Read kirikeni Luk 19 Bible Online

Luk 19 - kirikeni bible

Luk 19

¹Jizọs Ḅe nwẹngị mun Jẹriko la se tolu ḅọrọaḅẹ.

²Anịanga amaigbiki ocho àrị tịḅịnịḅọ omi-ẹ, Zakịọs nwọ chịnḅọ, ngọ kọn ḅọ-ẹ.

³Ọ̀ ḅụkụrọma Jizọs Ḅe ọrị ḍọkịmẹ, ọkụma ò gboluye gose ori ineda tomonima ogboku Jizọs Ḅe ọrịkẹ.

⁴Anị ọ̀ mangị inia tọrọkọ pẹlẹma se saịkamo nwọ chịn eje tanjịye-ẹ, Jizọs Ḅe ọrịḅịa ẹrẹchị, anịatịḅị anị ateli mị ḅụ mị ọ̀ ḅọrọḅịaye-ẹ.

⁵Jizọs Ḅe ḅo anịnyọ lasịkị, ọ̀ tọrụ deki ọgọnọ ḍikimẹ se nwọse Zakịọs ḅe ḅẹmẹ, “Fịkịrị koroḅo, Zakịọs, anịatịḅị à mịmgba ị́ya warị ḅie simeḅịa.”

⁶Zakịọs ḅe be koroḅo se opu ḅieḅẹlẹ ḅụ ori ọkịmẹ.

⁷Anị ọrịapụ mamgba sakị mukumukuma ọkwẹịn aḅẹ, “Ḅe ḅọ ḅe ọ̀ simịẹḅọ warị igoni munsam!”

⁸Zakịọs ḅe sịsẹ chịẹ se nwọse Nyanaḅọ Ḅe ḅẹmẹ, “Poki, sẹnịḅọ! À nyana ayema se maịn pu ḅe gbọrị kiri à nwọse igwein apụma pịrịḅịa, se àrị inumaḅọ omi-ẹ ḅẹḅẹ, anịḅe inein-a kiri à nwọse iniḅọ gbẹịnḅịa.”

⁹Jizọs Ḅe nwọse ọ̀ ḅẹmẹ, “Ḍụaḅọrọma mịmgba mị warị ḅosam, ḅe ḅọ ḅe sọnị Ebraham furo ḅie pakaḅo ḅọ-ẹ.

¹⁰Anịatịḅị Tomoniḅọ Tọkụ Ḅe ò ḅo fa apụ ḍọkị se ini ḍụa-eḅomẹ.”

¹¹Tomonima mịn mị nwọ pokiarị sịkị, Jizọs Ḅe ọkwẹịnma mun se gbọrị kaḅo nwọ kọn ini pịrịmẹ. Mịọkụ kalaye kọnmẹ ò ḅo Jerusalẹm la, se ini nwọ koromamẹ na Tamụnọ Amanyanakiri mị ḅo kiri ọkị-ẹtọn aḅẹ.

¹²Anị ọ̀ nwọḅẹye-ẹ, “Gbọrị opuḅọ simemẹ so ḅọlọ ama nwọ mun-aḅọ, ini ò seni amanyanaḅọ mịẹse ò vinpịkị ama ḅoḅịa ẹrẹchị.

¹³Ma ò munka simeogbo, ori oria oyi-a fịrịnwẹngịapụ nwọ chịnmẹ se gbọrị goli igbiki nwọse ḅọḅọ pịrịmẹ, se nwọ ḍuko ini pịrịmẹ, ‘Mịn mị ọ́ nwọse fịrị ḅụ chu, à so sa ḅẹḅẹ.’

¹⁴Mịọkụ, oria amapụ taraka se ọ̀ wẹrịmamẹ, se ini oku seni ọ̀ fịrịmamẹ ò mun so sịkị, ini nwọ ḅẹmẹ, ‘Wa ḅikẹ ḅe ḅọ ḅe mịna amanyanaḅọ nwọsọ.’

¹⁵“Ini ḅe opuḅọ ḅe nwọse amanyanaḅọ mịẹse ò vinpịkị ḅomẹ. Anị kirikiri ọ̀ tọnmẹ na ori igbiki se pịrị oria fịrịnwẹngịapụma ọ̀ tọrọkọ ḅo, mịẹse ini opoli tọn ọ̀ pịrịḅịa ḅara.

¹⁶Tatarị ḅọ ḅe ḅo se nwọ ḅẹmẹ, ‘Sẹnịḅọ, ị́ se ị̀ pịrị igbiki mị à nwọse oyi-a goli sọye nwọ mịẹ ḅosam.’

