Read kirikeni Luk 4 Bible Online

Luk 4 - kirikeni bible

Luk 4

¹Jizọs Ḅe Fịafịa Tẹmẹ Ḅe na ḅein se Jọdan ḅụ vinpịkị ḅomẹ, se Tẹmẹ ḅe Ọ̀ ḅọrọma piri-ele mị mun mẹ,

²Oru ḅe Ò telima nyọ mị, ḍin-a mesi na gbasịye ḅụ. Anịsịkị mị mgba Ò yefịkẹ, anị gose anị ḅo ḅọrọ sịkị ḅuru Ọ̀ tarịmẹ.

³Oru ḅe nwọse Ọ̀ ḅẹmẹ, “Ị́rị́ Tamụnọ Tọkụ-ẹ ḅẹḅẹ, tọn mị ḍụparị mị pịrị anị pịkị fịturu sọ.”

⁴Jizọs Ḅe pẹkẹrẹmẹ, “Fịafịa Ḍiri mị nwọ ḅẹmẹ, ‘Tomoniḅọ ineda fịye kẹngẹ ḅụ wẹrị ḍumo ẹkẹ?’”

⁵Anịsịkị Oru ḅe Ori ọkị se boka sịkị ḅụ bebe tomonikiri sime amanyanakiri mamgba se Ò ḍiemẹ.

⁶“À ma kụrọ mamgba nwọse ị́ pịrịḅịa pịkị ma ngọ mamgba na,” Oru ḅe nwọse Ọ̀ ḅẹmẹ. “Ini àrịmgba saḅama ị̀ ḅara chụasam, à pịkị ineda anị se ị̀ ḅụḅẹlẹḅọ ḅẹlẹḅọ nwọ pịrịḅịa.

⁷Ma mamgba ị́yaye-ẹ, ị́ nemikase ị̀ tọrọkọ kpẹrẹkị ị̀ tẹkẹmẹ ḅẹḅẹ.”

⁸Jizọs Ḅe pẹkẹrẹmẹ, “Fịafịa Ḍiri mị nwọ ḅẹmẹ, ‘Kpẹrẹkị ị́ Nyana Tamụnọ Ḅe tẹkẹ, pịkị fịrịnwẹngị ori kẹngẹ pịrị!’”

⁹Anịsịkị Oru ḅe Ori ọkị Jerusalẹm mun mẹ se Ori ọkị Oputẹkẹwarị mị ọgọnọ geletẹịn nyọ chịẹmamẹ, se nwọse Ọ̀ ḅẹmẹ, “Ị́rị́ Tamụnọ Tọkụ-ẹ ḅẹḅẹ, mị anga wẹrị ḍosi koro.

¹⁰Anịatịḅị fịafịa ḍiri mị nwọ ḅẹmẹ, ‘Tamụnọ Ḅe Ọ̀ tọn oria enjẹlapụma pịrịḅịa, ini ḅereni ẹkẹ ye ị́ ḅụọ la.’

¹¹Anị pịkị nwọ ḅẹmẹ, ‘Ini inia ḅarama se ịkaịnḅịa, mịẹse ḍụparịma ye se ị́ ḅụọma lama ẹka ḅara.’”

¹²Se Jizọs Ḅe ọ̀ pẹkẹrẹmẹ, “Fịafịa ḍiri mị nwọ ḅẹmẹ, ‘Ị́rị́ ị́ Nyana Tamụnọ Ḅe ḍaḍikima.’”

¹³Oru ḅe ḅọkọ kịrịkịrị ḅụ Jizọs Ḅe telima so sịkị ọ̀ kala sịkị nwọse Ọ̀ wẹrịsomẹ.

¹⁴Anịsịkị Jizọs Ḅe vinpịkị Galili mun mẹ, se Tamụnọ Tẹmẹ Ḅe kụrọ mị Ori na omi-ẹ. Ò gboloma ḅẹrẹ mị wasama anịnyọ mị mgba kelemamẹ.

¹⁵Ori inia tẹkẹwarịma ḅie yeḍiemẹ se tomoni mamgba Ò tokonimẹ.

