Read kirikeni Luk 22 Bible Online

Luk 22 - kirikeni bible

Luk 22

¹Suka Fịturu Alalị mị ḅo kpeki sịkị mị, ini Saḅaḅọrọ nwọse chịn ye mị.

²Tịḅịnịapụma na, Oloko ḍieapụma na ḅọịma Jizọs Ḅe ḅaaḅịa ḅọkọ ḍọkị simemẹ anịatịḅị ini tomonima nwọ ḍikiḅalafamẹ.

³Anịsịkị Oru ḅe Judas ḅe ḅie sọmẹ, Ịskarịọt ini nwọse chịn ḅọ ḅe, oyimaịn ọḅụḍukoapụ fịnjịma ḅie gbọrịḅọ-ẹ.

⁴Anị Judas ḅe nwẹngị paka so mun tịḅịnị agbamịẹapụma na Tamụnọ Oputẹkẹwarị koru apụma ḅe tịḅịnịma na ọkwẹịnmaye-ẹ, ọ̀ ḅara wẹrịma Jizọs Ḅe ḅọrọma ini pịrịḅịa ọkụ.

⁵Ini ḅieḅẹlẹmẹ se pịkị igbiki ḅereni ọ̀ pịrịmẹ.

⁶Judas ḅe anị ḅereni ọkịmẹ se sakị achọ ḍọkịmẹ Jizọs Ḅe seni ịbafị ini pịrịḅịa ḅara tomonima anị gbolomaye nemika ḅụ.

⁷Ene mị ḅo lamẹ, Suka Fịturu Alalị sịkị mị ḅụ, ini Saḅaḅọrọ fịye ananama nwọ ḅaaḅịa sịkị.

⁸Jizọs Ḅe Pita ḅe na Jọn ḅe na fịrịma pakụma se nwọse ini ḅẹmẹ: “Ó mun wa se mịna Saḅaḅọrọ fịye fịḅịa ye nwọ karakarama.”

⁹Ini ò gbelamẹ, “Nde ị́ ḅi wa anị karakarama nwọḅẹ nyọ?”

¹⁰Ọ̀ nwọ ḅẹmẹ, “Ó poki! Ómine opuama mị ḅie sọmun sịkị mengi ojongo pụra gbọrị owuḅọ ómine na ịrịaḅịa, ómine ò ḍuko ọ̀ sọḅịa warị mị ḅie sọ.

¹¹Se nwọse warị mị nyanaḅọ ḅe ḅẹ: ‘Yeḍieḅọ ḅe nwọ ḅẹmẹ, Nde ị̀ya ọḅụḍukoapụma na ị̀rị̀ na Saḅaḅọrọ fịye mị fịḅịa ḅie mị?’

¹²Ori ọgọnọ warị ḅụ ḅirima sa gbọrị opu ḅie nwọse ó ḍieḅịa, anị ó yegoyegoye nwọ karakaramaḅịa nyọ mị-ẹ.”

¹³Ini pakasomẹ, se Jizọs Ḅe ḍuko ini pịrị ḅara mị anị anị paka ọkụ-ẹ, se Saḅaḅọrọ fịye mị ini nwọ karakaramamẹ.

¹⁴Sịkị mị ḅo lasịkị, Jizọs Ḅe Oria kiri nwọ ọkịmẹ dẹbụl mị ḅụ okunwẹngịapụma na ori na.

¹⁵Ọ̀ nwọse ini ḅẹmẹ, “Àrị opuma ḅimẹ àrị ómine na mị Saḅaḅọrọ fịye mị fị, ma à tọrụsiọrịka simeogbo!

¹⁶Anịatịḅị à ḍuko ọ́ pịrịaḅẹ, na à ḅarị jịn sịkị se anị fịẹkẹ ọkịmun ini Tamụnọ Amanyanakiri mị ḅie anị mịẹ ḅeinmaḅịa sịkị la.”