¹⁷Ị́ mịẹ ḍinmẹ, ọ̀ nwọse ọ̀ ḅẹmẹ, ‘ị́rị́ iḅi fịrịnwẹngịḅọ-ẹ! Ị́ nwọ kalaye ḅụ kuḅie se ḅụgbana gbẹịn warasịkị, àrị ị́ seni oyi ama tịḅịdaḅọ nwọ mịẹḅịa.’

¹⁸Maịn karama fịrịnwẹngịḅọ ḅe ḅo seni nwọ ḅẹmẹ,, ‘Sẹnịḅọ, ị́ se ị̀ pịrị igbiki mị à seni sọnọ-a goli igbiki sọye mịẹsam.’

¹⁹Ọ̀ nwọse ọ̀ ḅẹmẹ, ‘Ị́ sọnọ ama tịḅịdaḅọ nwọ sọḅịa.’

²⁰Jịn fịrịnwẹngịḅọ ḅo seni nwọ ḅẹmẹ, ‘Sẹnịḅọ, mị ị́ya goli igbiki mị-ẹ, àrị anị seni akịsị ḅie ḅọị koromamẹ.

²¹Àrị ị́ ḍikiḅalafamẹ, anịatịḅị ị́rị́ ḅụfụkama ḅọ-ẹ, ị́ya yeka ye ị́ nwọ ọkịkịmẹ, pịkị ị́ ḍipikaye ị́ nwọ soku sokumẹ.’

²²Ọ̀ nwọse ọ̀ ḅẹmẹ, ‘Ị́rị́ si fịrịnwẹngịḅọ-ẹ! Ị́ya ọkwẹịnma mị à se ḅẹrẹsi pẹlẹ ị́ pịrịḅịaye-ẹ! Ị́ nemimẹ na ị̀rị̀ ḅụfụkamaḅọ-ẹ, à nyanakaye à nwọ ọkịkịmẹ, pịkị ḍipikaye soku sokumẹ.

²³Iḅimẹ, anị ọkụma, cheye gose ị́ ị̀ya igbiki mị se igbiki kokowarị ḅie chụaka? Mịẹse anịa ḅụ igbiki gbana ị̀ pịrịḅịa ḅara, à nwọ vinpịkị ḅosịkị.’

²⁴Ọ̀ nwọse anịnyọ chịẹ sime apụma ḅẹmẹ, ‘Ómine ọ̀ ḅara anị goli igbiki mị ọkị, se anị seni oyi-a goli igbiki nyana fịrịnwẹngịḅọ ḅe pịrị.’

²⁵Ini nwọse ọ̀ ḅẹmẹ, ‘Sẹnịḅọ, ori oyi-a goli nwọ nyana waraḅẹ!’

²⁶Ọ̀ pẹkẹrẹmẹ, ‘À ḍuko ọ́ pịrịaḅẹ, na nwọ nyana waraḅọ ḅe, ini ḅakama jịnye nwọse ọ̀ pịrịḅịa ọkụma nyanakaḅọ ḅe, ori ịkịanma nyana kalaye mị sọnị ọ̀ ḅara ini pọkọ ọkịḅịa.

²⁷Mịọkụ, ị̀rị̀ na tarakapụma ọkụma àrị amanyanaḅọ sọ ini pịrị ḅika apụma ómine ini ọkị mịanga ḅo se ị̀ tọrọkọ ini ḅaa!’”

²⁸Jizọs Ḅe mịn mị nwọ ḍukoso sịkị, ori inia tọrọkọ pẹlẹma Jerusalẹm nwọ mun mẹ.

²⁹Ò ḅo Bẹtfagi na Bẹtani nwọ chịn amama na kpeki sịkị, Oliv Tụndụ mị nyọ mị ḅụ, ori mama ọḅụḍukoapụ se tọrọkọ fịrịmamẹ

³⁰nwọ ḍuko ini pịrịmẹ: “Ọ́mịna tọrọkọ sime ịwọama mị ọ́ nwọ mun; ọ́ sọ mun-arị sịkị, ini kpọ koroma ayamburama asụn tọkụ ọ́ nwọ ọrịḅịa, nweni ngịsị ma se nwẹngịka wu. Ò finma, se ò se ḅo.

³¹Nweni nemikase ó gbela na, nde ó gose ò fimarịye nwọ ḅẹḅẹ, ó ḍuko iniḅọ pịrị na Nyanaḅọ Ḅe ò ḅimẹ.”