¹⁶Anịsịkị Jizọs Ḅe Nazarẹt mun mẹ, ini Ò ḍikiḍiki pakụmaḅo nyọ mị, se Ịnyọsara Ene ḅụ Ọ̀ mịẹmịẹ ḅara ḅụ Ọ̀ tẹkẹwarị mị mun mẹ. Ọ̀ sịsẹ chịẹmẹ Fịafịa Ḍiri mị goḅịa ẹrẹchị

¹⁷se ini ịkịankoro Aịzaya ḍiri mị nwọse Ọ̀ ḅara chụamẹ. Se Ọ̀ fangala ḍiri mị finjimẹ, se ini mịn mị gịẹịn nyọ mị finjimẹ,

¹⁸“Nyanaḅọ Ḅe Tẹmẹ Ḅe ị̀ ọgọnọ gbanamẹ, anịatịḅị ori ị̀ sẹlẹsam, Iḅi Ḅẹrẹ mị ḍuko igwein apụma pịrịḅịa ye gose. Ori ị̀ se fịrịmamẹ àrị ngẹrị tịḅị nyana nwọ ḍuko pakụma kun ḅara ḅie sime apụma pịrịḅịa ḅara, tọrụmgbọlụ finji nwọ ḍuko tọrụmgbọlụpụn apụma pịrịḅịa ḅara, ini pụnda apụma mịẹse ini inia ḅụḅarasinḅịa ḅara,

¹⁹se pịkị Nyanaḅọ Ḅe Oria tomonima ḍụaḅọrọmaḅịa sịkị mị nwọ ḍukopakụma.”

²⁰Jizọs Ḅe fangala ḍiri mị iko, se anị se nyọ koruarịḅọ ḅe pịrị, se kpọnjị simemẹ. Tẹkẹwarị mị ḅie sime apụ mamgba inia tọrụmgbọlụma nwọse Ọ̀ ḅụ gbanamẹ,

²¹Ọ̀ sakị ọkwẹịn ini pịrịmẹ, “Fịafịa ḍiri mị ḅie mị pẹkẹrẹ mị anị ḅo mịmgba kọkọmaye sọsam ini anị go se ọ́ naasa ḅara ḅụ.”

²²Anị inimgba ḅụ okoromẹ, Ọ̀ kọn iḅiọkwẹịnma pịkị inia ḅụgbiripumamẹ. Ini nwọ ḅẹmẹ, “Ḅe Josẹf yaḅe orika?”

²³Ọ̀ nwọse ini ḅẹmẹ, “À nemi kpaịnmamẹ na ọ́ mị kaḅo mị nwọ kọn ị̀ pịrịḅịa, ‘Ḅịrịḅọ, ị́ ḅụ gwọ.’ Ọ́ pịkị nwọse ị̀ ḅẹḅịa mịanga ị́ya ama mị ḅie, ini ḍuko wa pịrị Kapanịọm ḅie, mịẹmẹ nwọḅẹ ayema, nwọ mịẹ.

²⁴Jizọs Ḅe pịkị nwọ ḅẹmẹ, À ḍuko ọ́ pịrịaḅẹ na,” “ịkịankoroḅọ ḅe ini ọ̀ paka ama ḅie iḅiọkụ se ori ọ̀ kịkịkẹ.

²⁵Ómine ị̀ poki: kọkọmaye-ẹ na tọn-a deapụ fị eremeni Izrẹl ḅie simemẹ Ịlaịja sịkị mị ḅụ, ene tẹrẹ-a kụra na pẹkẹrẹ na se koroka sịkị, opu ḅuruḅaa sime bebe ama mị kelema sịkị mị.

²⁶Anị sọnị ini Ịlaịja ḅe se Izrẹl ḅie fịrịma gbọrịḅọ sọnị ofori-ẹ, ọkụma Zarẹfat Saịdọn pẹkẹrẹ sime ama mị ḅie sime deḅọ fịsa eremeniḅọ ma kẹngẹ-ẹ.

²⁷Tọn-a ḅụkan obi kọn apụ pịkị Izrẹl ḅie simemẹ, ịkịankoro Ịlaịsha sịkị mị ḅụ anị-ẹ ḅẹ sọnị, inia ḅie ini gwọ gbọrịḅọ sọnị ofori-ẹ, Neaman, Siria ḅọ ḅe sikima.”

²⁸Tẹkẹwarị mị ḅie sime apụ mamgba mịn mị naa sịkị, anị ini ịganịmamẹ.

²⁹Ini sịsẹ ama mị ḅie Jizọs Ḅe nwọ fọnọpakụmamẹ, se Ò se ini inia ama mị nama chịngị mị ọgọnọ mun mẹ. Ò suma tuma nyọ mị ḅie gbinḅịa ẹrẹchị,

³⁰ọkụma Ò tomonikpo mị ḅie toluḅọrọ se nwẹngị somẹ.

