Read kirikeni Luk 2 Bible Online

Luk 2 - kirikeni bible

Luk 2

¹Anịsịkị mị ḅụ Sẹdaḅọ Ọgọstọs ḅe tọnmẹ na Rom Sẹ mị chuku ḅie sime sẹma ḅie apụ mamgba ẹrẹ se ḍiri ḅie chụa, inia kịẹnḅịpị nemiḅịaye gose.

²Mịn tatarị nweni kịẹn mị kiri ọkị sịkị anị Kwiriniọs ḅe Siria ḅie gọvịna sọ sịkị mị-ẹ.

³Anịsịkị tomoniḅọ goyegoye, mun iniḅọ ama ḅie ẹrẹ chụa-ẹ mun mẹ.

⁴Josẹf ḅe Galili ḅie sime Nazarẹt ama ḅụ so Judia mun mẹ, Bẹtlihẹm nwọ chịn ama mị ḅie, ini Amanyanaḅọ Devid ḅe yi nyọ mị. Josẹf ḅe anịnyọ mị nwọ mun mẹ, anịatịḅị ori Devid furo ḅọ-ẹ.

⁵Ò Meri ma na mun mẹ inia ẹrẹ se ḍiri ḅie chụaḅịa ẹrẹchị, ò simeḅịa gose ori ọlọ ḅọ ma. Á fura waraḅẹ,

⁶se ini anịnyọ Bẹtlihẹm mị ḅie simearịogbo, árịa yi sịkị mị ḅo lamẹ.

⁷Se árị árịa tatarị tọkụ ḅe yimẹ, se ḅịtẹ se Ọ̀ gbẹịnmẹ, Ò se nama-yefịfịye ḅie ḅọlọlọmẹ—anịatịḅị igoniwarị mị ḅie ini simeḅịa ḅie ofori-ẹ.

⁸Sẹ mị ḅie anị pẹkẹrẹ mị ḅụ ananaḍikiḍikiapụ ḍin ḅie eleogbo ḅụ sime inia ananama ḍikiḍikiaḅẹ.

⁹Nyanaḅọ Ḅe enjẹlḅọ ọ̀ ḅụ se ini ḍiemẹ, se Nyanaḅọ Ḅe boma mị ḅịa ini kelemamẹ. Inia ḅala opuma famẹ,

¹⁰ọkụma enjẹlḅọ ḅe nwọse ini ḅẹmẹ, “Ọ́ ḅalafama! Àrị iḅi ḅẹrẹ daḅo ọ́ pịrị-ẹ ḅomẹ, opu ḅieḅẹlẹ ọkịḅo tomoni mamgba pịrịḅịaye.

¹¹Mịmgba, Devid ama mị ḅie ini ọ́mịna Ḍụaḅọrọmaḅọ nwọ yisam anị—Nyanaḅọ Kraịst Ḅe-ẹ!

¹²Anị ḍiepakụma ọ́ pịrịḅịaye anị mị mị-ẹ: ini ḅịtẹ se ḅụ gbẹịn gbọrị ịwọma yi tọkụ ọ́ nwọ ọrịḅịa, nama-yefịfịye ḅie Ọ̀ ḅọlọlọ sime waraḅẹ.”

¹³Ḅụnemika simeogbo soḅie ḅaka enjẹlogbo ḅo enjẹlḅọ ḅe ḅụ sọ se tokoni nime chu Tamụnọ Ḅe bomaḅẹ:

¹⁴“Boma sime Tamụnọ Ḅe pịrị geletẹịn so mị ḅie, se deinma sime tomonikiri, Tamụnọ Ḅe ḍikiḅieḅẹlẹ apụma pịrị!”

¹⁵Enjẹlapụma ini koromaso vinpịkị soḅie mun sịkị, ananaḍikiḍikiapụma nwọse jịnḅọ jịnḅọ ḅẹmẹ, “Ó ye wa Bẹtlihẹm mun se pakaye mị ọrị, Nyanaḅọ Ḅe ḍuko wa pịrịsaye mị.”

¹⁶Anị ini be paka mun Meri ma na Josẹf ḅe na nwọ ọrịye-ẹ, pịkị tọkụ ḅe na nama-yefịfịye mị ḅie ḅọlọlọ sime waraḅẹ.

¹⁷Ananaḍikiḍikiapụma Ori ọrị sịkị, ini enjẹlḅọ ḅe tọkụ ḅe ḅụ ḍuko ini pịrịye mị nwọ ḍuko ini pịrịmẹ.

¹⁸Ananaḍikiḍikiapụma ḍuko ini pịrịye mị naa apụ mamgba ijira inia ḅụ saramẹ.