³²Ini mun nyọ mị lasịkị, Jizọs Ḅe ḍuko ini pịrị ḅara mị, mị anị paka ọkụ-ẹ.

³³Ini ayamburama asụn ḅe nwọ finmarị sịkị, ọ̀ nyanapụma nwọse ini ḅẹmẹ, “Nde ó gose ò fimarịye?”

³⁴Ini pẹkẹrẹmẹ, “Nyanaḅọ Ḅe ò ḅimẹ.”

³⁵Se ini ayamburama asụn ḅe ọkịmun Jizọs Ḅe pịrịmẹ. Anịsịkị ini inia ḅụchụayema se nama ḅe ọgọnọ ise, se ḅarachụa Jizọs Ḅe pịrị seni ori oria ọgọnọ ḅụkụlọmẹ.

³⁶Ori ò se nwẹngị mun-arị sịkị, ini inia ḅụchụayema se ateli isemẹ.

³⁷Ò ḅo Jerusalẹm na kpeki sịkị, ateli mị Oliv Tụndụ mị ḅụ wẹrị tu koro nyọ mị ḅụ, oria ọḅụḍuko ḅaka tomonikpo mị sakị mịẹḅaka se Tamụnọ Ḅe ḅẹ se ò tokonimẹ gele pụkọ ḅụ ini ọrịsa opuaye mamgba gose:

³⁸“Tamụnọ Ḅe Nyanaḅọ Ḅe ẹrẹ ḅụ ḅo Amanyanaḅọ ḅe ḅẹlẹma! Deinma soḅie sime, se boma sime Tamụnọ Ḅe pịrị!”

³⁹Anịsịkị tomonikpo mị ḅie sime da Farisiapụ anịnyọ ọkwẹịn pakụma Jizọs Ḅe pịrị se nwọ ḅẹmẹ, “Yeḍieḅọ, ḍuko ị́ya ọḅụḍukoapụma pịrị se ini yawụma sime!”

⁴⁰Jizọs Ḅe pẹkẹrẹmẹ, “Ini yawụma simemẹ ḅẹḅẹ, à ḍuko ọ́ pịrịaḅẹ ḍụparịma na mịnaḅụ na sakị olokuḅịa.”

⁴¹Ò ḅo opuama mị na kpeki se anị ọrị sịkị, ori anị gose owumẹ,

⁴²se nwọ ḅẹmẹ, “Ị́ ḅọrọ pa mịmgba ene mị ḅụ deinma ọkịḅoḅịaye nwọ nemimẹ ḅẹ ọkụma! Ọkụma mịọkụ ị́ ineda anị ọrịẹkẹ!

⁴³Sịkị ḅoḅịa ị́rị́ na tarakapụma onu se ị́ gbori kelema, kikichụa ị́ pịrị se anga na anga na ḅụ ị́ gbẹịn koromaḅịa.

⁴⁴Ini gbọtụḅara ị́ famaḅịa ị́ ḅie sime tomonima na, ini gbọrị ḍụparị sọnị ḅụḅarasin ẹkẹ anịa kiri ḅụ, anịatịḅị Tamụnọ Ḅe ḅo ị́ ḍụa-eḅoarị sịkị mị ị́ nemikẹ!”

⁴⁵Jizọs Ḅe Oputẹkẹwarị mị ḅie mun se sakị tomonima depakụmamẹ,

⁴⁶nwọse ini ḅẹaḅẹ na, “Anị gịẹịnsam Fịafịa Ḍiri ma ḅie, na Tamụnọ Ḅe nwọ ḅẹmẹ, ‘Tẹkẹwarị ini nwọse ị̀ya Oputẹkẹwarị mị chịnḅịa.’ Ọkụma ómine anị pịkị seni furuapụ pokolo mịẹsam!”

⁴⁷Jizọs Ḅe ene ḅene ḅene ḅụ Tamụnọ Oputẹkẹwarị mị ḅie yeḍiemẹ, agbamịẹ tịḅịnịma na Oloko ḍieapụma na pịkị tomonima ḅe tịḅịnịma na ḅimẹ ini ọ̀ ḅaa.

⁴⁸Ọkụma ini ḅọrọ se anị mịẹḅịa ọkụ ini ineda ḍọkịḅokẹ, anịatịḅị nweni mamgba ò poki ḅụ ini omi-ẹ, ini gbọrị ọkwẹịnmgbọlụ sọ fama ḅikẹ.