¹⁷Anịsịkị Jizọs Ḅe ọmọngọ mị ọkị mịẹḅaka se Tamụnọ Ḅe ḅẹ, se nwọ ḅẹmẹ, “Ọ́ mịn mị ọkị, se anị seni ọ́mịna ogboku ḍia.

¹⁸Anịatịḅị à ḍuko ọ́ pịrịaḅẹ na mịọkụ sakị mị iru mị à ḅarị ḅu ẹkẹ ọkịmun Tamụnọ Amanyanakiri mị ḅoḅịa sịkị mị laḅịa.”

¹⁹Anịsịkị ò fịturu mị ọkịmẹ, mịẹḅaka se Tamụnọ Ḅe ḅẹmẹ, anị pu se anị seni ini pịrị se nwọ ḅẹmẹ, “Mịn ị̀ya oju mị-ẹ, ini seni ọ́ pịrịye mị. Mịn mị mịẹ, ị̀ se ḅiekoroma ḅụ.”

²⁰Anị gbọrị ḅara ḅụ ori ọmọngọ mị se ini pịrịmẹ, saso fịye mị ini nwọ fịso sịkị, se nwọ ḅẹmẹ, “Mịn ọmọngọ mị anị Tamụnọ Ḅe ịwọ ọḅọkụ mị-ẹ, ini ị̀ya pulo se anị mịẹ kụrọmaye mị, ini ó gose ọsụn ye mị-ẹ.

²¹“Ọkụma, ḍiki! Ị̀ se ịbafịarịḅọ ḅọ ḅe ọ̀ mịanga mị dẹbụl mị ḅụ ị̀rị̀ na omi-ẹ!

²²Anịatịḅị Tomoniḅọ Tọkụ Ḅe ọ̀ fịḅịa, Tamụnọ Ḅe anị tọn sa ḅara ḅụ, ọkụma anị ḅalafamaye sọ ori ḅọ ḅe pịrịọkụ ḍiki, nwọ ò se ịbafị ḅọ ḅe!”

²³Anị ini sakị inia ogboku gbelaye-ẹ inia ḅie ḅụ ineda ò seni mịn ḅara mị mịẹḅịa ḅọ mị.

²⁴Ḅẹrẹjinea ọḅụḍukoapụma ogboku pakaḅomẹ inia ḅie opu sọtẹịnḅịaḅọ gbolomaye ḅụ.

²⁵Jizọs Ḅe nwọse ini ḅẹmẹ, “Mịn tomonikiri mị ḅe amanyanapụma inia tomonima ḅụ kụrọ nyanamẹ, ini pịkị ‘Tomonima Ikiapụ’ nwọ seni ḅẹrẹtọn-apụma chịnmẹ.

²⁶Ọkụma mị ḅara mị anị nwọ sime ọ́ pịrị ẹkẹ; anịnakaraka, ọ́mịna ḅie opusọtẹịnḅọ ḅe bokatẹịnḅọ ḅara nwọ sime, se tịḅịnị ḅọ ḅe pịkị fịrịnwẹngịḅọ ḅara nwọ sime.

²⁷Tụḅọ opuḅọ, sọtẹịn, dẹbụl ḅụ kpọnjị sime fịye fị àrị ḅọ ḅe mụnọ se fịrịnwẹngị ọ̀ pịrịarị ḅọ ḅe? Anị sime ḅara, kpọnjị sime ḅọ ḅe-ẹ. Ọkụma ị̀rị̀, ọ́mịna ogboku fịrịnwẹngịḅọ ḅara ḅụ omi-ẹ.

²⁸“Ómine ị̀rị̀ na simemẹ, ị̀ya ḍaḍiki sịkị mị mgba;

²⁹Ị̀ Ḍaḅe ḅẹrẹtọn kụrọ nwọse ị̀ pịrị ọkụ mị, anị ị̀rị̀ sọ pịkị ḅẹrẹtọn kụrọ se ọ́ pịrịḅịa ọkụ-ẹ.