¹⁹Meri ma maye mamgba nwọse ḅiekoroma se gbun koroma nyana àrị pịrịmẹ.

²⁰Ananaḍikiḍikiapụma vinpịkị somẹ, se nime chu Tamụnọ Ḅe tokoni mẹ, ini naa se pịkị ọrịsayema gose enjẹlḅọ ḅe ḍuko ini pịrị ḅara mị anị ọkọ pakamẹ.

²¹Gbọrị wiki ḅọrọ sịkị, tọkụ ḅe ḅụpẹlẹḅịa sịkị mị ḅo lasịkị, ini Jizọs nwọse Ọ̀ chịnmẹ, ma ini Oria sime kọnka sịkị ngịsị enjẹlḅọ ḅe se Ọ̀ chịn ẹrẹ mị.

²²Josẹf ḅe na Meri ma na Moziz ḅe tọn koroma na mịẹ nwọ ḅẹye mịẹḅịa sịkị mị ḅo lamẹ, anị ḅụmịẹfịafịama na gboloma mịẹmịẹye mị-ẹ. Anị ini tọkụ ḅe ọkị Jerusalẹm mun ye-ẹ, Ò ḍiepakụma Nyanaḅọ Ḅe pịrịḅịa ẹrẹchị,

²³Nyanaḅọ Ḅe oloko ḅie anị gịẹịnsa ḅara ḅụ: “Tatarị yiḅịa owutọkụ goyegoye ini nwọse osiḅụ wẹrị Nyanaḅọ Ḅe pịrịḅịa.”

²⁴Ini pịkị mun mẹ, mịẹse ini mama okuku anịkanịka mama ayamburama elesika se agba mịẹḅịa ḅara, Nyanaḅọ Ḅe oloko mị ḅi ḅara ḅụ.

²⁵Anịsịkị mị ḅụ Jerusalẹm ḅie anga gbọrị owuḅọ omi-ẹ, Simiọnị ini nwọse chịnḅọ. Ori anị karakara pịkị Tamụnọ ḍikiḅalafa ḅọ-ẹ, pịkị Izrẹl mị ḍụaḅọrọma nwọ koru simeḅọ-ẹ. Fịafịa Tẹmẹ Ḅe ori na omi-ẹ,

²⁶se ḍuko kụrọma ọ̀ pịrịmẹ na, Nyanaḅọ Ḅe ḅereni ini pịrị Mẹsaya Ḅe ọ̀ nwọ ọrịka simeogbo ọ̀ fị ẹkẹ.

²⁷Tamụnọ Tẹmẹ Ḅe dagbụkụkụma ḅụ, Simiọnị ḅe Oputẹkẹwarị mị ḅie sọ mun mẹ, se ò yiapụ ma tọkụ ḅe, anị Jizọs Ḅe se Oputẹkẹwarị mị ḅie sọ mun sịkị, anị Oloko mị ḅi fịrị, Ọ̀ ḅụ nwọ nwẹngịḅịa ẹrẹchị,

²⁸Simiọnị ḅe tọkụ ḅe deki ọ̀ ḅara kọngọ gbana se mịẹḅaka se Tamụnọ Ḅe ḅẹmẹ:

²⁹“Nyanaḅọ, mịọkụ, ị́ ḅereniye mị ị́ nwọ mịẹsam, fịrịnwẹngịḅọ ḅe wẹrịso ò deinma ḅụ so.

³⁰Àrị ị̀ tọrụmgbọlụma se ị́ya ḍụaḅọrọma mị ọrịsam,

³¹ị́ tomoni mamgba tọrụkuḅu ḅụ karakarama sa ye mị:

³²Ị́ tọn ye mị ḍieḅelema Jịnsẹapụma pịrịḅịa enekuḅu mị pịkị boma ọkịḅo ị́ya tomoni Izrẹlapụma pịrịḅịaye mị.”

³³Simiọnị ḅe tọkụ ḅe ḅụ ḍuko ayema ḍawu ḅe na nyọngọrọma na ḅụgbiripumamẹ.

³⁴Simiọnị ḅe ini ḅẹlẹma se nwọse Meri, nyọngọrọma ḅẹmẹ, “Tamụnọ Ḅe ḅe tọkụ ḅe sẹlẹmẹ fa na ḍụaḅọrọma na nwọse Izrẹl mị ḅie tọn apụ pịrịḅịa ẹrẹchị. Tamụnọ ḅara ḅo elekima Ọ̀ nwọsọḅịa, tọn apụ anị gose ọkwẹịn ḅụ Ori na tụḅụrụḅịa,

³⁵se anị ḅara ḅụ inia ḅọị-a koroma ma nwọ ḍieḅelemaḅịa. Se kururu, oḅu okola-agiji ḅara, se ị́ kuḅiemgbọlụ temi kanḅịa.”

