpeki sịkị, Jizọs Ḅe ò gbelamẹ,

⁴¹“Cheye à nwọ mịẹ ị́ pịrị ị́ nwọ ḅi?” Ọ̀ nwọ pẹkẹrẹmẹ, “Sẹnịḅọ, à ḅimẹ à pịkị ye ọrị.”

⁴²Anịsịkị Jizọs Ḅe nwọse ọ̀ ḅẹmẹ, “Ye ọrị! Ị́ya ḅereni mịẹse ị́ ḅụ iḅisam.”

⁴³Anịkirikiri ori ineda ye ọrịmẹ, se ò Jizọs Ḅe ḍuko, mịẹḅaka nwọse Tamụnọ Ḅe ḅẹma mun mẹ. Tomonikpo mị anị ọrị sịkị, inimgba Tamụnọ Ḅe tokonimẹ.