³⁰Ómine ị̀ya dẹbụl ọgọnọ ị̀rị̀ na yefị pịkị ḅuḅịa ị̀ya Amanyanakiri mị ḅie, ọ́ pịkị Amanyanapụ ngadama ọgọnọ sime se ḅẹrẹkọn Izrẹl oyimaịn furo fịnjịma pịrịḅịa.

³¹“Saịmọn, Saịmọn! Poki! Oru ḅe ọ̀ kụrọ ọkịsam ómine mgba ḍaḍikiḅịa ẹrẹchị, anị ozu kọrị ḅọ ḅe osirosiroḅa ḅụ ịpịamgba sẹlẹ sikima ọkụ mị.

³²Ọkụma à tẹkẹ ị́ pịrịsam, Saịmọn, mịẹse ị́ya ḅereni ḅụ ị́ ḅịkịẹka ḅara. Se ị́ vinpịkị ị̀ daḅịa sịkị, ị́ ḅarachụa ị́ya mịnapụma pịrịḅịa.”

³³Pita ḅe pẹkẹrẹmẹ, “Nyanaḅọ, à ḅụkarakaramamẹ ị́ ḍuko ikoli ḅie sọ, pịkị ị́ ḍuko fị!”

³⁴Jizọs Ḅe nwọ ḅẹmẹ, “À ḍuko ị́ pịrịaḅẹ, Pita, mị ḍin ọḅọkọ ma paịnka simeogbo ị́ tẹrẹ-a sịkị se ị̀ pikiḅịa na ị́ ị̀ nemikẹ.”

³⁵Anị Jizọs Ḅe nwọse ini gbelaye-ẹ, “Igbiki chụa akpa, na ḅara ọlọ akpa na, akpaka na ofori ḅụ àrị ọ́ fịrịma pakụma sịkị mị, ye ọ́mịna ḅụfụkama?” Ini nwọ pẹkẹrẹmẹ, “Ẹn-ẹn, ḅụfụkamaye ofori-ẹ.”

³⁶Jizọs Ḅe nwọ ḅẹmẹ, “Ọkụma mịọkụ igbiki chụa akpa, anịkanịka ḅara ọlọ akpa nyanaḅọ goyegoye ye iniḅọ anị ọkị, se okola-agiji nyanaka ḅọ goyegoye ye iniḅọ mịna ḅụchụaye nwọ dẹrị se gbọrịye fẹ ọkị.

³⁷À ḍuko ọ́ pịrịaḅẹ na Fịafịa Ḍiri mị ḍuko na, ‘Ini ò se oloko kan-apụma na chụa kịẹn gbolomamẹ nwọḅẹ ye mị,’ ị̀ḅụ anị mịẹ ḅeinmaḅịa.” Anịatịḅị ị̀ḅụ ini ḍuko ye mị anị ḅo kọkọmaye sọ-e ḅoaḅẹ.

³⁸Ọḅụḍukoapụma nwọ ḅẹmẹ, “Ḍiki mama okola-agiji mịanga omi-ẹ, Nyanaḅọ!” “Anị iḅisam!” ọ̀ nwọ pẹkẹrẹmẹ.

³⁹Jizọs Ḅe opuama mị koromaso se Oliv Tụndụ ọgọnọ mun mẹ, ọ̀ mịẹmịẹ ḅara ḅụ, se ọḅụḍukoapụma ọ̀ ḅụ sọ mun mẹ.

⁴⁰Ò mun nyọ mị lasịkị, ọ̀ nwọse ini ḅẹmẹ, “Ọ́ tẹkẹ, mịẹse ó telima ḅie sọẹka ḅara.”

⁴¹Anịsịkị ori ini wẹrị sikimamẹ, mun kpẹrẹkị se tẹkẹmẹ.