³⁶Gbọrị iḅiọkụ olomusa ịkịankoro eremeniḅọ omi-ẹ, deḅọ fịsaḅọ, árị ẹrẹ anị Anna, Fanuẹl Asha furo ḅọ ḅe ḅarọ-ẹ. Sọnọma kụra kẹngẹ anị á se owuḅọ simeye-ẹ. Se mịọkụ á kụra iniasi na inein-a kụra nwọ lasam. Tamụnọ Oputẹkẹwarị mị ngịsị árị anị koroma sosokẹ ḍin na enekaka na ḅụ, ḅuruseḅụḅaama na tẹkẹ na ḅụ árị omi-ẹ.

³⁷

³⁸Anị gbọrị awa mị ḅụ á ḅo la se mịẹḅaka se Tamụnọ Ḅe ḅẹmẹ, se tọkụ ḅe gbolomaye nwọ ḍuko Tamụnọ Ḅe Jerusalẹm mị pẹkẹrẹ pakụmaḅoḅịa nwọḅẹye mị koruarị apụ mamgba nwọ pịrịmẹ.

³⁹Nyanaḅọ Ḅe Oloko mị ḅi ḅara mị ini nwọ mịẹso sịkị, Josẹf ḅe na Meri ma na ini vinpịkị so Nazarẹt inia ama mị mun mẹ, anị Galili sẹ mị ḅie.

⁴⁰Tọkụ ḅe sẹnị pịkị ḅo kụrọḅọ sọmẹ; nemi Ò ḅie ḅeinmẹ, Tamụnọ ḅẹlẹmama pịkị Ori na simemẹ.

⁴¹Kụra goyegoye Jizọs Ḅe yiapụ ma Saḅaḅọrọ Alalị mị gose Jerusalẹm munmunmẹ.

⁴²Jizọs Ḅe ḅo oyimaịn kụra fịnjị nwọ lasịkị, ini mịẹmịẹ ḅara ḅụ ini alalị mị mun mẹ.

⁴³Alalị enema ḅọrọ sịkị, ini vinpịkị so warị mun mẹ, ọkụma tọkụ ḅe anị Jizọs Ḅe, Jerusalẹm ḅie Ò simemẹ, Ò yiapụ ma mịn mị ini nemikẹ.

⁴⁴Ini nwọ chịnmẹ na Ò tomonikpo mị ḅie omi-ẹ, anị ini bebe ene mị mgba se nwẹngịma ḅọrọ se sakị Ọ̀ ḍọkịye-ẹ, ini na pakụma apụma na inia ikiapụma na ḅie.

⁴⁵Ini Ori ọrịkẹ, anị ini vinpịkị Ọ̀ ḍọkịma so Jerusalẹm mun ye-ẹ.

⁴⁶Tẹrẹ-a ḍin karama ene ḅụ, ini Oputẹkẹwarị mị ḅie Ori ọrịmẹ, Ju yeḍieapụma na kpọnjị sime se ini poki pịkị ḅẹrẹ se ini gbelaḅẹ.

⁴⁷Ọ̀ wẹrị nemi se ye pẹkẹrẹ àrị ḅara mị anị ijira se anị naa apụ mamgba ḅụ saramẹ.

⁴⁸Ò yiapụma inia ḅụgbiripumẹ ini Ori ọrị sịkị, se nyọngọrọma nwọse Ọ̀ ḅẹmẹ, “Ị̀nịa, nde ị́ gose mị ḅara se wa mịẹye? Ị́ ḍaḅe na ị̀rị̀ na ḅalafama ḅara nwọse ḅụḅalaḅala nyanasam, pa mịẹse ḅụkụrọma ị́ ḍọkịḅoḅịa ẹrẹchị.”

⁴⁹Ori ini pẹkẹrẹmẹ, “Ó che gose ị̀ ḍọkị ḅe? Àrị ị̀ Ḍaḅe warị ḅie simeḅịa ọkụ ó nemika?”

⁵⁰Ọkụma Ò se ini pẹkẹrẹye mị ini kaịnḅokẹ.

⁵¹Anị Jizọs Ḅe ini na vinpịkị so Nazarẹt mun ye-ẹ, se ḅịpị poki ḅụ ini na angamẹ. Nyọngọrọ ma maye mamgba nwọse á kuḅiemgbọlụ ḅie kokomẹ.

⁵²Se Jizọs Ḅe sẹnịmẹ, oju ḅụ na pịkị nemi ḅụ na, Tamụnọ Ḅe na pịkị tomonima na Ọ̀ tarịmẹ.