³¹Anịsịkị Jizọs Ḅe Kapanịọm nwọ mun mẹ, Galili ḅie sime gbọrị ama, Ori Ịnyọsara Ene ḅụ ye se tomonima ḍie nyọ mị.

³²Ọ̀ wẹrị ye se ini ḍie ḅara mị anị ijira se inimgba ḅụ saramẹ, anịatịḅị kụrọnyanaḅọ ḅara Ọ̀ nwọse ọkwẹịnmẹ.

³³Tẹkẹwarị mị ḅie sitẹmẹ ḅie sime gbọrị owuḅọ omi-ẹ, ò gele pụkọ nwọse kụrọma oloku pakụmamẹ,

³⁴“Yia! Che mịẹgboloma wa ị́rị́ na nwọ nyana, Jizọs Nazarẹt ḅọ? Ị́ ḅo wa fama-ẹḅo? Àrị ị́ simeọkụ nemimẹ: Ị́rị́ Tamụnọ Ḅe oria fịafịa fịrịnwẹngị Tomoniḅọ Ḅe-ẹ!”

³⁵Jizọs Ḅe tọn tẹmẹ ḅe pịrịmẹ, “Ị́ ḅịpị gbẹịn, se tomoniḅọ ḅe ḅie pakaḅo!” Sitẹmẹ ḅe tomoniḅọ ḅe suma inia tọrọkọ gbin koromamẹ, se gbọrịye sọnị se ọ̀ lamaka ḅụ ò ḅie pakaḅomẹ.

³⁶Inimgba ḅụgbiripumẹ, se nwọse jịnḅọ jịnḅọ ḅẹmẹ, “Mà nde nde sime ọkwẹịn? Kụrọ na ịnyọ na nyana se ḅẹrẹtọn sitẹmẹma pịrị, se àrị pakaḅomẹ!”

³⁷Se Jizọs Ḅe gboloma ḅẹrẹ mị wasamamẹ anị pẹkẹrẹ mị mgba.

³⁸Jizọs Ḅe tẹkẹwarị mị koromaso se Saịmọn ḅe warị mun mẹ. Owoi-akọm Saịmọn fuarọ ma ọlọ waraḅẹ, se ini á gbolomaye nwọ ḍuko Jizọs Ḅe pịrịmẹ.

³⁹Ò mun árịa mọnọye anga chịẹ simemẹ, se ḅẹrẹtọn owoi-akọm mị pịrịmẹ. Owoi-akọm mị á ḅụḅarasinmẹ, anịkirikiri á sịsẹ se fịrịnwẹngị ini pịrịmẹ.

⁴⁰Ịrụa mị sọ sịkị, ini inia ikiapụ obi tọrụkịrịkịrị ḅụ sime apụ mamgba ọkịḅo Jizọs Ḅe pịrịmẹ Ori Ọ̀ ḅarama se inia ḅụ ḅọḅọ ọgọnọ gbana se inimgba gwọmẹ.

⁴¹Sitẹmẹma, sọnị tọn apụ ḅie pakasomẹ, oloku se nwọ ḅẹmẹ, “Ị́rị́ Tamụnọ Tọkụ Ḅe-ẹ!” Jizọs Ḅe ḅẹrẹtọn àrị pịrịmẹ se pịkị ḅerenikẹ àrị ọkwẹịn, anịatịḅị àrị nemimẹ na Ori anị Mẹsaya Ḅe-ẹ.

⁴²Eneḅa sịkị Jizọs Ḅe ama mị koromaso se sikima gbọrị gbọịn nyọ nwọ mun mẹ. Tomonima sakị Ọ̀ ḍọkị simemẹ, se ini Ori ọrị sịkị ini ḅarị ḅikẹ Ò so.

⁴³Ọkụma ọ̀ nwọse ini ḅẹmẹ, “À Tamụnọ Amanyanakiri mị ḅe Iḅi Ḅẹrẹ mị nwọ ḍukoḅịa ísí amama ḅie sọnị, anịatịḅị anị Tamụnọ Ḅe ị̀ fịrịma na à mịẹ nwọḅẹ ọkụ-ẹ.”

⁴⁴Se Judia sẹ mị ḅie sime tẹkẹwarịma ḅie mgba, Ọ̀ Tamụnọ ḅẹrẹ mị ḍuko kelemamẹ.