⁴²Se nwọ ḅẹmẹ, “Ḍaḅọ, ị́ ḅerenimẹ ḅẹḅẹ, ị̀ ḅara mị tọrụsiọrị ọmọngọ mị ọkịsin. À ḅi ḅarakẹ, anị simeọkụ simeọkụ sọnị, ọkụma ye ị́ ḅereniye mị mịẹ.”

⁴³Enjẹlḅọ soḅie koroḅo ọ́ ḅụ seni ò ḍie pịkị ịnyọ se ọ̀ ḅụ chụamẹ.

⁴⁴Opu kururu ḅụ ọ̀ kụrọma tẹkẹmẹ, ọ̀ ḅụ paka imo mị oju ḅụ kpoinkpoin kiri koroarị pulo simeọkụ simemẹ.

⁴⁵Tẹkẹ ḅụ ọ̀ sịsẹ sịkị ò vinpịkị ọḅụḍukoapụma damamun se ini mọnọarị ọkụ nwọ ọrịmẹ, ngịrị pịkị inia ḅụ ịnyọ famamẹ.

⁴⁶Se nwọse ini ḅẹmẹ, “Nde ó gose mọnọarịye? Ọ́ sịsẹ se tẹkẹ, mịẹse ọ́ ḅịkị telima ḅie sọẹka ọkụ.”

⁴⁷Jizọs Ḅe ọkwẹịn simearịogbo tomonikpo ḅo lamẹ, Judas, oyimaịn ọḅụḍukoapụ fịnjịma ḅie gbọrịḅọ inia tọrọkọ damẹ. Ò Jizọs Ḅe damaḅomẹ ọ̀ ḅịpị nọnjụḅịa ẹrẹchị.

⁴⁸Ọkụma Jizọs Ḅe nwọ ḅẹmẹ, “Judas, ḅịpị nọnjụ ị́ nwọse Tomoniḅọ Tọkụ Ḅe se ịbafị-ao?”

⁴⁹Jizọs Ḅe na sime ọḅụḍukoapụma paka-ẹ tọn àrị ye mị nwọ ọrị sịkị ini nwọ ḅẹmẹ, “Nyanaḅọ, wa mịna okola-agiji ma se ini gbogbo nọ?”

⁵⁰Se inia ḅụ gbọrịḅọ Gele Agbamịẹḅọ ḅe omoniḅọ ḅe amaḅara anga ḅeri pẹlẹsinmẹ.

⁵¹Ọkụma Jizọs Ḅe nwọ ḅẹmẹ, “Iḅisam ọ́ ḅarị jịnye mịẹma!” Ori ọ̀ ḅara se nweniḅọ ḅe ḅeri lama se ọ̀ gwọmẹ.

⁵²Anịsịkị Jizọs Ḅe nwọse tịḅịnị agbamịẹapụma ḅẹmẹ, Oputẹkẹwarị mị ḅie fịrịnwẹngịapụma na pịkị sẹnịapụma na anị ḅo ori ọkị-ẹ ḅo apụma, “Oloko kanḅọ ḅara ọ́ nwọse okola-agiji ma na imgbelema na se ị̀ damaḅo?

⁵³Àrị ómine na ene mamgba Oputẹkẹwarị mị ḅie simemẹ, ómine ị̀ kun ḍụkụkẹ. Ọkụma mị ọ́ kụrọ kọnḅịa sịkị mị-ẹ, anị kanakana mị ḅe kụrọ mị ḅẹrẹtọn àrị sịkị mị.”

⁵⁴Ini Jizọs Ḅe kunmẹ se ori ọkị se Gele Agbamịẹḅọ ḅe warị mun mẹ se Pita ḅe sasaju sime ini ḍukomẹ.

⁵⁵Ḅẹrẹkọn warị mị nụngọ ogboku ḅụ, ini fịnị tọnọmẹ, se Pita ḅe sọ inia ḅụ sọ fịnị mị temimẹ.

⁵⁶Fịrịnwẹngịarị eremeni-awọ ma ḅie gbọrị eremeni tọkụ ori ini na fịnị anga simeọkụ ọrị sịkị, á tọrụ se ọ̀ da se nwọ ḅẹmẹ, “Ḅe ḅọ ḅe sọnị ọ̀ ḅụ ḅọ-ẹ!”

⁵⁷Ọkụma Pita ḅe anị pikimẹ, “Eremeniḅọ, ò nemi sọnị àrị ò nemikẹ!”

⁵⁸Ḅịpị kalaye ḅọrọ sịkị, gbọrị owuḅọ ọ̀ ḅụ elekima chụa se nwọ ḅẹmẹ, “Ị́rị́ sọnị inia ḅie gbọrịḅọ-ẹ!” Ọkụma Pita ḅe pẹkẹrẹmẹ, “owuḅọ, ị̀rị̀ ka-o!”

⁵⁹Se gbọrị awa pembe ye ḅọrọ sịkị, jịn owuḅọ kụrọma ḍukomẹ, “Pikipikiye ofori-ẹ ḅe ḅọ ḅe sọnị ọ̀ ḅụ ḅọ-ẹ, anịatịḅị ori sọnị Galili ḅọ-ẹ!”

⁶⁰Ọkụma Pita ḅe pẹkẹrẹmẹ, “Owuḅọ, ị́ ḍukoarịye tịḅị à nemikẹ!” Anị kirikiri ọ̀ pa ọkwẹịn àrị ogbo, gbọrị owoi-ọḅọkọ paịnmẹ.

⁶¹Nyanaḅọ Ḅe vinpịkị, gbụkụkụma Pita ḅe ḍikimẹ, se Pita ḅe Nyanaḅọ Ḅe se ọ̀ ḅẹye mị nwọse ḅiekoromamẹ na, “Owoi-ọḅọkọ mị ḍin ma paịnka simeogbo, ị́ tẹrẹ-a sịkị se ị̀ pikiḅịa.”

⁶²Pita ḅe nwẹngị paka se ọ̀ ḅụ akụ ḅara se owumẹ.

⁶³Jizọs Ḅe koru simeapụma ò se kpọti pịkị ò fomumẹ.

⁶⁴Ini ye seni ọ̀ tọrụmgbọlụma fịna se ò gbelamẹ, “Mgbamgba! Tụḅọ ị́ ḅakụ?”

⁶⁵Ini pịkị tọn-a wọlọ ọkwẹịn nwọ kọn ọ̀ pịrịmẹ.

⁶⁶Ene ḅa Sịkị, Ju ama sẹnịapụma na, tịḅịnị agbamịẹapụma na Oloko ḍieapụma na ịrịamamẹ, se ini Jizọs Ḅe ọkị inia ḅẹrẹchiri mị ḅomẹ.

⁶⁷Ini nwọ ḅẹmẹ, “Ḍuko wa pịrị, Mẹsaya Ḅe Ị́rị́?” Ọ̀ pẹkẹrẹmẹ, “À ḍuko ọ́ pịrị sọnị, ómine ị̀ ḅereni ẹkẹ;

⁶⁸à pịkị ḅẹrẹ se ó gbela sọnị ọ́ pẹrẹkẹ ḍụkụ-ẹkẹ.

⁶⁹Ọkụma mịọkụ ọkị tọrọkọ mun Tomoniḅọ Tọkụ Ḅe Kụrọmamgba Nyana Tamụnọ Ḅe amaḅara anga ḅụ simeḅịa.”

⁷⁰Inimgba nwọ ḅẹmẹ, “Anịọkụma, Tamụnọ Tọkụ Ḅe Ị́rị́?” Ori ini pẹkẹrẹmẹ, “Ómine mị ọkọ ḅẹye-ẹ, na Ị̀rị̀-ẹ.”

⁷¹Se ini nwọ ḅẹmẹ, “Wa ḅarị jịn onyechịẹ apụ ḅikẹ! Mine sọ ḅarana ò ḍukoye naasam!”